Luk 2

Otse kwa Aba Amaan Jisɔs

1Ko okpe nwo ovaar kwi ididen Ɔgɔstus#2:1 Ɔvaar Ɔgɔstus ɛma wɔ ode ɔvaar kwi ididen kwu Rom ko okpe kwa aba amaan Jisɔs. Atɨm-nkpon pɨ Rom akem nkama re sawɔsaw ɔttara ki Izɨrɛl, aba tɨm bɛ kɛ ɛffa. ɔnang ɛmang abɛ aba awug ɔnang kwidede kwu unɨng kɔ ɔyagbɨn kwa Rom. 2(Muma wɔ ode ɛnang wuga etseden tsɛ ko okpe kwu Kwirinus ɔdaw Siriya.) 3Ɔnang kwidede opfona ko ofon kwɔ ɔmman aba ta wug-ɛ. 4Josɛf ɔttara ubɨna Nazarɛt kwu Galili opfona Bɛtɛlɛhɛm ko ofon kwu Devid kwu Judiya ukwurabɛ ɛma ubɨn ke effona tsi Devid. 5Ubɨn ɔttara Meri umɨna kwɛ, kwɛ ɛfar kɛ ɛbara aba ta kɛr ntse rabɛ. 6Sa aba anɨng muma, okpe kwu Meri mɔ ɔmaan okwo wem, 7Ɔmaan otseden nwa kwɛ, unwa udwunɨng. Ɔfar-ɛ kɔ ɔvara, ɔtag-ɛ oto tsog gi ikwukwu sa abɛna anang nten utsatɔg, ukwurabɛ ɛwang gɔ ɔtsɔm kwa anang ana yam aba ayɨma kede. 8Akker-nvu aba rɨg ki imɨn abanga ma Bɛtɛlɛhɛm kɔ ɔwang kwa abɛna ker nvu rabe ki irɨng. 9Ɔtɔmɔtɔm kwu Ubɨnɔkpaabyi uyɨn obe, owonidi kwu Ubɨnɔkpaabyi ɔnna muma kɔ ɔwang ngwo ibɨng, ozora ussi bɛ. 10Ɔtɔmɔtɔm kwu Ubɨnɔkpaabyi oben bɛ abɛ, “Ozora ɔnang banga ussi, ntɨm ekkawa zuwa ntsen banga kwɛmɛ ɛnang ɔnang kwidede olew. 11Tsemma ko ofon kwu Devid, abɛ kɔ Ɔkkana amana, Krais#2:11 Krais ɔttara Mezaya uyɨn ɔttɔg van Ɔkkana, ana otse ngwo na jera, ma jer-ɛ Ɔvaar kwu Ubɨnɔkpaabyi oben abɛ mo otsena anang pɛ. Krais ode ɔtɔnga kwu Grik, Mezaya ode ɔtɔnga kwu Hibru. kwode Ovaar. 12Ker ɛkɔga sa abanga ma tɨma asonga; abanga ma se unwa kwa aba far-ɛ kɔ ɔvara aba arɨr-ɛ ki ikwukwu sa abɛ na ake utsatɔg pfu nten.”

13Sɔ ɔnɔ tɔnga ma, atɔmɔtɔm pu Ubɨnɔkpaabyi sawada ɛkwɛ tara ɔtɔmɔtɔm kwu Ubɨnɔkpaabyi nwo aba na tsona Ubɨnɔkpaabyi abɛ:

14“Abarada ade pu Ubɨnɔkpaabyi ga kɛ ɛrang,

ɔttara ki iseg ɔkkpakpa dɨr unɨnga ɔttara anang pu Ubɨnɔkpaabyi olew abubɛ.”

15Okpe kwa atɔmɔtɔm pu Ubɨnɔkpaabyi ammang awana ga kɛ ɛrang, akker-nvu mbo aben ayog abɛ “Amana anta Bɛtɛlɛhɛm anta se udɨg ngwa kwa kwɛ ku uyɨna kwɔ Ɔvaar ka amana ussa ansonga.”

16Aba dwuga aba pfona, aba ase Meri ɔttara Josɛf ɔttara ku unwa nwo su uyɨm ga ki ikwukwu sa abɛ na ke utsatɔg pfu nten. 17Sa aba ku unwa nwo asa aba ateg ɔnang kwidede udɨg kwa kwɛ kuyɨna ɔttara otse kwa atɔmɔtɔm pu Ubɨnɔkpaabyi ka aba ateg ɔbanga unwa nwo. 18Anang mbo ibɨng pa aba awanga idɨg ndo ra akker-nvu ateg bɛ, arɛ ikkon bɛ. 19Meri ɔtaga idɨg ndo ibɨng oke ke ettem ɔttara ɔtan ntana ɔbanga ma. 20Akker-nvu mbo aba manga ata ker nvu ra abɛ, aba anang abarada ɔttara atsona Ubɨnɔkpaabyi ki idɨg ra abɛ awang ɔttara aba se, otse kwa aba ateg bɛ.

21Sɔ ɔgba ngwu ɔsɔttan, se kobenga kwa abɛma kpar-ɛ ɛkpatwar, aba kpɛ Jisɔs etse nzo sɔ ɔtɔmɔtɔm kwu Ubɨnɔkpaabyi ukpɛ-ɛ pɛrɛ aba tɨm-ɛ ki ifar.

Aba Atima Jisɔs Aba kwu kɔ Ɔtsɔm kwa Atɨm

22Si ngwu ndo ri Meri moddo ɛma oyen uwur#2:22 Si ngwu ndo ri Meri mo odo ɛma oyɛn uwur, Ku Nnwer kwu Levitikɔs 12, amana ana jer abɛ odesɛ ukwanɨng ku unwa ɔmana, mu si ndodo rɛ mi sɛ uwur. Udɨm ɔttara ku ukwa ma tɨma eten aba fɔn ɛzza anang Ubɨnɔkpaabyi ko okpe ngwo. Meri ɔttara Josɛf masɛ aba tto okpor abɛ ɔrɔman nwa na ka tɨma Aba tɨma ikpowuga. Jer Nnwer kwu Levitikɔs 12:1–8 otse kwi inyɨna tsɛ Mosis ɛtɔng kɨmgba, Josɛf ɔttara Meri aba ataga Jisɔs pfona ga Jɛrusɛlɛm aba ata akɔga Ɔvaar, 23otse kwa aba kɛr ki inyɨna tsɔ Ɔvaar abɛ, “Otseden nwa kwidede kwo ode udwunɨng, aba ataga nang Ɔvaar.” 24Ɔttara aba fɔn ɛzza tse etor ki inyɨna tsɔ Ɔvaar abɛ “Aba atɨma akpowuga affa, odesɛ enede, aba atɨma adugbɛnya va affa”. 25Ko okpe ngwo ɔkam udwunɨng wan kwo okpen Simyon, urɨg ma Jɛrusɛlɛm, ode ɔnang kwu uwuruwur ɔttara ono tsog inyɨna su Ubɨnɔkpaabyi, unu tɨg igwu so ofog-nttem kwi Izɨrɛl mu ukwu. Ɔkpakpa kwu Ubɨnɔkpaabyi unɨnga abɛ. 26Ɔkpakpa kwu Ubɨnɔkpaabyi kɛ otega abɛ moppe pɛrɛ ose Ɔvaar, Krais. 27Ɔkpakpa kwu Ubɨnɔkpaabyi utɨm-ɛ opfona ga kɔ ɔtsɔm kwa atɨm kwu Ubɨnɔkpaabyi. Okpe kwu Josɛf ɔttara Meri aba atɨm unwa nwo Jisɔs aba nwa ga ke ɛtanga aba assi otse kwɔ ɔmmana dɨg kwi Inyɨna tsɛ Mosis, 28Simyon ɔtaga unwa nwo Jisɔs utɨma kɔ ɔbɔg, otsona Ubɨnɔkpaabyi abɛ,

29“Ɔvaar, ka assa otse kwa aben,

temɔbɔg nfpona ki idɨra.

30Atsen pam kɛ ɛkkana tsɔ isa,

31sa addo atsog anang pɔ ibɨng aba ase:

32Iyansa ra akɔg anang pana Izɨrɛl na bɨna,

ɔttara abarada pa anang anang pɔ Izɨrɛl.”

33Otte ɔttara kɔ ɔkka okkon bɛ ki idɨg rɔ ɔtɔng ɔbanga Jisɔs. 34Simyon ɔshɛ bɛ ishɛ, oben Meri ɔkkakwe abɛ, “Unwa nwa Ubɨnɔkpaabyi wɔ oreng-ɛ abɛ ussi anang ban aba annanga ɔttara anang ban atto ma ki Izɨrɛl. Ɛma wɔ ode ekɔga su Ubɨnɔkpaabyi. Anang na tɔng ipyuwa anang-ɛ, 35fasɛ ɔjaag ntana ri inɨng bɛ kɨ nttem. Irem ni sɔ ke ettem dambɛ ogge wu kumɔ uyɨn ki innam ɔttara.”

36Ɔkam ukwanɨng wan kwɔno oteg ɛkkawa tsu Ubɨnɔkpaabyi, kwo okpen Anna, unwa kwu Fanuɛl kwu ubɨn ke effona tsa Asha. Anna kɔ ɔtama; ku udɨm ɔba ki itso isenaffa pɛrɛ udɨm oppe urɨg-ɛ. 37Unɨng epokwa tarr kowema itso araw anebɨng ukkuma anebɨng. Anna ɔtsɔm kwa atɨm kwu Ubɨnɔkpaabyi kunu bɨna urɨg. Ono kpowa Ubɨnɔkpaabyi ki irɨng ɔttara kɛ ɛya, okwo afufɛ ɔttara ka atɨm zɔma. 38Ukwu muma ko okpe ngwo kwu Simyon ɔnɔ ɔtɔnga ɔnang Meri ɔttara Josɛf, usɨma Ubɨnɔkpaabyi ɔttara ɔtɔnga idɨg ɔbanga unwa nwo, oteg anang pana tɨg ɛnnanga tsɛ Jɛrusɛlɛm.

39Okpe kwu Josɛf ɔttara Meri aba ki idɨg ndo ri Inyɨna tsɔ Ɔvaar oben abɛ aba assi, assa ibɨng aba manga pfona ga Galili ko ofon kwa abɛ Nazarɛt. 40Unwa nwo okpom, ɔkpɔg kɛ ɛkpakpa; esonga ɛnwɛ ɔttara ɔsham pfu Ubɨnɔkpaabyi unɨng abe.

Jisɔs ke Ɛvava Ɔnwa kɔ Ɔtsɔm kwa Atɨm

41Utso kwidede otte ɔttara kɔ ɔkka aba nata Jɛrusɛlɛm aba ata assi Elowa tse Ezzega.#2:41 Elowa tse Ezzega: Mama wɔ ode elowa sa aba na si aba zɨma igwu sa aba annang ibura ga Ijip. Ko okpe nkwo Ubɨnɔkpaabyi ɔfɔ atseden dwunɨng va pa anang pi Ijip. Kɔ ɔtsɔm kwidede kwa anang pi Izɨrɛl ki isɛ rɔ ɔrɔman nwa foga ma kɛ ɛkpaga, ɔtɔmɔtɔm kwu Ubɨnɔkpaabyi kwu utɨm obo ngwo ukwu, ozega abɛma, ɔnang kwo oppe ma ki itsɔm ndo ko ode. Jer nnwer Ɛkzɔdɔs12:1–27 ɔttara nnwer kwu Ditrɔnɔmi 16:1–8. 42Okpe kwu Jisɔs owem itso zowaffa#2:42 Okpe kwo owem itso zowanffa, uva dwunɨng abɛ na ta si idodo dan pɛrɛ aba atara anang tama aba si nlowa ri Izɨrɛl ibɨng. aba ayɨn elowa nzo otse kwa abɛ nassi. 43Se elowa nzo kɛ ɛra, so otte ɔttara ɔkka aba na pfona ko oter, Jisɔs okponga unɨnga ga Jɛrusɛlɛm, otte ɔttara kɔ ɔkka fɨna songa. 44Aba atan abɛ ɔttar bɛ mma, aba senga osenga ngwo ki igwu. Aba titso aror-ɛ ma ka anang pa abɛ ɔttara ka ayog. 45Masɛ aba nɛkɛnasa aba manga innam ga Jɛrusɛlɛm aba ta ror-ɛ. 46Si ngwu nttan nseng aba ta se-ɛ ga kɔ ɔtsɔm kwa atɨm kwu Ubɨnɔkpaabyi, unɨng ɛyar ga ɔttara ka akpew-nnwer, ɔnɔ kɔm bɛ ɔttara ɔbɔw bɛ idɨg. 47Ɔnang kwidede kwɔ ɔwang-ɛ okkon-ɛ otse kwi idɨg ini tan-ɛ ɔttara otse kwɔ ɔnɔ ɔpɔn bɛ. 48Okpe kwo otte ɔttara kɔ ɔkka aba asɛ, okkon bɛ. Ɔkka oben-ɛ abɛ, “Unwa kwam, odeyan kwa assi mana otse ngwa? Atte ɔttara ka amma ka amana udɨg ɔyaga, ana rorɔ.”

49“Bugudɨg gwɔ kwa abanga na ror-m, abanga na songa abɛ amma nɨnɨng kɔ ɔtsɔm kwo Otte kwam?” Jisɔs ɔbɔw bɛ. 50Akwɛ bɛ no ogwonga udɨg kwu Jisɔs ɔtɔnga abubɛ.

51Ɔtwan abubɛ opfona ga Nazarɛt, unussi idɨg ra aben abɛ ussi; ɔkka ɔtaga idɨg ndo ibɨng oke ke ettem. 52Jisɔs okpom ke esonga ɔttara kɛ ɛkpakpa ɔttara Ubɨnɔkpaabyi ɔttara ayog anang aba assi izuwa anang-ɛ.

Attualmente Selezionati:

Luk 2: mfn

Evidenziazioni

Copia