Luk 19
19
Sakiyas ndramak ta akohok luk ta takis
1Jises ili bolo kon Jeriko. Iy edek san amwenen ta iu. 2Ya ndramak ari nyaran Sakiyas udu aliy. Iy ndramak ta atondrok iri lau ta akohok luk ta takis. Ya iy ale tan lakou solo-an. 3Iy badeh, aseken handru ta atou bada Jises, arile iy badeh, mo-on labai, ya eme koroha iri lau solo-an badeh, iy batou Jises bwe. 4Eme iy sakaniy i bwena ta san kameh Jises edek eme aliy, ya iy nyikidi kei ari aloh, Sikamo.
5Jises edek eme isos bahandra kei nane iy udu aliy, ya madan anya ki loke badeh, atou iy. Eme Jises tiye i tan anya, “Sakiyas, ou ame andri suwi, na dah kameh jo anya kewek asiu tam.”
6Eme iy ales eme andri, ndrinen badeh sekesek labai, ma iy kuhi Jises i asiu tan. 7Ya eme iri lau atou badeh, iri nunu-uh nunu-uh anya, “Aha kanyolom se! Iy badeh, ilih amadin asiu ta ndramak ari ta amekes kandriyen ndra-in.”
8Sakiyas eme ales ere loke udu asiu tan, tiye sahou i ta Laban anya, “Laban, ou ndratou! Na dah kameh jo edeu lakou tek ranah mara-ei kameh i tiri lau tiri lakou bwe. Ya, i buku none jo mene ndrabene-ei rayah lakou tiri ndrame tek, idah kameh, jo edeu lakou san hasan ja, i la-u toro mene ja.”
9Eme Jises tiye i tan i buku doh, “Na len dah Kindrei ndrasebenei oro ndramak badu asiu dah, tasah na dah, ndramak dah, ndrasan lundriye Abraham. 10Tasah, Nadu Ndramak Awas eme andri dah badeh, ta asilah ma ta aseben are oro taku ta kandriyen ndra-in.”
Sahou sokek ta luk ta amekes lahou
(Metiu 25:14-30)
11Iri lau anuhun iy asehek sahou nane dah kahis le badeh, iy asehek sahou sokek i tiri, tasah iy ndrame mirihik ta Jerusalem. Eme iri lau lomondra anya, idah kameh Kindrei atondrok kon dan ai? 12Eme Jises anya, “Na len ari badeh, ndramak batun ta boho kamen ra-em badeh, anya kili kon munyak ari udu len, ta iri kadeu iy kasahan kabin ta atondrok iri, ano iy barame hamon ja. 13Eme iy luhi oro lohowan tan ma ronoh ame, ya iy atehei luk ma luwa (K200) i mine oro. Udu bolo luk ma luwa (K200) doh badeh, iy ari ari akohok lunek (K20). Ano iy tiye i toro i buku doh, ‘Ado kadeu luk doh, ki ta amekes lahou, ya kaliu bundruwen keme hamon, winiya le jo barasahan.’
14“Arile, iri lau badu kon tan baseken iy asahan kabin bwe. Eme iri suni iri lau rayah are hamon tan ala, ta tiye i tan anya, ‘Ahi bwale ahi ndramak kede-eh asahan kabin tahi.’
15“Arile, bwe adeh, iy ndrasahan kabin ai. Ano iy eme hamon eme kon. Eme iy suni sahou ili toro lohowan mene iy edeu luk i mine oro ame, ya iy ndremenya oro ta sabe handru oro ndraluwi ndrame na luk mene.
16“Eme iy ari ma mwena ili anya, ‘Tinan tek, luk tam mene, badeh, jo ndraluwiy luwa (K200) ja ndrame hawe lunek (K20) mene eme minek.’
17“Eme kabin tan anya, ‘Lohowan tek, ou mwasin handru. Ou tondrokei luk nadu bwisik asahan sola, ou kameh atondrok kon tinan ronoh udu baha tondrok tam.’
18“Ano iy ari eme ja anya, ‘Tinan tek, luk tam mene badeh, jo ndraluwiy rawa (K100) ja ndrame hawe lunek (K20) mene eme minek.’
19“Eme kabin tiye i tan anya, ‘Ou kameh atondrok kon tinan limeh.’
20“Ano iy ari eme ja anya, ‘Tinan tek, luk tam mene asah idah, jo su-iy na ndrari kolau, ma tone udu abe-en ou. 21Jo badeh, inoh ou, tasah ou badeh, ndramak ta losen. Ou akohok lakou laleyah ma akohok lakou badu bwisi limem bwe.’
22“Eme kabin tiye i tan anya, ‘Ou lohowan ndra-in! Jo kameh edeu maha-an ewek tam in hamon ta sahou tam. Ou tanam jo badeh, ndramak ta losen. Jo akohok lakou laleyah ma akohok lakou badu bwisi limek, jo atah bwe. 23Ya, i buku sah handru, ou batehei luk tek bala bolo buk ta ndrahu luk bwe? Ya, i buku none jo keme hamon badeh, jo winiyan andrei ma hawe bundruwen ale.’
24“Ano iy tiye i toro lau nane ales are mirihik dah, anya, ‘Ado kakuhi luk ma lunek (K20) tan, ya katehei ki ta ndramak nane luk ma luwa (K200) udu minen.’
25“Eme oro lau tiye i ta kabin anya, ‘Tinan taso, iy mene ndrandrei luk ma luwa (K200) bwena mene o!’
26“Arile, ndramak tinan dah, tiye i toro ja anya, ‘Jo katiye tado, are lau oro mene ndrakohok bwena, idah kameh oro akohok i la-un ja. Arile, are lau oro sese le udu aliy, idah kameh kuhi mari ano iu. 27Ma ado katiyani are lau oro mene anya jo sasahan kabin badeh, kame, ya ado kadai oro kamak kare madak.’ ”
28Jises asehek sahou doh, ano iy edek in bwena toro iu ili Jerusalem.
Jises edek ili asahan Jerusalem ma iy leheya iri mwan ma badih udu bolo asiu tinan ta Kindrei
(Kalan 19:29–21:38)
Jises edek eme Jerusalem i buku kabin
(Metiu 21:1-11; Mak 11:1-11; Jon 12:12-19)
29Iy edek eme mirihik ta kon Betapes ma Betani, udu loboho kesehe mandrei aloh Olip. Eme iy suni uru lau tan la-uh ma tiye turu anya, 30“Ah kala kon udu bwena ta to badeh. Ya ah ala bolo kon le kameh ah atou donki ari loweu, ari ndramak bamanyah bare bwele-en bwe le. Ya ah katolowei malou, ma ah kasiriniy keme dah. 31Ya, i buku none are lau kandremenya ah anya, ‘Ah anya katalou malou tan ta sasah?’ Ah katiye ki buku doh, ‘Laban gok udu tan.’ ”
32Eme uru lau tan nane ala badeh, atou udu aliy, i le buku none Jises nane ndrasehek turu. 33Ya uru talou malou kahis le badeh, iri lau ta nadu donki dah, anya, “Hei, ah anya katalou donki badeh, ta sasah?”
34Eme uru tiye i tan anya, “Laban gok udu tan.”
35Eme uru sirini iy ili hawe Jises, ano oro lowosani kolau toro lawe-en badu bwele-e awin toro i konan, ma bwese-ei Jises manyah udu la-un. 36Eme iy edek ili badeh, iri lau ame asin awin tiri lawe-en ya iri talaha in san.
37Ano iy edek eme mirihik ta kon tinan, san ili andri ili bwilin ndrondro-ou Olip. Eme iri lau solo-an badu hamon tan badeh, iri sekesek tinan labai, ma hawe iri atudun nyara Kindrei na boho iri i loken, ta lahou tinan mari mene iri ndranyolom ndra-au. 38Ma iri anya,
“Kasekesek ki ta kabin!
Kasore nyaran!
Iy eme ta nyara Laban!” Wari 118:26
“Mondrei udu kandrah,
ma lomadan ki ta Kindrei badu loken!”
39Eme oro Parasi rayah ado bolo iri lau nane, tiye i ta Jises anya, “Ndramak ta leheya, ou abarah iri lau tam kandru-uk!”
40Eme iy tiye i toro anya, “I buku none oro kandru-uk kameh iri bek kameh katubuni iri, ma iri kasarakau.”
41Eme iy edek eme mirihik ta kon tinan Jerusalem, ma iy anyolom badeh, iy eden ndranye Jerusalem. 42Iy anya, “Jo badeh, aseken labai na len dah, ado katanan kandriyen ta amekes mondrei. Arile, bwai, ndramai ta mada ado ai. 43Na len eme kameh iri lau ta amekes bahun ewek tado kameh tabadah munyak eme loke anyek kon tado. Ma iri kameh awudi kon tado mari, ma turuki madasan mari awek bolon. 44Iri kameh adai ado ma hawe nadu ado oro. Kon ma asiu tado kameh atokos, ari lakou winiyan bado bwe. Tasah, ado banyolom tanan ta Kindrei bwe, ta aseben ado bwe.”
Jises udu asiu tinan ta Kindrei
(Metiu 21:12-17; Mak 11:15-19; Jon 2:13-22)
45Ano Jises ili bolo asiu tinan ta Kindrei, ya iy atikah iri lau asih lakou are aliy, au a manan. 46Eme iy tiye i tiri anya, “Buk ndrabun tiye i buku doh,
‘Asiu tek dah, asiu ta amekes salom labai,’ Aisaya 56:7
arile ado ndramesekei asiu tek badeh, ndrasahan
‘asumwe iri lau ta bahana.’ ” Jeremaya 7:11
47Eme na len mari badeh, Jises leheya udu asiu tinan ta Kindrei, arile iri tinan tiri pris, ma hawe iri lau ta leheya kandriyen tiri Juwis, ma hawe iri lau batun tiri lau lomondra ta anya kadai iy. 48Arile, iri takaleh madasan ta kada iy labwe, tasah iri lau mari badeh, tawi sahou tan.
© 2001, Wycliffe Bible Translators, Inc. All rights reserved.
