Genesis 9
9
God-im Sivunniuġutaa Noah-mun
1 #
Gn 1.28. God-im quviasaaġusiamik uqallautiŋagaich Noah-lu iġñiŋiḷḷu uqallakłuni, “Iñugiaktuanik miqłiqsiyumausi, kiŋuvaaġiniaqtasi iñuuyumaut sumipayaaq nunami. 2Iluqatiŋ niġrutit, tiŋmiat, paamġuqtuat nunami, iqaluiḷḷu iñuuniaqtut iqsigilusi. Tavra qaisaurut iḷivsiññun aŋalatquvluġi. 3Niġrutipayaurat niġiyumiñaġisi. Niġisuuravsitullu nauriatun, iluqaisa qaitkitka ilivsiññun niqigitquvlugich. 4#Lv 7.26, 27; 17.10-14; 19.26; Dt 12.16, 23; 15.23.Atausitualuk uvva niġiñiaŋitchaqsi, auqaqtuaq niqi; taamna pitquŋitkiga qanukkii iñuggun tavrani augmi ittuq. 5Iñuk iñuaqpan, tatavsaqtauniaqtuq. Tatavsaġniaġiga tuqqunmik niġrutipayaaq iñugmik tuqutchiruaq. 6#Ex 20.13; Gn 1.26.Iñuich savaaguŋarut irrusiqaqługich God-itun, tavraasii iñuaqtuaq iḷaŋannik tuquttaksraġigaa allam iñuum.
7 #
Gn 1.28. “Ilivsiḷi iñugiaktuanik miqłiqsiyumausi, kiŋuvaaġiniaqtasi iñuuyumaut sumipayaaq nunami.”
8God-im uqallautigaich Noah-lu iġñiŋiḷḷu, 9“Inillairuŋa sivunniuġunmik ilivsiññun suli kiŋuvaaġiniaqtavsiññun, 10suli piqatigilugich iñuggutiqapayaaqtuat—tiŋmiapayaat niġrutipayaallu—iluqaisa niuqatigiŋarasi umiaqpagmiñ. 11Ukuniŋa uqalugnik sivunniuġutiliuqtuŋa ilivsiññun: Unniqsuqłiiruŋa qakuguunnii iluqaġmiŋ iñuggutiqapayaaqtuat suksraunġiqsautqigñiaŋitchut uliqpakun; qakuguunnii uliqpaum suksraunġitkigñiaŋitkaa nuna. 12Nalunaiñŋutausaġlugu isuksraiḷaamun inniaqtuaq sivunniun inillaktaġa ilivsiññun suli iluqaiññun iñuggutiqapayaaqtuanun, 13iḷisiruŋa pimñik tulimmaġmik nuviyanun. Nalunaiñŋutauniaqtuq sivunniutigiramnun nunamun. 14Nuviyaliqsituaġupku aasii nuiḷuni tulimmaq, 15itqaumaniaġiga sivunniuġutigiraġa ilivsiññun niġrutipayaanullu. Uliqpaum qakuguunnii suksraunġitqigñiaŋitkaich iluqaisa iñuggutiqapayaaqtuat. 16Tulimmaq nuituaqpan nuviyani, tautugniaġiga aasii itqaġlugu taimuŋa inniaqtuaq sivunniuġun uvamniñ suli iluqaiññun iñuggutiqapayaaqtuanun nunami. 17Tavra taamna nalunaiñŋutauniaqtuq sivunniuġutigiramnun iluqaiññun iñuggutiqapayaaqtuanun.”
Noah-lu Iġñiŋiḷḷu
18Iġñiŋich Noah-m niuqatigiŋaraŋich umiaqpagmiñ ukua Shem-lu, Ham-lu, Japheth-lu. (Ham aapagiraŋa Canaan-gum.) 19Tavra taapkua piŋasut iġñiġiraŋich Noah-m maŋŋuġigaich iluqaġmiŋ iñuich nunamiittuat.
20Noah, nunami nauruanik savaaqaqtuaq, nautchirriiqqaapialaŋaruq siiġñanik wine-liaksranik. 21Imianikkami iḷaŋanik wine-gum, imiŋasiŋaruq, annuġaiyaŋaruq, aasii annuġaiḷḷaġmi nalavluni tupiġmiñi. 22Ham-gum, aapauruam Canaan-mun, tautukkamiuŋ aapani annuġaitchuaq, anivḷuni kiliŋagaik aniqatiigni. 23Tavraasii Shem-lu Japheth-lu uligaaq tuiqqagmignullaavlugu, kiŋuppiaqtuqhutik tupiġmuŋaruk aasii matuvlugu aapaktik, tununŋavlutik, tautuguŋił̣ł̣ugu annuġaiḷaq. 24Noah qaurigami, iḷitchuġikkami Ham-mun nukaqłigmun suŋatilaamiñik, 25uqallaktuq,
“Piaġiiññaq iḷiḷi Canaan-mun, iġñiŋanun Ham-gum!
Kivgauniaqtuq aniqatiimiñun, atchiksuagułhaaġluni kivgaŋiññiñ.
26Nanġaun qaisauli Ataniġmun, God-igiraŋanun Shem-gum!
Canaan kivgauniaqtuq Shem-mun.
27Qanuqtuq God-im Japheth naupkaġliuŋ!
Kiŋuvaaŋich iñuuqatauyumaut iñugiraŋiñun Shem-gum!
Canaan kivgauniaqtuq Japheth-mun.”
28Uliqpaanigman Noah iñuuvsaaŋaruq 350-ni ukiuni 29aasii tuquvluni 950-tun ukiuqtutilaanikkami.
Iñupiatun Mumiksat Uqalugiksuat (North Slope Iñupiaq Bible) © American Bible Society.
All rights reserved.
Bible text from the North Slope Iñupiaq Bible is not to be reproduced in copies or otherwise by any means except as permitted in writing by the copyright holder:
American Bible Society, 101 North Independence Mall East, Floor 8, Philadelphia, PA 19106-2155 (www.americanbible.org)
