Shiyanso 27

UIsaaka ikimuyimiilila uYaakobo

1UIsaaka pina wágosipaga na meeho gaakwe gatelepaga wáava asiloleela wunofu, wámushemeela uEsawu umuswamuve umukhome wáaja, “Muswamu wangu!” Woope wáaja, “One nili baaha wiheesu.” 2UIsaaka wámujovela wáaja, “Puliisa mwanangu! One nagoosipa mandu na ilisiku ilya kiifwa nisilimeenye. 3Lino, nilomba utoole uludibulo ni mbogolo ya ndibulo saakho, ulute unifwimile inyama, 4uniteleshele ishakiilya ishinofu shina nishigeene. Unileetele nilye, baheene nikuyimiilile shiishi shina nishaanali nisinaafwe.”

5Uluhaavi pina uIsaaka akhandi ilogola nu Esawu, humbe uLebeka akhandi ipuliisa. UEsawu pina wáaluta kifwima inyama ku lihakha, 6uLebeka wámujovela umwanaakwe uYaakobo wáaja, “Puliisa, napulikha uwiheenyu ikimujovela umuvaha waakho uEsawu iija, 7‘Nilomba unifwimile inyama ya mu lihakha na uniteleshele ishakiilya ishinofu mandu nilye. Pina naamala kiilya, nisikuyimiilile pa Mutwa uNguluvi shiishi shina nishaanali nisinaafwe.’ 8Lino mwanangu, puliisa amaswi gangu, ugayinatile gina nikikujovela. 9Luta lino mu lupanga, unileetele inyana mene sivili inofu. Niteleshe ishakiilya ishinofu shina uwiheenyu idobokha. 10Baheene umutwalile uwiheenyu alye, baheene akuyimiilile shiishi shina ashaanali muumi.” 11Leelo, uYaakobo wámujovela uLebeka umaayi waakwe wáaja, “Nyineesu, umeenye kiija umuvaha wangu ana waaji muvili goona, leelo one nisiina. 12Uwiheesu nda aniyambaase, asiimanye kiija nisakula nimujanje, asiniyimiilila, leelo asiniyiijile.” 13Umaayi waakwe wámujovela wáaja, “Mwanangu, kiyiijilwa kwakho kuyinsaje kunyangu. Owe gaha shina nakujovela, luta unileetele imene sina nakujovela.”

14Baaho uYaakobo wáaluta kisileeta imene wátwala kwa maayi waakwe. Umaayi waanave wátelekha ishakiilya ishinofu, shina idobokha uwihaanave uIsaaka. 15Baheene uLebeka wátoola amenda amanofu mandu aga Esawu umwanaakwe uwa wutasi, gina gakhandi mukhati, wámupeela uYaakobo umwanaakwe umunangʼana wáfwala. 16Wámufwasa inkwembe sa mene sila mu mawokho na mu luvala luna lukhandi lugaya waaji mu nsingo yaakwe. 17Kuwudugo, wámupeela ishakiilya shila ishinofu nu mukhaate guna akhandi amutelesheele.

18Baheene uYaakobo wáaluta kwa wiihe wámujovela wáaja, “Wiheesu!” Woope wáaja, “Wuli mwanangu, owe yuuwe naani?” 19UYaakobo wámujovela wáaja, “Yuune Esawu, ni mwanaakho wa wutasi. Naagaha ngaja shina ukhandi unilajiise. Lino, lamukha, ukhale wunofu, ulye fina nafwima, baheene uniyimiilile.” 20UIsaaka wámuposa wáaja, “Mwanangu, wuli, iminsiyaano wáfwima na kipata nyangu inyama ndeeni?” UYaakobo wámujovela wáaja, “UMutwa uNguluvi, uNguluvi waakho yumwene wánitanjilisa.” 21Baheene uIsaaka wámujovela uYaakobo wáaja, “Mwanangu vejeela nkholeela nikuyambaase, baheene nimanye shiyooli nda yuuwe mwanangu uEsawu awu yunji.” 22Apo baheene uYaakobo wámuvejeela uwiihe woope wámuyambaasa umwanaakwe wáaja, “Ishawuti ya Yaakobo, leelo amawokho ga Esawu.” 23Asikhamumeenye, kwa kiiva amawokho gaakwe gakhandi gana waaji ngaja ga Esawu. Ndeeno, uIsaaka wáyansa kimuyimiilila uYaakobo, kuno umwene ihiiva kiija yu Esawu. 24Leelo uIsaaka wámuposa khanji wáaja, “Mh! Shiyooli owe yuuwe mwanangu Esawu?” Wámuyankha wáaja, “Eena, yuune!” 25Baheene uIsaaka wámujovela wáaja, “Mwanangu, nivejeesesa inyama yina wafwima nilye, baheene nikuyimiilile.” UYaakobo wámutwalila ishakiilya, wáalya, khanji wámutwalila nayi divaayi wáangʼwa. 26Baheene uIsaaka wámujovela, “Lino vejeela mwanangu, uninoonele.” 27UYaakobo wámuvejeela, wámunoonela. UIsaaka wáganaga kinunsa amenda ga mwanaakwe, wámuyimiilila wáaja,

“Loleela umununsi gwa mwanangu,

guli ngaja mununsi umunofu ugwa mugunda guna guyimiliilwe nu Mutwa uNguluvi.

28UMutwa uNguluvi akukunulile inungwe iya kushaanya,

akupeele amagunda amanofu amanya mota,

inkungulo inofu ni divaayi inofu nyinshi.

29Ifikholo ifikhome ifya vaanu avanji fikhava fikikusenjela,

na kikufugamila kwa lishima.

Uveesaje mukhome pa valukholo lwakho,

avaana va maayi waakho vakhava vikikufugamila.

Vina vakhakuyiijila, vakhayiijilwa vaveene,

na vina vakhakuyimiilila, vakhayimiililwa!”

UEsawu ikimulomba uwiihe amuyimiilile

30UIsaaka wáganaga kimala hela kimuyimiilila uYaakobo, uYaakobo wáganaga kiwuukha, woope uEsawu wáafikha kihuma kifwima. 31Woope wátelekha ishakiilya ishinono mandu wámutwalila uwiihe wámujovela, “Wiheesu! Lamukha ukhale, ulye inyama yina nafwima, baheene uniyimiilile.” 32UIsaaka wámuposa, “Owe yuuwe naani?” Woope wáaja, “Yuune Esawu, muswamuwo wa wutasi.” 33UIsaaka wáalava mandu, baheene wáyansa kitetema kuno iiposa, “Wuli, yu naani yuna wáfwima na kinileetela inyama? Naamala kiilya pina owe usinayinse. Lino one shi namuyimiilila, shiyooli umwene asiyimiililwe!” 34UEsawu wáganile kipulikha ndeeno, baheene wáyansa kikhoola kwa wushungu mandu, kuno ikimujovela uwiihe iija, “Wiheesu, nilomba na yuune uniyimiilile.” 35Uwihaanave wámujovela, “Umunangʼana waakho wáyinsa apa, wánijanjilisa, namuyimiilila.” 36UEsawu wálogola kwa nkhalasi wáaja, “Silulwene itambulwa Yaakobo?#27:36 Yaakobo: Litaawa lya Shihebulaniya. Uluganulo lwakwe, mudehi. Wánijanjilisa mala khavili isi! Ulwa wutasi wátoolaga uwukhome wangu uwa kitala kisawa, lino khanji wátoola imota yangu.” Baheene uEsawu wámuposa uIsaaka wáaja, “Wiheesu usanisigasisa one hata imota yoyoona?” 37UIsaaka wámujovela, “Shi namugaha uYaakobo ave mutwa waakho, khanji namupeela avalukholo lwakwe woona vave vasenga nsengo vaakwe. Namupeela inkungulo ni divaayi inofu. Lino muswamu wangu, shiinu shishi shina nisikupeele?” 38UEsawu wámugomosesa, “Wiheesu kusiina hata imota yimo yina yisigeele? Nilomba uniyimiilile na yuune.” UEsawu wákhoola kwa shawuti nkhome. 39Baheene uwiihe uIsaaka wámujovela,

“Loleela, uwiikhasi waakho wusiive kutali ni nyi inya nungwe kihuma kushaanya

ni nyi inya lilongo ilinofu ilinya mota.

40Ipanga yaakho yiyeene yina yisikugahe ukhale,

khanji usiive muvanda wa maamo.

Leelo, uluhaavi luna luyinsa pina ukhava wawuukha mu wutawulilwa waakwe,

ukhayiwuusa kiiva mu wuvanda waakwe.”

UYaakobo ikimusiga uEsawu

41UEsawu wámukhalalila mandu uYaakobo kwa kiiva ya luyimiililo luna uwihaanave wámuyimililaga. Wáyansa kihiiva kiija, “Uluhaavi lwa shivembo sha wiheesu lwavejeela, pina tikhava taamala ishivembo hela, baheene pina nikhamubuda uYaakobo.” 42Leelo, uLebeka wáganaga kimanya uEsawu shina agulumiile, wámufilikha umuunu amushemeele uYaakobo. Wáganaga kiyinsa wámujovela, “Uyiyangalilaje wunofu, umaamo agulumiile kikubuda, kwa kiiva ya gala gina wamugahilaga. 43Lino mwanangu, ugahe ngaja shina nikikujovela. Lamukha nyangu usijile kwa Labani uwulumbu wangu yuna iikhala ku lijumbi lya Halani. 44Ukhale na woope nsiku nyasilinga ndeeni, mbakha inkhalasi ya maamo yisile. 45Usigalaje kuukho mbakha inkhalasi yaakwe yisile na kisaamwa injowo sina wamugahilaga. Apo baheene nikhamufilikha umuunu akugomose. Kwashi nifwilwe noomwe woona vavili kwa lijuva limo?”

46Baheene uLebeka wámujovela uIsaaka wáaja, “One niilava hela kwa kiiva ya vashimaayi ava Shihiti ava, avadala va Esawu. Lino, uYaakobo woope nda atoole munyaayumo wa vashimaayi ava Shihiti ngaja ava, uwiikhasi wangu wusiiva nu lutono loloona!”

Attualmente Selezionati:

Shiyanso 27: Shisangu

Evidenziazioni

Copia