Mak 12

Kaani Si Som i Ro ta Yang

1Unai Yeso fur laksus findel ti kaani nyai, “Maɗufal nin han yang i manggɓu'. Ta' bang nggar ti ya, ɗak ti kyel ima ɓa si tyas ma'al i manggɓu'i ta, ɗak ta' ahom ti ɗuya ta fit, ɓa maɗing ti kyel ya u te ta. Unai fa som i ro i mahan shini yangi ta ra, ɗak wis ɗa'at. 2Myan i karat mas, mayangi ro mamuro ames ta kyel i som i roi ɓa u mat ɓwai i karat ames. 3Som ima fas yangi ta ra, si ka' mamuroi si ndash, ɗak si nggahus ra ashoki. 4Unai hum ro ti mamuro nin ta kyel ames, maiyi hwak si ndash fwet si ɓakus hai ya, si kofus ya si fwash hai. 5Hum ro ti nin ta, mai mamuroi si for ya. Andi si cu wei ti masi ti som muroi hyang, si ndash shini, si fwar shini ya.

6“Ta dala, kat maɗufal andek ima ɓa u roi, a al ames, ima ma ɓwet sus fwet. Rohus ta dala, nyai, ‘Si wa hal ti al amen.’

7“Unai som i roi si lak ɗiyai ames si ni, ‘Ma cwai ti kopi mai. Yehukan, ka for ya, ɓa kopi u te ii mamukan.’ 8Unai si ka'us, si for ya, ɗak si hwiti funati ya ta takfai i bang.

9“Ami mayangi ma wa masi ya? Ma wa yes u fwar som i roi ya, u fa shini yangi ya ta ra. 10Hu mbe' Worong i DeeƁwe moti kwa haa?

“ ‘Afung tima som i ta' si zan a ɗama i gbya',

ayit ti ɓin anggumi shak.

11Mai a ro i Deembai,

a ɗama i shok na fo na kyel amukan.’ ”#12:11 Ɗing huni hwak: Nak 118:22-23.

12Unai mbayai i Ju si lang far ti ngga' ima ɓa si ka'us ta, ɓurti si shangi mas findel i kaani si a sin hai. Shak ta andi, ɓurti myanat i suɓut i ɗufal ima si mati, si honus ta kyeli si wis.

Tal ti Cef i Wufen ta Kyel i Makai

13Ta takfai, si ro Farisiyawa shini hu som i Herod ta kyel i Yeso, ɓa si dangus u lak aɗeng ima ɓa si ka'us ti findel i fo ames. 14Si yes kyel ames si nyus, “A makofiti, ni shangi ha a maɗufal ma lak ti mwawei. Ha myan ɗeng fo kwa, ɓurti ha mwa' ti ngga' ima ɗufal si ta kwa, ha kwafan ti fisel i DeeƁwe ndere si mwawei asut hai. Laka nin mwashi, a kiga' ni tal Makai cef i wufen haa? 15Ni tal ahun ni tal kwa ya?”

Yis ima shang rere ames nyus, “A ɓurti mi hu ɓweti mbasun ya? Kol huna cefi i ɗingi.” 16Si kolus, lulus ni, “A mashilim hu asum i we mai ya?”

Si nyus, “Ii Makai.”

17Unai Yeso lakus ni, “Fahun Makai ɗama ima mii Makai, hu fa DeeƁwe ɗama ima mii DeeƁwe.”

Unai si shok na fwai si yis hai.

Lul Hai i Muluk Fit ta Mot

18Unai Sadukiyawa, ima si nyai na ɗeng mot ma wa muhum muluk fit kwa, si yes kyel ames si lulus si ni. 19“A makofiti, ai Mosis worong nin ni u ni, na nusus i maɗufal mot ɗak hon mbor asus na kaciwa' al, a kanggang nususi u kat mbori, ɓa u alus fe. 20Ai shunus i ɗiyai shini pyoron sin na. I bya'i kunggo mbor ɗak motus kaciwa' al. 21Mapili katut, yis hwak motus kaciwa' al, mataati hwak andi. 22Andi shak asussi pyoroni, si kunggwa hut si mwatus shak kaciwa' al. Ta dala, mbori ti motut hwak. 23Mwashi myan i muluk fit i som mot, ɓurti mbori ti kunggo hus shak asussi, mbori ti wa mute a ti we ya?”

24Unai Yeso lakus ni, “Ambe' amui mas kwa fweng! Hu shang Worong i DeeƁwe kwa, fut hwak hu shang mbaitat i DeeƁwe kwa. 25Myan ima som ima si mwat si luk fit, ɗeng ma wa kunggo kwa, a hun uɗeng ti wa kunggo kwa. Si yus wa mute fota som lu' i DeeƁwe i kyel ta fit. 26Mwashi si hai i muluk fit ta mot wi, hu mbe' ta kaada i Mosis kwa haa? Myan ima ɗing man yis cwai ti ya, DeeƁwe lak Mosis ni, ‘Ayin a DeeƁwe i Ibirai, hu i Aizik, hu i Jakop.’#12:26 Ɗing huni hwak: Mul 3:6. 27Yis a DeeƁwe i som ima si ti mupwet, ii som ima si mot kwa. Aɗeng ima hu laki mai ma kiga' kwa!”

Anggut ma Mbai

28Andek ta saa ti som kofiti si anggut hai, halus sin uɓet. Hali Yeso matus findeli ndere, lulus ni, “Ta saa ti anggutat ani shak, anggi mii mbai shak ya?”

29Yeso matussi ni, “Ima mii mbai shak a yis mai, ‘Hal huni, a Isar'ila, Deembai DeeƁwe amukan, a yis a Deembai andek. 30Ɓweta Deembai DeeƁwe ama, ti shak mulut ama, ti shak mupwet ama, ti shak shangi ama, ti shak njeng ama.’#12:30 Ɗing huni hwak: Muh 6:4-5. 31Ima kolfai mai, ‘Ɓweta shini fota hai sa.’#12:31 Ɗing huni hwak: Koc 19:18. Anggut mbai nin mana, ima ɓin mai kwa.”

32Unai makofiti si angguti hai ni, “A makofiti, a ndere ha lak. DeeƁwe nin mana kwa, DeeƁwe ma andek je. 33Na ha ɓwet DeeƁwe ti mulut ama shak, hu shangi ama shak, hu njeng ama shak, na ha ɓwet shini fota hai sa, mai ɓin tor ti kuna i ɗoi hu i lyafani njeng shak.”

34Myan ima Yeso ɗingi matus findel ti piris, unai lakus ni, “Ha mas maleng ti kaitat i DeeƁwe kwa.” Unai tasi ani hai, ɗeng humus masti lul kwa.

Yeso a Al i We Ya?

35Myan ima Yeso yis kofiti ta Wur i DeeƁwe, unai lulul, “Atini som kofiti si anggut hai si nyai Kristi a al i Devid ya? 36Ɓurti Devid ti haisus, findel ta kyel i Rin Masapai ni,

“ ‘Deembai lak Deembai amen,

“Tya amun na ra i ucwa amen,

yes myan ima i wa kinti som ima si ha' ti wei ti ha

na sisai ama.” ’#12:36 Ɗing huni hwak: Nak 110:1.

37“Devid ti haisus laiyus ii ‘Deembai.’ Atini ma wa mute ii al Devid ya?”

Male' i ɗufali si shu mwal si aɗeng ima ma laki, si pipel na mulwat.

38Yeso te kofiti ni, “Shingat hun ti som kofiti si anggut hai. Si ɓweti ati ti mbayai faginan, sin ɓweti ɓa ɗufal si twa'us ta kikyal i woor. 39Si ɓyat mbayai kikyal i mute ta Wur i DeeƁwe, hu kikyal i mute maɗesi ta kyel i got. 40A sin a som i muk ti arof ima arya ames si mwatus. Takfai ti mai si ɓwet zan ti myan sin fwal fwet ɓa si ɗingus. Musut i ɗufal mii si wa totsus ɓur si fwash hai.”

Fai i Mbor tima Re Amet Motus

41Yeso wa te amun ta nggas ti kyel i fai, yis ɗing ti ngga' ima ɗufal sima shwaiti cef ames ta wii i kwangi. Shini som i sufati sin shwaiti cef ma hyangi ta. 42Unai mbor mujyel nin tima re amet motus ti yes, ti shu ɓwai i cef i ugbwirik apil ta, ima kol kabo kwa.

43Yeso lai som koltifai amesi nyus, “I ma laksu ti mwawei, aɗeng ima mbor mujyel moti, ti fa, ɓin i anggum i ɗufali shak. 44Sin shak si fa gilik ta saa ti sufat ames, yit ti fa ii ta wet asut wi, ti fa shak aɗeng ima mii mupwet amet.”

Attualmente Selezionati:

Mak 12: AlisIRonNT

Evidenziazioni

Copia