Pupuꞌ 4
4
1Enang tee Aadama Iivi-ninka ba'aang ninka otoresi teni kempo'kuu'. Teketa tooto' narung donkaani paravuu' tenie, miring Keini'.#4:1 Iiburu-nupoong biikaang kara-koo miring “Keini'” tee “Nkavansi” pina' aurompari otong, ee'noko tee miring “Eebelo'” tee “Domang-kera'” miru'ari otong. Ee'noko aa'puu' tenie, “Ninge narung donkaani paravansing Ovoringe pakumuio'.” 2Napo' kemu'kana' tenie donkaani Keini'ke baara'ma'nung paravuu' miring Eebelo'.#4:2 Iiburu-nupoong biikaang kara-koo miring “Keini'” tee “Nkavansi” pina' aurompari otong, ee'noko tee miring “Eebelo'” tee “Domang-kera'” miru'ari otong. Eebelo' sipisipi'nanka tanata deemparu' ee'noko Keini' mintoong nkonara.
3Dama'ke tee Keini'ke tee-koo keenkeenanka-koo sinananka nkavurira Ovoring-koo boontunamparu'. 4Ee'noko Eebelo'ke sipisipi'nanka-koo nii'ning tutuna'ning-kooning dato'urira menaanka dovang-nairu ninka boontunamparu'. Ee'noko Ovoring Eebelo'koo aa'na' dotuaru' ee'noko tee-koo bakaang-koo boontunang-koo. 5Teka Keini'koo ee'noko tee-koo bakaang-koo boontunang-koo dotuaravaruu'. Ee'noko Keini' tee'koo aa'na' iirai oing oraka' oro'paru'.
6Ee'noko Ovoringe aa'puu' tee Keini', “Da' aming-koo iirarora oing oraka' oro'daramang? 7Da' tampa' boontunantaravaing deeko' ning da'koo dotumaravaing, ape' aung? Teka tee dake kapoo' orara nkoveko deeko' tee orara aarumo maamuari otong da' kurumaa'koo. Nka dake purintarara puru'eaing tee.”
8Teketa Keini'ke tee baara'ma'nung Eebelo' bokuvuma aa'puu', “Poai io' tokoi pora'ke korokoromareai.” Ee'noko tenang pora' bereta Keini' tee-koo baara'ma'nung-koo Eebelo'koo dau kokoroarara teka tavuma dupisi'uu' tee.
9Tenang Ovoringe aa'puu' tee Keini', “Eebelo' arerai tee daara'ma'nung?” Ee'noko Keini'ke aa'puu', “Ninge noru'ampa' tee, ai' ning tee ntara'ma'nung tare-koo si'meu'nunge?”
10Ee'noko Ovoringe aa'puu', “Nka dake aming nkoveing? Tee daara'ma'nung bakaang ereng-koong aurong tee ning-koo biromparamang kansi'keta. 11Emu' tee da' barakosi'dama aa'damaang: Anketa kansi'keta da' tenkeniaing, a' te' kansi'noo' daara'ma'nung-koong ereng tuuvuio' naivuinoo' daka dake dupisi'eio'. 12Da' tee pore'doma kansi'koo keempeko taamang tampa' nkoaravauka'nung ee'noko tokoo dakanoo' masipo' oto'deruauka', tamung kansi'koo kororaramatoaing.”
13Teketa Keini'ke aa'puu' tee Ovoring, “Ee baka', aung tee kiimata pankaing masikung. Dake ameio' orarunsie dupisi'muu'naang. 14Dake tee ning e'mung bata'meing anketa kansi'keta, ee'noko dakaang biraanke-ita baku'meinge. Ee'noko tokoo nkanoo' oto'memuauka'; tamung kansi'koo koromarama'noaing. Naninge tokoa oomura deeko' tamung anutua dupisi'muaing makosie.”
15Teka Kumponinge aa'puu' tee, “A, tee' deea'. Nii'nung naninge da' taruma dupisi'duaing deeko', tee naning tee ninge aa'na' dau basinoo' kiimata avompaing.” Ee'noko Ovoringe Keini'koo taa'ni'anta sipuu' naninge tokoa oovura tavu'neeng-koo tee. 16Teketa tenang Keini' Ovoring-ankoita tenkenuu', ee'noko bera Ata'nanu' tampaama-nameng-koo beu' teketa Iideni'keta duaa' pomanoo'aapenameng-koo.
Keini' Bakanaving
17Emu' tee Keini', osi pankaing kanivui otoko, ba'aang kempo'kura bauring donkaani paravuu' miring Iinoke; ee'noko Keini'ke tee osi opura napo' Iinoke namirimpuu'. 18Ee'noko Iinoke tee Irat bauma. Tee Irat tee Meusiel bauma, ee'noko Meusiel tee Metusiel bauma, ee'noko Metusiel tee Leemeki' bauma.
19Ee'noko Leemeki'ke kenaanka manikumaara nampuretu'. Nii'nani-koong miring Eda, ee'noko nani Sila'. 20Ee'noko Edai Jabal paravuu', Jabal tee teing pora'ke nanaama boromaka'nanka tareariko'ning biuma. 21Tee Jabal baara'ma'nung miring Jubal, ee'noko tee Jubal tee teing nantoong kovi dovang kiita kompaamaing biuma. 22Dama'ke napo' tenie Sila'ke Tubokein paravuu'. Tubokein tee teing nantoong baraasi˜ dovang-koo aini aa'ning-koo kapoo' nkonuka biuma. Tee Tubokein ba'mari miring Naama.
23Nii'na'mung Leemeki'ke tenaanka ba'aankaara nauvurema aa'puretu', “Eda naanka Sila' ee, nkaang kara tampa' masika' taaramereai. Naninge narunge nemakai ning baikemuio' ninge dupisi'ansieeng maku'koo, ee'noko ba'marange mero'koo piavorora deeko' ee' nauarampaing, 24‘Baa naning Keini' dupisi'uaing aa'na' dau basinoo' kiimata nkavuaing, ee'noko naning ning tamuaing bakei aa'na' aa'na' kiimata dau basinoo' kompuaing.’”
Set Bakanaving Tampaving
25Dama'ke napo' Aadama ninka otoresi ba'aange tooto' narung donkaani napo' paravuu' miring Set,#4:25 Iiburu-nupoong biikaang kara-koo miring “Set” tee “Avuavu'” pina' aurompari otong. ee'noko tenie aa'puu', “Kumponinge tooto' narung napo' amuing Eebelo' pari'antanung tee Keini'ke dupisi'uu'nung.” 26Dama'ke napo' Set bauring ponto'aru' ee'noko Iinosi' tampuu'. Tenang ee'nang nantoonge Kumponing Iaaue#4:26 Tee miring Iaaue tee Iiburu'na' miring Kumponing-koong; “O'noi O'nomaung” pina' auromparamaung. tampaama dootuu' tutumpariru'.
© 1994, Wycliffe Bible Translators, Inc. All rights reserved.
