Shiyanso 21

Kisawa kwa Isaaka

1UMutwa uNguluvi wámusukwagwa uSaala, wámugahila ngaja shina wámujovelaga.#21:1 Yimba mu litaafili lya Shiyanso 17:16; 18:14. 2Baheene, uSaala wáava nu lwanda, wámusava umwana mudiimi mu luhaavi lwa wugogolo wa Abulahamu, khanji mu luhaavi lulula luna uNguluvi akhandi amujoveele uAbulahamu. 3UAbulahamu wámutambulila umwana uyu, ilitaawa lya Isaaka.#21:3 Isaaka: Litaawa lya Shihebulaniya. Uluganulo lwakwe, luhekho. 4UIsaaka wáganile kifisa nsiku munaana, uAbulahamu wámuyinjisaaga ijando ngaja shina uNguluvi wámulajisaaga. 5UIsaaka wásawaagwa pina uwiihe uAbulahamu akhandi afisiise maakha ligana.

6Woope uSaala wáaja, “UNguluvi wánipeela ulushendeewo. Umuunu yoyoona yuna asipulishe injowo isi, asishendeeve lumo noone. 7Yu naani ndi wámujovela uAbulahamu kiija, one ningayonsa avaana? Lino namusavila umwana wa shidiimi mu wugogolo waakwe.”

8UIsaaka wáakula, wáalekha kiyonkha. Ilisiku lina wálekhaga kiyonkha, uAbulahamu wágahaga ishiwungo shikhome.

UHajili nu Ishimayeli viidagwa

9Ilijuva limonga uSaala wámwajile uIshimayeli umwana wa Hajili uMumisili, ikimubeda umwanaakwe uIsaaka. 10Kwa kiiva ya ilyo, uSaala wámujovela uAbulahamu wáaja, “Mudaga umuvanda uyu nu mwanaakwe, kwa kiiva umwana wa muvanda uyu, asikwiliile kihaala lumo nu mwanangu!”

11UAbulahamu wásugumilwa mandu kwa kiiva ya lujowo ulu, kiiva lukhandi lumulenjile umuswamu waakwe uIshimayeli. 12Leelo, uNguluvi wámujovela uAbulahamu wáaja, “Usikhatungumalaga kwa kiiva ya Ishimayeli nu muvanda waakho. Pulisaaga na kigaha gina uSaala ikikujovela, kwa kiiva ishikholo shaakho shikhahuma kwa Isaaka. 13Khanji, umwana wa muvanda waakho, ishikholo shaakwe nisishiyoolose na kiiva shikhome, kiiva woope mwanaakho.”

14Pamulaawu njine, ulwamilaawu mandu, uAbulahamu wálamukha, wátoola ishakiilya nu ludungulu lwa malenga aga kiingʼwa, wámubaabisa uHajili pa livega, baheene wámujovela awuushe nu mwanaakwe. UHajili wáwuukha, wáava iyuluutikha mu lunyikha nkholeela ni lijumbi lya Belisheeba. 15Gaganaga kisila amalenga, uHajili wámuviikha umwanaakwe pansi pa mumepo gwa musita. 16Baheene wávejeela pamwandi padoodo kihuma pina wámulekha umwana mbakha pina akhandi akwali, ngaja uwutali wa lutooso lwa ludibulo, kuno ihiiva mu numbula yaakwe iija, “Shiba nisikhamuloleelaga umwanangu pina iifwa.” Baaho, pina wáali akheele, wákhoola kwa mangʼuulo.

17UNguluvi wámupulikha umwana yula pina ikhoola. Baheene uMalayikha wa Nguluvi wámushemeela uHajili kihuma kushaanya wáaja, “Hajili! Shiinu shishi shikikukhoosa? Usikhatiilaga, kwa kiiva uNguluvi wápulikha inkhoolo ya mwanaakho kuna umugoniise. 18Yiima! Ulute, umukhate iliwokho, umuyiinule, kwa kiiva ishikholo shaakwe nikhashiyoolosa mu nyi.” 19Baheene uNguluvi wámudindula ameeho uHajili. Baaho wályaga ilisima lya malenga, wáaluta kinega amalenga, wáamemya mu ludungulu lwa malenga, wámupeela umwanaakwe wáangʼwa.

20UNguluvi wámuyangalilaga umwana uyo, woope wáakula, wáava mukhome. Wáakhala mu lunyikha, insengo yaakwe yikhandi kifwima kwa ludibulo. 21Wáali ikhalaga ku lunyikha lwa ku Palani. Umaayi waakwe wámutoolela umudala uwa kunyaanave ku Misili.

Ulufingano lwa Abulahamu nu mutwa uAbimeleeki

22Uluhaavi ulo, umutwa uAbimeleeki nu Fikoli umukhome wa vasulukhali vaakwe vafikhaga kwa Abulahamu. UAbimeleeki wámujovela uAbulahamu wáaja, “UNguluvi ali noowe kwa shila shiinu shina wiigaha. 23Lino, nikikulomba kiija, uyiyiije kwa Nguluvi kiija usinijanga one, avanangu ni shisafi shangu. Ngaja one shina nakugahilaga wunofu, shiisho ndeeno na yuuwe unigahilaje wunofu, one ni nyi iyi yina ukheele ngaja muhensa.” 24UAbulahamu wámujovela wáaja, “Nikiyiyiiga nisiigahe shina walogola.”

25Baheene uAbulahamu wámupiikha uAbimeleeki wáaja, “Avavanda vaakho vanipokhaga kwa ngufu ilisima lyangu limo.” 26UAbimeleeki wámujovela wáaja, “Kwashi usikhanijoveele? Shiyooli, one shi nipulikha hela injowo isi ndeeni, nisimeenye kiija vava naani vagahaga ndeeno.” 27Gaganaga kishila ago, uAbulahamu wámupeela uAbimeleeki inkholo ni ngʼombe, baheene avaanu vavili ava, vafingana. 28UAbulahamu wásibaagula na kisiviikha kulubali inkholo itogota fungati. 29UAbimeleeki wáganaga kiwona ndeeno, baheene wámujovela wáaja, “Kwashi wasibaagula kulubali inkholo iso itogota fungati?” 30UAbulahamu wámuyankha wáaja, “Posheela inkholo isi itogota sina nikikupeela kwa liwokho lyangu, kiiva shimanyilo sha kiija, ilisima ili yuune nahimbaga.” 31Kwa kiiva ya ilyo, uluvala ulu lwatambulwa Belisheeba,#21:31 Belisheeba: Litaawa lya Shihebulaniya, lina nganulo sivili. Ulwa wutasi, lisima lya lufingo nu lwa wuvili, lisima lya fungati. kiiva apo papeene pina vafinganaga woona vavili.

32Ndeeno, vaganaga kimala kifingana ku Belisheeba, umutwa uAbimeleeki nu Fikoli umukhome wa vaanu va wulugu waakwe, vaawuya ku nyi yaanave iya Vafilisiti. 33UAbulahamu wávyala umusisi ku Belisheeba, wámufuunya uMutwa uNguluvi uwa Shiluta. 34Kuwudugo, uAbulahamu wáakhala nsiku nyinshi mu nyi ya Vafilisiti.

Attualmente Selezionati:

Shiyanso 21: Shisangu

Evidenziazioni

Copia