Matyu 3
3
Oksam ukayin tunum Jon ami weng bakayin-bisa kaami sang kaata ko
Mak 1:1-8, Luk 3:1-18, Jon 1:19-28, Ap 13:24, 19:1-6
1Yesus aso, awak-aalap so, alimal ili kawu laabipla bombii, man ayo tal aba tam fasu tunum aalap dukum kelale, kulu oksam ukayin tunum Jon ayo tal Provins Judiya kaptam-ami tunum dinim bokon kawu bom-balala, unang tunum iyo tal-tal ke-bilipla, God ami weng uyo bakayim-bamda bokola: 2God ami unang tunum imbii tam almi abip daa tiin molokoma kaali, mepso tulu, kemin (ibi God kaa numi ban-wakan-umbup uyo yam-kukulokoma kayu,) kipni ban ayo kulaa kela aket fanang uyo fal-sikiliwa yo, kal-bomda bakayila ko. 3Siin sawaayak sawaayak kawu profet Aisaya ayo Jon ami sang kalaa Sukon Tem kabaku dolale bokola:
Tunum ma, tunum dinim bokon kawu, naan-bamda bokola ko: Liip tambal ma talalmiwa, Kamokim ayo baan abiltap-kup talak o, kalala naanba kayi!
kala Aisaya ata kanum boko dola kuyinsa. (Kemin, kabak-ami miit kaali, unang tunum kipni aket fanang ayo fal-siki talal-bam dota-silipla, Yesus ayo talak o, kala-lomdu kanum bokosu) no.
4Jon ali (sawaayak profet o, kala God ami weng ku-fatap-daa bakayin tunum Elaija ami kukup kanumsa ultap kaata kuluu-lomda) ali ilim tambal kaa mikimsa disa; ami ilim mafak kaali, taloop kamel o kala-laabip umi kon kaata, bakelip mikilale, kang kau umi ipnaal uta ukduu ol tiil o kala dotu kutii, kuyang diila nek molule, ima waan tangbal uyo falala le, kupluum so, as tem umi mumu wok so, kiita-kup in-bom biisa. 5Unang tunum yaapkan abip dukum Jerusalam ilin isole, Provins Judiya bokon alik kaptam-ami abip ma ma bom ilin iso, Ok Jodan balang diim ilin iso, iyo tal Jon ami weng kaata weng san-kaamum o, kalalipla, 6tala-tala-ke Jon ami weng ayo weng san-kaa-bamdip, imi aket uyo fal-kela-lomdip le, God so, unang tunum so, imi tiin diim kawu ilmi ban kemin uyo ku-fatap-daka-bam ke-bilipla, Jon ayo taba imbii daak Ok Jodan kumun tem im-baak daa oksam wakaya ko.
7Juda imi kamok kamok Falosi so, Sadusi yaapkan so, iyo tal Jon ata numi oksam ukayilak o, kalalip ami fanang tal-tal kebip. Lale, Jon ali utamala, Imi aket kaa fal-sikilin disa ke-lomdip tilip kala, kala-lomda, itam bokoyila ko: God ata taba-lomda kipni kukup mafak kaami kalan kaata, yam-mafak fuulokoma. Kemin, ibi kanta bokoyipla, ipkal aket fukun-daa-lomdipla, Din Jon atamup ami oksam ukuyokoma kaata, fan God ami aket atul kuyokoma uyo uktayokomu te! kalalip tale-bam ale, ibi inap imi tikiin kiin-bala, suun daa-lom ukadaa sak funbi unebip ililtap kelipla, nami fanang tale-bam kebip yoko? Katale, kaali, ibi uktayokomu disa yo. 8Ti kukup tambal kaata ti kanu-bilipla, kabak-ali utamila, kipni aket fal-siki-lomdip ipni kukup mafak kaa, kulaabip kala kalon o. 9Ibi nami weng kala bokoyokomi kaali, weng san iliwa, ibi Nuli ti Abraham ami man loop kemin uktayokomu no, kala-lom fiyaap duubip. Lale, God ata tuum kalawiili fal-sikila tiltam Abraham ami man loop ke-lomdipla, ipni abiin uyo kuluulamip kemin, ibi dotu utamdiwa! 10Kemin, God ayo as miit tem kawu kaabaak ma kutii-lomda as ayo duulmon o keba. Kemin, as alik ibi dok kanolin kiita, as lap tambal ma abuulin disa kesip namti, duula-lom as kuyak daala kiin-taba unokomu no. Kemin ultap o, ipkal kukup tambal kaali, tabuulin dinim ke-lokomip kaali, God ata taba-lomda yam-kan tiilokoma no. 11Kipni tunum talokoma no, kal-bom fenbip kaa, nita disa; kemin, kaali nasiik tilila, akal mulo kawu nami daang tem kawu talokoma. Kemin, ali kamokim dukum ke ata ata kela, nali kulaak banila, ata tam banin kala-somdiya fatom kep-nambu. Kemin, nali ti fan tunum kemin, nali taang-kalali yang ami miit tem kaa yang ilomdi ami yaan ilom kaa kulii-unomi dinim o. Ibi aket fal-sikilip kulaali, nali disa ok kulaata-kup kuluu-lomdi oksam ukayimbi. Nali disa ok kulaata-kup oksam ukayimbi. Katale, tunum kaa talokoma kaami almi Sinik Tambal ata dabaala taba-lomda kipni iipyak tem aket mafak fanang mafak dakabip uyo, as kuyak daala kiin abamnula, alik ibi tambal ke-lokomip ko. 12Yak tunum imi yeng kuluu-lomdip wiit o kalalip kaali, bobi kutal tii-lomdip talal-bilip bii, umi ipnaal ayo takan-tii-lomdip wiit tiil ata-kup, kuu am tiile, ipnaal kaata-kup abul-daalip kiin-tabemin o. Kemin, ultap o; tunum kaa talokoma kaa tunum unang ami lak duusip iyo afeta yim-tii foko kutam almi abip tiiba-kup, ale yak tunum unang ami lak duulin disa ita, atin ti as kiinin-kup ilin ten-yaamin disa; ti kano kiinin-kup ilin kaami tem kabaaku abul-daala kiin-bam ilokomip o, kala bakayila ko.
Jon ata Yesus ami oksam ukonsa kaami sang kaata ko
Mak 1:9-11, Luk 3:21-22
13Jon ayo kanu-bamda bom-balaya kulaali, Yesus ayo Provins Galili uyo kulaa kambola din Jodan dal din atamiya, Jon ayo oksam ukop-nak o, kalala din atamala, 14Jon ayo bokoliya oksam woko-laamin kaayo kambolak o, kala-lomda bokolala: Yi, kabi God ali uldaa-tam-buula tiltam Kamokim kesap tunum ale, nita atin tunum kemin, nali oksam kaa ukop-tokomi disa; kapta taba-lom nami oksam okop-nan o. Kanimin o, kalalapla bokop-na-lomdap: Oksam ukop-nan o, kalbap i? akale, 15Yesus asiik bokola: Nak-tunum kapyo, kabi nali oksam ukop-nokomap kaali, God ami weng kuka-daasa uyo tiltam tituun-kup ke-lokomu kalalila kemin, umi fanang kaata tili. Kemin, kapyo oksam ukop-nan o, kalala, Jon ayo fan, weng san-ilomda, Ayo, kala yak oksam ukola ko.
16Jon ayo taba Yesus ami oksam ukola kem-salale, maak fak-daalin tap Yesus ayo ok tem kambola tiltam aba abiil tikiin uyo tem kalulu titam daalaya, God ami Sinik ayo awon Abim tap kela tildaak nami diim ayo abamna kala, kala-somdala, 17alep iyo weng seliwa yi! abiil tikiin lo kawu, God ami weng ma tal bokolu kabak-ali boko-lomdu: Mep kaali ti nalmi Man aket-iip kemin, nami aket fanang uyo nali ami fiyaap-kup duubi no, kala bokoya weng sanip ko.
© 1999, Wycliffe Bible Translators, Inc. All rights reserved.
