Mateo 5
5
1Habamwene bibumbu, bakamine mu ngulu; habashalele, bana be ba bukishi babafikile kwadi. 2Babulwile mu kanwa mwe kwibalambukisha’shi: 3Mwabi kwi balanda mwishimba, mwanda bufumu bwa mwiilu mbwabo. 4Mwabi kwibo abanyeng’eshimba, mwanda abakekala basambībwe, 5Mwabi kwi’bo bahohele, mwanda abakahyana nsenga. 6Mwabi kwi’bo be na nsala na nyota bia kululama kwishimba, mwand’abakekuta. 7Mwabi kwi’bo be na lusa, mwanda abakakwatshilwa lusa. 8Mwabi kwi’bo be selelee ku mashimba, mwand’abakamono Efile Mukulu. 9Mwabi kwi’basungwa ba bantu, mwanda abakaudikwa’shi, mbana b’Efile Mukulu. 10Mwabi kwi’bo abamweshibwa malwa ha mwanda wa kululama kw’eshimba; mwanda bufumu bwa mwiilu mbwabo. 11Mwabi kwanudi h’ābenukaa, na h’ābenusabula, na h’ābenudimbila madimi oso, ha mwanda wande. 12Sehelai, nusangala bikata, mwanda bwedi bwenu mbukata mwiilu, mwanda babadi abamweshe malwa batemuki anka biabia bababadidile kwibedi kwenu.
13Anwe nwi mungwa wa hanohansenga, anka su mungwa ubatukuluka, aukatu naminyi? biabia tawi bisumanga, anka kwiukatusha hashi, na kwashinwa ngwa ya bantu. 14Anwe nwitata dia hanohansenga. Kibalo kībakwe ha ngulu ta kifībwa. 15Bantu namu ta ’bosha etala kwiditula mushi mw’ekumbo, anka hanundu ha mutshi w’etala, biabia adimunyika kwi boso be mu nshibo. 16Etata dienu dikale kumunyika biabia ku mpala kwa bantu’shi, bamone bikitshino bienu bibuwa, batumbishe namu Shyenu E Mwiilu.
17Tanutentekyeshanga’shi: Ami nafiki kushimangisha mukanda-wa-bishila, sunga ngwa batemuki: Nki mufikye kulwisha, anka kwiyikumbasha. 18Mwanda binyibinyi, nenulungula ’shi: mpā n’ahakashimina eīlu na nsenga, sunga kahelahela ke ntshantshantsha, su ke nyunyunyu ka mukanda-wa-bishila takakashimina sunga kahelahela kenyi, mpā na haukakumbana. 19Ese muntu akashūla kamune’nka kahelahela ka yino milangilo, na kulambukisha bantu biabia, e akatemunwa bu kentshantshantsha mu bufumu bwa mwiilu; anka ese muntu akwiyilama na kwiyilambukisha, na mwinyi akatemunwa bu mukata mu bufumu bwa mwilu. 20Mwanda nenulungula’shi, su kululama kw’eshimba kwenu ta nkukile kwa bafundji-ba-mikanda na Bafadiseo, tanukatwele mu bufumu bwa mwiilu.
21Nubahushishe bibakwile kwibakala’shi: Toihanga muntu, anka ese muntu akaihanatadi hehi ha kwelwa mu kimu. 22Anka’mi nenulungula’shi: Muntu ese e na mukwabo nsungu bisumanga, tadi ha kwelwa mu kiniu, anka muntu ese akatemune mukwabo Laka, tadi hehi ha kutushwa ku kilumbeno kia bakulu, anka muntu ese akākula’shi: Obe we mulubi, tadi hehi ha kwelwa mu kālo ka Ngehena. 23Binyibiabia su ofiki na buntu bwobe ku kitahilo, otentekyeshe hanka’shi, mukwetu e nami mwanda: 24Olekye buntu bwobe ku mpala kwa kitahilo, wende, okabadile kulombana na mukwenu, biabia ofikye olambule buntu bwobe. 25Olombashe n’odi n’e luhuna bukidi, h’okī n’e mwishinda, tala, kutshina’shi, su kihindji kikampanda, winyi n’obe luhuna akakufisha kwi nsushi, na nsushi akakufisha kwi mpulushi, n’obe okelwa mu nshibo ya lukano. 26Binyibinyi, nakuamba’shi: Tokatuka mwanka mpā na hokafuta kishio kioso, sunga ekuta dimune kushala.
27Nubahushishe mwa kibakwilwe kwi ba kala’shi: Tokitanga lusandji. 28Anka’mi nenulungula’shi: Muntu ese atala mukashi meso mu kumukyebe, bahu kukita n’e lusandji kala mwishimba die. 29Su eiso diobe dibalume dibakukokosha, tondobola’dio, wedisumbule, mwanda wa kushimisha kintu kimune kia mbidi yobe, nkukila kwelwa mbidi yobe yoso mu Ngehena. 30Su mboko yobe yibalume yibakukokosha, tshibayo, weyisumbule, mwanda kushimisha kintu kimune kia mbidi yobe nkukile kwelwa mbidi yobe yoso mu Ngehena. 31Kibakwilwe’shi: Ese muntu takatusha mpian’e, amuhe mukanda wa bulunda bubafu: 32Anka’ mi nenulungula’shi: Muntu ese akatusha mpian’e anka su ha mwanda wa lukyebanokyebano, biabia amwikasha busha lusandji, na yawa muntu akabamba yawa (mukashi) mutushwe akekala bu sha lusandji namu.
33Nubahushishe kabidi kibākwile ba kala’shi: Totshihanga bia madimi, anka kitshinamitshiho yobe kwi Yehowa. 34Anka’mi nenulungula’shi: Tanutshihanga, sunga kwa mwiilu, mwanda di luhun’a nsulu lw’Efile Mukulu. 35Sunga kwa ha nsenga; mwanda nyi kitulo kia ngwa ye; sunga kwa Yelusalema, mwanda ki kibalo ki kituka kia Nfumu mukata. 36Sunga kutshiha’shi, mpā na bi ku mutwe w’obe, mwanda oshīuku kwalula lunyenye lumune su mbu lutoka, su mbu lufita, ooo. 37Anka misambo yenu yikala’nka’shi, uolo, uolo, ayoyo, ayoyo; yoso ayikidi yaya, ayifiki ku bubi.
38Nubahushishe mubalungudibwe’shi: Eyiso kwī’yiso, eino kwi eino; 39anka’mi nenulungula’shi: Tanukingisha bubi, anka muntu ese akakuhila luhi kwitama dibalume omwalulwile dingi namu. 40Su muntu akwimukisha ku kimu, akwata nsumishe yobe, mulekyele ekotshi diobe namu. 41Muntu ese namu akukwiyisha luendo lwa kilometre kimune’nka, nda n’e bibidi. 42Au akutekye kintu, omuhe; na kwi’wa akyebe kukwashima tomufutalanga.
43Nubahushishe mubalungudibwe’shi: Ikala na mwin’obe kifulo, shikwa e n’obe luhuna. 44Anka’mi nenulungula’shi: Ikalai na kifulo n’abo be nenu ngo, tulai mwabi kwi’bo abenuuele muloa; nukita kwi benushikwa, bibuwa, nwibatekyele’bo abenumwesha malwa. 45Bianudia kwikala bana ba Shyenu E mwiilu, mwand’E atushā nguba kwi bantu be bubi na kwi bebuwa, anoshā mpeshi kwi bantu balulame na bashi balulame. 46Mwanda su anwe nwi na kifulo anka kwi be nenu kifulo, bwedi bwenu bwi kunyi? Basangishi-bamilambu tabakitā hamune su? 47Su anwe anwimuna namu anka bakwenu, anukile bangi bantu na minyi? Basangishiba-milambu namu tabakita biabia su? 48Binyibiabia nwikale bakumbane, bu bi Shyenu E mwiilu E mukumbane.
© 1952 Alliance Biblique de la République Démocratique du Congo