JOHAN 13
13
Jesu'n Nungzuite Khe Asil
1Paikan Ankuanglui kipat ma in, Jesu'n hiai khovel nusia a Pa kiang a apai hun hong tungta chih athei a; khovel a a-itte, atawp pha in a-it hi.
2Huan nitak an nek lai a, diabol in Simon tapa, Judas Iskariot, lungtang a Jesu zuausan a matsak lungsim akoihsak khit nung in, 3Pa'n akhut ah thil bangkim apeta chih leh Pathian a kipan hong pai ahi a, Pathian kiang a pai ding ahi chih, Jesu'n theigige in, 4nitak an um lai adingh a, apuante asuahkhia a, kinulna puan ala a, ateng hi. 5Huan kisilna kuang ah tui asung a, nungzuite khe asilsak a, akinulna puanten in anul zel hi. 6Huchi in Simon Peter kiang ah ahong a, “Toupa, nang tel in ka khe na sil dia hia?” achi hi.
7Jesu'n akiang ah, “Ka thilhih tu'n ah na thei kei; himahleh tunung chiang in na thei ding,” chi in adawng hi.
8Peter in akiang ah, “Ka khe na sil kei hial ding,” achi hi. Jesu'n akiang ah, “Na khe ka sil keileh ka kiang ah tan na nei kei ding,” achi hi.
9Simon Peter in akiang ah, “Toupa, ka khe kia hilou in, ka khutte leh ka lutang leng aw,” achi hi.
10Jesu'n akiang ah, “Kisil khinsa akhe lou ngal sil akiphamoh kei, apumpi in asiang; nou na siang uh, na vek un zaw ahi kei,” achi hi. 11Amansak dingpa athei ngal a; huaiziak in, “Na vek un zaw na siang kei uh,” achi hi.
12Huchi in akhete uh asil khit a, apuante alak a, atut nawn in akiang uah, “Na tung ua ka thilhih na thei uhia?” achi hi. 13“Nou, Toupa leh heutupa na hon chi ua; na chi dik uh, ka hihna mah ahi. 14Kei Toupa leh na heutupa un na khe uh ka silleh noute'n leng na khe uh na kisilsak chiat ding uh ahi. 15Na tung ua ka hih bang in, nou leng na hih sam ding un, hihdan ding hon hilh ka hi. 16Chihtaktak in, chihtaktak in ka hon hilh ahi, sikha apu sang in athupizaw kei a; sawl a om leng asawlpa sang in athupizaw sam kei hi. 17Huai thilte na theih ua, na hih uleh minuamsa na hi uhi.
18“Na vek ua thu ka gen kei a; ka telte ka thei; himahleh ka tanghou nepa'n ka tung ah akhetul alikta chih, Laisiangthou ahong tuntheihna ding ahi. 19Tu in ahong tun ma in ka hon hilh ahi, ahong tun hun chiang a kei amah ka hi chih na gintakna ding un. 20Chihtaktak in, chihtaktak in ka hon hilh ahi, kuapeuh ka sawl kipahpih, kei hon kipahpih ahi; kuapeuh kei hon kipahpih, hon sawlpa kipahpih ahi,” achi hi.
Jesu'n Matsak A A-om Ding Agenkhol
21Jesu'n huai thu agen khit in, alungsim amangbang a, “Chihtaktak in, chihtaktak in ka hon hilh ahi, na lak ua mi khat in kei hon mansak ding,” chi in atheisakta hi.
22Huan nungzuite'n achih pen athei kei ua, aki-entuah chiat uhi. 23Anungzuite lak a khat, Jesu'n a-itpa, dohkan sik ah Jesu angsung ah kingai in a-om hi. 24Simon Peter in huai mi kiang ah, kua pen thu ahia agen dong ding in akhutvan hi.
25Jesu awm ngai mah in a-awnphei a, akiang ah, “Toupa, kua pen ahia?” achi hi.
26Jesu'n, “Tanghou them ka diah a, ka piakpa ahi ding,” chi in adawng hi. Huchi in tanghou them adiah zoh in Simon tapa, Judas Iskariot in kiang ah apia hi. 27Tanghou them apiak nung in asung ah Setan alutta hi. Huchi in Jesu'n akiang ah, “Na hih ding hih meng in,” achi hi. 28Dohkan a omte'n bang tum a hiai thu gen hiam chih athei kei uh. 29Akhen in Judas in dangka ip akep ziak in, Jesu'n ankuangluina a ding thil kiphamoh peuh lei in, chi hiam, migentheite kiang ah banghiam piak ding, chi hiam asa uhi.
30Huan tanghou them la in, apawtkhe pah a; huai tuh zan lai ahi.
Thupiak Thak
31Huaiziak in apawt nung in, Jesu'n agen a, “Tu in Mihing Tapa pahtawi in a-omta a, Pathian leng amah ziak in pahtawi in a-om hi. 32Amah a Pathian pahtawi a a-omleh amah leng Pathian mahmah in apahtawi ding a, apahtawi pahta ding hi. 33Naute aw, hun tomchik na kiang uah ka om lai tadih hi. Nou na hon zong ding uh; Judate kiang a, ka paina ding ah nou na hong pai thei kei ding uh chih ka gen bang in, tu in huchi mah bang in na kiang uah ka gen ahi. 34Thupiak thak ka hon pia ahi, ki-ittuah chiat un; ke'n nou ka hon it bang in, nou leng ki-ittuah un. 35Na ki-ittuah uleh mi tengteng in ka nungzuite na hi uh chih hiai ah athei ding uh,” achi hi.
Peter Kitheihmohbawl Ding Genkholhna
(Mat 26.31-35; Mar 14.27-31; Luk 22.31-34)
36Simon Peter in akiang ah, “Toupa, koi a hoh ding na hia? achi hi. Jesu'n, ka hohna ding ah nang tu in na hon zui thei kei ding; tunung chiang in zaw na hon zui ding,” chi in adawng hi. 37Peter in akiang ah, “Toupa, bang ding in ahia tua leng ka hon zuih theih louh ding? Nangmah ziak in ka hinna ka koihkhe ding,” achi hi. 38Jesu'n, “Keimah ziak in na hinna na koihkhe ding maw? Chihtaktak in, chihtaktak in ka hon hilh ahi, nang thumvei na hon kitheihmohbawl ma in ak akhuang kei ding,” chi in adawng hi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
