Genesis 11
11
Hay nawadaan di nunhihinnatkon an kali
1Handih pinghana ya oha ya abuy kalin di tatagu. 2Handih mungkadakol da ya numpae dah nangappit hi timilan di algo ya dinatngan da on nundotal an lutad Babilon ot mumboble dah di. 3,4Indani ya waday ninomnom dah aton da. Ot kanan day “Aga ket iphod taku tun boble takut mundingngol. Mangapya takuh nakattag-en binattun bale ta datnganad kabunyan ta mundingngol taku ya adi taku miwahit.” Ot ilappu dan mangapya.
5Indani ya immalih APU DIOS ot tibona nan boblen pun-iphod datuwen tatagu ya nan binattun balen pungkapya da. 6Kananay “Datuwen tatagu ya niohha da ya ohay kalida. Hituwey kilappuwan di pangatan da nadah pinpinhod dan aton, ta loktat ya am-in di nomnomon dan aton ya mabalin an aton da. 7Kinali agat punhihinnatkonon takuy kalida ta adida mungkakainnawatan.”
8Athidiy inat APU DIOS ot miwahit da tuh luta ot itikod dan mangapya nah pumboblayan da. 9Hay nungngadan dan diyen boble ya Babel te hidiy nunhimongan APU DIOS ke dida an hinannotanay kalida hi nunhihinnatkon ot iwahit na didah kabobboble tuh luta.
10Datuwey holag Sem. Handih nala-uy duwan toon nipalpuh nagibbuwan di nalbongan di luta, handih hinggatut di toon Sem ya nahlag ot wadah Arpachshad. 11Timmagu pay hi Sem hi limay gatut an toon ot mawada day udum an imbabalena.
12Kimmat-aguh Arpachshad ot handih tulumpulut limay toona ya nahlag ot hi Selah. 13Ot tumagu pay hi opat di gatut ta tuluy toon ot mawada day udum an imbabalena.
14Kimmat-aguh Selah ot handih tulumpuluy toona ya nahlag ot hi Eber. 15Timmagu pay hi Selah hi opat di gatut ta tuluy toon ot mawada day udum an imbabalena.
16Handih tulumpulut opat di toon Eber ya nahlag ot hi Peleg. 17Timmagu pay hi Eber hi opat di gatut ta tulumpuluy toon ot mawada day udum an imbabalena.
18Hi Peleg ya nuntoon hi tulumpulu ot mawada nan imbabalenan hi Reu. 19Timmagu pay hi Peleg hi duway gatut ta hiyam an toon ot mawada day udum an imbabalena.
20Handih tulumpulut duway toon Reu ya nawadah Serug an imbabalena. 21Timmagu pay hi duway gatut ta pituy toon ot mawada day udum an imbabalena.
22Handih tulumpuluy toon Serug ya nawada nan imbabalenan hi Nahor. 23Timmagu pay hi duway gatut an toon ot mawada day udum an imbabalena.
24Hi Nahor ya duwam pulut hiyam di toona ot mawada nan imbabalenan hi Terah. 25Timmagu pay hi Nahor hi hinggatut ta himpulut hiyam ot mawada day udum an imbabalena.
26Hi Terah ya napituy toona ot ahi mawada nadan imbabalenan da Abram, hi Nahor ya hi Haran.
Hanadan holag Terah
27Datuwey holag Terah an hi aman da Abram, hi Nahor ya hi Haran. Nahlag hi Haran ot hi Lot. 28Hi Haran ya nate nah bobledad Ur ad Babilon yaden matagu ni-an hi amanan hi Terah. 29In-inen Abram hi Sarai ya hi Nahor ke ya in-ine nah Milkah an imbabalen Haran an hi aman damdaman Iskah. 30Hi Sarai ya adi pakaimbabale.
31Hi Terah ya ingkuyug nah Abram an imbabalena, hi Lot an inap-apuna an imbabalen Haran ya hi Sarai an inayan Abram ot taynan dad Ur hidid Babilon ot umga dan ume dad Kanaan. Mu nundag-u dad Haran ot mihaad dah di. 32Ot hidiy natayan Terah handih duway gatut ta limay toona.
Attualmente Selezionati:
Genesis 11: ifkWB
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2004, Wycliffe Bible Translators, Inc. All rights reserved.
