Matiye 10

Iisa n̰akammay jobookeetee ku orro o seera

(Elloŋ Mark 3.13-19, 6.7-13, Lik 6.12-16, 9.1-6)

1Iisa kolliy jobookeetee ku orro o seera. Gaa biriyyoo gudirane ku maa gu peteɗɗiy awaaradgee o gu rayyaɗɗiy paraayiŋgee paracco ku giimo o madurgee.

2Semeeco oko n̰amaakeetee ku orro o seera pa, ay kooko: ka omma ɗe goo Simo maa gu kolaa kulla goo Piyer ma sinti kee Andire, o Zak runti Zebedee ma sinti kee Yaaya, 3o Pilip ma Bartelemi, o Toma ma Matiye ma sokokka miiri, o Tadee ma Zak runti Alpee, 4o Simo ma deyekka gu guta ma ay Yawudigee hikimiyicca kiɗaaco o Yudas Iskariyot ma akkiya bira Iisa picco giimo.

5Ay kooko appe ay jobookeetee ku orro o seera maa ga Iisa n̰aame ma beneyyiŋgee kooko gaa: «Aɗoŋ ecekka ɗa bottolli ma kataa kiɗaayeeco oko giimi ma ay Yawudigee ɗa o ku aɗoŋ un̰n̰a ɗa gawaagargeeco Samaaritennigeyyo. 6Aɗoŋ soo oko giimi ku Isirayel ma ay aleŋ tamee ku masilenta. 7Kuu kataa butuuli pa, ku tasawwoŋ kuu gi mulunniti Mellayi aseero katta. 8Rayyaddoŋgu ma parayya o ku naɗakkoŋgu ma matakke. Rayyaddoŋgu majaddimnigee gu deeɗo samaane unti Mellayi o ku petekkoŋgu awaaradgee. Naa birtoŋ malan̰, kuŋ kulla biroŋ malan̰ ka. 9Aɗoŋ gulma ɗa dahamne bala poddane bala gurus juyupgeetoŋ, 10bala karaatalgee ku turguwwi, bala kaɗiŋgee o bala n̰uura ku magaawi, bala gombolli asan ga lubaaka lekkiti botol oko tiyawti.

11«Kuu un̰n̰e geegarri e baŋ pa darriti, ku deyekkoŋ gimu ma gederra ga joobittoŋ, ku deeɗo nunta girti namma ya wikinne maa ku ƴiiliɗo. 12Kuu on̰aa girti pa, ku salammoŋgu kuu: “Gi aapiya dee ma kuŋ.” 13Guu melleetee giiri kotti joobitoŋ daana, gi aapiya tee maa ku inne nowottayo. A guu joobitoŋ ɗa daana pa, gi aapiya maa ku inne tee yokaatoŋ oko kuŋ. 14Guu joobitoŋ ɗa o gu giyyiya ɗa beneytoŋ, kuu okomma min ger kaaka e baŋ pa min geegar kaaka, ku kokkoŋga buruntulle ka asintoŋ#10.14 Kokko ta buruntulli pa garaa kadar ga gimu cimmica kayaati minnancum, gaa Mella pe asiyyam caaɗa parlane suura.. 15Na beneyyatoŋca seene: Meene ta parlanti, gu giimi ku geegar ma joobitoŋ ɗa o gu giyyiya ɗa beneytoŋ, ga Mella akkiyooga zilla bogorti ƴiila min oko ta giimi ku geegar ka Sodom o ka Gomor#10.15 Sodom o Gomor pa ay gawaagargee maa gu giimi nowottiyo wikinniti Biraayim. Mella pa bittiy ma n̰aawo ta okkati o ta bitti gazanta asan gu giimi ku gawaagargee kotti leewa miɗɗa ta kaw unti Mellayi. Elloŋ Diilo ta Lawwi Paracco 18–19..»

Giimi deegeyyay ma jobokkaa Iisa

(Elloŋ Mark 13.9-13, Lik 21.12-19, 12.2-9)

16Gaa Iisa beneyɗiyo missa oko jobookeetee gaa: «Na n̰amakkatoŋ aleŋ tamee aacco ɓiliwɓiliwnigeyyo. Kuŋ pa tawakkoŋgu kayyeetoŋ aleŋ ta barweyyo o ku deyyoŋ detta aleŋ hamam. 17Warroŋ maaƴi min giimo, asan gu deeɗikitoŋ katawwo unco wereeriyee ku parlanti o gu akkitoŋ r̰ocokko aɗicco gerraco ku giraaniti. 18Guta katawkitoŋ unco gubernernigeyyo o unco salaataŋgee asan ku ay jobookeetaw. Kuu deeɗo suyuudigeetaw unco o unco oko giimi ma ay Yawudigee ɗa. 19Wikinne maa guu katawkitoŋ unco giimi kooko, ku aɗoŋ karriya ɗa oko beneyyi baŋ ku deeɗiya beneyya kuu me. Beneyyi maa ku dekka beneyya, ga Mella beraatoŋga saa oko wikinne kaaka aɗe. 20Beneyyiŋgeetoŋ kotti asaa ɗa min oko kuŋ, ay Ruuhanti Mella Tattoŋ ma beneyya ma kuŋ. 21Sin akkiya bira sinti picco giimo gu deeɗiya o baaba akkiya bira runti picco giimo gu deeɗiya, o miici akkiyo ribila oko gayyeeco guu gaariɗiy gu giimi asiɗiy bamma diyaawi. 22Giimi paracco akkitoŋ ɗakita asan ku ay jobookeetaw. Maa gaa deero soopa baatiyne namma ya dessiti, deewa najjiyenta. 23Wikinne maa guu deegeyyatoŋ geegar kaaka maa ku alɗo, ku gaɗɗoŋ oko geegar kaƴi. Na beneyyatoŋca seene, ku gakammay ɗa gawaagargee ku Isirayel gaɓirati, gaa Runti Gimi asiɗo.

24«Jobookati garaawayi gi ibinti ƴiilaca ɗa ta garaawati, o lubaaka ƴiilaa ɗa tattuwti. 25A jobooka pa gi maanee ga deeɗo aleŋ garaawati o lubaaka aleŋ tattuwti. A gaa milti giiri appe gu kolliya goo ga Belzebul#10.25 Belzebul pa ay tattuwco awaaradgeyyo maa gu kolaa kulla goo Seetanne., gu giimi ku girti pa gu akkiy kolowwo pe ƴiila taata.

26«Kaaka pa ku aɗaaniyo ɓaya ɗa asan gu lekka ɗa gaari ku kiilenta ma akka ooma ɗa purta o gu lekka ɗa gaari maa gu giimi ƴapawwikoo ma akka dee ɗa ibinenta. 27Maa na beneyyatoŋ oko kuŋ ka ma aandoŋ ga kuŋ pa beneyyoŋga ma gaayile, o maa ku geewa ma semsimo ka deytoŋ ku oomikini renta kuu taasiyya ma raɗɗa. 28Aɗoŋ ɓayakka ɗa giimi. Guta deewa zii ka, ruuhane pa gu gederra ɗa gu deeɗica. Ɓayoŋ soo Mella, gata ma gederra ga deeɗiya zii o ruuhane aattí okko ma batakka ɗa ta kaw. 29Ten̰ten̰n̰i seera gu geɗekkiko ɗa aɗe ma riyal e? Gaa ma kaaka aɗe ga alɗo lekka ɗa ya kaƴi min aacco ma galaa kiɗaati bala aŋkiti Mella Tattoŋ. 30Kuŋ pa gu laawa paracco ku kayyeetoŋ kulla ga Mella gemekkiy. 31Kaaka pa ku aɗoŋ ɓaya ɗa. Kuŋ, ga kulla kaƴi min aattoŋ kaali ƴiila min oko ten̰ten̰n̰i ku maani. 32Ay ɗakko appe, ga kulla gimu aɗe ma akka beneyya unco giimo gaa ga ay kanni, ga naa kulla asiɗo beneyya unti Tattu ma aaye samaani naa ga ay kanni. 33A gimu soopa ma akkino pooca unco giimo, ga naa kulla akkiya pooca unti Tattu ma aaye samaani.»

Gimu ma jobokkaa Iisa gasakka gaari ku raɗɗa

(Elloŋ Mark 8.34-35, Lik 12.51-53, 14.26-27)

34Gaa Iisa beneyyiyyoo payya oko jobookeetee gaa: «Aɗoŋ lee ɗa kuu walaŋ na ase na eterɗe aapiya dunuuniti. Naa, asee ɗa na eterɗe aapiya, innasoo na eterre jollo. 35Naa eterre jagaw beenanne miiɗi ma tatti o daate ma yaatí o gomosso ma aydintí ta daatta. 36Gimu gasakkaa ma aŋkiya ɗa min oko gimtee ku giiri saa.

37«Gimu ma ƴekkaa tatti e baŋ gi yaati ƴiila min oko naa, arakke ɗa ga deeɗo jobookatu, o ma ƴekkaa runti e baŋ gi runti ƴiila min oko naa, arakke ɗa ga deeɗo jobookatu. 38Gimu ma ecekka ɗa kuruwati#10.38 Icco ta kuruwayi pa ay oyyo ta diiganti o ta muuti aleŋ ta Iisa, asan ga kuruwa ay latta maa gu giimi ku Rooma dewɗiy giimi ma paapo. o ga jobokkano ɗa, arakke ɗa ga deeɗo jobookatu. 39Gimu ma aŋka dummiytí hayaatanti akkica misila, a ma mesellaca hayaatanti soopa saanantu akkica gassa.»

Gimu ma jobaatoŋ, jobaano

(Elloŋ Mark 9.37,41)

40Gaa Iisa beneyɗo missa gaa: «Gimu ma jobaatoŋ jobowwino saa naa, o ma joobino jobowwiya gata ma n̰akamminoo. 41Gimu ma joobe nabiinice girti, asan ga gimu maa ga joobe kaaka ay nabiinice, akka gassa haggane maa ga Mella beree oko nabiinici, o ma joobe gimu ka ɗayaŋ unti Mellayi, asan ga gimu maa ga joobe kaaka ɗayaŋ unti Mellayi, akka gassa haggane maa ga Mella beree oko gimu ka ɗayaŋ unti. 42Gimu ma beraa caŋ gi kuraaka ta ammi ku detta ka kulla oko kaƴi min oko jobookeetaw ku rootta asan ga ay jobookatu, na beneyyatoŋca seene, gata kaaka akkica gassa hagganti min oko Mellayi.»

Attualmente Selezionati:

Matiye 10: mmy

Evidenziazioni

Copia