ATÜTSAR 30

1Rachel tü atsa küsü nga wuo Jacob mükütsü küngura vü ma jie Lea noküjizhitewa; jüti sanü ma nüh Jacob vü, “Hi nga atsa tsüluo, nyuthuoüji hi nü sünathuoh,” ti küza. 2Thinü Jacob tü Rachel vü arüshu taji, “Hi tü Saküüwuowa kümjie vünüh peh nü noh shiekuo vünüh noh tsa küngura aviwa khetemtü ülo?” ti küza. 3Rachel nüh shele, “Eh siepevühwa Bilha hala pehveh ünüh ma siezeh luo, jüti sanü ma tü eh kenüh atsa ngutüra naveh ünüh. Thi hi tü ma vünüh atsa pehra naveh,” ti rületsü. 4Jüti sanü Rachel tü ma siepevühwa Bilha vi Jacob tsü nü ma vü küüzeh. 5Thi Bilha tü atsamoh nü nyimpari küsü wuo Jacob tsü. 6Jüti küsa vü Rachel tü, “Saküüwuowa nüh hi notsüthuoh, thi eh jikhi nga künatsü nü atsa nyimpari küsü tsüthuoh,” tisa. Jükenüh Rachel nüh ma tsa anyo Dan, küümze vünüh notsü, ti ji. 7Rachel siepevühwa Bilha tü atsamoh le nü nyimpari akünyia wa wuo nü Jacob tsü lehü. 8Jüti küsa vü Rachel nüh, “Kükhra thse nü hi tü eh jie siesaluothuoh, thi charathuoh,” ti sanü Rachel nüh ma nyo Naftali, mazhünyo, Saluo, ti ji.

9Lea tü atsa wuhtuomthuoh ta küsa ma mpa ma küthsüra vü ma siepevühwa Zilpa vi nü Jacob tsü. 10Jüti sanü Lea siepevühwa Zilpa tü atsamoh nü nyimpari küsü wuo nü Jacob tsü. 11Thinü Lea nüh, “Müngu kümhie,” ti sanü ma nüh atsawa nyo Gad, müngumhie ti ji. 12Lea siepevühwa Zilpa tü atsa akünyia wa wuo nü Jacob tsülehü. 13Thinü Lea nüh, “Hi tü loküzhewa! küpakenühnyunü nyimzari nüh hi tü külozhewa ta jinaküveh kenüh,” ti sanü ma nüh atsawa nyo Asher, külozhe, ti ji.

14Hiemtha kümahwie tsotho vü Reuben tü lahzhure azhuh vünüh ngura nü vi ma zah Lea vü ru. Thinü Rachel nüh Lea vü, “Noh tsa lahzhure hi nga pike tsü jie,” ti khuo. 15Thitü Lea nüh, “Noh nüh eh vüpa viteküwa tü azhünyo küzah ti müsheveh ülo? Thi khinyi nga noh tü eh tsa lahzhure vihü nti ülo”? ti rületsü. Thinü Rachel nüh, “Jüta thuoüji noh tsa lahzhure kenüh süta vü ma tü noh vü nyi zehra naveh,” ti rületsü. 16Jüti küsa vü Jacob tü münüleh vü azhuh vünüh ru ünü, Lea tü ma mütu nti alievü wa nü ma vü, “Noh tü hi vü müturuji mümhie; küpakenühnyunü eh tsa lahzhure nüh hi nüh noh müsa küsathuo kenüh,” ti küza. Jüti sanü jüma rüzavü Jacob tü Lea vü nyi zeh. 17Jüti küsa vü Saküüwuowa nüh Lea kükhuo künatsü nü Lea tü atsa nyimpari müngaawa wuo nü Jacob tsü. 18Thinü Lea nüh, “Saküüwuowa nüh eh kümlie tsüthuoh, küpakenühnyunü hi nüh eh siepevühwa vi eh vüpa kütsü kenüh,” ti küza. Jüti sanü Lea nüh ma tsa nyo Issachar, nyurazhi müsanü kümlie küngura, ti ji. 19Jüsevü nga Lea tü atsamoh le nü nyimpari türoawa wuo Jacob tsü hü. 20Jüti küsa vü Lea nüh, “Saküüwuowa nüh zanyo kümhie sa hi tsüthuoh; khinyi thuoüji eh vüpa tü hi siake nathuoh, küpakenühnyunü hi nüh atsa nyimpari türo wuo ma kütsüthuoh kenüh,” ti sa. Jüti sanü Lea nüh atsawa nyo Zebulun, siake nü kütsü, ti ji. 21Jüma sevü Lea tü nyimzari küsü wuo, thi ma nyo tü Dina ti ji. 22Jüti küsa vü Saküüwuowa nüh Rachel müshe taji ma kükhuo künatsü nü ma shiekuo saphietsü. 23Ma tü atsamoh nü nyimpari küsü wuo taji, “Saküüwuowa nüh eh küzükrü vijamtü thuoh,” ti sa. 24Thi ma nüh atsawa nyo Josef, ti ji nü, Vüwa tü atsa nyimpari kütsü phrele saluo, ti sa.

Jacob nüh Laban vü Kükhuo

25Rachel nüh Josef wuo küm sevü Jacob nüh Laban vü, “Hi küzem luo, jüti sanü hi tü hi mpa eh tharuo, eh nyu vü wanathuoh. 26Hi nüh noh kütsü sanü küngura eh vüvühri thi eh tsari hi tsüm luo, hi nüh küzakele noh kütsü sathuoh ünüh noh mpa nüh thsüvehthuoh, tinü hi küzem luo,” ti khuo. 27Thitü Laban nüh ma vü, “Noh nüh hi tü küüza nta thuoüji, hi tü noh kenüh Vüwa nüh tsia hi tsüthuoh ta küsa amahtsa vünüh thsürathuoh; 28Kümlie noh nüh küngulehri chietsüluo, hi nüh noh tsüm naveh ünüh,” ti küza. 29Jacob nüh ma vü, “Hi nüh mokümjie noh kütsü sanüh noh mpa nüh thsüveh, thi hi nüh noh nyihzhüri küno vünüh küzake jeshie wathuoh ünüh noh mpa nüh thsüveh. 30Hi müjie küru tüvü nü noh tü pikempa pehla, thitü hi küru sevü thuoüji hozake zhitewathuoh; thi hi khiekhievü nga wa tü Vüwa nüh tsia noh tsü. Thitü khinyi thuoüji hi tü küsie eh zhehlonyula nonathuoh lo?” ti küza. 31Ma nüh, “Hi tü noh vü mowa tsü na lo?” ti küna. Jacob nüh ma vü, “Noh tü zanyo küsü nga hi kütsüwa nyu; mükütüküzü noh nüh eh kenüh jüta sa nta thuoüji hi tü noh anyihnyih riehkhuo avo sa thi huo le hü na nü: 32Tinü nosü hi tü noh nyihzhüri azavü tse küüze luo, jüti sanü nyihzhü küruo, athsoshi küperi thi nyihzhüzah künyiri, thi nyihsü thsoshi küpe thi aküruori küürükazhu luo thi jümari vi hi tsü nü jümari nüh eh jisuo küüsaluo. 33Hi tü nyitsa ünü nyu nüh noh mpa nüh thuotü vünüh eh zhiri no nta küru vünüh thsüra naveh ünüh. Mükütüküzü nüh eh zhiri azhievü aküruo thi athsoshi mükünyie nyihsü thi nyihzhüzah azhievü akünyi küpe mükünyie nguthuoüji kürühu ti chieke luo,” ti rületsü. 34Thinü Laban nüh, “Mhie sheh! tinü noh nüh küüza kümjie saluo,” ti rületsü. 35Thinü jüma rülo vü Laban nüh nyihsü avo kükhrüpuori; thi nyihsü awie küruo thi athsoshi küperi, kümji küperi aveh, thi nyihzhüzah akünyiri vi ma tsari nüh küünom; 36Jüti sanü rülo küche zetse kükietuo vü tewa; thi Jacob tü Laban anyihnyih küpari aveh no.

37Jüti küsa vü Jacob tü küzhirhüh athsoh kürho thi akhathsoh kürho thi wuhjinga arhu kürho akie aveh khu khehm nü athsoh jümari alievü chü sa. 38Thi athsoh akie khu kümri ma nüh vi nü anyihnyihra tüvü arühgu lovü, anyihnyihri nüh ru ajuh zhuzhuti küsa vü sa, mari ajuh zhu nta ru nü jüla azah tsatsati, 39jüti sanü anyihnyihri tü athsohri nato vünüh tsanü saküüriethuo, saküürüwuo thi athsoshi küüsasati. 40Jüti sanü Jacob nüh nyihzhüzahri tü saküpa nü anyihnyihri tü küriethuo wuovü saküüprüke thi Laban nyihnyih akünyiri vü müsarü nüh sa. Jüti küsa vünüh ma anyihnyih thi Laban anyihnyih tü küpapa sa. 41Mükütüküzü anyihnyih küülieri tsa na saveh thuoüji Jacob nüh anyihnyihra tüvü athsohri ajuh küzhuku lovü thsethseti. Jüti küsa vünüh ma tü athsoshiri rügi vünüh tsatsa ti. 42Thitü anyihnyih müküülieri thuoüji jüma rügi vünüh müküütsa; jüti sanü anyihnyih mükükrüri nü Laban azhi sa, thi kükrüri thuoüji Jacob azhi sasati. 43Jüti sanü Jacob tü nyirhie sheh teru, anyihnyih saluo, siepevüh saluo, siepepa saluo, ut saluo thi rawuh saluo khieloti pehtewa.

選択箇所:

ATÜTSAR 30: POCHBSI

ハイライト

コピー