wandījo 49
49
Yakobo na bitūnja bakwe
1Hūna ū Yakobo ūbitana a bitūnja bakwe; ūhaya, “Bing'we ibilingagi aha namuwīle īyo īlang'wilongele kū shikū ja kū būtongi.
2Bitūnja ba ng'wa Yakobo
ibilingagi mundegeleke
ū sīng'we ū Isilaeli.
3Bebe, Lubeni, ūlī ng'wana wane
wa kwandya, ūlī būdūla wane,
lūmeng'ho lwa wandījo wa nguzu jane;
Ūlī ntongeeji ū ng'wikūjo,
nū mu būgaagaanu ūlī ntongeeji.
4Ūbange minzī gatalembeelaga,
alīyo ūtūtongeela hangī,
nguno ūkalinha ha būlīīlī bo ng'wa so:
Ūkasosohaja ha būlaalo wane.
5“Simioni na Lawī bene ba shikūlū
na shizuna jigi;
ī shū jabo shilī shilanga sha
kūtūmamīla kwiboneela.
6Ee, būpanga wane ūtizūbiza
na lūbanza nabo;
būpanga wane īngaga ū ng'wigele lyabo.
Nguno baabūlaga banhū mu
būpelanu wabo,
būtīnagūla matimba ga nzīkū kūlwa
wibonya wabo.
7Leke būzung'we ū būpelanu wabo,
nguno wabūbi no;
pyī nū būkalī wabo,
nguno wa nyakenaagūji.
Benabo leka nabasalang'hanīje
mulī Yakobo;
bajimīīlīle mulī Isilaeli.
8“Yuda a baana ba ng'wing'we
bakūkūkumīlīja;
ū nkono gwako gūkūbīnza nhingo
ja banishi bako.
A baana ba ng'wa so bakūbiza
baakūkwinamīla bebe.
9Ee, Yuda ūlī ng'wana wa shimba;
ng'wana wane wafumile ū kwihīīga.
Abange shimba yalembeelaga
Īkūkūngīlīga, gītī shimba ng'hīma;
nani ū wa kūnkomya?
10Ū būdūla wa būtemi būtalang'wīnga
Ū Yuda,
ū nang'ha gwa nyatemi gūtī gwa kwīnga
mu magūlū gakwe,
kūshisha ize ūyo gūng'wigeleelilwe
kūbiza gwakwe,
ūyo igelile kwigwiwa na mahanga.
11Akūkūnga nzobe yakwe ha nzabibu,
nū ng'wana wa nzobe wakwe
ha nzabibu gwawiza.
Akūfula shizwalo shakwe mu divai,
ī myenda yakwe mu mininga
ga mizabibu.
12A miso gakwe gakūbiza na būūza
būpiile kūtinda divai,
na a mino gakwe gakūbiza gape
kūtinda mabeele.
13“Ū Zabuloni akūzenga kū mbalama
ya nyanza,
abize būkolelo wa meeli;
Ī sī yakwe īkūbīmbīkanwa na Sidoni.
14Ū Isakaali ng'wene nzobe ya nguzu,
īlembeelile yalindaga kūbūūcha miligo.
15Ūlū alabūbone ū wiza w'ipandī
lya kwifuula kwakwe,
nū wiza wa sī yakwe,
akwinamya ibega lyakwe alinde nīmo
gwa kūbūūcha;
akūzunya ū kūtūmamiwa bo nguzu.
16Ū Dani akūbiza namuji wa
banhū bakwe,
gīt'umo jilī ng'anda jingī
ja Baislaeli.
17Ū Dani abange ng'hoboko īlī hihī
n'ipanda,
ng'wenūyo ng'wene ibambahili
lichaamīka mu nzīla,
īlyo līkalumaga ndaamhī
kū mashiigina
kūshisha ū ndamhīji wagwa sagaalī.
18Ee SEEBA, nangūhīlage ūnipīje.
19Ū Gadi akūdumīlwa n'ibità
lya banishi,
alīyo akwilwisha nabo,
kūshisha akūbapyena,
bang'olekeje mashiigina.
20Ū Asheli ī shilīwa shakwe
shikūbiza sha būhondo,
akūbiza na shizeeze sha kūdūla
kūlisha batemi.
21“Ū Nafutali ng'wene mhala
ya kū matogolo,
īyo īkabyalaga baana bawiza.
22Ū Yosefu ng'wene nzabibu gwa
matwajo mingī;
gwenūyo gwene nzabibu
gwa matwajo masoga,
ūyo gūzwīlile ha lūzwīlo lwa minzī;
gwa matambī galandaalile
higūlya ya ndugu.
23Balasi baalī bang'wilumīlwa
ng'haya kūndumīla,
būng'wītīla wanishi bakūnasaga.
24Alīyo ū būta bokwe būtatelile,
na a makono gakwe gatanogolekile,
kūlwa kūguzuhiwa na nkono gwakwe
Ū wa būdūla,
ū Mulungu#49:24 Mulungu: Ū mu shandīkwa shaho na kale lītīho a henaha ī lina ‘Mulungu’ alīyo ū mu maganiko ga ng'wa Yakobo lyalīmo; hūna lūūlū lītūūlilwe ho kūlwa kūgunanha kasomele. wa ng'wa Yakobo;
kūlwa kūguzuhiwa nū Ndīīmi,
ūyo alī Shiganga sha ng'wa Isilaeli.
25Kūlwa nguno ya ng'wa Mulungu
wa ng'wa so,
ūyo akakūgunanhaga;
kūlwa nguno yakwe ū wa būdūla bose,
ūyo akakūfuuhaga kūfuma
ng'wigūlū kwigūlya,
ja ha sī, na mu gatī ya sī,
na ja konhya baana,
na ja nda ya būbyīle.
26Ī ja ng'wa so jene
jawiza no,
jitindile wingī wa mbango
ja bakūla kale,
nūūlū a ba kale gītī ngūlū.
Jitindile wiza bose ūbo būkilongaga
kūfuma kū ngūlū ja kale.
Ī jose jenīji jiikale ha ntwe
gwa ng'wa Yosefu,
jing'widīkīle jimpīndije hose hose,
ūyo asolilwe kūfuma mu
baana ba ng'wawe.
27Ū Benjamini ng'wene mhūūge
saasagūji,
ī dilū akalyaga sha kūpondya;
mhīndī lyabiza igabanha īsho
wadimaga.”
28Ī jenīji h'ī ng'anda ikūmi n'ibīlī ja baana ba ng'wa Isilaeli, hama ī yenīyī h'ī mihayo īyo akabawīla ū saabo aho alībafuuha; wang'winhaga būlī munhū ījo jalī jing'wigeleelilwe.
Kūcha kwa ng'wa Yakobo
29Hūna ūbalagīla alībawīla gīkī, “Ū Nene nalī hihī kūcha naje kū bang'wise. Mukūja mukanijīke ūko bajīkilwe bataale bane, ū ng'wipilinga lya ng'wilaale lya ng'wa Efuloni ū Ng'hītī, 30Ī lipilinga īlo līlī ng'wilaale lya Makipela, hihī na Mamule ya Kanaani; īlo Abulahamu akagūla kūlwa nguno ya kūjīkīla, kūfuma kūlī Efuloni Ng'hītī, hamò nī lilaale lyaho. 31Ū ng'wenūmo h'ūmo wajīkwa ū Abulahamu nū nke ū Saala, h'ūmo wajīkwa nū Isaka nū nke ū Lebbeka, h'ūmo nanjīka nū Leya. 32Ī lilaale nī lipilinga gakagūlwa a gose kūfuma kū Bahītī.” 33Ū Yakobo aho wamala ū kūbinha ī shilagīlo a bitūnja bakwe, ūduta magūlū gakwe higūlya ya būlīīlī, hūna wesheema lwa kūmalīīja; ūtwalwa kū bang'wawe.
Sukuma Bible © Bible Society of Tanzania, 2019.
