MATTHAI 2
2
Mipilte biahna
1Huchi'n kumpipa Herod lal laia Judia gam a Bethlehem khua a Jesu ahung pian in, ngai un, suahlam akipanin mipilte Jerusalem ah a hung va 2Khoiah ahiai Judate Kumpipa piang chu? Suahlam ah a aahsi ka mu va, amah be diing a hung ka hi uh, a chi va. 3Kumpipa Herod in hichu a zaah tahin a lungdong a, huleh Jerusalem a mi zousiah zong amah toh a lungdong uhi. 4Huleh siampu lalte leh mite lehkhagialtute zousiah a koukhawm a, Khrist pianna diing khoitah ahiai chih a dong a. 5Huleh amahun a kawmah, Judia gam a Bethlehem khua ah; ajiahchu zawlnei in hichibangin ana gial hi, 6"Nang Juda gam a Bethlehem, Juda khopite lahah na neupen hial sih hi; ajiahchu na sung apatin optu hungdoh diing ahi, ka mi Israel veengtu diingin, chi'n," a chi va. 7Huin Herod in mipilte a guuh kouh a, aahsi kilat hun a dong chianta a; 8Huleh amahuh chu Bethlehem ah a sawl a, "Chiah unla naungeeh thu chiantahin va kankhia un; huleh na muhtah chiangun kei zong ka hung biah ve theihna diingin hung hilh kiit un," a chi a 9Amahun kumpipa thu a zaah zohun a kipankheta va; huleh ngai in, suahlama a muh uh aahsi chu naungeeh umna tung zawn a tun a, a khawl masiah a ma vah a pai jel hi 10Amahun aahsi chu a muhun nasatahin a kipaah uhi. 11Huleh inn sungah a luut va, naungeeh a nu Mari toh um chu a mu va, huleh a khupboh va, a beta uhi; huleh a goubawmte uh hong in a kawmah sana leh, begaw leh murrah kipaahna in a pia uhi. 12Huleh Herod kawma kilehkiit lou diing a Pathian in a mang va a thuhilh jiahin lampi tuam juiin a kholam vah a chiahta uhi.
Aigupta gam a taina
13Huleh amahuh a chiah nungin, ngai in, Lalpa angel chu Joseph kawmah a mang in a kilaah a, "Thou inla, naungeeh leh a nu pui inla, Aigupta gam ah tai in, huleh ka hung hilh kiit masiah hutah ah um zing in: ajiahchu Herod in naungeeh chu suhlup diing a hawl diing ahi," a chi a 14Huleh amah chu a thoh in naungeeh leh a nu chu a pui a, ajan ajan in Aigupta lamah a chiahta hi. 15Huleh Herod a sih masiah hutah ah a um zing a; Lalpa’n zawlnei kama, "Aigupta gam apat ka Tapa ka koudohta," chia a soi ahung taangtun theihna diingin.
Herod in Bethlehem naupangte a thahna
16Huin Herod in mipilte’n a heem uh chih a heet in nasatahin a lungthah a, huchi'n mi a sawl a, mipilte kawma a hun thu a dohchian bangtahin Bethlehem leh a kiimvel zousiah a naupang kum nih leh a nuailam zousiah a thatta hi. 17Hulaiin zawlnei Jeremiah in hichibanga ana soi chu ahung taangtungta hi, 18Rama khua ah thawm a kija, misi ngaia kah leh maauna nasatah bang, Rachel in a tate a kah a, a um nawn louh jiahun a hamuantheihta sih, a chih chu.
Aigupta apat Nazareth a kilehkiitna
19Hizongleh Herod a sih phetin, ngai in, Aigupta gam ah Lalpa angel khat Joseph kawmah a mang in a kilaah a, 20Thou inla, naungeeh leh a nu chu pui inla, Israel gam ah chiah in; ajiahchu naungeeh thah tumte a sita uh, a chi a 21Huin amah chu a thou a, naungeeh leh a nu chu a pui a, Israel gam ah a hungta hi. 22Hizongleh Arkelaus chu Judia gam ah a pa Herod munah a lal hi chih a jahin hu lamah a chiah ngamta sih a, a manga Pathian in a thuhilh jiahin Galili gam lamah a kilehheita hi. 23Huleh a hung a Nazareth kichi khopi khat ah a teengta hi: zawlneite’n, Amah chu Nazareth mi a chi diing uh, chia a soi uh a taangtun theihna diingin.
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
