Mateu 13

Haga 13

Iãꞌãkap Puo Iesui Henoi Iãꞌỹi Sytpok Hat Etiat

Maku 4.1-9; Iruka 8.4-8 Piat Ewy

1Mekewat eꞌat pe Iesui toto raꞌyn mekewat tawa pyi hawyi toto raꞌyn yi Karireia ehyemyiꞌa ẽpe kape. Miꞌi hawyi taꞌapyk itote miitꞌin muꞌe hamo. 2Miꞌi turan miitꞌin sem tõꞌẽ typyꞌi kahato raꞌyn Iesui kape. Miꞌi hawyi Iesui teke raꞌyn yara pe hawyi taꞌapyk yara pe maꞌato miitꞌin sem tukupteꞌen yi kyt rote yꞌam me. 3Miꞌi hawyi Iesui tiꞌatumuꞌe kahato itote tehay iãꞌãkap wo. Miꞌi hawyi mio tã e -Pyno wẽtup mo toto ihainia iãꞌỹi sytpok hamo. 4Maꞌato karãpe tohytpok iãꞌỹi turan iraniaꞌin iãꞌỹi hewo muap ẽpe upi. Miꞌi koꞌi ti weitaria koꞌi tuꞌu yne neꞌi. 5Maꞌato iraniaꞌin iãꞌỹi hewo mekewat nu totiat yi tote neꞌi. Miꞌi pote mekewat iãꞌỹi hẽtyt meremo wen maꞌato yt yi pit pe i sese. 6Miꞌi pote ti karãpe aat hakup putꞌok e hawyi mekewat mikoi igag naꞌyn topyhuꞌat kat pote hapo koꞌi yt teke kuap i yi pit pe pote. 7Maꞌato iraniaꞌin hãꞌỹi wyti hewo hu piat neꞌi. Miꞌi ti hẽtyt wen maꞌato meremo iꞌanam tohik hawyi yt tuwenug kuap i raꞌyn. 8Maꞌato hãꞌỹi hewo yi wakuat rote rakaria tuwenug kahato pote toipuẽti hãꞌỹi poꞌog 100 wo saꞌawyꞌi wuat tomikoi kai. Iꞌewyte 30 poꞌog tomikoi kai hawyi 60 toipuẽti poꞌog iwato saꞌawyꞌi wuat tomikoi kai e. 9Miꞌi hawyi Iesui ihay kahu raꞌyn hawyi toꞌe miitꞌin me -Pyno ehewaure kaꞌa uiꞌe hap kape pote waku eweikuap eiwanetup hawe uiꞌe hap koꞌi e.

Maku 4.10-12; Iruka 8.9-10 Piat Ewy

10Mio tã e Iesui hawyi tokokaꞌat hemiitꞌin hewowi hawyi apo iꞌatuꞌe -Kat poteĩ ehay miitꞌin kape sehay iãꞌãkap wo yn mehin iꞌatuꞌe. 11Miꞌi hawyi Iesui tiꞌatuwesat -Pyno waku eiperia aikotã Tupana toineꞌen morekuatnuat hap etiat migꞌi wuat koꞌi waku eweikuap wen maꞌato iraniaꞌin me yt heremo i e. 12Maꞌato uwe uwe tuwanetup kahato uhehay kape poꞌog ikuap hamo. Miꞌi haria ti aru poꞌog neꞌi taꞌatupuẽti iꞌatumikuap mo. Maꞌato uwe yt ikuap teran i uhehay miꞌi hat kaipyi wyti aru tuweityk taꞌyn imikuap oktan. 13Miꞌi pote ti uhehay iãꞌãkap wo yn miitꞌin kape. Kat pote ti miꞌiria hewaure kaꞌa wen maꞌato yt teke i iatuwanetup hawe. Iꞌewyte teꞌerehaꞌat wen maꞌato yt teꞌeraꞌakasa i. 14Pyno miꞌi hap ewy ti miitꞌin tukupteꞌen aikotã saꞌawyꞌi Tupana ehay moherep hat Isaia toꞌe hap ewy -Ehewaure kaꞌa wen maꞌato yt eweikuap i. Eiwehaꞌat wen maꞌato yt kat i eiwaꞌakasa. 15Pyno miꞌi hap ewy ti miitꞌin wanetup hap yt tuweꞌapypykuap i teꞌerewaure kaꞌa hik neꞌi. Iꞌewyte teꞌerehahik neꞌi. Taꞌatupyꞌa piat iheg kahato raꞌyn topyhuꞌat. Maꞌato uiꞌe hap teke iꞌatupyꞌa pe iꞌewyte tehaꞌat sese uhewowi hawyi teꞌeruwemorem kuap i Tupana ewowi. Mio tã hap ewy pote atiꞌatumog kuap iꞌatuminug saꞌag hap koꞌi upi e Tupana moherep hat tomiwan me. 16Miꞌi hawyi poꞌog Iesui toꞌe temiitꞌin me -Maꞌato eiperia ti eiwepiit kahato rakaria wo eweikupteꞌen katupono eweiꞌakasa kuap kahato raꞌyn. Iꞌewyte ehewaure kaꞌa eweituwepypok kahato raꞌyn uimienoi hap kape. 17Pywo pe ti areꞌe ehepe saꞌawyꞌi wuaria Tupana ehay moherep haria iꞌatu kahato iꞌewyte iraniaꞌin ywania kaipywiaria Tupana mohey haria ti teꞌerehaꞌat teran kahato koran wuat eiꞌakasa hap koꞌi kape maꞌato yt aikotã kuap i teꞌeraꞌakasa. Iꞌewyte teꞌeruwanetup teran kahato koran wuat eimikuap koꞌi koꞌi kape wen maꞌato yt teꞌeruwanetup kuap i.

Iesui Timoherep Mekewat Iãꞌãkap Iãꞌỹi Sytpok Hap Etiat

Maku 4.13-20; Iruka 8.11-15 Piat Ewy

18Miꞌi hawyi poꞌog Iesui toꞌe -Pyno waku eiwemuꞌe kat som sehay iãꞌãkap wo ahenoi iãꞌỹi etiat hap kuap hap ete. 19Pyno mekewat iãꞌỹi muap upiat hewo muap ẽpe upiat hewo rakat ewy wuat wyti karãpe miitꞌin teꞌeruwanetup Tupana ehay kape wen maꞌato yt toikuap i. Miꞌi ti aikotã muap ẽpe upiat iãꞌỹi ewy topyhuꞌat katupono miꞌi ti karãpe yt nakuap i putꞌok e raꞌyn hawyi toihep taꞌyn ipyꞌa pyi iãꞌỹi hap ewy e. 20Maꞌato mekewat iãꞌỹi misytpok wyti iraniaꞌin hewo nu tote neꞌi. Miꞌi wyti aikotã iraniaꞌin teꞌeruwanetup Tupana ehay kape hawyi meremo toikuap hawyi iwepiit kahato raꞌyn. 21Maꞌato miꞌi ti aikotã yt hapo i rakat ewy topyhuꞌat. Karãpe sehay yt naku i hap putꞌok e raꞌyn imosoꞌopot hap miꞌi hap eꞌat pe meremo toiwaure raꞌyn saꞌawyꞌi wuat imohey hap. 22Maꞌato iraniaꞌin wyti tukupteꞌen teꞌerepomohepapꞌi mesuwat rotiat taꞌatuekat puẽti hamuat ete yn. Miꞌi haria ti aikotã mikoi iãꞌỹi yt haat i rakaria ewy wuaria tukupteꞌen. 23Maꞌato mekewat iãꞌỹi hewo yi wakuat rotiaria ti tukupteꞌen aikotã miitꞌin ikuap Tupana ehay hawyi topyhuꞌat iꞌe hap ewy. Miꞌiria ti aikotã haat kahato rakaria ewy tukupteꞌen. Wẽtup kaipyi 100 toipuẽti hap ewy wẽtup ok kaipyi 60 hap saꞌawyꞌi wuat imikoi kai hap ewy hawyi iraniaꞌin 30 iãꞌỹi hap ewy toipuẽti saꞌawyꞌi wuat imikoi kai. 24Miꞌi hawyi Iesui henoi poꞌog wẽtup ok iraꞌyn sehay iãꞌãkap. Miꞌi hawyi toꞌe miitꞌin me -Pyno ahenoi aikotã Tupana topyhuꞌat morekuatno hap etiat. Pyno so wẽtup ok ihainia toto toko kape iãꞌỹi sytpok hamo hawyi tohytpok mekewat teꞌyi wakuat rote. 25Maꞌato mekewat ewãtym mo ikoi haria teꞌeroket raꞌyn turan iket kai putꞌok e raꞌyn hewanikap hawyi toikoi raꞌyn mekewat iãꞌỹi Sereai ypia toꞌoran me mekewat iãꞌỹi yt nakuat i rakat gaꞌakyt imikoi moꞌanam hamuat hawyi migꞌi wo toto iraꞌyn. 26Miꞌi pote karãpe mekewat imikoi Sereai tuwemotag raꞌyn hawyi Sereai tuwemotag turan iꞌanam wywo toꞌoꞌewy raꞌyn iꞌatutag. 27Miꞌi turan mekewat go kaꞌiwat emiitꞌin tuwat raꞌyn ikaꞌiwat piat henoi hamo hawyi teꞌeroꞌe -Urukaꞌiwat iꞌatuꞌe uruikoi raꞌyn iãꞌỹi wakuat eko pe wen maꞌato uweĩ ikoi iꞌanam eko pe urukaꞌiwat iꞌatuꞌe. 28Miꞌi hawyi iꞌatukaꞌiwat tiwesat -Taꞌi ahewanikaptia mikoi raꞌyn ti som e toiꞌatuwesat. Mio tã e pote hemiitꞌin -Pyno waku watipuruk taꞌyn emikoi pyꞌasetpiat koꞌi ahewanikaptia mikoi iꞌatuꞌe. 29Uruwanetup turan wẽtup ok ahewanikap inug miꞌi tã iꞌatuꞌe. Miꞌi hawyi poꞌog apo iꞌatuꞌe -Maꞌato apo waku raꞌyn uruipuruk iꞌanam koꞌi urukaꞌiwat iꞌatuꞌe. Maꞌato iꞌatukaꞌiwat iꞌatuwesat -yt aikotã kuap i rat e katupono eweiwat hawyi eweipuruk iꞌanam koꞌi pote te ren wakuat aimikoi koꞌi wywuat neꞌi raꞌyn eweipuruk wy e. 30Tero iꞌatutag toꞌoꞌewy tiriku iꞌanam koꞌi. Miꞌi hawyi karãpe iterek hap eꞌat putꞌok e hap kape ahenoi Sereai terek haria waku eweipuruk to saꞌawyꞌi iꞌanam koꞌi hawyi eweipeman hawyi eweiwuk taꞌyn areꞌe. Miꞌi hawyi waku eweiterek tiriku koꞌi hawyi waku ewehytmoĩ raꞌyn Tiriku apykok netap we.

Iãꞌãkap Mutata Iãꞌỹi Etiat

Maku 4.30-32; Iruka 13.18-19 Piat Ewy

31Miꞌi hawyi Iesui henoi wẽtup iraꞌyn sehay iãꞌãkap wo. Miꞌi hawyi mio tã e -Pyno ahenoi aikotã Tupana toineꞌen morekuatno hap etiat. Miꞌi ti aikotã mekewat iãꞌỹi Mutata iãꞌỹi kurin kahato rakat ewy. Miꞌi ti ihainia tikoi teꞌyi tote. 32Maꞌato mekewat iãꞌỹi kurin kahato torannia iãꞌỹi koꞌi kai rakat maꞌato karãpe hẽtyt raꞌyn hawyi tuwemowato kahato raꞌyn hawyi torannia mikoi yp koꞌi kai raꞌyn iꞌyp wato. Ikoran iwato kahato raꞌyn hawyi yne weitaria teꞌeresoknug kuap taꞌyn ikoran upi.

Iruka 13.20-21 Piat Ewy

33Miꞌi hawyi Iesui henoi poꞌog sehay iãꞌãkap wo miitꞌin kape aikotã Tupana topyhuꞌat morekuatno hap etiat. Miꞌi ti aikotã man apopyt haryporia tat hawyi tohãꞌãg myẽꞌym iãꞌãg hap eꞌy tiriku ãkuꞌi hawyi toipykoi kahato hawyi toiꞌapokik kahato hap ewy.

34Mekewat eꞌat pe toiꞌatumuꞌe yt herep wo hin i. Maꞌato sehay iãꞌãkap wo yn. 35Maꞌato miꞌi tã ti toimoherep aikotã saꞌawyꞌi Tupana ehay moherep hat e hap ewy. Miꞌi ti mio tã e -Meiũran ti aru atiꞌatumuꞌe sehay iãꞌãkap wo yn ahenoi henoi kahato ti aru yt iꞌatumikuap sehay puo hin i saꞌawyꞌi wuat uinug turan nuat pyi te yt uwe mikuap i tohenoi Tawi wepy hawe 78.2 pe. 36Miꞌi hawyi Iesui hokiwat raꞌyn miitꞌin sem hawyi toꞌaipok iraꞌyn netap kape. Miꞌi turan hemiitꞌin tokokaꞌat hewowi hawyi apo iꞌatuꞌe raꞌyn taꞌatukaꞌiwat pe -Pyno ehenoi uruepe kat som sehay iãꞌãkap wo ehenoi iꞌanam etiat iꞌatuꞌe. 37Miꞌi hawyi Iesui tiꞌatuwesat -Pyno mekewat iãꞌỹi wakuat sytpok hat wyti Ihainia Saꞌyru 38Maꞌato mekewat yi wyti topyhuꞌat miitꞌin mesuwiaria. Maꞌato iãꞌỹi wakuat koꞌi wyti miitꞌin Tupana miꞌairo koꞌi maꞌato mekewat iꞌanam wyti yt naku i sese nug haria. 39Maꞌato mekewat hewanikap mikoi iꞌanam wyti topyhuꞌat ahiag mikoi maꞌato mekewat iterek hap eꞌat putꞌok e turan wyti iterek hanuaria atipy piaria Tupana emiitꞌin. 40Iꞌewyte aikotã mekewat iꞌanam koꞌi taꞌatuꞌatunug hawyi taꞌatusok wuk. Miꞌi ti ikahuro raꞌyn hap eꞌat pe topyhuꞌat hamuat. 41Pyno ti aru Ihainia Saꞌyru tipoꞌoro ti aru temiitꞌin atipy piaria iꞌatunug hamo hawyi ti aru toipuruk taꞌyn yt nakuaria i yt naku i nug haria iꞌewyte kat koꞌi kat koꞌi saꞌag nug haria. 42Miꞌi hawyi Tupana emiitꞌin tipugha raꞌyn mekewat miitꞌin yt naku i nug haria mekewat aria wato hyemyiꞌa pe aiũpe iwoꞌokakꞌi tote. Iꞌewyte taꞌatuiãi ete kyryet kyryet iꞌatuꞌe itote. 43Maꞌato Tupana emiitꞌin imohey haria wyti imehit rakaria wo tukupteꞌen aikotã aat ewy tukupteꞌen uiꞌywot etama pe. Maꞌato mio wat uiꞌe hap eweikuap pote eweipyhuꞌat ro uiꞌe hap ewy. 44Uiꞌywot etama piat ieineꞌen hanuaria ti aikotã sekat toineꞌen. Aikotã wẽtup ok tipuẽti hekat go yt iwat i rakat pe. Toipuẽti hawyi toterewyi iraꞌyn aikope tomipuẽti hap tote. Miꞌi hawyi meremo toto raꞌyn toꞌyat kape yne tekareꞌen koꞌi weneru hamo hawyi taꞌaipok iraꞌyn mekewat saꞌup wywo mekewat go kyiꞌat hamo. 45Tupana toineꞌen morekuatno hap wyti aikotã karaiwa tikat kahato tomikyiꞌat wuat nu ikahu rakat hap ewy Perura e hap. 46Miꞌi hawyi karãpe toipuẽti raꞌyn wẽtup nu howoity rakat hawyi toiweneru yne tekareꞌen koꞌi toĩ rakaria hawyi toikyiꞌat raꞌyn mekewat nu ipewiu rakat. 47Iꞌewyte Tupana toineꞌen morekuatno atipy piat hap wyti aikotã wẽtup suki watipun ihyemyiꞌa pe pira pytyk hamo hawyi totat kat epira kat epira hap ewy. 48Miꞌi hawyi karãpe howopy raꞌyn suki pira wo hawyi mekewat pira pytyk haria tiherep taꞌyn suki yẽpekiat yi kyt kape hawyi teꞌeraꞌapyk itote mekewat pira koꞌi airo hamo kat epira kat epira som waku rakat wyti taꞌatupag yrysakag me maꞌato pira saꞌag koꞌi neꞌi ti taꞌatupugha raꞌyn 49Pyno miꞌi hap ewy ti aru ikahuro raꞌyn hap eꞌat pe Tupana emiitꞌin tõꞌẽ hawyi taꞌatuꞌairo raꞌyn miitꞌin wakuaria iꞌewyte yt nakuaria i. 50Miꞌi hawyi ti aru taꞌatupugha raꞌyn miitꞌin yt nakuaria i aria ehyemyiꞌa wato pe. Itote ti aru kyn kyn iꞌatuꞌe haty pono iꞌewyte taꞌatuãi ete kyryet kyryet iꞌatuꞌe. 51Miꞌi hawyi Iesui apo e temiitꞌin me -Pyno Eweikuap apo mio wat uiꞌe hap koꞌi e. Miꞌi pote -Taꞌi mehin uruikuap taꞌyn iꞌatuꞌe. 52Miꞌi hawyi Iesui toꞌe -Pyno uwe uwe mekewaria woꞌonapin hap kuap haria topyhuꞌat wyti aru Tupana toineꞌen morekuatno hap etiat enoi enoi haria wo miꞌiria ti aikotã eiꞌywot tihep tekareꞌen iꞌatunug hap yat kaipyi ipakuptia iꞌewyte ipotꞌi koꞌi hap ewy.

Iesui Etawa Nasare Piaria Yt Imohey Haria Hen I Tukupteꞌen

Maku 6.1-6; Iruka 4.16-30 Piat Ewy

53Miꞌi hawyi karãpe Iesui ihay kahu raꞌyn sehay iãꞌãkap wo hawyi toto iraꞌyn itote pyi. 54Hawyi taꞌaipok iraꞌyn mekewat tawa Nasare kape iraꞌyn aiũpe tuwemotag hap kape iraꞌyn. Miꞌi hawyi itote toiꞌatumuꞌe iraꞌyn Tupana motypot yat piaria. Miꞌi turan mekewat imienoi kuap haria teꞌeruwanetup kahato imienoi ete hawyi apo iꞌatuꞌe toꞌope -Aikope pyi som tuut iweꞌeg hap iꞌatuꞌe. Iꞌewyte hesaika hap koꞌi yt uwe i sepap inug hamuat koꞌi iꞌatuꞌe. 55Katupono ti miꞌi toineꞌen mekewat panꞌi panꞌi e hat saꞌyru neꞌi iꞌatuꞌe iꞌewyte Maria mepyt neꞌi rat iꞌatuꞌe iꞌewyte Tiaku ywyt iꞌewyte Iuse iꞌewyte Simau hawyi Iuta iꞌywytꞌin toineꞌen. 56Iꞌewyte yne inytꞌin tukupteꞌen meiũpe aipyꞌasetpe iꞌatuꞌe. Pyno aikope pyi som toipuẽti yne imikuap hap oktan iꞌatuꞌe. 57Miꞌi hawyi itotiaria tetawa piaria yt taꞌatumotypot hin i. Maꞌato Iesui toꞌe iꞌatuepe -Taꞌi Tupana ehay moherep hat wyti taꞌatumotypot iraniaꞌin etama puo maꞌato hetama sese piaria yt teꞌeropyhuꞌat hin i imohey haria. 58Miꞌi pote Iesui kurin toimoherep imisepap hap koꞌi katupono itotiaria yt imohey haria pote.

Attualmente Selezionati:

Mateu 13: mav

Evidenziazioni

Copia