Matiu 3

E Jon a Tsonun Baptais e habulunganein u raranga

(Mak 1:1-8, Luk 3:1-18, Jon 1:19-28)

1Nonei tara pöata teka#3:1 Tara pöata teka e Iesu e tetenei na tara kapakapa tere Matiu sapta 2. Nonei e kamei u topisa u maloto u hiningal tara tantania na sapta 3. e Jon a Tsonun Baptais, e habulungana naia u raranga tere Sunahan tara makum a palaka i Judia. 2Ba nonei e poeiena, “Alimiou go palis ba naiam a man markato a man omi. A Nipepeito tere Sunahan e sukusuku hakapa.” 3E Jon nonei a katuun te rangein e Aisaia a propet i manasa. Ba nonei e poeiena,

“A töa katuun ena ku hapan noa romana tara makum a palaka bate poeiena,

‘Kato hamatsköeiam a maroro,

a Tsunono e ngilin sila nama romana tara maroro a matskö.’”

4E Jon e roron hasogi u hasobö ti katoei a huluna a kemol, bate pouseiena a lete. Na nonei e roron noui a köno na möröana. 5Na tara pöata teka, u katunura i Jerusalem na tara man han hoboto tara provins i Judia na tara man han has i rehina a ramun i Jodan, i la hoboto uama tere Jon. 6Ba nori e pokeier a man markato a man omi i taren, ba nonei e baptais ranen tara ramun i Jodan.

7Be Jon e tara rena u Parasi#3:7 U Parasi na u Sadiusi a huol a hun katuun turu Jiu ti tagala koru sil u lotu na man lo turu Jiu. Nori i hakats koruni a man lo pinopino, kaba nori i ma taatagi rai u katuun. na u Sadiusi u parpara koru i la silema tegimi habaptais uen, ba nonei e poeiena i taren, “Alimiou u katunura tara kökötsi a omi, alimiou u katuun u gamogamo! Alimiou ema antunan bus ba namoi a raharaha tere Sunahan te butu nou! 8Te hapolasa ba namia limiou a man markato a man omi i tamilimiou, bora hatara marei tala naiam a markato a niga, tu habirits ba menami limiou a man markato a man omi i tamilimiou. 9Alimiou goma tatei mar hakats uami teka, ‘Alam e kamem e Abraham e tubumulam.’ Alia e hatei ragou limiou, e Sunahan e antunan katoe nei u hatu teka a hun haposa tere Abraham. E Sunahan ema antunan ngil pinopinoe nei a katuun te pala uana tere Abraham. E möa. E ngileiena a katuun te kato hanigana. 10A nikö e ka hakapaia i mouna u ruei. A man ruei tema hua haniga ri e ngats ba rariou bate lapo ba raroa turu tula.

11“Alia e baptais ragi limiou u ramun tuun, e hatara nena alimiou u habirits ba hakapa naiam a man markato a man omi i tamilimiou. Kaba a katuun te la hamurimuri nama romana i tar e pan bala koru nanou lia. Nonei a tsunono pan, na lia a katuun papala koru ema antunan söata nagi u sendol i tanen. Nonei te baptais ranoui limiou u Namnamei u Göagono na u tula. 12Nonei e katsin kato hamanasena a toukuin hamou turu wit. Nonei e lu kaakata ranou u katuun u niga na u katuun u omi. Nonei e haka ranoa u katuun u niga tara han a niga, ba nonei te tsuga mera noi u katuun u omi turu tula tema antunan hoso nari.”

E Jon e baptaisi e Iesu

(Mak 1:9-11, Luk 3:21-22)

13Na tara pöata teka e Iesu e la ba nema i Galili me la uana tara ramun i Jodan tegomi habaptais uen tere Jon. 14Kaba e Jon e torohanan katoeien ego palis u hakats i tanen me poeiena, “Alia ego habaptaisia i tamölö, kaba lö e la noa has uamuma i tar? Alö e pan bala koru namou lia.”

15Be Iesu e ranga palisenen me poeiena, “E noahasina alö go markato uu temar ranga uagu lia. Tara markato teka bara te kato hantunera a mamanaka a matskö te ngilena e Sunahan.” Be Jon e töa kukutiena temar ranga uu e Iesu. 16Pöata lahas te baptais hakapeien e Iesu me takei sei nama i ramun, ba u kolö e takalatana, ba nonei e tarena u Namnamei tere Sunahan e koul heremei a apena te ngöeri a kulu, memi töna tere Iesu. 17Ba u töa u raranga e butu nama i Kolö me poeiena, “Nonei a Pien Tson koru i tar. Alia e ngil korue gen, na lia e sasaala koru has megen.”

Attualmente Selezionati:

Matiu 3: HLA 2020

Evidenziazioni

Copia