Matthew 8
8
Jisu lepra küthimi thi küsührho küsü
1Süsa Jisu cejüthu yono kiri küyice thüma kro küzho shüh püh Pusa müdzi vori ta. 2Mo, Yhie! Lepra küthimi püh Puce vori Pu rüsu die sü, Nyepoo no n müdo lize a thi kümüsa vayi vezo zita. 3Süce Jisu Pu be yho püh pu nyi die sü, a müdo ve, no müsayi tate; zisü. Süzi sü mütha pu lepra küthi-o münü mhata. 4Süsa Jisu puce po die, no mipüh ceri po hite, sidie tavo ntho n khapüh Pethiküzho-o mhüngo thisü te, sidie mi po seyi küto na Moses-e po püh kümüzü rütho-o thisüte, zita.
Jisu kra mhu küzhoo cetami püh thi küsührho küsü
5Süsa Jisu Capernaum lü lüri küyice, riwhümi kra mhu küzhomi püh vori Puce sho die: 6Nyepoo, a cetami püh lasa ta die kümüzhe shüh die celü bayo le, zisü. 7Jisu puce; I vori die pu thi küsührho sü to, zisü. 8Riwhimi kra mhu küzho süo sü; Nyepoo, I n po a cekhrikhro vori no küto sümo ri zo; eli no züco pühri posü zori a cetao sührho ta zoto, zita. 9Kükrenamoli, I ri küzhomi khrikhro ta kütimi zo; a khro ri riwhimi ba, mo I hio ce, vote, zi lize puri vo tayo, kükremi pühce, vorite; zisü lize puri voriyo; mo a cetami yisü; hihi thi süte; zi lize puri thi süyo; zita. 10Jisu sü se küsüce, Pu malhü thi die Pu samüdzi kütako yisü, I nekoce potü süto, I Isrealmi dolü u kümülü hidü zho küti ngo mozo. 11Süze I neko ce po süto, nathoco mo nakroco thüma kükro vori die tüyo küdelü no Abraham, Isaac mo James neko züh ba tato. 12Süri cejü küdenuko-e kügü püh shozu küzühlü sü vato, sülü kra mo uhu thüzhe pü ba tato. 13Süsa Jisu kra mhu küzhoo yisü, n sholü votate, mo no mülü küyi bi die süo po n yo tsüh küyio thiyite. Sidie po küsü tütü lü pu cetao sührho bata.
Jisu thüma kükro thi küsührho küsü
14Süsa Jisu Peter celü vori küyice, Peter cemi ne zu rüce zü die ngoyi, 15Süna Jisu süpü be nyi sü mo rüce-o lata; sidie süpü sü die puko shoyi thi bata. 16Süsa thüva vori küyice. Thümako küsü rüpü po u kübü küta kükro züh Puce vori; mo Pu zü püh lüno rüpü süko hu va; mo küthi künyiko thi küsührho sü. 17Sidie Isaiah sadzühküseo po thazü; Putho u küsü kümüzako mo u küthi künyiko khi püyi te; süzi die po püh kümüzüo thi tsühyi.
Sadzi küthomi külhü
18Süsa Jisu thüma krode püh Pu hupü küba ngo küsüce, puko potasü lishico ku tano die Pu zü khasü. 19Sücesü lüsiküsethomi püh Puce vori die Pu yisü, Kümütha-o no kühopühra vo sheri I nsa müdzi tole, zisü. 20Jisu pu yisü, müsührüko ri uce ne, mo tüyo rako ri u kro ne, eli thümanuo Pu pi kha thothü küyi thiri di; zisü. 21Müthaküyimi kükremi püh ri Puce, Nyepoo apo vo apo khrüh va mürate; zita. 22Eli, Jisu pu yisü, a sa müdziyite, mo küsako po utho küsako khrüh vate, zita.
Jisu tükhra kükha küva
23Süsa Pu püzu lü küyice Pu müthaküyiko pu sa müdzita. 24Sücesü Yhie züküzholü tükhra kümüre thi süri, mo tükhra küyeri küta na züküzho rükhü tho püzu-o whüyita, süri Pu züh zü zo. 25Sücesü müthaküyiko Puce vori Pu küsüh die sü, Nyepoo hako küla süte, hako kata tozü te; zita. 26Süsa Pu süko yisü, Yhie! Neko kümülü kütsako, neko dipüh na müprüh ri zota-a? Sidie pu süri die tükhra mo züküzho rükhü-o kükha va, süsa rütü züh ta. 27Eli thümako u malhü thi die sü, thüma hihi dipüh bi küti mapüh ta shehe! Tükhra mo züküzhotho ri Pu khüzüh küta hi, zita.
Jisu mi küna yo thürüküsü hu küva
28Süsa Pu süo prüsü lishico Gergesenesmi cejülü tso küyice, küsü rüpü po u kübü pü kütami küna mhakhre lüno pari Pu züh küsühyi, unyi zhosü püh kümüre thi die mipüh ripo ta sü sholü vori yi sü bata. 29Sücesü Yhie unyi se die sü; Jihova nuo Jisu; No hanyi züh dipüh thi ta? No putü tso kümolü ha müthi münyi to vori yo me? zita. 30Sücesü thüvo kro künye püh vo rapeco mha ngüti ta rü; 31Thürü küsü rüpüko Puce u müzhemülo die sü; “No ha hu sü lize ha hu püh thüvo kroo lü süte,” zita. 32Süsa Pu süko yisü, ye tate, zisü, Süna puko ta pari die tasü thüvo kroo dolü lüta; sücesü, Yhie, thüvo kro süo ta rüthü sü dzüküzho shice thikha lü prü die dzülü mülhü khri tso va. 33Sücesü süko kükhüko ta nadelü vo die mha dipüh püh thita sheri mo küsü rüpü po u kübü pü küta yo dipüh thita sheri küti posü. 34Süsa Yhie! Nadelü thüma mütü Jisu züh küsüh tozu die prarita; Süsa puko pungo küyice Pupo ta puko rüna prühta no die Puce shota.
Chakhesang Chokri Naga New Testament © Bible Society of India, 2015. Used by permission. All rights reserved worldwide.
