SAN MATEO 22
22
Jun techel tiꞌj mejoblenel
(Lc. 14:15-24)
1Bix e xiꞌ tkbaꞌntl Jesús tuya yol min e txꞌolbaxixxin ti tten cye nejenel cye xjal. E xiꞌ tkbaꞌnxin:
2—Jpjel tuj tcawbil Dios tisenj e baj jun maj tej tbincha junxin rey jun nim waabj tuꞌn tiyꞌsanxin jmejoblenel tej tmaje tcwalxin. 3E xiꞌ tsmaꞌnxin ke tsanjelxin te txcol cyej xjal otk txiꞌ tkbaꞌnxin cye tuꞌn cyul tuj mejoblenel. Pero cycyꞌi tuꞌn cyul. 4Juꞌ tzunj, e xaꞌ tsmaꞌnxin cabtl tsanjelxin, bix e xiꞌ tkbaꞌnxin cyexin: “Cykbanxa cyej xjal e ntxoca: ‘Lu ma bint jun nin waabj wuꞌna te cyey. Ma chi cub wacẍ wuꞌna cyuyax juntl alimaj tbanelxix. Cykilca ma bint tten. Cytzaj tzuna tuj mejoblenel,’ tz̈i cybela,” tz̈i cawel cye tsanjelxin. 5Pero min e xiꞌ cybiꞌn xjal. Nuk oꞌcx e xiꞌ cyiiꞌn cychunkꞌlal tisex tten. At jun e xiꞌ akꞌanal tuj tawal. At juntl e xiꞌ akꞌanal tuj tqꞌueybil. 6Bix ke niyꞌtl xjal, e tzaj cytzyuꞌn ejeeꞌ sanjel, bix oc ten yasel cyiꞌj, bix e cub cybyoꞌn ejeeꞌ. 7Tej tbinte cawel ti otk baj, e tzaj nimxsen tkꞌoj, bix e xiꞌ tsmaꞌnxin ke tsoldadoxin tuꞌn tcub cybyoꞌn kej byol xjal bix tuꞌn tcub cypaten cytanem. 8Bix e xiꞌ tkbaꞌnxin cye tsanjelxin: “Binne tten nin waabj te mejoblenel. Pero kej xjal e ntxoca, yaaꞌn baꞌnke. 9Juꞌ tzunj, cyucxa cyey tuj cojbil tuꞌn tcnet xjal nchi bet cyuj be cyuꞌna, bix cykbanxa cye tuꞌn cyul tuj mejoblenel,” tz̈ixin. 10Bix e xiꞌ ke tsanjelxin cyuj be tiꞌjxe tnom, bix e tzaj cytxcoꞌnxin cykilca xjal e cnet cyuꞌnxin, kej xjal baꞌn cyuyax kej xjal yaaꞌn baꞌn tuj cywitz xjal, bix e noj jaaꞌ te mejoblenel cyuꞌn xjal otk chi tzaj txcoꞌn. 11Pero tej tocx cawel tuj jaaꞌ cyeyꞌlte cye xjal otk chi chmet, e tilxin junxin xjal yaaꞌn t-xbalen toc jnajben te mejoblenel. 12Bix e xiꞌ tkbaꞌnxin te: “Jay wuyena, ¿ti ma tzꞌoctzey bix yaaꞌn toc t-xbalena te mejoblenel?” tz̈i cawel. Pero jatzente xjal, mintiiꞌ aj ttzꞌakꞌbeꞌn. 13Bix e xiꞌ tkbaꞌn cawel cye tsanjelxin: “Cyẍpoꞌnc ke tkꞌab cyuyax tken, bix cyxoomex tuj klolj, jatztzen cokꞌela bix ckitxꞌitxꞌil t-xeeꞌ twitz te,” tz̈ixin. 14Tzin nkbaꞌna cyey, cykilca xjal o tzaj txcoꞌn tuꞌn Dios tuꞌn cyocx tuj tcawbil, pero yaaꞌn te cykilca kꞌoꞌn tuꞌn cyocx―tz̈i Jesús cye nejenel cye xjal.
Jun tumel tiꞌj chojentj te César
(Mr. 12:13-17; Lc. 20:20-26)
15Yajcꞌatltzen, bix e chmet ke aj fariseo, bix e yolen cyxolx ti tten tuꞌn tcub tzꞌak Jesús tuj jun tyolxin. 16Bix e xiꞌ cysmaꞌnxin cab cyxnakꞌatz yaaꞌn baꞌn tuj cywitz tuꞌn cychjet chojentj tej rey Cesar, cyuyax cab xjal tej cloj Herodes baꞌn tuj cywitz tuꞌn cychjet chojentj te Cesar. Bix e xiꞌ cykanen kej sanjel lu te Jesús:
—Taat Xnakꞌtzal, ktzkiꞌna jax tey tyol. Mintiiꞌ cytz̈i tiꞌja te kbalte cye cykilca xjal ti taj Dios. Min tzꞌaj tkꞌon tey tiib tuya juntl xjal. Min tzꞌoc tcyeꞌyen tey tiiꞌn ke xjal oj n-akꞌa nincꞌul xjal. 17Juꞌ tzunj, kbantz keya, ¿tajpa Dios tuꞌn t-xiꞌ kkꞌoꞌn te cawel te Roma jchojentj tzin tkanen ke, bix ka min?―tz̈ikexin.
18Pero el tniyꞌxin tiꞌj kaꞌ iyꞌ tuj cycꞌuꞌj, bix aj ttzakꞌbeꞌnxin:
—Ke cyey xjal caꞌba twiꞌ cyanema, ¿tikentzen ncwaꞌ cykꞌoꞌna cꞌoꞌbil tuj nbeꞌya tuya cyyola? 19Cykꞌontza jpwak chojentja weya―tz̈ixin.
Bix e xiꞌ cykꞌoꞌnxin jun pwak texin.
20Bix e xiꞌ tkanenxin cyexin:
—¿Ale jwitzbaj bix ale jbiybaj tcub twitzj pwaka?―tz̈ixin.
21Aj cytzakꞌbeꞌnxin:
—Te cawel te Roma―tz̈ikexin.
Bix e xiꞌ tkbaꞌnxin cyexin:
—Kane juꞌwa, cykꞌonxne te cawel te Roma alcyej te, bix cykꞌonx te Dios alcyej te Dios―tz̈ixin.
22Tej cybintexin jlu, e jaw kleeꞌkexin, bix e cyaj cycyeꞌyenxin, bix exkexin.
Jun kanbil tiꞌj itzꞌjlenel tuj cyamecy
(Mr. 12:18-27; Lc. 20:27-40)
23Tujx kꞌij lu e pon tuya Jesús juntl cloj xjal, saduceo tbi cycloj. E cykbaxin ka oj tcyim jun xjal, mintiiꞌ tuꞌn tjatz itzꞌj. Bix e xiꞌ cykanenxin texin:
24—Taat Xnakꞌtzal, e cyaj ttzꞌiꞌben Moisés cyjulu: “Ka ma cyim jun xinak, bix ka min-al tcwal, il tiꞌj tuꞌn tmaje jun ttzicy ma titzꞌen tuya t-xuꞌl, tuꞌntzen titzꞌj jun tiyꞌjil, tuꞌntzen miꞌn naj tiyꞌjil,” tz̈i tley Moisés. 25Attzen jun maj at wuuk xjal cyitzꞌen cyiib e ten kxola. E maje cytzicy tuya jun xuuj, pero e cyimxin. Pero min-al tcwalxin e cyaj. Juꞌ tzunj, e maje tneel titzꞌenxin tuya t-xuꞌlxin. 26Pero jax juꞌx e cyimxin, bix min-al tcwalxin e cyaj. Juꞌx e baj te toxen. Cykilcaj wuuk e maje tuya junx cyxuꞌlxin, bix cykilcakexin e cyimkexin, bix min-alx jun cyexin itzꞌj tcwal tuya xuuj. 27Mancꞌbiltzen, bix e cyim xuuj. 28Ojtzen cyjatz itzꞌj ke cyimne juntl maj tuj cyamecy, ¿altzen cyxolj wuuk xinak cꞌoquel te tchmil ja xuuj? Tzinen taꞌ mintiiꞌtl kchunkꞌlal oj kcyim, cuma ka at, iletle tiꞌj tuꞌn cyoc cykilcaj wuuk xinak te tchmilxuj, bix yaaꞌn tumel jlu―tz̈ikexin.
29Pero aj ttzakꞌbeꞌn Jesús cyexin:
—Junxse maj tzpetpajninkey. Min cytzkiꞌna ti toc tuꞌn tyol Dios, bix min cytzkiꞌna at nim tipemal Dios tuꞌn tjatz titzꞌjsaꞌntl t-xumlal jun xjal cyimne. 30Oj cyjatz itzꞌj cyimne juntl maj, mlay chi maje xjal juntl maj, sino chi oquel tisen ke ángel tuj cyaꞌj. 31Tuj cywitza, oj cycyim xjal, cyimneke te junx maj. ¿Pero bajxpa tzꞌoca cycꞌuꞌja tiꞌj ti toc tuꞌn Dios? E xiꞌ tkbaꞌn cyjulu: 32“Inayena Tdios Abraham bix Tdios Isaac bix Tdios Jacob,” tz̈i Dios. Kej yol lu tzin cyyeecꞌan iꞌtz kej xjal o chi cyim, cuma yaaꞌn Cydios cyimne texin, sino Cydios iꞌtz texin―tz̈i Jesús cye saduceo.
33Tej cybinte tnimal xjal jlu, e jaw kleeꞌxsen tiꞌ t-xnakꞌtzbilxin.
Jmandamyent mas il tiꞌj tuj tcawbil Dios
(Mr. 12:28-34)
34Pero tej cybinte fariseo otk caman Jesús cyibaj saduceo, e baj cychmon cyiib te yolel cyxolx ti tten tuꞌn tel cyiiꞌn tipemal Jesús tuj cywitz xjal. 35At junxin txꞌolbal ley cyxolxin e pon tuya Jesús, bix tuꞌn tcub tzꞌakxin tuj tyolxin, e xiꞌ tkanen txꞌolbal ley texin:
36—Taat Xnakꞌtzal, ¿altzen cyej mandamyent tuj tcawbil Dios mas il tiꞌj?―tz̈i txꞌolbal ley texin.
37Bix aj ttzakꞌbeꞌnxin:
—Cꞌoquelxix takꞌ Cyaawey Dios cyey tuꞌn cykil cycꞌuꞌja bix tuꞌn cykil cyanema bix tuꞌn cykil cynaabla. 38Jatzen mandamyent lu ja mas nintzaj. 39Bix tcab tmandamyent Dios tisen tneel. Tzin tkbaꞌn: “Cꞌoquelxix takꞌ jun xjal cyey tisenx n-oc cyakꞌ cyiiba cyey,” tz̈i ley te Dios. 40Tuꞌnj tzin cynimana kej caꞌba mandamyent lu, tzin cynimana cykilcatl mandamyent tuj tley Moisés bix tuj tyol Dios tzꞌiꞌbet cyuꞌn tyolel Dios―tz̈i Jesús.
¿Ale cwalbaj Cristo tuj cywitza?
(Mr. 12:35-37; Lc. 20:41-44)
41Joocꞌtzen cychmonx cyiib fariseo, e xiꞌ tkanen Jesús cyexin:
42—¿Ti toc cyuꞌna tiꞌj jxjal Scyꞌoꞌn tuꞌn Dios? ¿Ale cwalbaj tuj cywitza?
Bix aj cytzakꞌbeꞌnxin:
—Te David.
43E xiꞌ tkbaꞌnxin cyexin:
—Ka nuk tcwal David Jscyꞌoꞌn tuꞌn Dios, ¿titzen tten jax David e kbante tuꞌn tipemal Espíritu Santo ka Jscyꞌoꞌn tuꞌn Dios Taawxin? E xiꞌ tkbaꞌn David cyjulu: 44“E tkba Dios te Waaweya: ‘Kequey tuj nmankꞌaba te tneel xjal. Tcyaja tzalu hasta ojxe cyocx kꞌojlel tiꞌja tjakꞌ tkena wuꞌna,’ tz̈i Dios te Waaweya,” tz̈i David. 45Katzen jax David oc kꞌonte Scyꞌoꞌn tuꞌn Dios te Taaw at-xxe kꞌij, ¿titzen tten ka tcwalxin jxjal Scyꞌoꞌn tuꞌn Dios?―tz̈i Jesús.
46Min-al jun cye e cnet yol tuꞌn tuꞌn t-xiꞌ ttzakꞌbeꞌn texin. Bix ya min-al juntl e tnimsa tiib tuꞌn tbaj t-xkelentl texin.
Attualmente Selezionati:
SAN MATEO 22: mamTS
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2000, Wycliffe Bible Translators, Inc. All rights reserved.
