Génesis 12
12
Kána Ndiosíꞌ Abram
1Jee nkachiꞌ I̱toꞌoꞌ‑ó nu̱u̱nꞌ Abram:
“Kene xinóo ñuꞌun nú, rá táꞌán nú jín veꞌi tátáꞌ nú jee kɨ̱ꞌɨ̱nꞌ nú nu̱u̱nꞌ ñu̱ꞌún nu̱u̱nꞌ xinéꞌénꞌ ni̱ꞌ noꞌó. 2Jee saꞌá ni̱ꞌ ya̱ kene nu̱u̱nꞌ noꞌó ɨɨn nación kuñáꞌnú, jee saꞌá ni̱ꞌ ya̱ netuꞌ kuvi nú, jee saꞌá ni̱ꞌ ya̱ te̱ku̱tu̱ꞌún nasɨ́kuitɨꞌ jie̱ꞌe̱ꞌ nú jín ya̱ netuꞌ kuvi inka ñɨvɨ jie̱ꞌe̱ꞌ noꞌó. 3Saꞌá ni̱ꞌ ya̱ netuꞌ kuvi rá ñɨvɨ ya̱ saꞌá ráa ya̱ netuꞌ kuvi noꞌó jín rá se̱ꞌya ichiyúkúnꞌ nú. Jee rá ñɨvɨ ya̱ chisónínu ráa saꞌá kini rá kune̱ꞌyá ráa ránoꞌó, jee chisónínu ni̱ꞌ ráa kunoꞌo ráa. Jee jie̱ꞌe̱ꞌ noꞌó ni̱ꞌi̱nꞌ ñɨvɨ nɨꞌɨ rá tataꞌ ichiyúkúnꞌ ñɨvɨ ñɨ̱vɨ́ ya̱ netuꞌ kuvi ráa”, nkachiꞌ I̱toꞌoꞌ‑ó.
4Jee nkene Abram ñuunꞌ Harán sánikua̱ꞌ nkachiꞌ I̱toꞌoꞌ‑ó nu̱u̱nꞌ re̱ꞌ. Jee kua̱ꞌa̱nꞌ Lot jín re̱ꞌ. Jee íñɨ́ Abram u̱ni̱xiko xa̱ꞌu̱nꞌ kui̱ya̱ꞌ (75) sáá nkene re̱ꞌ Harán. 5Jee nkene Abram kua̱ꞌa̱nꞌ re̱ꞌ jín ñasɨ́ꞌɨ́ re̱ꞌ Sarai, jín Lot ya̱ kúvi se̱ꞌya yɨ́ɨ́ ñaniꞌ re̱ꞌ, jee ntavaꞌ ráa nɨꞌɨ rá nantíñú kúmí ráa ya̱ nníꞌinꞌ ráa jín rá ñɨvɨ nníꞌinꞌ ráa yɨ́ꞌɨ́ xi̱ntíín ráa sáá nééꞌ ráa ñuunꞌ Harán. Jee nkene ráa kua̱ꞌa̱nꞌ ráa nu̱u̱nꞌ ñuunꞌ Canaán jee nkenta ráa nu̱u̱nꞌ ñu̱ꞌún ñuunꞌ Canaán. 6Jee njia̱ꞌa Abram nu̱u̱nꞌ ñu̱ꞌún yukuán jee nkenta re̱ꞌ ne̱ nu̱u̱nꞌ kúvi ñuunꞌ Siquem nu̱u̱nꞌ íyó tu̱ya̱á nsi̱kúnání maa Moré. Jee rá se̱ꞌya ichiyúkúnꞌ nkene ráa nu̱u̱nꞌ Canaán nééꞌ ráa nu̱u̱nꞌ ñu̱ꞌún yukuán. 7Jee ntu̱vi I̱toꞌoꞌ‑ó nu̱u̱nꞌ Abram jee nkachiꞌ re̱ꞌ nu̱u̱nꞌ‑u:
“Nu̱u̱nꞌ se̱ꞌya ichiyúkúnꞌ nú ku̱ꞌva ni̱ꞌ ñuꞌun yaꞌá.”
Jee yukuán nsamaꞌ Abram yu̱u̱ꞌ ɨɨn nu̱u̱nꞌ #12:7 Altar so̱ko̱ꞌ re̱ꞌ nu̱u̱nꞌ I̱toꞌoꞌ‑ó ya̱ nstúvi‑i maáa nu̱u̱nꞌ re̱ꞌ. 8Jee nkene re̱ꞌ yukuán kua̱ꞌa̱nꞌ re̱ꞌ nu̱u̱nꞌ ñu̱ꞌún ichinúúnꞌ ñuunꞌ Betel ichi kénta nka̱niiꞌ nu̱u̱nꞌ íñɨ́ rá yuku, jee ña̱kuneeꞌ re̱ꞌ yukuán, jee ñaniꞌ re̱ꞌ rá veꞌi sayo saꞌma re̱ꞌ ma̱ꞌñú ñuunꞌ Betel jín ñuunꞌ Ai. Jee yukuán káá ñuunꞌ Betel ichi táꞌánꞌ nka̱niiꞌ jee káá ñuunꞌ Ai ichi kénta nka̱niiꞌ. Jee yukuán nsamaꞌ re̱ꞌ yu̱u̱ꞌ ɨɨn nu̱u̱nꞌ #12:8 Altar so̱ko̱ꞌ re̱ꞌ nu̱u̱nꞌ I̱toꞌoꞌ‑ó jee nkakua̱chi re̱ꞌ nu̱u̱nꞌ I̱toꞌoꞌ‑ó. 9Jee kua̱ꞌa̱nꞌ tuku Abram jee kua̱ꞌa̱nꞌ re̱ꞌ nu̱u̱nꞌ Négueb.
Nééꞌ Abram Egipto
10Jee ni̱yo ta̱ma̱ꞌ nu̱u̱nꞌ ñu̱ꞌún yukuán, jee kua̱ꞌa̱nꞌ Abram jín rá ñɨvɨ re̱ꞌ Egipto jee nkino̱o re̱ꞌ kuéntáꞌ to̱ꞌo̱ꞌ yukuán chi ni̱yo ta̱ma̱ꞌ xe̱e̱nꞌ nu̱u̱nꞌ ñu̱ꞌún Canaán. 11Jee sáá kua̱kuyatin re̱ꞌ nu̱u̱nꞌ ki̱vɨ ráa yuñúúnꞌ Egipto nkachiꞌ Abram nu̱u̱nꞌ ñasɨ́ꞌɨ́ re̱ꞌ Sarai:
“Kune̱ꞌyá, jíníꞌ ni̱ꞌ ya̱ kúvi nú ɨɨn ñaꞌan máá ñúnkúún viiꞌ íyó. 12Jee sáá kuniꞌ rá ñɨvɨ Egipto nó jee kachiꞌ ráa ya̱ ‘Ñaꞌan yaꞌá kúvi ñasɨ́ꞌɨ́ re̱ꞌ.’ I̱ña̱jée kaꞌniꞌ ráa nuꞌuꞌ, soo suvinú chi xinóo ráa noꞌó kutekuꞌ nú. 13Saáva kachiꞌ xá ya̱ kúvi nú ku̱ꞌva ni̱ꞌ, sáva koo váꞌa jín nuꞌuꞌ jie̱ꞌe̱ꞌ noꞌó, jee kino̱o ni̱ꞌ kutekuꞌ ni̱ꞌ jie̱ꞌe̱ꞌ noꞌó.”
14Jee sáá nki̱vɨ Abram ñuunꞌ Egipto, jee rá ñɨvɨ ñuunꞌ Egipto niniꞌ ráa ya̱ viiꞌ víꞌí ñúnkúún íyó ñaꞌan vá. 15Jee rá te̱e nísotíñú níkɨ́nꞌ ya̱ta̱ꞌ Faraón te̱e tátúníꞌ nɨꞌɨ ñuunꞌ Egipto, jee sáá niniꞌ ráa maáña jee nna̱kuetúꞌún ráa maa nu̱u̱nꞌ Faraón. Jee ña̱na̱ka ráa ñaꞌan vá nu̱u̱nꞌ veꞌi Faraón. 16Jee nito va̱ꞌa re̱ꞌ Abram jie̱ꞌe̱ꞌ ña, jee njia̱ꞌa re̱ꞌ nu̱u̱nꞌ Abram rá sa̱na̱ꞌ líꞌíꞌ jín rá xi̱ni̱kɨ̱ꞌ, jín rá burrúꞌ yɨ́ɨ́, jín rá musúꞌ yɨ́ɨ́ jín rá musúꞌ sɨ́ꞌɨ́ keꞌen ñɨvɨ kɨꞌɨ ráa xi̱ntíín Abram, jín rá burrúꞌ sɨ́ꞌɨ́, jín rá kitɨ kúvi kameyúꞌ.
17Soo njia̱ꞌa I̱toꞌoꞌ‑ó kue̱ꞌi̱ꞌ kunoꞌo Faraón jín táꞌán veꞌi re̱ꞌ jie̱ꞌe̱ꞌ Sarai, ya̱ kúvi ñasɨ́ꞌɨ́ Abram. 18I̱ña̱jée nkana Faraón Abram jee nkachiꞌ re̱ꞌ nu̱u̱nꞌ‑u:
“¿Ná kúvi yaꞌá ya̱ nsa̱ꞌá nú nuꞌuꞌ? ¿Na̱chi ntu nkáchíꞌ nú ya̱ kúvi ña ñasɨ́ꞌɨ́ nú? 19¿Na̱chi nkachiꞌ nú ya̱ ku̱ꞌva nú kúvi ña?, jee ntɨɨn ni̱ꞌ ña kuvi ña ñasɨ́ꞌɨ́ ni̱ꞌ. Vitan jee yaꞌá ñasɨ́ꞌɨ́ nú. Nakeꞌen ña jee kuáꞌán.”
20I̱ña̱jée nta̱túníꞌ Faraón nu̱u̱nꞌ rá ñɨvɨ re̱ꞌ jie̱ꞌe̱ꞌ Abram. Jee nna̱chuichí ráa Abram kene re̱ꞌ nu̱u̱nꞌ ñuunꞌ Egipto, jín ñasɨ́ꞌɨ́ re̱ꞌ jín nɨꞌɨ noo rá kúmí re̱ꞌ.
Attualmente Selezionati:
Génesis 12: meh
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.
