RAPHA HIQWA LAK 33
33
Jakob Ka Esau Rai Riihumto
1Jakob raq Esau ka asengi maiqwere shiblai kra shea raüta saüwa kra chhito. Kra ningkhan apaiq raq asetiim ka Lea, Rechel kiimaq chakliip nyungnai liipan na pheato. 2Apaiq raq chakliip nyungnai nai asetiim ka kongkhu na tiikito. Kra jai na Lea nai asetiim kra tiikito. Kra jainiishe Rechel nai Joseph ka jai tiisup niishe tiikito. 3Raüta Jakob ka tsangshiq ma mikhu na kihoto. Raüta aphu khaki na hiq na ku hihi jang miishi bumto. 4Shatmaq Esau ka tlat chhat apaiq humkai juto. Raüta ajaq wiinai maq apaiq ka pomsaq riito. Raüta atheaphi na shupto. Raüta tsangnai wiita aho trang liishe hoq trang hoto. 5Raüta Esau raq tsangnai tro na liito. Raüta kiijaq jechakre nai nosere kong kra chhito. Raüta apaiq raq waito, “Riita ara maiq kong ümniirai kitaq arka juwa?”
“Shiilangwe lei, arthun arka Shiikeawe raq lungwii raüta ngi ma kuqto,” nguta Jakob raq treto. 6Kiijiishe chakliip nyungwiinai ka tsang setiim rai saühoto, raüta Esau miki na hiq na bum rang raüta apaiq ka shrengto. 7Kra jai niishe Lea nai asetiim ka saühoto. Kiimaq atiisup niishe Joseph nai Rechel saühoto. Raüta hiq na bum rang raüta apaiq ka shrengto.
8Kiijiishe Esau raq waito, “Riita kongkhu na maiq kong tiikilaü thun ka juwa? Kra liichum ka jamlai wa?”
Jakob raq treto, “Kriithun ka ümnaq mangchan lap miitu tiiki kang.”
9Shatmaq Esau raq nguto, “Ino lei, ijaq na phanrap hongli asi. Ümjaq na jamlai wa sitlaq ka ümniiriili thülaq.”
10Jakob raq treto, “Riimak, mangchan laüta, ümniiraq ngi lungwiitlaü jiila, ikongphiq ka taolaq. Ngi ma ümsham chhi nong kriika, Shiikeawe rai arhum ikha. Riita ümchaü ümniiraq ngi ka tsan aheawiq miishe taolaü. 11Mangchan laüta ara kongphiq ngi raq ümniima alamhoha arka taolaq. Shiikeawe raq ngi ka kai mangchanto. Kiimaq ngi ma phanrap jam lai wa raa tlaq kra wiita kuqto.” Kiimaq apaiq raq mitaoshaq wiiwii Jakob raq shetang tiipaiq neato.
12Esau raq nguto, “Ikhla nanai ka kiim riiphea miitu she tiije i. Ngi ka ümkhaki na kongkhu kiholipha.”
13Jakob raq treto, “Ümniiri asap haü, nosere kong ka aphiq khum tsü mak. Kiimaq ngi ka sku kong nai nyamse kong asetiim noshii setiim kra liichang. Tsangshiq ka taütaü laü laü trü joho raü ka ranaiq shi li khum raü min, nyamse kong ka wiita mitsaiki. 14Mangchan laüta ümniika ngi ma sinkhu na kiholi laq. Kiimaq ngi ka ümjai na chaosu suse miitiq miki kang. Lata ümtin wa tang tiikang kra khan khan, nyamse kong rai kiimaq nosere kong rai Edom mung na ümnaq tloho miki kang.”
15Esau raq nguto, “Ikhla isengibi maiq wiijam ka ümniirai baiq thüpha.”
Jakob raq treto, “Kra ngo min rarai makli. Ngi ma akhek ka ümnaq mangchan kli akhek ratlo.” 16Krai mren kra ranaiqli Esau ka Edom mung na jangho nong kihoto. 17Shatmaq Jakob ka Sukkoth hiq nü na kihoto. Raüta kiijaq apaiq sichang jam ashi haito. Kiimaq anyamse kong sichang tiip ri haito. Kra ningkhan kra hiqshong ka Sukkoth nguta mangto.
18Jakob ka Mesapotamia mung maq jangho raüta khu asang maq Kanan mung na Shekhem chela na saühoto. Kiimaq apaiq sichang piitiip ka kra chela tho na wak ram ashi na teito. 19Apaiq raq kra hiq phu wak ram ka Hamor, Shekhem ma awe kra saüsetiim jaq wa kampho ngam sii shishi kuq raüta rito. 20Raüta apaiq raq kiijaq berong-wacha ashi haito. Raüta kriika Israilnok Shiikeawe El mang na thüto.
Tangsa Naga Bible - ASII LAKDAP
Copyright © 2015 by The Bible Society of India
Used by permission. All rights reserved worldwide.
