TAUNET 13
13
Abram ak Lot
1Ki togosta anyun Abram ak kwondonyi kong'eete Misiri, ak tuguuk tugul che ki tinyei kobooto Lot ak koba Negeb. 2Ki mogoryo Abram miising'; ki tinyei tuuga, fedha, ak thahabu. 3Ki wo kouuot eng' pandanyi, kong'eete Negeb agoi Bethel, agoi koit kwenutap Bethel ak Ai ole ki mi emennyi eng' tai. 4Ak ki testai kwo agoi ole ki mi kaptisisyet ne kigateech eng' tai. Eng' yooto koguur Abram kainetap Kamuktaindet ne Toroor. 5Ki tinyei Lot agine ne kibendi ak Abram neego, tuuga, ak emaisyek. 6Amu ki chaang' tuguukwak, ko ki ma imuuch koyam icheek tuwai komeny emonooto. 7Ki piit tiyet eng' mestoweek che ki iyagi kiyagiigap Abram ak che ki iyagi che po Lot. Ki menyei Kanaanik ak Perisik emonooto eng' peetuusyechooto. 8Ki leenji anyun `Abram Lot, “Ma myee kota kobiit suryet eng' kwenunnyoo, inyee ak anee, anan eng' kwenutap mestoweek chechuuk ak cheguuk, amu kitupche. 9Tos ma paraa emet eng' taing'ung'? Kaigai istegei eng' ole ami. Ngot iwe komostap kaataam, awe komostap tai; anan ngot iwe komostap tai, awe komostap kaataam.” 10#Tau 2.10 Ak kiguskong' Lot kotabendo, ak ki keer atebweetap Jordan komugul kole emet ne tinyei peek eng' olda age tugul ko uu mbareetap Kamuktaindet ne Toroor,#13:10 Toroor,: Kaboorunet agobo kabungut ne po Eden. ko uu emetap Misiri ne tokyingei komostap Zoar, ye ki tomo kong'em `Kamuktaindet ne Toroor Sodom ak Gomorah. 11Ki lewenjigei anyun Lot atebweet tugul ne po Jordan, ak kibesyo kwo kotokyigei kong'asiis. 12Ki meny anyun Abram emetap Kanaan, komeny Lot nganasook che ki mi atebweet, ak ki uot kot koit Sodom. 13Ago kiyaachen, ak ko ki kiptengegin miising' piigap Sodom eng' taitap Kamuktaindet ne Toroor.
14Kingo kagobesyo Lot ak Abram, koleenji `Kamuktaindet ne Toroor Abram, “Kuskong' ak itobende nguno anyun, keer kong'eete yo imi; kong'eete komostap kaataam agoi komostap tai, kong'eete kong'asiis agoi cherongo, 15#Poi 7.5 amu agoonin emet tugul ne igeere kobunjiin ak iyoteng'ung' agoi koigeny. 16Ayae lagoguk kochang'a ko uu temburyek che po ng'wony, si ngot komugaksei koiit chii temburyek, ko kaagaa iitoksei lagoguk ak icheek. 17Ng'eet, marar kooindap emoni ak tebeesindanyi, amu awendi agoonin kobunjiin.” 18Kiu anyun Abram kwo komeny ye neegitee keetiik che po Mamre, che mi Hebron, ak kiteekyi Kamuktaindet ne Toroor kaptisisyet eng' olooto.
©Bible Society of Kenya, 2019
