Zãa 3
3
Jesu do Nikodɛmu
1-2Idũ ajɔ nŋu gɔ mɔkɔ gɔ í bɔ bi Jesu à ya kpoo Nikodɛmu. Mɔkɔu Farisii, nɔ wa jɛ inɛ akãi inɛ ngboi Zuifu ŋa. Iyi í to bi Jesu ŋɔi í ni, Mɛɛtu, à mà iyi Ilaaɔ̃i í bɛɛ wa i naa i kɔ nwa si cio. À mà bɛɛbɛi si na iyi í jɔ̀ inɛ gɔ kù wɛɛ iyi á yɔkɔ ku ce maamaake ŋa iyi ì ya maa ce bii kù jɛ Ilaaɔ̃i í wɛɛ do lafɛ̃ɛ. 3Ŋɔi Jesu í jɛaa í ni, ntɔ ntɔ ǹ wa n sɔ̃ɛi, nɔ a kù bí inɛ isɛ gbeejisia kaa yɔkɔ ku yɛ bommai Ilaaɔ̃. 4Amma Nikodɛmu í beeɛ í ni, inɛ iyi í la tã, bɛirei aa ce a búu má. Á nyi inɔi iyeɛ a bɛi a buu isɛ gbeejisia mái?
5Ŋɔi Jesu í jɛaa í ni, ntɔ ntɔ, bii kù jɛ inyi do Hundei Ilaaɔ̃i í bí inɛ gɔ, lafɛ̃ɛ kaa yɔkɔ ku lɔ bommai Ilaaɔ̃. 6Amanɛ amanɛi í ya bí, Hundei Ilaaɔ̃ mɔ hundei í ya bí. 7Ǹ sɔ̃ɛ ǹ ni, í gbe a bí inɛ isɛ gbeejisia. Amma maà jɔ̀ ideu ku muɛ biti. 8Fufu í ya maa cei do bii í bi, nɔ ì ya maa gbɔ ibaɛ, mà irei. Amma i kaa mà hai bii wa naa hee má jɛ bii wa bɔ. Bɛɛbɛ mɔi í yɛ do inɛ iyi Hundei Ilaaɔ̃ í bí fei.
9Ŋɔi Nikodɛmu í beeɛ í ni, bɛirei á ce ku ce. 10Ŋɔi Jesu í jɛaa í ni, awɔi ì waa kɔ inɛi Izirɛli ŋa si cio nɔ i kù mà yaasei ideu bɛ? 11Ntɔ ntɔ ǹ wa n sɔ̃ɛi, ide iyi à mài à waa fɔ, nɔ à waa jɛ sɛɛdai mii iyi à yɛ. Amma do nŋu fei, i ci ya jɛsi sɛɛda nwa ŋa. 12Ǹ wa n sɔ̃ ŋɛ ide iyi wa ce si andunya nɔ i kù dasi naanɛ ŋa. To, bii bɛɛbɛi, nɔ bɛirei aa ce i dasi naanɛ ŋa bii ǹ sɔ̃ ŋɛ mii ŋa iyi wa ce lelei Aɔ̃. 13Inɛ gɔ kù wɛɛ iyi í bɔ lelei Aɔ̃ bii kù jɛ amu Amai Amanɛ, amu iyi ǹ kita wa hai lelei Aɔ̃.
14Si bɛi Moizi í kɔa njo si jĩi í wuu lele si gbaau, bɛɛbɛ mɔi amu Amai Amanɛ kù nɛ bɛi á ce iyi a kù wu aram lele, 15ku ba inɛ iyi í dasim naanɛ fei ku ba kuwɛɛ hai tã. 16Ilaaɔ̃ í bi inɛi andunya ŋa jiida jiida hee í na ŋa Ama akãɛ ku ba inɛ iyi í dasiɛ naanɛ fei ku maà ce nfe, amma kú nɛ kuwɛɛ iyi ci ya tã. 17Ilaaɔ̃ kù bɛ Amaɛ wa si andunya ku ba ku yɛò taalei inɛi andunya ŋa, amma í bɔɔ wai ku ba inɛi andunya ŋa a ba faaba na saabuɛ.
18Inɛ iyi í dasiɛ naanɛ, Ilaaɔ̃ kaa yɛ taaleɛ, amma inɛ iyi kù dasiɛ naanɛ í yɛ taalei lafɛ̃ɛ tã, si na iyi í jɔ̀ kù dasi Ama akãɛ naanɛ. 19Í yɛ taalei inɛ dimi bɛɛbɛ ŋai si na iyi í jɔ̀ inya kumá í naa si andunya, amma inɛ ŋa à bi ilu kuku í re inya kumáu. À bi ilu kukuui si na iyi í jɔ̀ kuce nŋa kù sĩa. 20Ntɔ ntɔ, inɛ iyi wa ce laalɔ fei í ya cé inya kumái. Ci ya naa si inya kumáu ku ba mii iyi wa ce ku maà fita gbugbãa. 21Amma inɛ iyi wa too kpãai ntɔ í ya ce icɛɛ ŋai do idɔɔbii Ilaaɔ̃. Na ŋɔi í jɔ̀ á naa si inya kumá ku ba a yɛ mii iyi nŋu wa ce ti idɔɔbii Ilaaɔ̃i.
Jesu do Zãa
22Si anyii nŋu, Jesu do mɔcɔɛ ŋa à bɔ ilɛi Zudee. Aŋaò ŋa à ce bɛ ajɔ minji, nɔ Jesu í dasi inɛ ŋa inyi. 23Zãa mɔ wa dasi inɛ ŋa inyi ilui Enɔɔ, kɔkɔi Salimu, domi inyi í kpɔ bɛ. Inɛ ŋa à wasi ku koo siɛ nɔ wa dasi ŋa inyi. 24Waati bɛɛbɛ a kù dasi Zãa piisɔ̃ɔ titã.
25Ŋɔi mɔcɔi Zãa ŋa do Zuifu gɔ à waa ce kakɔɔ si buki iyi amanɛ á ce ku bɛi ku maaju. 26Ŋɔi à bɔ bi Zãa à ni, Mɛɛtu, ajɔɛ ì jɛ sɛɛdai mɔkɔ iyi iŋɛò ì wa icei idoi Zuudɛ̃ɛu, mà irei. Wee nsɛi nŋu mɔ wa dasi inɛ ŋa inyi, nɔ inɛ fei wa bɔ bi tɛɛ. Kù jɛɛ si ide kãma?
27Ŋɔi Zãa í sɔ̃ ŋa í ni, inɛ gɔ kaa yɔkɔ ku ba ngɔgɔ bii kù jɛ Ilaaɔ̃i í muaa. 28Iŋɛ taka nŋɛ ì jɛ sɛɛdam iyi ǹ ni n kù jɛ inɛ iyi Ilaaɔ̃ í cicau, amma à bɛm wai ku ba n cuaa wa. 29Inɛ iyi í nɛ abo titɔ̃ nŋui í jɛ mɔkɔ titɔ̃, mà irei. Amma kpaasii mɔkɔ titɔ̃u, inɛ nŋu á leekĩi ku maa gbɔ. Nŋu mɔ í ya nɛ inɔ didɔ̃ ntɔ ntɔ waati iyi í gbɔ imui mɔkɔ titɔ̃u. Na ŋɔi í jɔ̀ nsɛi amu takam inɔ didɔ̃m í kɔ̃. 30Kù nɛ bɛi á ce iyi bɛɛrɛi Jesu kù kɔ̃ɔsi, nɔ tom kù nɛ bɛi á ce iyi kù kaye.
Inɛ iyi í naa hai lelei Aɔ̃
31Nɔ Zãa í ni má, inɛ iyi í naa hai lelei Aɔ̃ nŋui í re inɛ fei. Inɛ iyi í jɛ ti andunya, inɛi andunyai, idei andunyai í ya maa fɔ. Inɛ iyi í naa hai lelei Aɔ̃ nŋui í re inɛ fei. 32Wa jɛ sɛɛdai mii iyi í yɛ do iyi í gbɔ. Amma inɛ kãma kù waa jɛsi sɛɛdaɛ. 33Inɛ iyi í jɛsi sɛɛdaɛ, í jɛsi iyi Ilaaɔ̃ í jɛ ilu ntɔ. 34Inɛ iyi Ilaaɔ̃ í bɛ wa idei Ilaaɔ̃i wa fɔ, domi Ilaaɔ̃ í muaa Hundeɛ do inɔ akã. 35Ilaaɔ̃ Baaba í bi Amaɛ nɔ í daa mii fei si awɔ. 36Inɛ iyi í dasi Amau naanɛ fei í nɛ kuwɛɛ hai tã. Inɛ mɔ iyi í kɔ̀ ku dasiɛ naanɛ kaa ba kuwɛɛu, amma idɔɔkɔ̃i Ilaaɔ̃ í wa si irii lafɛ̃ɛ.
2021, SIM International et UEEB
