Mataos 3
3
Mɨtuno mo Yʉanes Ndubʉr
(Markus 1.2-6; Lʉkas 3.1-6; Yʉanes 1.19-28)
1É molu maa, Yʉanes Ndubʉr ze taare lé elɛɛ lɔɔ Zyɛm é feha si ndɨ é lal Yʉda ɛ. 2Nye a lɛɛ-lɛɛ e bʉr ó: «Gwɨma ga mobebe mɨn ɔɔ! Bɨn bé à dwir mɨleme ɔɔ, ebe, jɔʼ Da ócyel jwɨ̀ʼa ye cyecye e, yé mu ó kunokuno le epyal ɔɔ!»
3Lwib yaa, nye a lwib ye ó, ebe, yé ó lwib gwar ngwiha mɨlɔb Ezayi a tile e, lé elɛɛ ó:
Mʉr, nye etuno é feha si, lé elɛɛ ó:
«Komla ga zi mo Da ɔɔ!
Bɨn bé à cyel mozi me é liim ɔɔ!»
4Kan Yʉanes a bwar ɨ, wé a be ó tia e mye mo kamtʉl. Kana nye a tiile-tiile é kubo e, a saŋɔ ó e kʉr tir. Nye a de-de ó baaceme-bɨka e l'egbɔʼ. 5No ó bʉr o Yerʉsalɛm, le baa o lal Yʉda ndwe e baa o nkɔra dibe Yʉrdɛŋ, bɨbɛh, bé a fwal ɨ gumo nye a be e, 6ze gwihɔ mɨsyem myɔɔ, Yʉanes ze dù be é dibe Yʉrdɛŋ.
Gwɨma ga mobebe mɨn. Bɨn bé à dwir mɨleme.
(Lʉkas 3.7-9)
7No ó, mpʉ Yʉanes a bee oFarizyɛŋ bé e l'oSadwisyɛŋ é buobuo lé eze, ó nye dùʼo be e modibe e, nye ze lɛɛ e be ó: «Kampaŋa bɨgurokɔɔ yi, zé a pa kʉ lɛɛ e bɨn ó, bɨn bé e nkul ecɨŋ empime mo Zyɛm é jɔʼ nye ókpaa le e bɨn ɨ? 8Ebe no, guma ga mɨmpaŋ mɨ mpumo lé ejala e bʉr mu si gwɨma mobebe mɔɔ, dwir mɨleme e. 9Adɨ lɛɛla ga paʼra win ó: “Bɨna ga bé e sɔŋ ó Abraham#3.9 Bé a ngbaa lwib no ó, lé elɛʼle ocɨcyel wɔɔ é mih mo Zyɛm.,” ebe, me elɛɛ bɨn cyecye ó nɛɛ: Zyɛm óbɛm liŋ mokoʼ maʼ bwan mo Abraham. 10Zwɨɨ, nye mu ó é car lé etwɛ̀l lɨ nko evuʼ. Nye ótwɛ̀l lɨ yiyɛh ndɨ agumo mɨmpaŋ mɨ mpumo e, guho ye é l'ebeʼe e siʼe.»
11«Mɛm, me edù bɨn ó e modibe, lé esaa ó, bɨn nkʉʼ gwɨma mobebe le edwir mɨleme min. Sa gwar, mʉr ndɨ edu me é koo pihe e, nye e nkul mojwɨ̀ʼa, laa me. Me abe mbi mʉr lé ejala le enkɛɛ osilpah be e#3.11 Epɛʼ osilpah é mokʉ, lé ó syɛɛ mo zɨze elʉa.. Nyɛɛ, nye ódù bɨn ó é Mbɨambɨa Sisim ndwe e siʼe! 12Nye e pyɛba é mobo. Nye ólwal mpumo, ntɔʼ pyɛb. Pie tɨ, nye ógwamle duò epyɛb yaa, ntɔʼ komo mɨpyɛba é bɨtaa. No ó, mpʉn nyɛɛ, nye ósyɛŋ nye é syɛŋ syɛŋ, ntɔʼ sʉ é siʼe ndɨ adime-dime e.»
Ndubo mo Yesʉs
(Markus 1.9-11; Lʉkas 3.21-22; Yʉanes 1.29-34)
13No ó Yesʉs a ze mʉa ɨ Galɨle, to é l'ebʉm e dibe Yʉrdɛŋ nko Yʉanes a be e, lé esaa ó, nye nʉŋa ndubo mo Yʉanes. 14Sa gwar, Yʉanes a si ngbaa taare ebene. Nye e nye ó: «Da, yé ejala ó, gwɔɔ dùʼo me, abe ó, go ntaʼ ó mɛm dùʼo go!»
15Yesʉs ze bɨha e nye ó: «Birɨ, yé syɛŋɨ no, ebe, yé ejala ó, loŋlo bɨsyɛɛla bɨ ocɨcyel bibyɛh.» Yʉanes ntɔʼ mɛʼle. 16Jɨh tɨʼ Yesʉs a kʉ nʉa ndubo, le eduho é modibe, jobo ntɔʼ ze bɔa, nye ntɔʼ bee Mbɨambɨa Sisim mpʉ epɨba, lé efulo é baaa, ze bebre nye é nyʉl. 17Pie tɨ, nye ntɔʼ joʼo twii lé eduho é jobo kʉ, lé elɛɛ ó: «Nwaʼ, nye ó mwan kpɛl wam. Sʉhʉ yam yiyɛh, yé ó é nye.»
Attualmente Selezionati:
Mataos 3: ozmBad
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2002, Wycliffe Bible Translators, Inc. All rights reserved.
