MATTHEW 11
11
Baptisma riyaba Johan ni rikphayarao
(Lk. 7.18-35)
1Boha Jisu, jar ni rikphayarao jhigin khe grao riblai ba jang, bo oraha ni phrang bonsi ni nolei buthu ha sling rihi, grao sainthi mane bo thang la kha.
2Odehe, Johan de Krista ni khusi dangyaba buthu khe phatho ha khna hi boni yaohon rikphayarao khe boni ha ebo grao khe sing mane haiha ba. 3Bo phaiginyaba ning ning, na malai khe jing jon ma kho? thi hi sing ba.
4Ode, Jisu bonsi khe thiphin ba, “Thangphin lah, odehe, nisi nuyaba khnayaba khe Johan niha sainthi tha; 5Muthai ganarao muthai nu kha, igah khorarao igah jang hem lang la kha, khunthi jayarao ragao kha, khmao nathongrao khmao khna kha, githirao mathangphin kha, ode, dukhisarao hamba graojma khe khna ri kha. 6Sere ani basao ha khah maniya maiyayaba de boni khophal hambi, thi hi thi tha.”
7Bo buthu oraha ni phrang thangla ba jang Jisu subung buthu niha Johan ni grao khe thi ba, Hajengling ha snadi khe nai mane nisi thang ba? Bar jang maoyaba dobung khe? 8Niyakha la snadi khe nai mane nisi thang ba? Rih miyao dudu phinyaba subung khe? Nai lah, rih miyao dudu phinyarao de raja ni noh ha dongyaba se. 9Niyakha la, snadi khe nai mane nisi thang ba? Gorasali khe naihi mane? Bo ning ja kha. Ang nisi khe thiyaba de gorasali tha bo dedaoyaba se. 10Nai lah, ani degla khe nini sagang ha ang haiha du. Bo ning nini sagang ha nini lama khe slam ma se thi hi boni balam ha rebyaba de ebo ning ja kha. 11Gibi jang ang nisi khe thi du, masainjikrao hajai riyaba ni bising ha Baptisma riyaba Johan thane dedaoyaba saosi bo baigoya kho. Thikhabo sorgo raji ha khasidao thaoyaba bo Johan thane bo dedao. 12Baptisma riyaba Johan ni basain ni phrang dini sosi sorgo raji ha hap mane khlai hide subung buthu hamsi ning bao re, ar hamsi ning baoyarao de bising ha hap phu re. 13Johan ni bubli sosi khrip gorasalirao Moses ni dara ni grao khe ning thida ba se. 14Nisi manima nangjao khade, Elija phaiginyaba de bo ning ja kha. 15Sere khna mane khmao dong, bo tharmai la thing.
16Duha ni jug ni subung buthu khe snadi jang suthai hi ang thi ma? Ansarao hathai buthu ha kham hi lugurao khe long hi, 17Jing nisi ne khlai hi suphin dam ri du, thikhabo nisi de baiya. Jing jirikkhao hi gra du, nisi de khahbao doya, thiyarao lai se. 18Johan phai khali ha, jiya-lingya bani nisi sgain madai ni bese dongphayaba thi hi bokhe thi ba. 19Marsi ni Basa phai khali ha bode jidu-ling du, Nai lah, makham jiba raoyaba subung, grep bidi ling ba raoyaba, khajna khrangyarao ode subung phaphirao ni lugu se, thi hi nisi bo khe thi du. Thikhabo, tharmai lah, bo jar khusi dangyaba raothai buthu jang gibi dang phnu du.
Lonyayarao ni nogor
(Lk. 10.13-15)
20Subung buthu khah phinya bani bo gmang thaosisi gabang khusi dangyaba nolei buthu khe bo jo ba. 21Korazin, nini bubain risi bi! Bethsaida, nini bubain risi bi! Nisi niha gmang thaosisi khusi dangyaba khe Tura jang Sidon ha se dang ba thikhade, bosta phin hi thaphla ha kham hi bonsi dong kha mu! 22Ang nisi khe thi du, bisar ni sain khali de nisi ni dukhu thane Tura jang Sidon ni dukhu rejengdao nang kho! 23Odehe, ning Kapernaum, sorgo sosi ning khe bakhan rijao nang? Ning la githi ni nolei sosi thang ma thi hi mithi lah. Nini gmang thaosisi khusi dangyaba buthu khe Sodom ha se dang ba thikhade, duha sosibo dong ma se mu! 24Thikhabo, ang nisi khe thi du, nini dukhu thane Sodom raji ni dukhu rejengdao ma se, ode thi ba.
Ani ha phai hi lenggo lah
(Lk. 10.21,22)
25Bo bubli ha Jisu thiba, O Abai, phirthi jang sorgo ni Gabra, subung girikyarao ode bujiyarao niha ebo grao khe huikhao hi, ansarao niha ning sainthi bani ning khe ang bakhan khlai du. 26Jadu, O Abai, ning olei dang ba de nini nangjaothai hamba se.
27Ani Bupha ning a ne khrip jadi nepha thar kha. Bupha khe garhi de Basa khe saosi bo mithiya, ode basa jang basa thiphlayaba khe garhi de bupha khe saosi bo mithiya.
28Nisi dukhu jang bubain risi horyarao khripbo ani ha phai lah, ang nisi khe lenggoma ri nang. 29Ani jowal khe jar ni basao ha sugu hi ani ha sling lah. Bede thikhade gasain dik dikyaba ode khah laodao thaoyaba ang se; odebani nisi ni bese ne khlai hi lenggoma mai ma se. 30Ani jowal de horthao bi, ar ani bubain bo rejeng bi, ode bo thi ba.
Dimasa N.T. with PSA amp PRO (BSI)
© The Bible Society of India, 2006.
Used by permission. All rights reserved worldwide.
