Matayo 4
4
1NKAKO Yesu aotombama la Bolimo nd’etekeleke wete amekame la Satana. 2Aki’nd’okilaka toma betso l’embile ntuk’inei, nd’afeka aoloka nzala. 3Ko bomeki aoy’okel’ende, Nga w’ole Bona owa Nzakomba, sanga wae bikenje bine bifaningwa mampa. 4Lolo ende aokela, Joi jokotama, Bonto ntaikaka la mampa kika, lolo la wengi joi lindola lim’omwa wa Nzakomba. 5Lim’ako Satana aolotomba nd’onanga w’oeko; ko aoloila nd’aliko b’ilombe ya Nzakomba, nda nsonge; 6ko aolokela, Nga w’ole Bona owa Nzakomba, usa we mongo nd’ase; ele joi jokotama,
Ende ifotoma bikima bikande nd’eloko ekawe:
Ko bifokotomba nd’akata’akiyo,
Nyango likaka likawe lifoiman’ekenje.
7Yesu aolokela, Joi linkina jokotama, Tomekake Yawe Nzakomba ekawe. 8Lenkina Satana aolotomba nda ngongo ea ntale mongo, ko aoloeneya bakulaka bauma ba bise biuma, ko la jilangi ja bakulaka’ako; 9ko aolokela, Ayaka onkusamel’emi, ko ommemya, njifokoka toma tone touma. 10Yesu aolamba, Imana Satana; ele joi jokotama, Memya Yawe Nzakomba ekawe, ko osaela nk’ende kika. 11Lim’ako Satana aolocika; ko bala, bikima bia loola baoy’okambya.
12Aki Yesu ookaka Yoane aotungama, aolimana, ko aocwa nda Ngalilaya; 13ko aolimana Nazaleta, ko aoy’oyala nda Kapalanauma, ntutama la lieke nd’ekako bia Zebulona la Napatali; 14wae joi liki Yesaya owa boteli otefelaka jiele, aokela,
15Ese ea Zebulona, l’ese ea Napatali,
Ntutama la lieke, wij’a Yoladane,
Ngalilaya ea Bafaya,
16Banto bakokit’ase nda wilima
Benaki fole e’enene,
Ko fole engesaki el’iyo
Bakokit’ase nda wiji la lililingi j’iwa.
17Lim’ako Yesu aanga losanga nsango, akela, Loututala baoyi’obe; ele likulaka ja loola jotutama.
18Aki Yesu olande nd’eselo ea lieke ja Ngalilaya, aolena Simona otangema Petelo la Andelo okosangi l’ende nd’ooci, bayus’otai wa nse nda lieke: iyo baki baasi ba nse. 19Ko aolakela, Lonkim’emi, ko njifokel’inyo wae loyaleme baasi b’anto. 20Nkakoyoko baosundola betai, ko baolokima. 21Ko aki’nd’ocwa, aolena bam’afe, Yakobo, bona owa Zebedayo, la Yoane okosangi l’ende nd’ooci, baki nda wato la Zebedayo ise ekiyo, bayosambe betai bekiyo, ko aolaeta. 22Nkakoyoko baocika wato l’ise ekiyo, ko baolokima.
23Yesu aokenda nda bise bia Ngalilaya biuma nkaana, ayolake nda basunagoga bakiyo, ko ayosange bosako w’olotsi wa likulaka, ko ayoikya banto nkangi ko la tongoi gilenge la gilenge. 24Koko lokumo lokande lolongwana nd’ese ea Sulia euma: ko baoloyel’iy’auma bandokaki nkangi la biefe bilenge la bilenge, l’iy’aki la bademona la bensinga la nkangi ea nkataana: ko aolaikya. 25Koko bitukuluku bi’anto baolokima lima Ngalilaya, la Dekapoli, la Yelusalema, la Yudea, la wij’a Yoladane.
Bonkanda Wa Nzakomba W’aeyoko © Aliiance Biblique de la RD Congo, 1958.