Kusintii Andunya Kusinti
Kusinti
Tiai Kusintii Andunyai í jɛ tia sintei Bibeli. Bi Zuifu ŋa tiai Kusintii Andunyaui í jɛ sintei tia miiu ŋa iyi à ya kpe tiai wooda ŋau. Si dedemba nŋa à ni Moizii í kɔ tiau.
Aa yɔkɔ a kpɛ̃ tiau ikɔ̃ ikã ikã mɛɛje.
1. Iri 1-2. Kutakai andunya do ti amanɛ ŋa.
2. Iri 3-5. Dulum iyi inɛ sinte ŋau à ce do ijuukpãi dulum si andunya.
3. Iri 6-11. Nfe ku cei andunya si waatii inyi nlau, do idei tɔkui Nowee ŋa.
4. Iri 12:1-25:18. Faajii kuwɛɛi Aburahamu.
5. Iri 25:19-28:9. Faajii kuwɛɛi Izaaki.
6. Iri 28:10-36:43. Faajii kuwɛɛi Zakɔbu.
7. Iri 37:1-50:26. Faajii kuwɛɛi Zozɛfu.
Gbugbãi laabaau iyi í wa si tiai Kusintii Andunyaui í jɛ iyi Ilaaɔ̃ í taka andunya í sĩa jiida jiida, kù nɛ lɛɛfi kãma (1:31 ) nɔ í taka amanɛ ŋa a jɛ inɛ ngboi mii ŋa iyi í taka ŋau nɔ a maa cɔ ŋa (1:28 do 2:15 ). Ilaaɔ̃ í bi amanɛ ŋa iyi nŋu í taka ŋau a maa jɛ kuwɛɛi si anu akã do nŋu.
Amma amanɛ ŋa à kua woodai Ilaaɔ̃, nɔ dulum í lɔ wa si andunya. Waati iyi amanɛ ŋa à na à kpɔ à waa kɔ̃ɔsi si ilɛ, waati bɛɛbɛi andunyau í bɛjɛ wa kɔ̃ɔsi na dulum dii amanɛ ŋau (6:12 ).
Do nŋu fei, Ilaaɔ̃ í bi nŋu ku weea inɛi andunya ŋau fei. Na ŋɔi í jɔ̀ í kpe Aburahamu nɔ í ni nŋu á jɔ̀ ku ba tɔku ŋa (12:1-3 ). Nɔ Ilaaɔ̃ í dĩ akabuu do Aburahamu do tɔkuɛ ŋa. Aburahamu do tɔkuɛ ŋau à ce kurara ŋa. Amma baa do kurara ŋa iyi à ce fei, Ilaaɔ̃ í leekĩ dee dee si kuwãɛ iyi í ce nŋau.
Si antaii kuwee do tɔku nkpɔ nkpɔ ŋa iyi Ilaaɔ̃ í ni nŋu á jɔ̀ Aburahamu ku bau, í ceaa kuwãi inya tengi bii á buba má. Amma hee tiai Kusintii Andunyau í koo í bɔò kɔɔ, kuwãu kù kɔ̃. Iyi bɛ wa nyisi wa iyi Ilaaɔ̃ wa degbe inɛi nŋu ŋau a dasi nŋu naanɛ nɔ a leekĩ dim dim si kuwãɛ ŋau.
2021, SIM International et UEEB