Lukas 12

Yesus naha apeɗage ana hakodo halole-Na tannam ilaɗa ouhwe kanogoɗa raɗa ata walta kalibbo Farisi mono gurr agama Yahudi

(Mat. 10:26-27)

1Ɓatangraɗa riu-rata ata kamakahha tut rangewe hanuwanai Yesus, ɗahakahhi-kahna nyiwe maɗa hadeke leꞌna. Yesus nahanewe ul tabaraɗa ana hakodo halole-Na, “Hamataragela tannam ilam ouhwe kanogoɗa ata walta kalibbo Farisi kakoɓo atena. Oroge harayiɗa nahameraɗawe bibit roti hawai tut hapanne ɗangage tepung pahakila. Langka hoꞌkakige hatau naɗaꞌwe ɓana panne kahhawe. 2Tangngad hakab ate kajapata haɓunyɗa ata engage ɓapik etai, mono tangngad doku-jala hakuurɗa ata engage ɓana maɓugerai. 3Nahatakim ɓana gaꞌge, enga rangewe ɓana laɗoge; mono hamamham ta katil ata lar ta koro kamatoun, enga talarage gitoma giɗik.”

Madautaɗahon rakkanai Mori

(Mat. 10:28-31)

4“Lugɗamige ɓag ole-Gim! Ilam madautaka tabaraɗa ata kahamate ɗaheguge taum, tabolo walna ɗaꞌmawe hamategun ura-dewamu. 5Ɓatauge kag hatingoge tabaramu iyaɗahoi rakkana hamadautami. Madautaɗahon rakkanai Alla! Oroge Nyi waiɗahena kahamateguge taum mono Nyi ʄala kapang kawahana ɓaitagun ura-dewamu lar ta lat aika baɗa! Hatenawela, Nyiɗaho hamadautami.

6Lima manguu ngala waidi ɗuɗa amaha ɓah kahadda marraha. Loko ɓatauɗaꞌge walaꞌma wu ak hadanganai Alla. 7Wuu ta katakumu baꞌ yapud tangngadi. Oro ɓatauɗage ilam madautaka; mi athogim panghiim wal raɗa manguu!”

Ilam madauta mangaakge ɓa ɗokumini Yesus

(Mat. 10:32-33, 12:32, 10:19-20)

8Malinawalgei Yesus tabaraɗa ana hakodo halole-Na, “Ape hadahhage: ata kamangaak ta aro ata heka ɓa nyi kaɗouk-Ga, Ana-Na Kaɗaꞌ Ata enga namangaak ʄalani ta aroɗa malaikatnai Alla. 9Tabolo ata kaɓal-Ga ta aro ata heka ɓa nyi kaɗouk-Ga, Ana-Na Kaɗaꞌ Ata enga nakaɓal ʄalani ta aroɗa malaikatnai Alla.

10Ɓaɗaaka ata katakwe ɗiha wu kamagaɓɓa ta Ana-Na Kaɗaꞌ Ata, ɗaꞌhowe houpnad jalana. Tabolo ɓana takkawe ɗiha wu kamagaɓɓa ta Wad Ɓiha-madnai Alla, walna ɗaꞌmawe houpnad jalana.

11Mi ɓa ngidkam ta umma hadau kangote ata Yahudi,#12.11 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau lii-hanuwa lii-ha aka mono hadau pohta palakara. tannam kaparehami ta aro ata ka urha palakara waleka ata kapang kawahana, ilam gelagagaka tutge agaɗahona hatakkim tannam kam pahoilawe taum. 12Oroge agawe nahatakkim enga nahanuwagim Wad Ɓiha-madnai Alla tabaram ta rahge.”

Lii-hatuʄa ata pote kabangnga

13Wu ata ta jonga ata buta nahanewe tabarai Yesus, “Ama guru, oha am kam taknage angwug kana yiigad tabaragu waɗeka ngawu ha ijakana amama.”

14Yesus nabalehawe, “Yeih! Iyaɗa kaɗeketawa Nauwa katag ɓawegimid ɗaum ɗuɗa?” 15Maɓeggei Yesus linadi ata buta kaɗaana neɗo, “Ha atege mono hamataragela, ilam alpu kamaꞌkage tannam kampik kolena hapote kareih butaꞌna. Oroge kaɗaꞌ ata walena koleꞌmage mourha kalagahara mono moul, loko ɓana butahingɗui hapotena.”

16Maɓeggei Yesus nahalarai naɗe lii-hatuʄa, “Ɗaan wu ata pote kapang tanana mono butawe ngihge. 17Naɗa ata pote nahangaɗage lar ta atena, ‘Wale hillaꞌma hadau ha ijalawai, tangngadi ngih omagu. Ɓatauge agana winig?’ 18Manahangaɗa piwalge malinage, ‘Naɓatauge, ɗaa winigu. Umma ha ijalawai butayi, hegaraɗahod mono rayina kareih madakka. Yoɗa neɗo dau taugud ngih omag mono ngawug waɗeka. 19Malugɗage ta tau ɗaugu: yau utuw! Tangngage kadahha yau ɗauɓege mono bidau-bidau walena dukaꞌmage. Ngahuw naɓatauge! Yaa-enuw kadahha mono lagaharawu!’ 20Taboloi Alla nahanewe tabarana, ‘Taa... kabangnga! Ɓam matew nehe gaɗi, ma hil iyaꞌhoyi kakoled tangngad hapote hakahhaɓem tangadi?’

21Tauɗaɗage ɗaꞌge tutna ata kamaꞌge kapik pote tanga-tut ɗauna, tabolo walna runɗaꞌmage tut tadawe hakab atenai Alla.”

Hatenanage karawanai Alla

(Mat. 6:25-34)

22Malinagei Yesus tabaraɗa raɗa ata kaɗoku-Ni, “Nyiɗawe maluggim, ‘Ilam gelagaga tutge mourhamu, tut agana hayaam waleka agana hawaim.’ 23Oroge mourham nareih mang hiiɗahoge walta hayaa, mono taum nareih mang hiiɗahoge walta kalabbe. 24Hamataraɗaɗid gaka! Yiɗɗa walɗa hamulaꞌma, walɗa mangatiꞌma, walaꞌma umma hadau ijalaɗa waleka gal. Taboloi Alla nakarawai! Mi athogim panghiim wal raɗa kawurna! 25Iyaꞌkai walta jongam oro gelagagana naɗaꞌwe ɓana matabawe malauge lolongahna langɓa hoꞌkakiwe? Walaꞌmaǃ 26Nna kahadda marraha ɓa baɗa aina ɗaꞌkawe ɓamrayige, ahha mam gelagagage tutge waɗeka. 27Hamataraɗaɗud, aganaɗawe raɗa mangaata ɓana tum wale ɗa ullaꞌmana, wale ɗamanaan ʄalaꞌma. Tanyiɗuwe raja Salomo kamirahingna hapotena walna waiꞌmana kalabbe dahha katauna raɗa mangaata! 28Ruta ta maraɗa natum nehe laɗo mono ɗammagetana namut. Taboloi Alla nakarawai mono nahajoroi naɗa ruta. Atɗahoge mi! Tabolo mi hoꞌhege hatenami! 29Nyiɗawe, ilam alpu hangaɗage tutge agana hayaam mono ha enum, lohho ilam gelagagage tut yaa-enu. 30Tangngad raɗa ɗamayegadi ata aika tadai Alla. Ɓaɗoukage Amam ta sorga natadaɓewe, ɓam yaahom, ɓam enhom mono ɓam tauhom kalabbe, nyiɗawe ilam gelagagam. 31Tabolo mi runɗahoge kamtadawe agawe hakab atenai Alla, ma tangnga-tangngage aika ɗaana tabarami enga nayiimidi Alla.”#12.31 Hanewe ʄawage linaɗaweː runɗahoge mayegage hareha rajanai Alla. Nna ngihgeː mayegage tannamui Alla kana hareha dahha ta mourham.

Hapote ta sorga

(Mat. 6:19-21)

32“Mi kaɗouk-Ga kahoꞌkina mono kaloʄa, tabolo ilam madautaka! Oroge Amamu nyiꞌna Rajam kabaige hamaringim mono kakarawanekem. 33Malaajadi ɗaumu mono amahadi yiiy tabara ata milla. Rayina tangamu kaleku baku aika bora, yiɗay raɗa hapote ha ijala ta sorga. Raɗa hapote walna bungaꞌmai oro ata keɗu walna pikumadi ngalai mono waana walna yaaꞌmadi. 34Oroge ɓagid hapotem dau ɗaad, yoɗa ʄalawe atem!”

Ha inyawik hakitakim

35-36Yesus nahakitage hanewena, “Ha inyawik hakitamla gaɗi-laɗo rayi ullanage tutnai Mori. Katuʄana raɗa ata pahalewa ka engana katge ɓagena mono lat wena engage rewo, katangrana reman morɗa kahagga walta woleka ha ummana. Ɓana hagga naɗa morɗa mono nakaladge ɓinna, yiɗɗa ɗageha ɓugerage ɓinna. 37Ɓana haggaka morɗa mono naɗikkid tangraɗa harema, yiɗɗa ɗamaringna. Katautakkanage: naɗa morɗa enga naha inyaka mono halewayi ngoɗo raɗa atana, mana yiid hayaa ha enu. 38Wale anaꞌmanage maringɗa raɗa ka ullana ɓana ɗikkad morɗa ɓatangraɗa ha inyaka loko ɓana ɗikkid ɓa til gaꞌwe waleka ɓa kuk manwe! 39Apewela! Naɗa mor umma ɓana tadawe ɓa pirra tauge ɓa amini ata keɗu, nyi walna haiꞌman ata keɗu tama lar ta ummana. 40Tauɗa ʄalageɗimː mi ha inyawik hakitaɗahom, oroge Ana-Na Kaɗaꞌ Ata maina ta rah ai pahawaumi.’’

Ata pahalewa kamiku mono aika kamiku

(Mat. 24:45-51)

41Manakanukai Petrus, “Mori, naɗa lii-hatuʄa hatakkim natuɓa tabarama waleka tabaraɗa tangngana ata?”

42Nabalehawei Mori, “Iyai ata pahalewa kamiku mono ka ingta nyangala? Nyiꞌna ata hakeketana morna ɗaꞌ kapala wal raɗa ata pahalewa waɗeka tannam kana yiid hayaaɗa ta rahgeǃ 43Wale anaꞌmanage maringna naɗa ata pahalewana, ɓana hagga morna naɗikkin ɓatangra rayi ullana! 44Hatenawelaː Naɗa morna engana hatenanad tangngad ngawuna tabarana naɗa ata pahalewa. 45Tabolo naɗa ata pahalewa ɓana hanewe ate lar, ‘Morig namoʄahona ɓana hagga,’ manapaluy tangngaɗa ata pahalewa lawai-kaɓaan mono nayaa-en kahha ɓana kawinya. 46Naɗa morna nahagga ta laɗo mono ta rah ai pahawauna. Ma naɗa ata pahalewa aika miku, morna napaluy kahha ɓana ha ongu mono namerage haliɗa ata aika hatena tabarai Alla.

47Ata pahalewa katadawe hakab atena morna, tabolo walna ha inya wikꞌmana mono walna rayiꞌmage hamaꞌna morna, enga butayi pal pahibana. 48Tabolo naꞌ ata pahalewa aika tadawe habaina morna, murge narayige kajala enga ɗapaluyi, tabolo palhoꞌkaɗuyi. Oroge naɗa ata habaɗa yii kabuta, wal tabarana enga buta ʄalay hakarai. Mono ata habaɗa pahatena buta, wal tabarana enga buta ʄalay hakarai.’’

Wale molmawe tabolo haggaɓawe

(Mat. 10:34-36)

49Malinagei Yesus, “Nauwa maiwa ta pan-tana mai harewoguge lat.#12.49 Raɗa ata kakidge tadawe ngihge Jurata Ɓiha liɗaɗage nna latti hanawe nyiꞌwe houknai Allatabaraɗa ata kadoku-jala mono ata aika hatena. Reihi dahha ɗahowe nna lat ɓana rewowe! 50Ɗaa ɗahoge mayilla aika anana haliɗaho-Gu. Mono ate-Gu wale anaꞌmanage ojage ɓa aina ɗaꞌhowe. 51Nne pahawaum Nauwa mai-Gu ngidwe ka mol nne ta pan-tana? Waleꞌma, wale molɗaꞌmawe, tabolo haggaɓawe. 52Wal nne ɓatauge, ata kaha oleɓaina lar ta ɗiha umma ɗiha umma engana bahawe ɓaɗa hagaɓɓa wikna. Tauɗa gaɓɓad ɗuɗa, waleka ɗuɗa gaɓɓad tauɗa. 53Ha ama engana gaɓɓan ana kaɓaanna mono ana kaɓaanna gaɓɓan amana. Inyana enga nagaɓɓan ana lawaina mono ana lawaina gaɓɓan inyana. Madu lawaina engana gaɓɓan weyana mono weyana nagaɓɓan madu lawaina.”

Tadawe tadka nehe kaɗaꞌ ɓatauge

(Mat. 16:2-3)

54Yesus nahanewe tabara ata buta, “Nna ɓam etawe karabba ɓana mataba makaꞌla tabbara laɗo maal, mi limɗage, ‘Eeh engana urana.’ Mono naburtakka ura. 55Nna ɓam paɗani rereha kawal ta selatan, mi limɗage, ‘Enga ngangahana.’ Mono na ɗaꞌ takkawe ngangaha. 56Mi ata baige koɓo ate! Mi naɗaꞌwe ɓam tau katutwe nna tadka kaɗaꞌ waige etawe langta mono tana. Tabolo ahha mi etaɓegad harayi-Gu mono rangeɓegad hatakki-Gu tanyiɗuwe mi enga ʄalahoge aim hatenam?”

Molɗangan muhu

(Mat. 5:25-26)

57“Ahha mi walem pohta ɗauwe agawe katena? 58Ɓaɗaaka ata ka kallam ta pengadilan, kam run ge ɓanaɗaꞌkawe kamɓewe nna palakaram ɓatangrahom ta til lara. Ai waleka, nim nyi nangidim ta aro ata katagge pohta palakara#12.58 Ata katagge pohta palakara; lar ta hanewe ʄawage hakim nyiꞌna ata ka ullana tag ourha mono pohta palakara ta pengadilan. mono naɗa ata katagge pohta palakara na harakagim ta palihi, mono palihi nahatamagim ta gall. 59Hatenawela! Mi walem pikuꞌmana huuna walta gall ɓa aim ɓekahoi daddam hapohtaɓeɗa ata katagge pohta palakara.”

Attualmente Selezionati:

Lukas 12: lmy

Evidenziazioni

Copia