Luk 14
14
Jises udu asiu ta Parasi ari
1Na len ta amunyau ari, Jises aimon nyamon udu asiu ta tinan tiri Parasi ari. Eme iri badeh, atehei mada iri udu tan. 2Eme udu batalan badeh, ndramak ari badeh, sik pis udu ta bohan hawe katin. 3Eme Jises ndremenya oro Parasi hawe iri lau tanan ta leheya kandriyen tiri Juwis anya, “Mwasin ta amekes ndramak amwenen na len ta amunyau deh bwe?” 4Eme iri badeh, ari sahou bwe. Ya eme iy tawi ndramak dah, ma mesekei iy amwenen ma hawe tiye iy iu.
5Ano Jises ndremenya oro anya, “Ya, ki buku none ari nadu ado, deh ari katin haka tado oks, kataku ki bolo lek na len ta amunyau. Ado tana ado, sebwe ndramak nane winiyan tawi iy ma aluwi iy eme loken nadeh? Handru, iy ibo gok na len ta amunyau, tasah buku none iy bamekes bwe eh, iy kameh imek neh?” 6Eme oro ari sahou bwe.
7Eme Jises atou oro lau ame ta nyamon dah badeh, soso-on ndrahu manyah tiri lau tinan udu mirihik ta nyamon, ya eme iy asehek sahou sokek i toro anya, 8“I buku none ari ndramak katiye ou ala aimon nyamon ta molak hawen, ou badeh, sasoso-on sala bwena, hawe iri lau tinan. Koro-an ari ndramak udu bale iri kodo-oh ja, iri aseken iy. 9Ki buku i handru kameh, ndramak ta kati nyamon kameh suni ndramak ta tiye ou nane, ame kameh tiye tam anya, ‘Ou suri ou, ya ndramak dah kamanyah kudu badeh.’ Ano kameh bwilim ama andra-i, ma ou ala manyah are ndrobek. 10Arile, i buku none iri katiye ou ala ta aimon nyamon badeh, ou manyah are ndrobek. Ya i buku none ndramak ta kati nyamon eme atou ou kameh anya, ‘Kawas tek, ou ame manyah ame ndrahu manyah mwasin udu bwena kada-ah.’ Ma idah kameh, iri tinan kameh barala tanan ou ai, ta ou badeh, ndramak ari awas. 11Eme ya, i buku none are lau anya katudun iy ki loke, iy kameh ari nyaran bwe. Ya are lau amekes iy i buku iri nah nadu bwisik, idah kameh, nyaran i tinan.”
12Ano Jises tiye i ta ndramak nane kuhi iy aimon nyamon hawen anya, “I buku none ou awer nyamon tinan, badeh, ou sakohok iri kawas le, ma ou sakohok nadu tinem oro le, ma hawe ou sakohok lowam oro le, ma hawe ou sakohok iri lau lakou tiri solo-an, asiu tiri udu ka-u asiu tam le; i buku none ou akohok oro, idah kameh, oro akohok ou ala hawe oro ja, i saluwe ou mene akohok oro. 13Arile, i buku none ou awer nyamon tinan badeh, ou akohok iri lau tiri lakou bwe, ou akohok iri lau boha iri imek, hawe kati iri imek, ya ou akohok iri lau bada iri imek, ma hawe iri lau mada iri bwe, kawek kaimon nyamon hawem. 14Ya idah kameh, ou akohok nyosowan ta aliy. Tasah, iri badeh, lakou bwe, eme ya iri badeu saluwen bwe, arile idah kameh, ou akohok bundruwe nyamon tam na len iri lau mwasin amak, ame loken.”
Sahou sokek ta nyamon tinan
(Metiu 22:1-10)
15Eme ndramak ari badu bolo oro ta tukum ta nyamon tinan anuhun sahou Jises asehek badeh, eme ma iy tiye i ta Jises, “Are lau aimon nyamon udu baha tondrok ta Kindrei eme kameh, iy badeh, kasekesek.”
16Eme Jises anya, “Ndramak ari badeh, iwer tine nyamon, ya eme iy atehei sahou i tiri lau solo-an labai, ta ame. 17Eme na len ta nyamon amwenen, ndramak ta iwer nyamon suni lohowan tan ari ili, ta tandra-un iri lau mene sahou i tiri badeh, anya, ‘Ado kame, lakou mari ndra lokowaniy ndrano.’
18“Arile, iri mari badeh, ari bala bwe, iri anya tiri gok le. Eme iy ari ma mwena eme, tiye anya, ‘Jo badeh, tikisiy handru en, jo barasihinei bilin ranah ai, ya eme jo kili katou op.’
19“Ano iy ari ja ili tiye anya, ‘Jo badeh, tikisiy handru en, jo barasihinei bulumakau ma ronoh ai, ya eme jo ki-iu kaseu uru la-uh la-uh kase, ma kanone oro ta apou ndren.’
20“Ano ari ja eme anya, ‘Jo bawek bwai, tasah jo barala tasou ai.’
21“Ano lohowan dah, iu i hamon tandra-un ta ndramak ta iwer nyamon tan dah. Eme ndramak ta iwer nyamon nane dah, ibolosen, ma tiye lohowan tan dah, anya, ‘Ou ala suwi ala bolo kon badeh, kuhi iri lau tiri lakou bwe kame, ou kuhi iri lau mine iri imek hawe kati iri imek, ou kuhi iri lau mada iri bwe, ma hawe iri lau bada iri imek, ala ado loboho heh, loboho heh, bolo kon badeh, kame.’
22“Ano lohowan dah anya, ‘Tinan tek, sasah ou tiye badeh, ndrano, arile asiu baso bwe le.’
23“Ano ja, ndramak ta kati nyamon dah, tiye i ta lohowan tan anya, ‘Ou ala loboho san tinan hawe san bwisik hawe lobwilis badeh, tiye iri lau kame, ya bolo asiu tek kidih.’ 24Eme jo katiye tado kamwenen, idah kameh oro lau mene sahou i toro mwena badeh, winiyan baimon nyamon dah bwe.”
Ou anya asahan lau ta Kindrei, ou abudon kamwenen op
(Metiu 10:37-38)
25Eme ya iri lau solo-an badeh, are hamon ta Jises, eme iy tubuni batalan i hamon i tiri ma iy tiye: 26“I buku none are lau anya ki-in hamon tek, iy badeh, karuwani tinen uru taman, ma iy karuwani udun hawe nadun oro, ma iy karuwani nadu tinen oro mwan hawe badih. Ma hawe kohan ale, iy sabwerei labai ta aliy. Ya, i buku none iy abudon iri lakou doh tinan labai, badeh, iy ma nah bwisik kahis le, ma iy winiyan basahan lau tek bwe. 27Ma are lau mwan ma badih balokou iy ta imek bwe, ta ereu hamon tek, buku none ndramak ta imek iy kabwese kei tondreh tan amwenen, iy badeh, winiyan basahan lau tek bwe le.
28“Ya, i buku none ari tado anya katah bokok, badeh kameh iy winiyan batah bwena bwe op. Idah kameh, iy manyah mwena lomondra ta luk sabe kameh winiyan ta tahi asiu bokok, deh bwe. 29Ya, i buku iy banyolom bolo luk bwena bwe, ya iy katehei ndru kili ya bano bwe; idah kameh, iri lau atou kameh, iri kabobose iy anya, 30‘Katou iy, iy anya katah asiu ki loke badeh, bano bwe.’
31“O bwe em, ki buku none ari kabin kili kamekes bahun i ta kabin ari ja. Idah kameh iy manyah ma lomondra op, ‘Oro lau ta bahun tek ma 10,000 kada-ah winiyan adai oro lau ta bahun ta kabin ma 20,000 kodo-oh, deh bwe?’ 32I buku none iy winiyan bwe; ya iy kabin ari nane in ndra len kahis le, iy kameh suni oro lau ala tandra-un i tan ta bahun ndri-iy ai, oro kado le ai. 33I le buku aliy, i buku none are tado baruwani lakou tan mari bado api bwe, badeh, iy winiyan basahan lau tek bwe.
Sahou sokek ta ndras
(Metiu 5:13; Mak 9:50)
34“Ndras badeh, mwasin, arile i buku none nyakadan tan ki-iu, idah kameh, ou baramesekei nyiminye ndras doh barame hamon barala buku sah bah? 35Idah kameh, iy winiyan bakahei bala bwele-e munyak ta amekes munyak amwenen, bwe. Idah kameh akahei iu. I buku none ou are lau ndranyem udu aliy, ou anuhun!”
© 2001, Wycliffe Bible Translators, Inc. All rights reserved.
