Rut 3
3
Rutta ëllunanpaq Booz ñinqan
1Tsëpik uk unaqñam waćhqunta Noemí ñëqan: “Wawë, manam qosannaqllaqa kakunkimantsu. 2Qosäpa castallanraq kaptinmi Boozwan täkutsiynikita yarpëkä. Pallapäkoq ëwaptikipis pëqa allim ćhaskishöqonki. Kanan paqasmi cebädata wëraq ëwanqa. 3Qampis bäñakuskir allish kaq ratënikita ćhurakur perfümitapis itakuskir ëwë. Ćhëkurña pakaranki mikïta upyëta ushanqanyaq. 4Mëlämanpis puñunqanta chumaq rikëkur ćhakin kaqllaman puñukïkunki. Tsëćhöñam qamwan täkïta munarqa parlapäshunki”.
5Rutñam ñëqan: “Ñimanqëkinöllam llapantapis rurashaq” ñir.
6Tsëmi ëraman ëwëkur suegran ñinqannölla Rut ruräqan.
7Boozñam tsë ëraćhö kushishqa mikuskir upyaskir cebäda shunturëkanqan lädunman puñöqan. Tsëćhö puñïkaptinmi qataranqanta chumaqllalla qariskir Boozpa ćhakin kaqllaman Rut puñukïköqan. 8Pullan paqas rikaćharkur Booz tikrakunqanćhömi ćhakinćhö warmi puñïkanqanta tantiyaskëqan. 9Tsëmi tapöqan: “¿Pïtan kanki?”
Pëñam ñëqan: “Teytë, ñoqaqa Rutmi kä. Qosäpa castan kaptikim costumbri kanqannö ëllumänëkita munä”.
10Tsënö ñiptinmi Booz ñëqan: “Noemípa wamrankuna wañur ushakaptinpis tsë casta mana illakänanpaq qamqa allim yarpaćhaköqonki.#3.10 Israel runakunapa costumbrin kanqannö Boozpa tsurin Rutćhö yuriptin Noemípa wawanpa tsurinnömi käqan. Tsë costumbrinpik masta musyanëkipaq liyinki Deuteronomio 25.5-6. Tsënö yarpaćhakunqëkipik Teyta Dios yanapëkushunki. Wakin warmikunanöpis karqa jövinwanmi waktsa o rïcu kaptinpis täkunkiman käqan.
11“Wawë, ama llakikïtsu. Kë markaćhö llapanmi musyayan alli warmi kanqëkita. Tsëmi mañakamanqëkinö llapanta rurashaq. 12Qosëkipa castan kaptëpis#Rut 2.20. ukraqmi këkan mas legïtimu kaq castan. 13Kananqa tsëpalla puñukamï. Warëmi musyashun tsë runa ëllushunëkipaq o mana ëllushunëkipaq kaqtapis. Pë ëllushuptikipis allim kanqa. Mana ëllushuptikeqa ñoqam ëllukushqëki. Ñinqätaqa Teyta Dios wiyëkämanmi. Rasunpallam ariñinqäta cumplishaq” ñir.
14Tsë paqasmi Boozpa ćhakillanćhö Rut puñuköqan. Tsëćhö puñunqanta pïpis rikänanta Booz mana munaptinmi tuta tuta höralla Rut shäriköqan ëwakunanpaq. 15Manaraq ëwakuptinmi Booz ñëqan: “Cebädata qaranaqpaq yallkïkita mantamï”.
Yallkunta mantaskiptinmi ishkë arröbatanö cebädata qaräqan. Aparirkatsiptinmi wasinman kutiköqan.
16Wasinman Rut ćhëkuptinmi suegran tapöqan: “Wawë, ¿imatatan Booz ñishöqonki?”
Tsëmi Rut willäqan Booz llapan ñinqankunata. 17Tsëpikmi ñëqan: “ ‘Tsinallëkeqa ¿imanötan suegrëkiman ćhanki?’ ñirmi kë cebädata qaramashqa”.
18Tsënö ñiptinmi Noemí ñëqan: “Wawë, mä shuyäshun. Imanöshi kanqa. Ñishunqëkita manaraq rurarqa tsë runa amëtapis manam tarinqatsu”.
Attualmente Selezionati:
Rut 3: qcgPB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2022, Wycliffe Bible Translators, Inc. All rights reserved.