Mateyu 9
9
Duweja abuá axazauwaksánane janshi akzukuá
(Mlk 2.1-12; Lk 5.17-26)
1Ekí zegatogueni Duwe Jesú kanuwak juldungueniki akbateshi mokue ají kuíbuldu Kapeldahúmka akbaték. 2Exaki ezua sigí abuá axazauwaksánane ixabakak akshañga apebukueja Duwek akualdák. Ekueja Duwejañki se akzukualdixa alduna iyashiji akualdaklde katuakna, abuá axazauwaksánanek ekí akbeyá:
—Nasukuá, zeñ itshanwá. Sha matshixa nuk mixabetá ni gukú.
3Ekí aldukatshakna, anuñka guiyaba shizhixakuejañki kauwizhéñgaba ekí izhgabeyá: “Ekí negatshake Jate aguáñ izhbashi mual negashá.”
4Ekí ajañguatuka Duwejañki katuñguakna ekí kaklduká:
—¿Jinak shi ekí kutám agatsaldi minajañgú? 5Guake, ¿mielde shi aguáñ jibañ akzaldi, abuá axazauwaksánanek akbenaka na? ¿“Sha matshixa nuk mixabetá ni gukú” azhi “izhgaté xaldeki newa” shi akbenaka na? 6Ne naski, Jatetshi Asukuága ixagabaldeklduge, jai kagik sha atshixakue axabetaldikuamak niuwi naxaldé mimatuñshaldikue.
Guaguenik abuá axazauwaksánane ekí axaldék:
—Izhgaté, mixabaka guxa xaldeki mijuldi newa.
7Ekí akbeyatshaga amak izhgaldaguenik ajuldi ne. 8Guatshakna saldiñga tuatoxekuejañki: “¡Sakí shi ekí janshi akzukú!” ajañgui na, Jateja ekí agatsaldi atshexañ ezua kágubak kama agene shalda Jate za akldé akzamakga agazukuá.
Duweja Mateyu shaxaldiyaldixa izhgakuxá
(Mlk 2.13-17; Lk 5.27-32)
9Duwe Jesú exa zhinik neyatogueñki, nas#9.9 Mateyu Duwe shagitixaja kalta gauwatshak miyagaba aldéñ shalda guagatshak “nas” guagazhá. Guatshak kaugiañ zʉxaitshatshak kágaba guagakuamake aldéñ shalda guageñki “nas” guaka. Mateyuk natú. Naski sáñkaldak akiyalzabine zhiksuikuge nalgukuakna nagasabiyaldiéñ ité natuñguake ekí naxaldék:
—Shi maldagitiyaldixa nak nagapa kuizaldi.
Ekí naxaldeguake izhgaldagukueniki amak agapa neyaldá.
10Guñguenik Duweki najuxa zatogueñga, matshuwi najanañga sáñkaldak akiyalzabine zhiksuikakue, axautshi sha atshixa akuakakue jiaga aldagueniki, Duwe shi kagitixakue juizhi yaldashi asaldá. 11Ekí zaté zʉnatuatshakna, paldiseyukueja Duwe shi kagitixakuañ ekí zʉñkaldék:
—¿Shi miñkaldixaki sakí zhinik shi sha atshixakue na, sáñkaldak akiyalzabine zhiksuikakue juizhi zatók?
12Ekí nukajakna, Duweja kakbeyá:
—Se nekueki méldiku kagajuezhazhé. Akze, mulbatá akzekakue guana, méldiku kagajueshka naldashá. 13Ekí Jateja guaklde: “Kágubagaba guañ ajañgui ishkajanashixá na akldé naxatshakue kajañguge. Ne béyakze nagakuagakue za kajañguazhúge nzha.”#Os 6.6; Mt 12.7 Ekí guaklde na, sakí guashi guaklde tuakue ni mimajañgukú. Akze, naski mieldekue axaldáñgaba “jian sha izhokú” itshankakue Jatek axakualdinaldiamak kaldiyal nagazhánuge. Ekí ne, sha atshixakue niñkauwañki sha ajanashixa abajiñga abaja xaldeki Jatek axakualdinaldiamak kaldiyal naklduge ni mitú.
Duweja shaxaldixakue jinak asáaki ashekualdazháne
(Mlk 2.18-22; Lk 5.33-39)
14Guñguenik Juañ nik majaukshakue shagitixakueja Duwe axaldaguenik ekí agalduká:
—¿Sakí shi nasʉñki, paldiseyukue nañki Jate muldetua axazguagakualdiamake záaki katshekue ne, ma shi maxaldixakue zʉnake asáaki anuñka ashekua akuazhé na?
15Guake Duweja ekí nuxa kakiyó:
—Nauwisaná sigí numa nexaldixa naldieñki matshuwi abuzatiakue akbeñka. Gualdinik aldéñ kagapañga nogeñga abuzál nakldekue ¿sakí shi itshani ashekualdaka na? Guanaldixa sigí numa neklde ishkapañgui awaldeyaldiéñ ldiuwañ zegatshak zʉnake apebukueki itshani, asáaki aldoxaldixa naldashá.#9.15 Ekí zʉñmeyatshake ekí guashi naldaka. Duwe Jesú aldéñ shaxaldixakuek kagapañga noxaldieñki asáaki ashekualdazháldixa, ne axajuekuatshak zʉnake asáaki ashekualdaldixa.
16Ekí kakbeñguenik jiak, ekí kakbeyá: “Ni meja zhakuá abisa ne duebak agapa guazhé. Azhi ekí guatshake, akldé zhindu axazgualdixa. Ekí guatshak míñgaki akldé nusakuá gualdixa naldashá. 17Ekibeñga na, ni meja alditsha tanagáldega moñkú#9.17 alditsha “vino”, moñkú “cueros” duebak kuashazhé. Azhi ekí kuashaldiake tanatshak moñkú dueba kualbenatshake, alditsha jiaga nuk zuldatshake, mozhuañga itshuana guaka naldashá. Ekí atshaka nakna, alditsha tanagáldega moñkú abisak za kuashakue. Ekí guanake mozhuañga alditsha, moñkú nañga nusaldeshi itshuanazháldixa naldashá.”#9.16-17 Ekí guagatshake ekí guashi naldaka. Nauwibamakue ajanashixa nane, kauwijí shibaldamaki zhakuá azhi alditshaboñku dueba jana ne guashi. Guatshake Duwe kagik zʉnekualdal naklde shaldaki, guiyaba abisa zʉñkabashatoguakna, zhakuá azhi alditshaboñku abisa jana ne guashi. Guatshak zhakuá duebak abisa agapañguatshak axazauwazhámakbeñga na, nasʉñ Duwe namak kajañguatshak, duebakuetshi shibaldama na ají na zhikjiuwagába izhogakue.
Kumí shuane, munzhi mulbatá akzeka
(Mlk 5.21-43; Lk 8.40-56)
18Ekí guaxalga nogueñga na, ezua sáñkalda juldiútshiga Duwe stak axaldagueni nuldu axayoshi ekí akbeyá:
—Nabunzhiki kaiga guana nakshuizhá ni gu. Nak ma exa maldeyaldinik káuxalda ipa makuatshake “mokue izhgaté guaka shakldá” na jañgukú.
19Ekí akbeñguake, Duweki izhgaldagueni nasʉñ shi kagitixakuañ juizhiñga agapa ne. 20Amak neyatogueñga na, ezua munzhi, ají mulbatája guxa guñguenik 12 kagi itsegatuka nalguák Duwe shaneldi ga naguenik zhakuá sʉxak juguá. 21Aldéñki “Duwetshi zhakuá nuxaki jugualdatshake, se nakzukualdixa shakldá” jañguñguák ekí juguá. 22Amak juguatshaga na, Duweki neyatogué zhikbateguenik ai munzhi tuatshak ekí akbeyá:
—Nabunzhi, zeñ nuxa itshanwá. Mañki “neskaitshaka shakldá” najañgui, alduna maldeshéñ zhinik na se mikzék ni gu.
Atshak zhinikga na, ají mulbatá iskaiti, muldetua se akzék na gua.
23Guñguenik Duwe sáñkalda tshuxa neyatshake ezua shuigatshak ajanashamakga, kuizi ajuishi, káguba duwá zhikzhe nakldekueki jaldáñ shuane axabauwaté Duweja tuatshakna 24ekí kaxaldék:
—Jai zhinik nuk akzʉxaitá guwíñ. Kumíki shuigazháne, egaba kabashi guatogák.
Ekí aldukatshakna, shuane kakualguakna Duwe iyashimá. 25Guatshak jiaga, Duweja kakzʉxaitshiñguenik kumí shuane nugaldi juldungueni etshi káuxalda akpanatshaga mokue izhgaté na gua. 26Ekí kumí izhgaldakshane shalda na, saldiñga eñgui baxe nahauxa izhukakueja ai shalda izhgabejiñgaba na ashekualdá.
Uba isékue uba ikukshá, zukuagagálde zukuakshá
27Duwe Jesú exa zhinik neyatogueñki, mozhua sigí uba isékue axapañga aldeji saldiñgaja nukandana agatsaldi ekí iyaxauldaldá:
—Mañki nauwibama sáñkalda Dabítshi atukuaga#9.27 Jinake Dabítshi atukuaga agabeyazhá. Jateja ezua etshi atukuaga zʉnekualdal zʉñgakaxaldixa guaklde kakué nalguák. maldé, guañ maldazʉnajañgualdí.
28Guñguenik Duwe juk juldungueni, ai mozhua uba isékue axaldagatshak ekí kaklduká:
—¿Maiñ minajañguxáki uba minkukshanakldegamak shi minajañgú?
Guake akiyayó:
—Akze, amak zʉñkatshamildaka na kabajañgú.
29Ekí akiyayokuñguakna Duweja ubak kaugikepañgui ekí kakbeyá:
—Ake, maiñki “uba nazikukshaka shakldá” najañgui, alduna nazishaminamak uba minkuká ni gu.
30Ekí kakbeyatshaga uba kekukshá.
Gueni Duweja keshkaldukshi ekí kaxaldék:
—Ekí uba mimekukshanuge meja akwashegazháldiamak kama ilshiji miñgualdí.
31Ekí kaxaldeklde nalgué jiaga, exa zhinik aldeyapanatshaga sakí Duweja kaxatshane shalda saldiñga eñgui baxe nahauxa akuashiñgaba aldeyaldá.
32Exa zhinik agazaxaitatogueñga na, ezua sigí jisétshi aldunaja ijuldunatshak zukuakshaksá guane nalgué Duwek akualdák. 33Guake Duweja ai alduna izheñshatshaga na, jiak mokue zukuaxaldá. Guakna saldiñga atuatoxekuejañki “¡sakí ekí se akzukuxá!” ajañgui na:
—¡Jai nauwisanákue Isayél kenañga ni mitsák ekí zegaté tuañkáalde giemi nzha! —na akuaxá.
34Akuagatshak paldiseyukueja niñkauwañki:
—Ejiéki jisé ají aldunakue aksanekaja kama agegatshak guana ekí ají aldunakue izheñshashá —na nalda axakuaxá.#Mt 10.25; 12.24; Mlk 3.22; Lk 11.15
Kágubakueja Duwe iyapandana kakzexaldixa
35Guñguenik Duwe Jesúki eñgui baxe kuíbuldu nahauxa juwí izhajuizhaldegeñka “Saldiñga netshi Jateja kágubakue janshagatsaldi kaksanexaldixa nakldá” kakbeji na mizhatoxá. Ekí kakbeji na, káguba mulbatá saldiñga nalda kakzekakue keskaitshi, se akzegagáldekueki se kakzukui na mizhatoxá.#Mt 4.23; Mlk 1.39; Lk 4.44 36Duweja kágubakue duwá zhikzhe ashé katuatshakna, guañ kajañguá. Jinake ekí kajañguazhá. Ekueki jubeju aksaneka, numañ tuñka naldakí kakzegakldegamakbé kagusani, jie kakzeshi “sakíga ni atshanakldék” akldegagáldekue katuwák.#Nm 27.16-17; Jer 50.6-7; Ez 34.5; Mlk 6.34 37Ekí katuwakna shi kagitixakuañ ekí zʉñmeyá:
—Tek gakue matshuuwi gugakuegaba negatshak, jiba atshakakue auxaga naldakí nahamakbe, matshuwi nepanaldixakue nañga naldatshak, nas shalda kakbeyakakue auxabé naldakí. 38Akna, tetshi jáugukuik jiba axatshaldixakue akldé gagakue akshishakuamakbé, nauwijí Sáñkaldaja nas shalda guaxaldixakue gaxaldiamak miyakshishaldí —na zʉñmeyá.#Lk 10.2; Jñ 4.35
© 2015, Wycliffe Bible Translators, Inc. All rights reserved.
