Mataayo 27

ɄYɨɨsʉ ihɨlɨkwa kwa Pilato

(Maliko 15:1; Luuka 23:1-2; Yohana 18:28-32)

1Wʉ kʉkie pavʉsiku, avavaha va vateeketsi vooni paninie na vanzagɨla va Vayahudi, vakɨtsosanza ʉmwa kʉmʼbudila ʉYɨɨsʉ. 2Vakankʉnga, vakalʉta nave kʉ mbaha va veene ʉNdooma ʉvɨ ɨlitaawa lya mwene aale vɨ Pilato.#27:2 Pilato Ikulongwi tsa muunu ʉjʉ ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ.

ɄYuuda ikɨtʉlɨka

(Mbombo tsa Vapositili 1:18-19)

3Lɨno ʉYuuda, ʉlya ʉvaammendiime ʉYɨɨsʉ kʉ valʉgʉ, wʉ aweene ʉkʉta ʉYɨɨsʉ ahɨgilwe ʉkʉta abudwe, akɨsaatsa itsyavombile. Pwʉ akatoola ihelahela tsilya isitsigo sidatu (30), akakilivula kʉ vavaha va vateeketsi valya na vanzagɨla va Vayahudi. 4Akavavʉʉla akata, “Ndɨvombile sivi, ʉkʉmmendama kwanyie ʉmuunu ʉntsila vʉgalo ʉvʉveetsaga.” Aveene vakata, “Ago nagikʉtʉtanga kɨɨnu ʉwe. Ago gaako jyʉve.” 5Pwʉ ʉYuuda akataaga ihelahela tsilya mu lʉvɨgo lwa Vʉtaamo ʉVʉvalatse wa Ngʉlʉve. Akahega, akatsikɨtʉlɨka. 6Avavaha va vateeketsi vakahola ihelahela tsilya. Vakatsovana vakata, “Mwiko ʉkʉhanza indalama itsi ni tsinge itsa mu tembile, ʉlwakʉva tsihombilwe pakʉta ʉmuunu abudwe.” 7Pwʉ vakɨtsosanza nʉ kʉlamula ʉkʉta indalama itso tsigʉle ɨkɨlɨmɨla kya mbʉmbasivya, pakʉta mwʉ vasɨɨlwagwe ʉmwa avaswe avahenza. 8Ɨkyo kyʉ kɨpelile ɨkɨlɨmɨla ɨkyo, ɨlitaawa lya kyene vateetsage ɨKɨlɨmɨla kya Nkisa, ʉkʉsikila ɨleelo.

9Ewo mwʉ ɨlimenyu lyavombekye ɨlyʉ ʉnyamalago ʉYelemiya aavɨgile ʉkʉta, “Vaatoolile ihelahela isitsigo sidatu, ɨkɨgelelo ɨkyʉ aVaisilahɨli vɨɨdɨngʼiine. 10Vaagʉlile ɨkɨlɨmɨla kya mbʉmbasivya ndʉwʉ ʉNtwa ʉNgʉlʉve aalagye.”#Zakaliya 11:12, 13; Yelemiya 19:1-13; 32:6-9

ɄYɨɨsʉ pavʉlongolo pa Pilato

(Maliko 15:2-15; Luuka 23:2-3, 18-25; Yohana 18:29–19:16)

11Kʉmbele vakamwɨmya ʉYɨɨsʉ pavʉlongolo pa ndongotsi ʉNdooma. Ʉndongotsi ʉjwa akambʉʉtsa akata, “Ndeeti, ʉve veeve Nkʉlʉdeeva va Vayahudi?” ɄYɨɨsʉ akamwanda akata, “Ʉve veeve ʉtsovile.” 12Pwʉ avavaha va vateeketsi avo na vanzagɨla va Vayahudi, vakatengʉla ʉkʉtsova itsa kʉmmɨga ʉYɨɨsʉ. Napeene, ʉmwene naavaande kɨɨnu. 13Pwʉ ʉPilato akambʉʉtsa akata, “Ndeeti, navukʉgapʉlɨka ago gooni ʉgwʉ vikʉkʉhɨga?” 14ɄYɨɨsʉ akatsiga kɨnuunu. Ɨlyo lɨkampelela ʉPilato ʉkʉdega siitso.

15Ʉmwaka nʉ mwaka, pa nsɨkɨ gwa kyaka kya Pasaka, ʉndongotsi ʉjwa aale nʉ lwiho lwa kʉmbopola ʉnkʉngwa mpamato ʉvɨ avaanu vaanogilwe ahʉme. 16Lɨno mu nsɨkɨ ʉgwa, aalepwo ʉnkʉngwa mpamato ʉvɨ ɨlitaawa lya mwene aale vɨ Balaba. Ʉnkʉngwa ʉjwa aamanyikiike siitso ʉkʉkongana ni mbiivi itsʉ aavombaga. 17Lɨno wʉ avaanu valʉndamiine, ʉPilato akavavʉʉtsa akata, “Veeni ʉvɨ munogwa ndɨvavopolele mu vakʉngwa ava vavɨlɨ? Ndeeti, munogwa ndɨvavopolele ʉBalaba evo ʉYɨɨsʉ ʉvɨ avaanu vikʉmwɨlanga viita vɨ Kɨlɨsiti?”#27:17 ɄPilato aavʉʉtsiitse ndavʉle wʉ kʉnʉ ihʉʉvɨla ʉkʉta ɨlipʉga lɨlya lya vaanu lyale liita ʉYɨɨsʉ vɨ avopolwe ʉlwakʉva aamanyikiike kange aaganilwe na vaanu vongosu. 18ɄPilato aavavʉʉtsiitse ewo ʉlwakʉva aalʉmanyile ʉkʉta, avalongotsi va Vayahudi vaale nɨ kɨvini nʉ Yɨɨsʉ kyʉ mene vaammɨliike kʉ mwene ahɨgwe.

19Wʉ ʉPilato ataamile mu kɨtaamilo kya mwene kya kʉhɨgɨla inongwa, ʉnʼdala va mwene aansuungʼie ɨkulongwi akata, “Ʉmuunu ʉjwa ʉntsila vʉgalo, ʉleke ʉkʉmbombela ʉvʉviivi ʉvʉveetsaga ʉlwakʉva pakɨlo ndɨhangajiike siitso mu magonasivi pa kulongwi jya mwene.”

20Avavaha va vateeketsi na vanzagɨla va Vayahudi, vakavasonga avaanu ʉkʉta vanʼdoove ʉPilato, avavopolele ʉBalaba nʉ kʉmmɨga ʉYɨɨsʉ ʉkʉta abudwe. 21ɄPilato akavavʉʉtsa ikange akata, “Veeni ʉvɨ munogwa ndɨvavopolele mu vakʉngwa ava vavɨlɨ?” Vakamwanda vakata, “Tunogwa ʉtʉvopolele ʉBalaba.” 22ɄPilato akavavʉʉtsa ikange akata, “Lɨno, ndɨvombe kɨki kwa Yɨɨsʉ, ʉvɨ vikʉmwɨlanga ʉkʉta vɨ Kɨlɨsiti?” Avaanu vooni vakooveela vakata, “Intovelele pa kɨdamingʼanie!” 23ɄPilato akavavʉʉtsa ikange akata, “Ʉmuunu ʉjʉ, avombile vʉnangi vʉki?” Aveene vakoongeletsa ʉkwoveela vakata, “Intovelele pa kɨdamingʼanie!”

24Wʉ ʉPilato aweene ʉkʉta nakaweese ʉkʉlema amasaago ga vaanu avo nʉ kʉta vatengwe ʉkʉvomba ɨholo, akatoola amagasi, akapuguha isivoko sya mwene, pavʉlongolo pa veene, ʉkʉvonia ʉkʉta ʉmwene nalɨ nʉ vʉgalo ʉvʉveetsaga. Pwʉ akavavʉʉla akata, “Ndɨlɨ mbʉla vʉgalo ʉvʉveetsaga kʉ muunu ʉnʼgolosu ʉjʉ. Aga galɨ mu sivoko siinyo jyʉnyie!” 25Avaanu vooni vakamwanda vakata, “Ʉvʉnangi wa kʉmʼbuda ʉYɨɨsʉ, vʉve wiitu na vaana viitu!” 26Pwʉ ʉPilato akambopola ʉBalaba, ndʉwʉ vaanʼdoovile. Napeene, akavalagɨla avasikali va mwene ʉkʉta, vantove ʉYɨɨsʉ ni sikoti nʉ kʉntovelela pa kɨdamingʼanie.

Avasikali vikʉnkinila ʉYɨɨsʉ

(Maliko 15:16-20; Yohana 19:2-3)

27Pwʉ avasikali avo va ndongotsi ʉNdooma, vakantoola ʉYɨɨsʉ. Vakabɨha nave kʉ nyumba jya lʉdeeva. Vakalʉndamana avasikali vooni nʉ kʉntsʉngʉtɨla ʉYɨɨsʉ. 28Vakasuula ɨmisabwa gya Yɨɨsʉ nʉ kʉnswalɨtsa ɨkanzo ɨnduungʼu. 29Vakativa ʉlʉdingʼulilo lwa mitwinyo, vakanswalɨtsa kʉ ntwe nʉ kwibatɨtsa ɨlilanzi mu kɨvoko kya mwene ɨkya kʉndyo pakʉta avoneke ʉta lweli inkʉlʉdeeva. Vakasugama pavʉlongolo pa mwene, vakapembetsa kʉ lʉbedo vakata, “Mapembelo, gwe Nkʉlʉdeeva va Vayahudi!” 30Vakamʼbehela amati ʉYɨɨsʉ. Vakatoola ɨlilanzi lɨlya mu kɨvoko kya mwene, vakatovela kʉ ntwe. 31Wʉ vamalile ʉkʉnkinila, vakansuula ɨkanzo ɨjyo nʉ kʉnswalɨtsa ɨmisabwa gya mwene ikange. Vakalʉta nave kukʉntovelela pa kɨdamingʼanie.

ɄYɨɨsʉ itovelelwa pa kɨdamingʼanie

(Maliko 15:21-32; Luuka 23:26-43; Yohana 19:17-27)

32Wʉ avasikali vihʉma nave ʉYɨɨsʉ mu vʉtsenge wa Yelusalemu, vakambona ʉmuunu mpamato mu nzɨla ʉvɨ ɨlitaawa lya mwene aale vɨ Simoni. Ʉmuunu ʉjwa aale mmolwa va kʉ vʉtsenge wa Kilene. Avasikali avo vakamwʉmɨɨlɨtsa apɨmbe ɨkɨdamingʼanie kya Yɨɨsʉ. 33Kʉmbele, vakatsisika nʉ Yɨɨsʉ apoonu apaatambʉlwagwa Goligota. Ɨlitaawa ɨlɨ kwʉ kʉta apoonu pa Liheela lya Ntwe. 34Pwʉ vakampa ʉYɨɨsʉ ɨdivai ɨjyʉ vaahanziitse nʉ ntuguva ʉnkali pakʉta, aleke ʉkʉpʉlɨka ʉlʉvavo lwa vʉkʉvɨlwa. Wʉ avonziitse, akabeela ʉkʉnywa. 35Wʉ vantovelye pa kɨdamingʼanie, vakagavana ɨmisabwa gya mwene kʉ nzɨla jya silagʉlɨlo sya veene, pakʉta gavombeke amamenyu galya ʉgwʉ aatsovile ʉnyamalago, “Vaagaviine ɨmisabwa gyango, nʉ kʉvomba isilagʉlɨlo pa kulongwi jya kanzo jyango.”#Zabuli 22:18#27:35 Pakʉta gavombeke amamenyu galya ʉgwʉ aatsovile ʉnyamalago, “Vaagaviine ɨmisabwa gyango, nʉ kʉvomba isilagʉlɨlo pa kulongwi jya kanzo jyango.” Inyandʉlʉ itsinge tsa katale tsa Vʉvɨge ʉVʉvalatse natsilɨ nago amamenyu aga. 36Vakataama baaho pakʉta vandoleele. 37Pakyanya pa ntwe gwa mwene, vakavɨɨka amamenyu ga kʉmmɨga ʉgwʉ gaavɨgilwe ndee, “ʉjʉ vɨ yɨɨsʉ, ʉnkʉlʉdeeva va vayahudi.”

38Apoonu baaho apo, vaalepwo ikange avanyambuda vavɨlɨ. Avasikali vaavatovelye avaanu avo paninie nʉ Yɨɨsʉ, mpamato ʉlʉvasu lwa kʉndyo, ʉjyʉnge ʉlʉvasu lwa kʉngʼɨgɨ. 39Avaanu ʉwʉ vaalʉtɨngʼaniaga apo, valɨkʉtiga ɨmitwe gya veene nʉ kʉnʼdʉka ʉYɨɨsʉ. 40Vakannyongʼonyola vakata, “Ndeeti, naveeve vɨ waatye ʉlamamula ʉVʉtaamo ʉVʉvalatse wa Ngʉlʉve nʉ kʉtsenga ikange mu sigono sidatu? Lɨno, ɨngave lweli ʉlɨ Mwana va Ngʉlʉve, ɨpoke jyʉve, ika pa kɨdamingʼanie!” 41Vʉvʉle vʉle, avavaha va vateeketsi na vamanyisi va ndagɨlo paninie na vanzagɨla va Vayahudi vakanʼjʉlʉʉlɨsa. 42Vakatsova vakata, “Akaale nyango ʉkʉvapoka avange, lɨno ilemwa ʉkwɨpoka jyʉmwene! Ɨngave lweli vɨ Nkʉlʉdeeva va Vaisilahɨli, iike pa kɨdamingʼanie, pwʉ nʉʉwe tukʉmwɨdɨka. 43Ʉmwene ikʉmmʉʉvɨla ʉNgʉlʉve, pwʉ ʉNgʉlʉve ampoke lɨno ɨngave lweli ʉNgʉlʉve anʼganile#Zabuli 22:8 ʉlwakʉva alɨkʉtsova alɨkʉta, ‘Ʉne ndɨlɨ Mwana va Ngʉlʉve.’ ” 44Naveene avaajɨhambʉkye ɨsilikali ʉwʉ vaatoveliilwe paninie nʉ Yɨɨsʉ, valɨkʉnʼdʉka ʉYɨɨsʉ ndʉwʉ avange vaanʼdʉkaga.

Ʉkʉswa kwa Yɨɨsʉ

(Maliko 15:33-41; Luuka 23:44-49; Yohana 19:28-30)

45Ʉkʉhʉma pa kavalɨlo ka ntanato (6), ʉkʉsika pa kavalɨlo ka budikakʉpamato (9), ɨngʼiisi jɨkagwa mu kɨlʉnga kyoni. 46Ʉta pa kavalɨlo ka budikakʉpamato, ʉYɨɨsʉ akalɨla kʉ limenyu ɨlivaha akata, “Eloi, Eloi, lama sabakitani?”#27:46 Eloi, Eloi, lama sabakitani Amamenyu aga ga nzovele ɨjya Kɨalameo. Ɨjɨ jyʉ jyale nzovele jya Vayahudi pa nsɨkɨ gʉlya ʉpwʉ ʉYɨɨsʉ aataamaga mu kɨlʉnga. Ʉvʉganulu wa mamenyu aga kwʉ kʉta, “Ngʉlʉve vango! Ngʉlʉve vango! Kɨki ʉndekile?”#Zabuli 22:1 47Wʉ avaanu vatʉnga ʉwʉ vɨɨmile apo, vaampʉliike ʉYɨɨsʉ, vakata, “Ʉjʉ ikʉmwɨlanga ʉnyamalago ʉEliya#27:47 ɄEliya Ʉvʉganulu wa Eliya lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉkʉhʉma kʉkyanya.” 48Baaho, mpamato mu vasikali akanyila ngʼaningʼaani, akiitsa nɨ pamba, akatsaba mu divai ɨngʼali, akavɨɨka ɨpamba ɨjyo mu lilanzi, akammɨlɨkɨla ʉYɨɨsʉ pakʉta amiime. 49Avasikali avange vakatsova vakata, “Ɨlekelwe, ʉleke ʉkʉmpa ɨdivai ɨjyo, manya tunogwa tʉlole ɨngave ʉnyamalago ʉEliya ikwitsa kukʉmpoka!” 50Pwʉ ʉYɨɨsʉ akalɨla ikange kʉ limenyu ɨlivaha, akaswa.

51Baaho, ɨlipasiya ɨlyale mu Vʉtaamo ʉVʉvalatse wa Ngʉlʉve,#27:51 Ɨlipasiya ɨlyale mu Vʉtaamo ʉVʉvalatse wa Ngʉlʉve Ɨlipasiya ɨlyo lyʉ lyene lyagavile Pavʉvalatse na Pavʉvalatse Siitso. Lola ɨpitsa jya tembile kʉ vʉganulu wa limenyu ɨlɨ ʉvʉlɨ kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. lɨkalendʉka pagati, ʉkʉhʉma kʉkyanya ʉkʉsika paasi, lɨkɨgava pavɨlɨ. Kɨkahʉmɨla ɨkɨlindima ɨkɨvaha ɨkyʉ kyapelile inalaawe tsibatsʉke. 52Naweene ʉvʉguli vʉkasɨɨlʉka, ɨmihana myongosu gya vɨɨdɨki va Ngʉlʉve, ʉwʉ vaasue, gɨkatsʉʉka nʉ kʉhʉma mu vʉguli. 53Kʉmbele, wʉ ʉYɨɨsʉ atsʉʉkile, vakiingila mu vʉtsenge ʉvʉvalatse wa Yelusalemu nʉ kʉvavonekela avaanu vongosu.

54Wʉ ʉmbaha va vasikali paninie na valya ʉwʉ vaandoleelaga ʉYɨɨsʉ, vakɨweene ɨkɨlindima na gange gooni ʉgwʉ gaahʉmye, vakadwada siitso, vakatsova vakata, “Jɨlweli, ʉmuunu ʉjʉ akaale Mwana va Ngʉlʉve!”

55Baaho apo, vaalepwo avadala vongosu, ʉwʉ vaankongaga ʉYɨɨsʉ nʉ kʉmbombela, ʉkʉhʉma kʉ Galilaya. Avadala avo vɨɨmile kʉvʉtale nʉ kʉlola gooni ʉgwʉ gaavombekaga apo. 56Mu vadala avo, aalemwo ʉMaliyamu Magadalena,#27:56 Magadalena Ʉvʉganulu wa litaawa ɨlɨ ɨmba kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. ʉMaliyamu ʉvanyina va Yakobo nʉ Yusufu nʉ nʼdala va Zebedayo.

ɄYusufu va kʉ Alimataya ikʉnsɨɨla ʉYɨɨsʉ

(Maliko 15:42-47; Luuka 23:50-56; Yohana 19:38-42)

57Wʉ vʉhue, iitsile ʉnkongi mpamato va Yɨɨsʉ, ʉvɨ ɨlitaawa lya mwene vɨ Yusufu. Ʉmuunu ʉjwa aale mmosu. Aahʉmile mu vʉtsenge wa Alimataya. 58ɄYusufu ʉjwa akalʉta kwa Pilato nʉ kʉdoova ʉnsimba gwa Yɨɨsʉ. Pwʉ ʉPilato akavalagɨla avasikali va mwene ʉkʉta, vampe ʉnsimba gʉlya. 59ɄYusufu akabɨha, akatoola ʉnsimba gʉlya nʉ kʉgʉbina mu sanda. 60Akagonia ʉnsimba mu vʉguli#27:60 Vʉguli Lwale lwiho lwa Vayahudi va nsɨkɨ ʉgwa ʉkʉnotsa imanga tsive vʉguli mwa kʉsɨɨla avaswe. Tsyaveetsaga ʉngata ngumbwa mbaha. Pa wingililo wa manga vaadɨndaga nɨ liganga ɨlivaha. wa mwene ʉvʉpya ʉwaajavilwe mu lʉnalaawe. Pwʉ akabɨɨlʉsa ɨliganga ɨlivaha, akadɨndɨla ʉndyango gwa vʉguli vʉlya nʉ kʉhega. 61Mu nsɨkɨ ʉgwa, ʉMaliyamu Magadalena nʉ Maliyamu ʉjyʉnge, vaataamile palya, vaalolaga kʉ vʉguli.

Avasikali viloleela ʉvʉguli wa Yɨɨsʉ

62Ɨkɨgono ɨkyakongile, ɨkyʉ kyale kɨgono kya Sabato, avavaha va vateeketsi na Vafalisayo vakalʉndamana kwa Pilato. 63Vakambʉʉla vakata, “Gwe ntwa, tukʉmbʉka ʉkʉta, ʉnsɨkɨ ʉnsyovi ʉlya wʉ mwʉmi, akatsovile akata, ‘Wʉ silʉtɨngʼiinie isigono sidatu, jʉnditsʉʉka ʉkʉhʉma kʉ vaswe.’ 64Lɨno, tudoova ʉvalagɨle avasikali vaako, valoleelage ʉvʉguli ʉkʉsika mu kɨgono kya daatu. Ɨngave nʉkavɨɨke avakʉloleela, avakongi va mwene viweesa ʉkwitsa kuhɨɨtsa ʉnsimba gwa mwene nʉ kʉvasyova avaanu ʉkʉta, atsʉʉkile ʉkʉhʉma kʉ vaswe. Ɨngave ago givombeka, ʉvʉnuasi ʉwa jʉwiiva vʉviivi siitso ʉkʉlʉtɨɨlɨla ʉvʉtatsi.”#27:64 Ʉvʉnuasi ʉwa jʉwiiva vʉviivi siitso ʉkʉlʉtɨɨlɨla ʉvʉtatsi Ʉkʉkongana na masaago ga vanzagɨla va Vayahudi ʉvʉnuasi ʉvʉtatsi wa Yɨɨsʉ wʉ vʉlya ʉwʉ ɨɨtsovile jyʉmwene ʉkʉta vɨ Mesiya evo vɨ Kɨlɨsiti. 65ɄPilato akavaanda akata, “Vatooli avasikali. Bɨhagi kʉ vʉguli nʉ kʉloleela, kʉ maka giinyo gooni.” 66Pwʉ vakalʉta kʉ vʉguli, vakavɨɨka ɨkɨkolekelo mu liganga pakʉta, aleke ʉkʉvepwo ʉmuunu va kʉbɨɨlʉsa ɨliganga ɨlyo. Kʉ vʉmalɨlo, avalongotsi avo, vakavaleka avasikali baaho pakʉta, valoleelage ʉvʉguli.

Attualmente Selezionati:

Mataayo 27: zga

Evidenziazioni

Copia