Génesis 7
7
Nchi̱tú nute nu̱u̱nꞌ ñu̱ꞌún
1I̱ña̱jée nkachiꞌ I̱toꞌoꞌ‑ó nu̱u̱nꞌ Noé:
“Noꞌó jín nɨꞌɨ rá táꞌán veꞌi nú ki̱vɨ rán iniꞌ arca. Noꞌó chi niniꞌ ni̱ꞌ ya̱ na̱a̱ꞌ kúvi nú ichinúúnꞌ ni̱ꞌ nteñu rá ñɨvɨ tékúꞌ tióꞌ yaꞌá. 2Jee chuꞌun nú u̱xa̱ꞌ ta̱yú ntáká nu̱u̱nꞌ rá kitɨ noo [ya̱ kuvi so̱ko̱ꞌ rán nu̱u̱nꞌ ni̱ꞌ], kitɨ yɨ́ɨ́ jín kitɨ sɨ́ꞌɨ́. Jee ntáká nu̱u̱nꞌ rá kitɨ ya̱ nsú kitɨ noo kúvi rátíꞌ [ya̱ ntu kúvi so̱ko̱ꞌ nu̱u̱nꞌ ni̱ꞌ] chuꞌun nú u̱vi̱ꞌ rátíꞌ, ɨɨn kitɨ yɨ́ɨ́ ɨɨn kitɨ sɨ́ꞌɨ́. 3Suni chuꞌun nú u̱xa̱ꞌ ta̱yú ntáká nu̱u̱nꞌ rá kitɨ íyó chi̱yo̱ꞌ jíkó súkún, kitɨ yɨ́ɨ́ kitɨ sɨ́ꞌɨ́, sáva kutekuꞌ rá tataꞌ rátíꞌ nu̱u̱nꞌ ñu̱ꞌún. 4Chi ré njia̱ꞌa u̱xa̱ꞌ ki̱vɨ̱ꞌ ka̱ꞌ kuun sa̱vi̱ꞌ nu̱u̱nꞌ ñu̱ꞌún saꞌá ni̱ꞌ vi̱xiko (40) nuví jín vi̱xiko (40) yakuááꞌ. Jee xináánꞌ ni̱ꞌ nɨꞌɨ ya̱ íyó nu̱u̱nꞌ ñu̱ꞌún ya̱ nsa̱ꞌá ni̱ꞌ”, nkachiꞌ I̱toꞌoꞌ‑ó.
5Jee nsa̱ꞌá Noé nɨꞌɨ sánikua̱ꞌ nta̱túníꞌ I̱toꞌoꞌ‑ó nu̱u̱nꞌ‑u.
6Íñɨ́ Noé i̱ñu̱ꞌ sientúꞌ kui̱ya̱ꞌ (600) sáá nchi̱tú nute nu̱u̱nꞌ ñu̱ꞌún. 7Jee nki̱vɨ Noé iniꞌ arca jín rá se̱ꞌya re̱ꞌ jín ñasɨ́ꞌɨ́ re̱ꞌ jín rá ñasɨ́ꞌɨ́ rá se̱ꞌya re̱ꞌ, jie̱ꞌe̱ꞌ ya̱ chitú nute nu̱u̱nꞌ ñu̱ꞌún. 8Jee rá kitɨ noo jín rá kitɨ ntu̱ví noo, jín rá kitɨ íyó chi̱yo̱ꞌ jín ntáká rá kitɨ síúꞌun‑u maáa nu̱u̱nꞌ ñu̱ꞌún, 9ta u̱vi̱ꞌ ta u̱vi̱ꞌ rátíꞌ nkenta nu̱u̱nꞌ Noé nki̱vɨ rátíꞌ arca, kitɨ yɨ́ɨ́ kitɨ sɨ́ꞌɨ́, sánikua̱ꞌ nta̱túníꞌ Ndiosíꞌ nu̱u̱nꞌ Noé.
10Jee sáá njia̱ꞌa u̱xa̱ꞌ ki̱vɨ̱ꞌ jee nkenta jiásɨ́ꞌ nute kue̱ꞌe̱ꞌ nu̱u̱nꞌ ñu̱ꞌún. 11Sáá íñɨ́ Noé i̱ñu̱ꞌ sientúꞌ kui̱ya̱ꞌ (600), jee kui̱ya̱ꞌ yukuán yo̱o̱ꞌ uvíꞌ, ki̱vɨ̱ꞌ xa̱ꞌu̱nꞌ u̱vi̱ꞌ (17), jee nka̱ꞌnɨ̱ꞌ nu̱u̱nꞌ ñu̱ꞌún kúnú chi̱ji nuteñúꞌún nine nu̱u̱nꞌ káku nute nkaa nu̱u̱nꞌ ñu̱ꞌún, jee nkuun xe̱e̱nꞌ xá sa̱vi̱ꞌ. 12Jee nkuun sa̱vi̱ꞌ nu̱u̱nꞌ ñu̱ꞌún u̱vi̱xiko (40) nuví jín u̱vi̱xiko (40) yakuááꞌ.
13Jee ki̱vɨ̱ꞌ yukuán Noé, jín rá se̱ꞌya yɨ́ɨ́ re̱ꞌ, ya̱ kúvi Sem, Cam jín Jafet, jín ñasɨ́ꞌɨ́ re̱ꞌ, jín núníꞌ rá ñasɨ́ꞌɨ́ rá se̱ꞌya Noé nki̱vɨ ráa iniꞌ arca. 14Ntáká ráa nki̱vɨ jín ntáká nu̱u̱nꞌ rá kitɨ yúkú sánikua̱ꞌ rá kitɨ kúvi maárátíꞌ, jín ntáká nu̱u̱nꞌ rá sa̱na̱ꞌ sánikua̱ꞌ rá kitɨ kúvi maárátíꞌ, jín ntáká nu̱u̱nꞌ rá kitɨ síúꞌun maárátíꞌ sánikua̱ꞌ rá kitɨ kúvi maárátíꞌ, jín ntáká nu̱u̱nꞌ rá kitɨ íyó chi̱yo̱ꞌ sánikua̱ꞌ rá kitɨ kúvi maárátíꞌ. 15Nkenta rátíꞌ nu̱u̱nꞌ Noé nki̱vɨ rátíꞌ arca ta u̱vi̱ꞌ ta u̱vi̱ꞌ ntáká nu̱u̱nꞌ rá kitɨ íyó ñunéꞌyúꞌ ya̱ tékúꞌ ya̱ íxtátáchiꞌ. 16Jee nkenta kitɨ yɨ́ɨ́ kitɨ sɨ́ꞌɨ́ ntáká nu̱u̱nꞌ kitɨ ñunéꞌyúꞌ. Jee nkanta rátíꞌ sánikua̱ꞌ nta̱túníꞌ Ndiosíꞌ nu̱u̱nꞌ Noé. Jee ñasɨꞌ I̱toꞌoꞌ‑ó yuvéꞌí ya̱ta̱ꞌ Noé.
17Nchi̱tú nute nu̱u̱nꞌ ñu̱ꞌún vi̱xiko (40) ki̱vɨ̱ꞌ nnu̱kueꞌeꞌ nute nu̱u̱nꞌ ñu̱ꞌún jee nkaneꞌen nute arca. Jee nnako̱o arca ne̱ nu̱u̱nꞌ ñu̱ꞌún. 18Jee nnaa nute nnu̱kueꞌeꞌ víꞌí nasɨ́kuitɨꞌ nute nu̱u̱nꞌ ñu̱ꞌún jee nna̱kosonéchí arca nu̱u̱nꞌ nute. 19Nukueꞌeꞌ nasɨ́kuitɨꞌ nute jee nna̱kasɨꞌ nute ntáká rá yuku súkún ya̱ íyó chi̱ji kua̱íyó súkún. 20Nkaa nute nku̱súkún ka̱ꞌ nsú káꞌ u̱xa̱ꞌ metro nu̱u̱nꞌ rá yuku ñasɨꞌ‑ɨ ráa. 21Jee ni̱ꞌi̱ꞌ nɨꞌɨ rá ntekuꞌ jín ñunéꞌyúꞌ rá jíka nu̱u̱nꞌ ñu̱ꞌún: rá kitɨ íyó chi̱yo̱ꞌ, rá kitɨ yúkú, jín rá sa̱na̱ꞌ, jín rá kitɨ síúꞌun maátíꞌ nu̱u̱nꞌ ñu̱ꞌún, jín rá ñɨvɨ. 22Ni̱ꞌi̱ꞌ nɨꞌɨ noo ya̱ tékúꞌ ya̱ nástatáchiꞌ ráa jín i̱xti̱nꞌ ráa ya̱ íyó nu̱u̱nꞌ ñu̱ꞌún íchí. 23Nxi̱náánꞌ Ndiosíꞌ kua̱íyó kuitɨꞌ ya̱ ña̱ko̱o nu̱u̱nꞌ ñu̱ꞌún: rá ñɨvɨ, rá kitɨ jíka nu̱u̱nꞌ ñu̱ꞌún, rá kitɨ síúꞌun maátíꞌ nu̱u̱nꞌ ñu̱ꞌún, rá kitɨ jíkó súkún. Nkino̱o kua̱chi kuitɨꞌ Noé jín rá ñúꞌún jín re̱ꞌ iniꞌ arca. 24Nka̱a nute nu̱u̱nꞌ ñu̱ꞌún sientúꞌ vi̱xiko u̱ji̱ꞌ (150) ki̱vɨ̱ꞌ.
Attualmente Selezionati:
Génesis 7: meh
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.
