Shiyanso 13

UAbulaamu nu Looti vibagunkhana

1Ndeeno uAbulaamu wáwuukha ku Misili, wámutoola umudala waakwe, uwusi waakwe woona nu Looti, wáaluta ku Negebu, kunyagamo ya Kanaani. 2Uluhaavi ulo, uAbulaamu akhandi akwavile ifiinu finshi, akhandi ni fidiimwa, ihela ni sahaabu.

3Kihuma kunyagamo ukho, wáyansa kihaamila mbali nyinshi, mbakha wáafikha paakhati ya lijumbi lya Beteeli ni lya Ayi, uluvala luna akhandi asenjile ilitinga ulwamwandi. 4Apo baheene pina wáali asenjile uluvala lwa kihumisa ishadanda. Ukho uAbulaamu wámufuunya uNguluvi kwa litaawa lyakwe ilya Mutwa.

5Baheene uLooti yuna akhandi ishuula nu Abulaamu, woope akhandi nu wusi winshi mandu. Akhandi akwavile ingʼombe, imene ni nkholo, akhandi ana mudala, avaana na vavanda vinshi. 6Ifidiimwa fyanave fikhandi finshi mandu, ndeeno, inyi yila yikhandi yisikivakwila uAbulaamu nu Looti kikhala lumo. 7Lulwene avadimaaji va Abulaamu na va Looti vakhandi vidalinkhana. Khanji uluhaavi ulo, kukhandi kuna Vakanaani na Vapeleesi vina vakhandi viikhala mu nyi yila.

8UAbulaamu wáganile kiwona ndeeno, baheene wámujovela uLooti wáaja, “Miyaa, tisikhayansaaga kidalinkhana ose awu avadimaaji veesu, kiiva tili lukholo. 9Lino nikikulomba tibagunkhane. Owe, loleela inyi iyi yoona yina ukiyaaga. Nda widobokha kiluta uluvala ulwa kunshiji, one nisiilute uluvala ulwa kundiilo. Nda widobokha kiluta uluvala ulwa kundiilo, one nisiilute uluvala ulwa kunshiji.”

10ULooti wáganaga kiyiima na kiloleela kwa kutali, baheene wályaga ilifunkho lyona ilya mukhoga ugwa Yolodani, mbakha ilijumbi ilya Sowaali. Wályaga lina malenga minshi, ngaja inyi iya Misili na mu shiisi sha Edeni.#13:10 Shiisi sha Edeni: Uluvala ulu lulwene luna lukhandi ishiisi ishinofu mandu, shina avaanu va wutasi uAdamu nu Hawa vavishilwagwa shila shiinu nu Nguluvi. Kwa Shihebulaniya yiyandiikhwe, shiisi sha Mutwa uNguluvi. #13:10 Yimba mu litaafili lya Shiyanso 2:10. Uluhaavi ulo, uMutwa uNguluvi akhandi asinagananje amajumbi ga Sodoma ni Gomola. 11Ndeeno uLooti wáhaagula ilifunkho lyona ilya Yolodani, wáaluta kunena. Avaanu vavili awo, vabagunkhana. 12UAbulaamu wásigala mu nyi ya Kanaani. ULooti wáakhala paakhati ya majumbi gina gakhandi gali mu lifunkho lila, wásenga ilitinga nkholeela ni lijumbi lya Sodoma. 13Leelo, avaanu va ku Sodoma vakhandi vanansi mandu, vakhandi viigaha uwunansi wukhome kwa Nguluvi.

UNguluvi ikimusoonela uAbulaamu inyi

14ULooti nu Abulaamu vaganaga kibagunkhana, uMutwa uNguluvi wámujovelaga uAbulaamu wáaja, “Apo pina ukwali, yiima uloleele imbali soona, kunyagamo, kunena, kunyiikho na kusikha. 15Kwa kiiva inyi yoona iyi yina ukiyaaga, nikhakupeela owe nu lusawo lwakho, yive yeenyu shiluta. 16Ulusawo lwakho nikhaluyoolosa luve lukhome ngaja luhankha luna lusivasikha! Umuunu nda akwiliile kiluvasa uluhankha, ulusawo lwakho loope asiluvase. 17Lino, yiima ujende jende na kiyiseesa inyi yoona, uyaaje uwupapaate waakwe nu wutali waakwe, kwa kiiva inyi iyi nikhakupeela owe.” 18Baheene uAbulaamu wálihaamya ilitinga lyakwe, wáaluta kikhala kulubali lwa mapishi amatali aga mwalooni, gina gali ku Mamule, nkholeela ni lijumbi lya Hebuloni. Ukho wámusenjela uNguluvi uluvala ulwa kihumisa ishadanda.

Attualmente Selezionati:

Shiyanso 13: Shisangu

Evidenziazioni

Copia