Mat 4
4
Ana nnehm gare Jisos
(Mak 1:12-13; Luk 4:1-13)
1Etingi Etohko kehm yehke Jisos, song kak go elka emahng re nnehm gar-e.#4:1 Jems 1:2; Hib 4:15. 2Eji Jisos ma bade elne njal nfung atahl abal, owo njal kehm-e yame. 3Nnehm kehm bake, ba tong-e re, “A lꞌjol Mmon Esowo, tong atal nyaa siingi abred.”
4Jisos kehm-e faange re, “Bo nyono go nwer Esowo re, ‘Abred nya nya sang wahnge nne kpo kpin, á kpo bel elkpin go ellum anehng anehng ni lohng go nnyo mi Esowo.’ ”#4:4 Jon 4:34; 6:27.
5Nnehm kehm rodo Jisos, tahm a ne go mbarebare ejahbe, song kun-e go elkong etahk Esowo, 6kehm-e tongo re, “A lꞌjol Mmon Esowo, yehb, wo ba gbo go ndi! Tibre bo nyono go nwer Esowo re,
“ ‘Esowo bahke tongo enjel enye bada na.
Bo bahk-a gbiiri go bo abo,
eji a lꞌkꞌba jahre akpade enya go eltal.’ ”
7Jisos kehm faange re, “Bo tꞌtob nyon go nwer Esowo re, ‘Ka gare Esowo, Ntul ewa!’ ”#4:7 Mat 27:42.
8Nnehm kehm kpe rod Jisos, tahm a ne go ewong ji sahb wꞌwahre, fere tib-e ajahbe kpee nya li go njini, a ellub ni bo kpi no, 9kehm-e tongo re, “M bahk-a kake nyaa kpee, a lꞌjamme alahng kak-m.”
10Owo Jisos kehm-e tongo re, “Nnehm, tahm-m go esamahr! Tibre bo nyono go nwer Esowo re, ‘Esowo, Ntul ewa wo wo, a bahk-e jo kak. Ye ntahngtahng wo, a bahke fere jo lok-e.’ ”#4:10 Jems 4:7-8.
11Nnehm kehm-e soro yake. Babenjel soro ba kak-e ebo.
Ana Jisos bomo alum Esowo abungu go Galili
(Mak 1:14-15; Luk 4:14-15)
12Eji Jisos wuku re, Jon, bo m-e kak ngbekobo, á kehm tahme eje, song rehng go Galili.#4:12 Mat 14:3. 13A kehm tahme go Nasaret, fere song lene go Kapenium ji jolo kohlo eto ji Galili, go ndi nyi abone Sebulon, a ba Naftali, 14eji lꞌlohko jol jang jang ana nnyehnamahr Aisaya bungu no re,
15“Ndi nyi abon Sebulon,
a ba Naftali,
ba lene ejang bio bi eto ji Galili li no,
egbuk Jodan
jehko go Galili jio ji ane ba ki nyi Esowo,
16ane bao ba jehk go ejannge
ebnyehn egburu ellennge.
Ane bao ba nong go emel elkv,#4:16 Elt 26:18.
edi ebkehme bo lennge.”
17Bomo ngare nyio asongo Jisos kehm kehme etib ebe tiingi re, “Senngen njahm go egahne abiafem! Tibre etul bi Esowo ebkabbe.”
Ana Jisos lungu abasahre nsahre, ane na ani
(Mak 1:16-20; Luk 5:1-11)
18Eji Jisos jo jen go nkpe eto nyi Galili, á kehm nyehne abasahre nsahre, ane na abal, noko jolo Saimon ji bo jo lung-e re Pita, noko, bo jo lung-e re Andru ji mmonannyehn Pita.#4:18 Jon 1:35-42. Bo kake erim alahb. 19Owo Jisos kehm tongo bo re, “Tahmen toon-m, m bahk-n limi ń fere jo bim ane.” 20Bo kehm soro tahm arim ebo sa, tahm toon-e.#4:20 Mat 19:27.
21Jisos kehm kpe sehng asongo, kpe song nyehn ane abal bako. Noko, bo jo lung-e re Jems. Noko, bo jo lung-e re Jon, mmonannyehn Jems. Bo jolo abon Sibidi. Bo woomo go egbang, jo baade arim ebo, a Sibidi nde ebo. Owo Jisos kehm lungu bo. 22Bo kehm soro tahm egbang sa, tahm nde ebo sa, tahm toono Jisos.
Ana Jisos jo tib, fere jo lim aneb ayam, bo nob
(Luk 6:17-19)
23Jisos kehm tahme, jo yannge go Galili kpee, jo tib ane go bo ntahk ero, fere jo tiingi nnoobo etib bio bi etul bi Esowo, fere jo lim ane, bo nob elkohn eyam abehng abehng.#4:23 Elt 10:38. 24Ane kpee ba jolo go Siria wuku kan elgahm ene, owo bo kehm koko aneb ayam kpee ba go ege, ba jo yam ajoobo ayam tvv, fere jo nyehn ajoobo arem, a ane ba bele abi atohko go bo a ntim, a aneb eyam atatehk, a ane ba ma banne. Jisos limi bo kpee, bo nob. 25Ellong ane gbalee ba jo toon-e, egom jindiki lohng go Galili, egom jindiki lohng go Dekapolis, egom jindiki lohng go Jerusalem, egom jindiki lohng go Judea, egom jindiki lohng go egbuk Jodan jehko.
© 2012, The Nigeria Bible Translation Trust and Wycliffe Bible Translators, Inc. All rights reserved.
