Zãa 1
1
Inya kumá do idei kuwɛɛ
1Hee a maa taka andunya inɛ gɔ í wɛɛ à ya kpoo Ide. Ideu í wɛɛi do Ilaaɔ̃. Ideu takaɛ Ilaaɔ̃i. 2Ideu njɛ í wɛɛi hai sinte do Ilaaɔ̃. 3Do nŋui Ilaaɔ̃ í taka mii baa yooma fei, nɔ nkãma kù wɛɛ iyi kù jɛ nŋui í takaɛ. 4Nŋu takaɛi í jɛ irii kuwɛɛu, nɔ kuwɛɛu í máa inɛ ŋa inya. 5Inya kumáu í mái do si ilu kuku fei, nɔ ilu kukuu kù yɔkɔ kù kãmiaɛ#1:5 kù yɔkɔ kù kãmiaɛ Tia nwo gɔ ŋa à ni kù gbaa..
6-7Mɔkɔ gɔ í wɛɛ iyi à ya kpe Zãa. Nŋui Ilaaɔ̃ í bɛ wa ku naa ku jɛa inɛ ŋa sɛɛdai inya kumáu, nɔ inɛ fei ku dasiò inya kumáu naanɛ do saabuɛ. 8Zãa takaɛ kù jɛ inya kumáu, amma à bɔɔ wai ku jɛ sɛɛdai inya kumáu. 9Inya kumáu nŋu akãi í jɛ inya kumá ntɔ iyi í naa si andunya ku ba ku jɔ̀ inɛ fei ku yɛ ilu.
10Inɛ iyi í jɛ Ideu í wa si andunya wo. Do saabuɛi Ilaaɔ̃ í takaò andunya. Do nŋu fei, inɛi andunya ŋa a kù màa. 11Bi inɛɛ ŋai í naa nɔ inɛɛ ŋau à kɔ̀siɛ. 12Amma inɛ ŋa iyi à gbaa nɔ à dasiɛ naanɛ í mu nŋa kpãa a jɛò amai Ilaaɔ̃ ŋa. 13A kù jɛ amai Ilaaɔ̃ ŋa do yaase bɛi à ya ce a bíò amu ŋa si andunya. Kù jɛ do idɔɔbii amanɛ ŋa, ti Ilaaɔ̃i.
14Ideui í baa í jɛ amanɛ. Í kɔ̃ò didɔ̃ nɔ bɛɛbɛ mɔi í kɔ̃ò ntɔ, nɔ í ba wa kuwɛɛ. À yɛ amboeɛ, à cɔɔ do laakai, dimii amboe iyi Ilaaɔ̃ Baaba í na Ama akãɛu. 15Zãa í jɛa inɛ ŋa sɛɛdaɛ, í la í ni nŋu mbɛ inɛ iyi nŋu í fɔ ideɛu nŋu í ni á na ku naa si anyii nŋuu, amma í re nŋu domi í wɛɛ hai waati iyi a kù bí nŋu.
16Si amani nlaɛu awa fei à ba andi baa nwa, nɔ à ba didɔ̃ si antaii didɔ̃u. 17Hai bi Moizii Ilaaɔ̃ í na wa wooda, amma didɔ̃ do ntɔ í naai hai bi Jesu Kirisi. 18Inɛ kãma kù yɛ Ilaaɔ̃ Baaba ajɔ kãma. Ama akãɛ iyi í wa bi tɛɛu nŋu takaɛ Ilaaɔ̃i. Nŋui í jɔ̀ à màa.
Idei Zãa woo dasi inyi
(Cɔ Matie 3:1-12; Maaku 1:1-8; Luku 3:1-8)
19Ajɔ nŋu gɔ inɛ ngboi Zuifu ŋa iyi à wa Zeruzalɛmu à bɛ si Zãa woo weei Ilaaɔ̃ ŋa do inɛi Levii ŋa a koo a beeɛ a ni, awɔ yooi. 20Ŋɔi Zãa í jɛ nŋa í fɔ si bantuma í ni, n kù jɛ inɛ iyi Ilaaɔ̃ í cica. 21Ŋɔi à beeɛ à ni, debɛi, awɔ yooi. Awɔi Elii walii nlai takou? Nɔ í ni, aawo. N kù jɛ Elii. Nɔ à beeɛ má à ni, awɔi ì jɛ walii iyi á na ku naau? Nɔ í ni, aawo. 22Ŋɔi à beeɛ má à ni, debɛi, awɔ yooi. Sɔ̃ wa ku ba ka ba iyi aa kaa sisia inɛ ŋa iyi à bɛ wa wa. Bɛirei awɔ takaɛ ì waa nia araɛ.
23Ŋɔi Zãa í so ide iyi walii Ezai í tako í fɔu í jɛ nŋa do í ni, amui ǹ jɛ
inɛ iyi wa dɔ̃ anu si gbaa wa ni,
i teese kpãai Lafɛ̃ɛ kú tɛ ŋa.#1:23 Cɔ Ezai 40:3.
24Wee inɛ ŋa iyi à bɛ wa ŋau, hai bi Farisi ŋai à naa. 25Ŋɔi à bee Zãa à ni, ì ni i kù jɛ inɛ iyi Ilaaɔ̃ í cicau, i kù jɛ Elii, i kù nɔ i kù jɛ walii iyi á na ku naau. To, na mii í jɔ̀ ì ya maa dasi inɛ ŋa inyi. 26Ŋɔi Zãa í jɛ nŋa í ni, amu inyii ǹ wa n dasi inɛ ŋa, amma inɛ iyi á na ku naau í wa anini nŋɛ nɔ i kù màa ŋa. 27Nŋui á naa si anyim. Nɔ n kù tosi n fũ baa ikũi baataɛ. 28Ide ŋau ihɛ̃ fei Betanii í ce. Betaniu do ikpa nunui daakɔi idoi Zuudɛ̃ɛi í wa. Tengi bɛi Zãa wa dasi inɛ ŋa inyi.
Jesui í jɛ ama angudãi Ilaaɔ̃
29Iju kumáɛ ŋɔi Zãa í yɛ Jesu wa naa siɛ, ŋɔi í sɔ̃ inɛ ŋa í ni, i cɔɔ ŋa. Inɛ ihɛ̃i í jɛ ama angudãi Ilaaɔ̃ iyi á nya dulum dii inɛi andunya ŋa ku nɛò. 30Ideɛi ǹ tako ǹ fɔ wo ǹ ni inɛ gɔ wa naa si anyim iyi í rem, domi njɛ í wɛɛ hai waati iyi a kù bím. 31Amu takam n kù mà mà nŋui à ni á na ku naau wo, amma ǹ naa ku dasi ŋɛ inyii ku ba iŋɛ inɛi Izirɛli ŋa i màa ŋa.
32-33Ŋɔi Zãa í sɔ̃ ŋa má í ni, amu mɔ n kù mà mà nŋui à ni á na ku naau wo. Amma Ilaaɔ̃i í bɛm wa n naa n dasi inɛ ŋa inyi. Nɔ nŋui í sɔ̃m mii iyi á jɔ̀ n màa. Í ni an yɛ inɛ gɔ iyi Hundei nŋu á kita ku de siɛ wa nɔ ku maa wa bɛ. Nŋui á daa inɛ ŋa si Hundei nŋu. Ntɔ ntɔ ǹ yɛ Hundei Ilaaɔ̃u wa kita si Jesu wa hai lele. Hundeu í yɛi bɛi ankasiidi. 34Ǹ yɔɔ, nɔ ǹ wa n jɛa inɛ ŋa sɛɛda iyi nŋui í jɛ Amai Ilaaɔ̃.
Mɔcɔ sintei Jesu ŋa
35Iju kumáɛ Zãa í wa bɛ má, wa leekĩ do mɔcɔ minjiɛ gɔ ŋa. 36Ŋɔi à yɛ Jesu wa lɔ nɔ Zãa í ni, i cɔɔ ŋa. Inɛ ihɛ̃i í jɛ ama angudãi Ilaaɔ̃.
37Iyi mɔcɔ ŋau à gbɔ ideu ŋɔi à too Jesu. 38Ŋɔi Jesu í sinda í ba à waa too nŋu wa, nɔ í bee ŋa í ni, mii ì waa dɛ ŋa. Ŋɔi à ni do fee nŋa, Rabi, waatɔ mɛɛtu. Ŋɔi à beeɛ à ni, iwoi í jɛ kpasɛ̃ɛ. 39Ŋɔi í jɛ nŋa í ni, i naa i cɔ ŋa. Nɔ à tooɛ à koo à cɔ bii í wa nɔ à hoe bɛ. Ideu ihɛ̃ í cei alɛ zakai isɔ mɛɛ.
40Inɛ akãi amanɛ minji ŋa iyi à gbɔ idei Zãa nɔ à too Jesuu, nŋui í jɛ Anderee, ifɔi Simɔɔ Piɛɛ. 41Iyi í sɛkɛɛ hai bi Jesu gbakã í koo í kpe Simɔɔ igbãɛ nɔ í sɔ̃ɔ í ni, à yɛ inɛ iyi Ilaaɔ̃ í cicau. 42Ŋɔi í bɔò Simɔɔ bi Jesu. Iyi Jesu í cɔɔ nɔ í ni, ǹ mà iyi awɔi ì jɛ Simɔɔ amai Zãa, amma Sefasii aa ya kpeɛ bɛbɛi. (Iriu bɛ do Piɛɛ fei, yaaseɛi í jɛ kuta.)
Jesu í kpe Filipu do Nataniɛli
43Iju kumáɛ Jesu í dasi idɔ nŋu ku bɔ ilɛi Galilee. Iyi í to bɛ ŋɔi í ko Filipu nɔ í sɔ̃ɔ í ni, toom wa. 44Wee Filipu inɛi Bɛsaidai. Anderee do Piɛɛ ŋa mɔ inɛi ilu bɛ ŋai. 45Ŋɔi Filipu í koo í dɛdɛ Nataniɛli í sɔ̃ɔ í ni, à yɛ inɛ iyi Moizi í kɔ ideɛ si tiai wooda ŋau nɔ walii ŋau mɔ à fɔ ideɛu. Inɛɛu nŋui í jɛ Jesu inɛi Nazarɛti amai Zozɛfu. 46Ŋɔi Nataniɛli í beeɛ í ni, inɛ jiida gɔ á yɔkɔ ku fita hai Nazarɛti mbɛ? Ŋɔi Filipu í ni, naa i koo i cɔ.
47Ŋɔi à waa koo. Iyi Jesu í yɛ Nataniɛli wa naa bi tɛɛ ŋɔi í ni, i cɔ ŋa, amai Izirɛli takaɛi wa naa bɛ, kù nɛ takii kãma si idɔɛ. 48Ŋɔi Nataniɛli í beeɛ í ni, hai iwoi ì màm. Ŋɔi Jesu í ni, baa hee Filipu koo maa kpeɛ wa ǹ yɛɛ icui jĩi ndii figiu ihɔ̃. 49Ŋɔi Nataniɛli í ni, Mɛɛtu, awɔ Amai Ilaaɔ̃i, awɔ ilaalui Izirɛlii. 50Ŋɔi Jesu í jɛaa í ni, ì dasim naanɛ tã si na iyi í jɔ̀ ǹ ni ǹ yɛɛ abɛ jĩi ndii figiu ihɔ̃? Aa yɛ mii ŋa iyi à la à re iyi bɛ má.
51Nɔ í ni má, ntɔ ntɔ ǹ wa n sɔ̃ ŋɛi, aa na i yɛ lelei Aɔ̃ í cĩ ŋa nɔ amalekai Ilaaɔ̃ ŋa aa gũ a maa kita si amu Amai Amanɛ.
2021, SIM International et UEEB
