Matiyò 11

Jon Fo Mòlû tum ghɨt a wuna ghɨ tuma ha Jisòs na ghɨ yê buf gha ha wûn

(Lûk 7.18-35)

1À hì mô te Jisòs yike mihe jùmtìbàmsu wunsu njwòsù bà lo afû hì fôktè yênà gha Fùyènì fê yike yê nì ghɨta a tèk tu letu a Galìlî.

2Te Jon Fo Mòlû ywo gha ghe Klistù ndùku nê, mô a ndâ chyâk tum jùmtìbàmsu wunsu lesu na ghɨ yê buf ha wun na, 3“À mò wò we wò ndùku kəta hi bèn ma, ghàh kəta hi tè yute wùt lò agha?”

4Ghɨna yen buf, Jisòs fîsì na, “Ghàn kaha yê fokti ha Jon gha ghe ghàn ywo ha ghɨta nì gha ghe ghàn yena nì se ghana: 5Fèfù kaha yena tu luk, ghɨt a kəblena gbê, kùhù tâ, kwùkù ywo a ghâ, ghɨt a kputena lôtè a yi kpû, ghɨt a fufana fê ywo tum yì jùŋ. 6Jùŋ mò ha wùt we wù kante wijə bimi ye wù kəta ha mu.”

Jisòs jis ha ghɨta kum wùt we Jon mò wunù

7Ni te jùmtìbàmsu Jon su tì kaha lo, Jisòs yîmì hi tè jìs ha nôn à ghɨ̂t ghe kum Jon buf na, “Ghàn tì yen yi lak yi sùsi hi yen a wùni wùt afû agha? Ghàn tì yen hi yena wut wu nêkà te yi jyâŋà a wu yu afa fufa chyàlà ma?” 8Ghàn tì yen nâ kum ghə, hi yena wùt te wù lafa laf yi jûŋì ma? Ngaŋ! Ghàn hi khə na ghɨt ghe ghɨ lafa wu lum afân chyə kə a tôk. 9Ghàn fokti lê ha mu na ghàn tì yen kum ghə agha. Hi yena fòktì yì chìk ma? Yi mô kə nâ ni. Mu jìsà ha ghàn na ghàn ti yen wùt wu chyâ fòktì wù chìk, 10beka Jon ndùku mô ni a mô wut we ghɨ tì nyàka a ŋwàklù Fùyèn kum wun na: Yên, mu bè tuma wùt à mù wù tum, ma wù yen a wo ashyə̂ ma wù fati lum wa ha wò.

11Mu jìsà ha ghàn hamok na wùt ywên tà timi bwɨ jə̂ wùt lè a chyə̂ afân wu chyâ Jon Fo Mòlû biyani nâbi we wù tobte gokhe wu lùk wu fə̀n wù Fùyènù chyàlò wûn. 12Fə̂n wù Fùyènù ləma yênà ashyə̂ nì jyaka kə hi yìmì wu tuk afa Jon Fo Mòlû tì yìme fêt yì wuni, ghɨta hì nô nì jyaka hi lye wu lùk wu Fùyènù afân. 13Nâ fòktìsu chiksu sù jɨ̀m nì sak yi Musìs hì fòktè kə kum ben yì fə̂n wù Fùyènù shyəma Jon bê boŋa ben. 14Ghàn shìki kôŋ hi bimî ghàn hi khə na Jon mu wuna mò Ìlajà we ghɨ tì jìsa na wù bè kaha bènàlò. 15À hì tofa nâbi nde wù hi tòkà yutê.

16“Mu mò hi fèknà ghɨt a mbyi chin nì ghə? Ghɨna mò te mwəlà wu wən, ghɨ le toŋâ jîsà ha ghɨta na, 17Ghàh ti yem njàŋsù fomasu na ghàn bin, ghàn ti faŋ hi bîn, yem njàŋ yì kpû na ghàn ji, ghàn ti faŋ hi jì. 18Mu jìsà ni beka Jon Fo Mòlû tî ben yə wi hidù, nyo wi lùkû ghɨt à jɨ̀m jis na, Wù kəta yohnà be. 19Wâ Wùt ti bên, hì yə̂, nyô, ghɨ ti jis na wùt wuna yə chyâhèlò, nyo chyâhè, fê mò sunu ha ghɨt ghe ghɨ kâtà ŋwàklànà nì ghɨt a be ale! Biyani, Yènfù chwùtè tof wu wunu tohna a gha afa ghɨt a wuna nè.”

Tèk te ghɨ tà tì bimi jə Jisòs atɨ̂n

(Lûk 10.13-15)

20Ghɨta a tù tèk te Jisòs ndùku nê gha kanana dona atɨ̂n tì tunhi hi kahe təm a ghɨna a ghɨna sùbe nî, Jisòs hì njaŋâ ha ghɨna na, 21“Ngə̂k yì chìk bè hì mô ha ghàn ghɨt a Kolasîn kəbi nì ghàn ghɨt a Bèsadà! À ndùku mô na ghɨ ni gha kanana mɨ ghɨ̂n a ghe ghɨ ne ha ghàn, ha ghɨt a Tayà nì ghɨt a Sidòn, ma ghɨna tì fuk bwu mak shàklà mù sùnju hi chwùtì na ghɨna ti kahi təm a ghɨna a sùbe. 22Mu jìsà ha ghàn na, à bè hì mò wu tuk wu sak wu Fùyènù, ma ngə̂k bê hi mô ha ghàn chyâ te yi ndùku mô ha ghɨt a Tayà nì Sidòn. 23Ghàn ghɨt a Kàbanùm, ghàn kwàktè na Yènfù ne nê ma ghàn kwok à tan a nyə ma? Yi wijə yâ. Fu bè tuma chwohe ghàn yi be afa yi lye gokhè wi. À ndùku mô na ghɨ ni gha kanana ghɨ̂n ghɨ ne a ghàn a fùtɨ̂n à yì tèk ni na ghɨ ni yi tèk yi Sodòm, ma yi baha làwû lân.” 24Mu jìsà ha ghàn na, “À bê hi mò wu tuk wu sak wu Fùyènù, ngə̂k bê hi mô ha ghàn chyâ te yì ndùku mô ha Sodòm.”

Jisòs jis na ghɨta ben ha yi, ma ghɨ khɨti yutìnì

(Lûk 10.21-22)

25Jisòs tî jəm ha Bè wûn kəbi a yu mefû jis na, “Bâba we wù saka nyə nì chyə, mu fo àyòŋnà ha wò beka wò ti letì gha ghɨ̂n ha ghɨt ghe ghɨna kwàktè na ghɨna tofalò chwûtì ha ngwònu. 26Hamok a Bâ à kòŋà kə wò hi nì ni.”

27Jisòs fî kaha jis ha ghɨta na, “Bom ti fo mwə̀ mù jɨ̀m ha mu. Wùt fate khə wi Wan a bu kə Bì, wùt fate khə wi Bì a bu kə Wan nì ghɨt ghe Wan chwoka hi chwùtè Bì ha ghɨna.”

28“Ha ghàn ghe ghàn bekà ngəksu fi fet botlò, ghàn ben ha mu, ma mu ni ma ghàn yuti. 29Ghàn lyi fwàŋ à mì yì fèt, ma ghàn yiki chyənà mì beka mu bonalò, fê kəta yi ngumlî. Ghàn ki nî ni, ma ghàn khɨti yutìnì a ghàn a təm. 30Fwàŋ à mì bonalò hi khɨtî, shyə ghe mu fo na ghàn beka ghɨ jîtà wi.” Ghɨt a Jûs ndùku ke na Ìlajà bê kaha bênàlò tuk lefu hi bakte à ghɨ̂t a yi bèn yì Klistù, Jisòs fî jis na Jon mò fòktì te Ìlajà we ghɨ ndùku ke.#11.30 Fwàŋ mò kâk fe ghɨ lêmà a nyamsu ni te nàk makə mbòŋ sùbà wu mɨ̀ na su hi chîntè fêtà amok.

選択箇所:

Matiyò 11: bmv

ハイライト

コピー