Matthew 10
10
Müthaküyi kürikünako
1Süsa Jisu Pu müthaküyi kürikünako ci püh Puce süyi die, puko po müsakümo rüpüko huyi küve, küthi künyi mo küsü kümüza kükrekre ti mütü thi küsührhoyi küve küku püh puko prü sü. 2Süze kütsüh küsü kürikünako za hikohi; Kürao Simon lie ciyo küti-o mo pu sazüh-o Andrew, Zebedee nu James mo pu sazüh-o John; 3Philip mo Bartholomew; Thomas mo Matthew khazhonu kükhrüo, Alphaeus nu James, mo Thaddaeus, 4Canaanmi Simon, mo Jisu tü küsüo Iscariot Judas sa.
Mi kürikünako kütsüh küsü
5Jisu-e mi kürikünako kütsüh die pukoce; Neko mülükümomi sholü vohi; mo Samaritanmi rüna pühlü ri lü hite; 6Eli tasü Israelmi müdi küva koko celü vote, 7Mo neko vo küyice; tüyo küde münoto taho; zi küti posüte; 8Küthimi thi küsührho süyi, leprami thi küsührho süyi, küsami phu mürhüh sü, küsü rüpüko hu vayi; neko müthu ngoyi mo müthu püh mi prü süte. 9Ne presa bühlü suna, mori rüka mo presathi pühri pü tahi; 10Mori ne rüvüh lakho, ne bola küna, ne pheku mori ne thü ri püh tahite, kükrenamoli, mhaküthimi-e uva ngoti züzo kütina. 11Süze ne rüna nadelü lüri mori natsühlü lüri, sopüh celü vo zü shi küti kütso die voyi, mo lata kümothe ce sülü bazoyite. 12Süze no ce sülü lüküyice galiphi püh ce sülü süte; 13Mo ce süo putü lize ne liphi po ce sülü ba küyio thiyi, süri ce süo pütü mo lize ne liphi po ne yo la vori kütao thiyite. 14Mo thüma kühopühri ne zühyi muta lize, mori ne zhopo rünyi mu ta lize, ne ce süo lü mori rüna süo lüno ta pari küzüce, ne pheyo nyophu kükhu vate. 15I neko ce potü süto, zünyo küti küto tüsonha Sodom mo Gomarrah nyi kümüjoe rüna süo kümüjo ceri yheyi rüyi ku zoto.
Kümüthi kümünyi bi küto dzüh küpo
16Yhie, Tüko-e sace dolü küvo bi I neko kütsüh sü to zü ho; nekoe tünyhi do küve bi zoyite, mo mükhro zho küve biyite. 17Eli nekoe thüma yo münuyite, kükrenamoli süko neko tüpüh mülhiko kühulü süto, mo puko synagogueko lüno neko vüto tina. 18Mo mi aza na neko züh küzhoko mo küdeko mhuzülü voto, kükrenamoli süko ri mo mülükümoko mhüzülü ri zhopo püh thisü kütona. 19Eli mi neko tü küsüce, neko dipüh bi die mha po to sheli küti lü ne lü künyi thi hite; kükrenamoli putü vori küyice nepo dipüh po toshi küti khasü to tina. 20Sücesü nethono moli neko Poo Rüpüo nelü kübao tho mha posü küto na. 21Sülize u sazüh-o tho u züra-o tüsü mi po dokhritoü po-e u nuneko tü sü to; mo u nunekoe u krüneko mütsu süri die puko tüpüh mipo dokhri to. 22Mo aza na mi mütü po neko mütsü to. Süri yhie zoba pu küla tso küyio külayi to. 23Süri mi rüna hi-olü ne müthi kütace ta rüna kükrelü vo tayi; kükrenamoli I neko ce po süto; Thümanuo küvori mhüzü neko Israel rünakolü vo tsoyi külho na. 24Müthaküyioe pu kümütha-o ceri zhoku mo, mori ceta-oe pu nyepoo ceri zhoku mo. 25Müthaküyioe pu bi mo ceta-oe pu nyepoo bi küyi sasü tsüh zo, Mi celü nyepoo thori yisü Beelzebub litaze, pu celümiko yisü dithili-e cita?
Sopüh müprü zü shi küti
26Süna süko müprüh ta hite; kükrenamoli mhapühri sühpra mi mhüngo thi modie whü püh ma küta di, mori mipo se mo küto na küva püh ma küta di zo. 27I küzühlü nekoce po küsüko nekoe püh küvelü posü te; mo neko nyilü mükhrüh po küsüko pühpra cetu-o se süte. 28Sülize ne mo hio dokhri va zori ne rüpüo dokhri vayi külhoko müprüh ta hite; eli mezalüno ne rüpüri mo ne mo ri müka vayi kütoo müprühyite. 29Tsükhra küna püh presa püh khriyo mome? Süri neko Poo müdo tazo kümosa süko pühri rütu cejü prü tayo mo. 30Eli ne piyo ne pithapriko mütü ri phi tsoyite. 31Süna neko müprüh ta hite, ne tsükhra kükro ceri ne ma neku tina. 32Süna thüma kühopühri thüma mhüzülü aza phra yo lize I ri tüyo küba a Po mhuzülü pu za phrato. 33Süri thüma kühopühri thüma mhuzülü aza phra mu tayo lize, I ri tüyo küba a Poo mhuzülü pu za phra mu tato.
Küzüküve mori zesho süh küvori
34I küzüküve kha cejü sü küto na kü vori lüta hite, I küzühküve moli zesho khasü to küvo ri zo. 35I-e mipo külükre die unu po upo mütsu, unupü po uzu mütsu, umhüpü po unapü mütsu zi kütona küvori zo. 36Sidie thüma püh ngomu-e putho pu cekrolü süri to. 37Kühopüh ri aceri pu po pu zu khrüku yo kütimi sümi a thüma thi sümo, mori pu aceri punu mori pu nupü khrüku yo lize pu a thüma thi sümo. 38Süze thüma kühopühri putho pu cross püh mo die asa müdzi timi, a thüma thi sümo. 39Thüma kühopühri pu kürhühro mükrü püh pu züthiyi künyimi pu süo müdi vato; süri thüma kühopühri aza na pu pho müka müdi va lize, pusüo ngo layi to. 40Kühopühri neko zühyi yo kütimi a zühyi yo, mo a zühyiyo kütimi a kütsüh küsüo ri zühyi yo. 41Sadzühküsemi za lü sadzühküsemi zühyi yo kütimi sadzühküseo zhokhro ngoto. 42Süze thüma kühopühri müthaküyimi zalü zükohe pühri püh küzhoshüh hiko mipühri da sü lize, I nekoce po süto, Pu mhapüh ceri pu zhokhromüdi va lho.
Chakhesang Chokri Naga New Testament © Bible Society of India, 2015. Used by permission. All rights reserved worldwide.
