LUKASI 21

Ywə yə npfɔk mjwǐ lə hɑ̌ a

(Mk 12.41-44)

1Yeso lə pʉ' mnyə, jɔ pɔ pyə wap lə bɑwə nyəŋ ywə nthʉm kak yə pu nyəŋ ywə nə́ fa' Dyə Si nə a. 2E lə yɔ bɑ mu' npfɔk mjwǐ sɔ' nyəŋ tsə bɛ pʉə nthʉm ó. 3E ghɔm gɑ: Kwa' nyənyɔ gɑ̌ siŋ wɔ gɑ bəŋ npfɔk mjwǐ yəŋ gɑ nyəŋ shyə guŋ pɔ awɛ. 4Nə pa' guŋ pɔ awɛ lɑ pɑ dzyak nə sɔ' hɑ, tə sɔ' m nə e, e ghɔ nə pəŋ é hɑ guŋ yə ywə yə e kɑ gɔ nə vɔk a.

Nə sa'tə Dyə Si

(Mt 24.1-2; Mk 13.1-2)

5Shɑ́ pɔ lə pɑ gɔmnwə nə Dyə Si ba nə tsə mkwiŋ myə a lə bɑ nə Dyə Si a, mwɔ' pu a guŋ tsə tsyə pu lə hɑ Dyə Si a, Yeso ghɔm gɑ: 6Mtyɛ'dzʉ wə sɔ́', myə a gɔ ghɔ nə mwɔ' bǎ, sɔm lə piŋ shwə nə sɔm á, bɑ pu kwɔk ma'tə si awɛ.

Mtiŋ

(Mt 24.3-8; Mk 13.3-8)

7Wap həŋtə Yeso gɑ: Ta, a gɔ sɔ' pɑ po'o sǒ? Pu gɔ sɔ' lɑ kɑ nə zhyə mnwə bɔ̌?

8Yeso ghɔm bi pu gɑ: Po pɔmtə gɑ mo kɑ ghə po hɔjyə̀. Nə pa' pɔ tə jɔm gɔ sɔ' sɔ' nə tso tsɑ̌ piŋ pɑ ghɔm gɑ: A bɑ a, cwə̌ ghɔptə. Po pɔmtə nə cʉ́m jʉ̌m pú. 9Pɔ gɔ sɔ' yu' shu, pu piŋ bɑ gɔmnwɔ nə shu. Po kɑ pwɔk. A puŋ gɑ tsə bɔ təm awɛ. Da' gɑ a lə wuŋ bɑ nə miŋ. 10E lə piŋ gɔm bi pu gɑ: Mu' guŋ gɔ sɔ' lo' yə mu' guŋ; mu' nəfo pɑ do' yə mu' nəfo. 11Ca' gɔ sɔ' pɑ cʉ'nyə po'o té', mu' bɔkbɔk gho pɑ gəm pɔmnəŋ jwətə wap, a kəya' vʉ nə shɑ mtsʉ'. Msya pu a shɑ mtiŋ təm kɛbəŋ.

Gǒ' nə cwɔ' mkwə pɔ cwəpuŋ

(Mt 10.17-22; Mk 13.9-13)

12A gɔ sɔ' nə təm po'o, bɑ pu ghəm wɔ, pɑ́ lɑ wɔ yɔgo' sinagogə, nyəŋ wɔ dyəcɛ̌. Pɑ́ lɑ wɔ ghɔ dzə mfomfo pu a mgɔpna' nə tso tsɑ̌. 13A cyə m po'o po pɑ mghɛ kwinthɛ pɑ̌. 14Ka lam tsɔ́ sɔ́ nə ywə yə po gɔ sɔ' nə kwinthɛ a. 15Gɑ gɔ sɔ' hɑ ghɔm ba fʉ̌ yə bi a pɑ sɔm gɛ bo yɔ lə ghə ya a bi po. 16Mfɑ pɔ ba mso pɔ gɔ sɔ' pɑ tɛ́mnɛ́ mɔ, zhwə bo'gwyə pɔ cəcɑ̌ po. 17Guŋ pɔ awɛ gɔ sɔ' pɔ wɔ nə tso tsɑ̌. 18Da' gɑ sɔm ta' nəŋ thə́ yɔ lə pi pɑ. 19A gɔ sɔ' cyə m nə kaktʉɔ yɔ po vɔk tʉm tsɔ.

Nə fyɛ' Yerusalɛm

(Mt 24.15-21; Mk 13.14-19)

20Cwə yə po gɔ sɔ' yɔ bɑ msəŋwi lɑ Yerusalɛm a, pɔ zhyə́ gɑ cwə ghəghʉɔ é ku'. 21A la' tə bɑ po'o, pɔ pyə wap Yudea a khʉ gɔ m dəm khuŋgɔ̌; pɔ pyə wap nthʉm tisuŋ a khʉ nthəm, ba pɔ pyə wap m go a kɑ pɑnyə tisuŋ. 22Nə pa' a gɔ sɔ' pɑ tyɛ'dzʉ nə pa' bo, ywə yə pu lə və a, a pəmtə. 23Ghəghʉɔ pɑjwǐ tsʉ̌m pu a mʉə po nə tyɛ' dzʉ bɔ, nə pa' mɑzhwiŋ gɔ sɔ' pɑ́ nthʉm guŋ, lúŋ Si yɛ nə pɔmnəŋ. 24Pu pɑ dɑ mnyədwɔp pəpɛ gwatə wap, mguŋ mguŋ pɑ gəm wap nə gɔ gə mkwɔ pap, pɑ tə́ pɑ pɑ Yudea nəŋtə Yerusalɛm tə̌ yap cwədzʉ̌ kǔ'.

Pa' Mu mo gɔ sɔ' sɔ' a

(Mt 24.29-31; Mk 13.24-27)

25Mtiŋ təm nə nam, ba nə mɑŋwə́, ba m nə msɛ́, a piŋ bɑ dəm sicǎ' mguŋ pɑ jwiŋ. Lam tsap pɑ sɔ nə́ nə cu' shyə lɑpʉə ba fa é. 26Pɔmnəŋ gɔ sɔ' pfʉ́ cwɔ', bɑ bwɔk ywə yə a gɔ cyə dəmca' a, nə pa' mtʉɔ kɛbəŋ gɔ sɔ' cʉ'nyə. 27A gɔ pɑ cwə o bɔ pu yɔ Mú mo e sɔ' dəm mlwa nthʉm ghu'tə ba tʉɔ.

Nəfo Si ghɔptə

(Mt 24.32-35; Mk 13.28-31)

28Cwə yə mnwə bɔ gɔ təm a, po tiŋnyə dəŋdəŋ, bʉ' mthə́ mɔ, nə pa' cwə nə vɔk wɔ ghɔptə.

29Yeso ghɔ́m mu' ghɔm tə tutə bi pu gɑ: Po le thə́ nthɔmmthə pu a guŋ mthə́ awɛ tə jɔ. 30Cwə yə po jɔ bɑ mhwə to' nə twɔp nə a po ghɔm gɑ cwədzʉ pɑpuŋ wə sɔ́'. 31A dəŋdəŋ po'o, po la' jɔ mnwə bɔ təm po zhyə gɑ Nəfo Si wə sɔ̌'. 32Gɑ wə siŋ wɔ kwa' nyənyɔ: Pɔmnəŋ nə yəŋ wɔdzʉ́ tə gɔ sɔ' cyə tə mnwə bɔ sɔ́' pɑ. 33Kɛbəŋ pu ca' gɔ sɔ' mi, da' gɑ́ mghɔm mə tə gɔ la' mi pɑ.

34Po pɔmtə gɑ́ mlu' pu a ywətsǔ ba m nə zhwiŋ kɑ ghə tʉm tsɔ pwa. Bwɔk gɑ tyɛ'dzʉ bɔ kɑ sɔ' bvonyə́ wɔ vonyə. 35A gɔ sɔ' vʉ dəm guŋ pɑ nthʉm dzʉ awɛ pa' ŋkhə vʉ́m a. 36Ka po ti, po pɑ shwyɛ'nyə Si guŋ mcwə awɛ po'o gɑ e hɑ gu' bi po, po vɔk mnwə bɔ myə a gɔ sɔ' sɔ' a, tə ŋwak yɔ dzə Mú mo dəŋdəŋ.

37Yeso lə jwɔk ji'tə pɔmnəŋ nwə Dyə Si, á cwə bɑ bwadzʉ̌ e ghɔ dəm kuŋ mthə olivə. 38Guŋ pɔ awɛ piŋ bɑ sɔ' Dyə Si kwa' mɑmpʉm dzʉ bɑ ju' ywə yə e gɔm a.

Attualmente Selezionati:

LUKASI 21: NTGomala

Evidenziazioni

Copia