A’NPHUTNA 3
3
Mihring Ṭong Juimak
1Tûnchu, Rōngpu Pathen kutsyem kâra mari inti hi lungthim kaṭhamak pen kae. Mari khan nuhmeinu ader, “Rahōna kakek theikarahei sathei hêrmak tin chei, tia Pathen in ati chei mo?”
2Nuhmeinu khan amasôn, “Rahōn shunga thingkung kara rakip kansâk thei, 3rahōnlaia kakek thing kara tei loa. Pathen in khava thing kara kha sâk mak ruh khana atônbek um tônmak ruh khana khavakha kantlo’nchu akathi sik ung kae ati.”
4Mari khan amasôn, “Khavakha dikmak. Nangni thimak tin chei. 5Nangni’n theikara kha nansâk pha leh nanhmit amanvâr sik a kha, akaṭha leh akase nanmanhret sik a kha Pathen leh in-ang sik chei ti hi amanhret a, kha ati kae.”
6Nuhmei khan thingkung kha heituk a enkahōi mo, khana akara kha sâk a heituk a akatui sik mo khana singna chen sik kha’m heituk a a’nlak sik mo tia aleihmu jo. Khava jâra nuhmeinu khan ajing aṭhōt a asâk jo. Apuise’m ajing apek a asâk jo. 7Khava sōa anhmit heikavâr joa pōn leh derkei loa ka-om ung ti inhret jo hei. Khava jâra theichangbō ankaṭhui manchuna antaksa inkhuna jo hei.
8Khava khōhlei ning Rōngpu Pathen rahōna ahong kha anleithei jo, khana anmani’n thingkung kâr heia le’nthup jo hei. 9Tâk-kha Rōngpu Pathen in pasepa abek a, “Nang khon mo aka-om che?” ati.
10Khava pha pasepa khan amasôn, “Rahōnna Narasa kathei, pōnbōia ka-om jâra kaṭit chea a’nthup eng kae.”
11Pathen in, “Tu’n mo nang pōnbōia ka-om che ati? Samak ruh tia ṭong kapek chei theikara kha nantasâk jo mo?” tia ader.
12Pasepa khan amasôn, “Hinahin naman ompui eng nuhmeinu hin theikara kha apek enga, ke’n khavakha kaleisâk jo.”
13 Rōngpu Pathen in nuhmeinu ader, “Heijâra mo hivahi naleitlo?”#2 Cor 11.3; 1 Ti 2.14
Nuhmeinu khan amasôn, “Mari khan khava sâkna sik ahōn mathlâk enga kae.”
Pathen in Ṭong Atan
14Khava sōa Rōngpu Pathen in mari hneng khan, “Hivahi natlo jâra karâkna nachen sik jo kae; ranhring rakip kâra nang rōk in hiva hâksêrna hi naratō sik kae: tuna inphut nabok a a’nsôn sik che kae. Nahring lai seng vaiphin nasâk a aka-om sik che kae. 15Nang leh nuhmeinu kâra in-enkadana kaman om sik jo; nuhmeinu sōn in nalu asukkhōi sik khana nang in asōn apâr kerahmit namachuk pek sik kae,” ati.#Ṭph 12.17
16Khana ama’n nuhmei hneng khan, “Nachung hriklai leh nasa neilai nanat kamanhnak sik, khōdeng kamanthei sik che. Kha’num napuise madu rangeina chu naneiṭhak sik, kachanga napuise thōia aka-om sik che kae,” ati.
17Khana ama’n mipa hneng khan ahri, “Nanuhmei ṭong narangeia ke’n sathei mak tin kalei ti theikara kha nasâk jo. Naṭōntlo jâra ralei in hâksêr achen jo. Nahringkhō shung senga sâk leh in hmuna sik a ṭōn rahnak a natlo sik kae.#He 6.8 18Ralei hin phi leh rahling hingja amankek sik, khana nang in ram a thingbō rōbōhei nasâk sik kae. 19Ṭōn rahnak a natloa raleia heikhat mankekna sik natlo sik kae; nataksa inphut ahong kasōk narathlen man na’nsâk sik kae. Nang raleia inphut ansyem che kae khana raleia na’nle mak kârseng hinga natlo sik jo kae.”
20Adam khan anuhmei kha Eve tia aphō jo, ajârchu amanu khan raleichunga mihring rakip nu kachang jo. 21Khana Rōngpu Pathen in shavun heia pōn asyema Adam leh Eve kha amansi jo hei.
Adam leh Eve Rahōna Inphut Atirsōt hei
22Khava sōa Rōngpu Pathen in, “Tûnchu mihring in akaṭha heimo khana akase heimo manhretna anneia eini kapō kachang jo hei. Anmani hi kumsôt anhring makna sik hringna akapek thing kara hi mansâk mak sik jo hei kae,” ati.#Ṭph 22.14 23Khava jâra Rōngpu Pathen in anmani kha Eden rahōna inphut ahnong sōt jo hei. Khana anmani insyemsōtna raleia khan hlei amanthlō jo hei. 24Khava sōa Eden rahōn nisō intongting ama’n ranhringhei leh akimvea a’nlek lele hmeimale Chemjâm inkhat ada jo. Hivahi hringna thingkung kha mihe’n anhei hnaithei makna sik a kae.
Komrem Revised Bible - LEKHARABU INTHENG
Copyright © Bible Society of India, 2015.
Used by permission. All rights reserved worldwide.
