Матта 6
6
Касибариз кюмек тувуб
1Лигай-гьа, учву апӀру ужʼвал варидарин улихь рябкъруганси мапӀанай: даршиш Аьршарин ичв Адашдин терефнаан учвуз пешкеш хьибдар.
2Гьаддиз, гьар фила-вушра учву касибариз ужʼвал апӀруган, кьюб маш гъяйидари чпин тярифар апӀри дупну, мистариъна кючйириъ апӀруганси, гьарйир мапӀанай. Гьякьди кӀуразачвуз, дурарихьна сарун чпин рубкьру пай вари дурубкьна. 3Уву ужʼвал апӀруган, яв арччул хили гьапӀраш, гагул хилиз аьгъю дарибшри. 4Яв ужʼвал жиниди ибшри. Жиниди апӀурайибра рябкъру Яв Адашди думуган увуз пешкеш тувди.
Адашдиз ккарагуб
5Хъа учву ккарагруган, варидариз рякъри кӀури, мистариъна кючйириъ ккарагуз ккуни кьюб маш гъяйидарси махьанай. Гьякьди кӀуразачвуз, дурарихьна чпин рубкьруб гъурубкьну. 6Уву ккарагруган, яв хулаъ учӀв ва, раккин хъябкьну, душваъ шлизкӀа дярякъру яв Адашдиз ккараг. Ва жиниди апӀурайибра рябкъру яв Адашди увуз пешкеш тувди. 7Ккарагруган, аллагьсузариси, артухъ гафар мапӀанай. Дурари фикир апӀураки, чпи гизаф гафар апӀури гъахьиш, дурар ерхьиди. 8Гьаци дурариз ухшар махьанай, фицики ичв Адашдиз учву ккарагайиз улихьна учвуз фу ккундушра аьгъя. 9Гьаддиз гьамци ккарагай:
«Я аьршариъ айи ич Адаш!
Яв ччвур гирами ибшри.
10Яв Паччагьлугъ улубкьри.
Яв гаф аьршариъси жилиинра тамам ибшри.
11Учуз лазим вуйи уьл гъийиз ча.
12Учук кайи бурж учуз гьялал апӀин,
ва учура жарадарик кайи ич буржар
дурариз гьялал апӀурча.
13Учу тямягьариъ мааан, писвалихьан уьрх».
14Эгер учву инсанарилан хил алдабгъиш, Аьршарин ичв Адашдира учвлан хил алдабгъиди.
15Хъа эгер учву инсанарилан хил алдадабгъиш, думуган ичв Адашдира ичв гунгьарилан хил алдабгъидар.
Ушв бисбакан
16Учву ушв бисруган, кьюб маш гъяйидар фици пашманвалиъ кӀул ипну лицураш, гьаци учвура машар пашман дапӀну милицанай. Фицики дурари, чпи ушв бисурайиб улупуз кӀури, чпин машар язухъ гъюру гьялнаъ дерккра. Гьякьди кӀуразачвуз, дурарихьна рубкьруб дурубкьна.
17Хъа уву кӀуруш, ушв бисруган, кушар журх, машар жикӀ, 18уву ушв бисурайиб инсанариз ваъ, хъа дярякъди увухъ хъайи яв Адашдиз аьгъю шлуганси апӀин. Гьадмуган жиниди апӀурайиб вари рябкъюрайи яв Адашди пешкеш тувдивуз.
19Жилиин девлет уч мапӀанай, мушваъ думу сурарина мюркъю ипӀуру ва угърийири, хулаъ учӀвну, гьитӀибкӀуру.
20Аьршариин девлет уч апӀинай, душваъ думу сурарина мюркъю ипӀидар ва, угърийири, архьну, гьитӀибкӀидар, 21Гьаз гъапиш яв девлет наан аш, яв юкӀвра гьадушваъ хьибди.
22Бедендин чирагъ ул ву. Гьаддиз, эгер яв ул марцциди вуш, яв вари беденра акуди хьибди.
23Хъа эгер яв улар чӀур духьнаш, уву вари мучӀушнаъ хьидива. Гьаци вуйиган, эгер увуъ айи акв мучӀушин вуш, думуган мучӀушин фициб шул!
24Сарихьанра кьюр агъайиз сабси гъуллугъ апӀуз шулдар, фицики дугъаз санур даккун, хъа тмунур ккун хьиди; вая сариз ужуди гъуллугъ апӀиди, хъа тмунуриз – чӀуруди. Аллагьдизра, девлетназра сатӀиди гъуллугъ апӀуз хьибдарчвухьан.
25Гьаци вуйиган, кӀуразачвуз: ичв гъян бадали фу ипӀуруш, фу убхъуруш, ва ичв жан бадали фу алабхьуруш, гьаддин гъайгъушнаъ махьанай. Фицики уьмур – ипӀрубтӀан, хъа беден палаттӀан заан ву.
26Завуъ айи жакьвариз лигай: дурари я убзури, я ккадабцӀури шулдар, я амбарханйириз тахил уч апӀдар. Хъа Аьршарин ичв Адашди дурар тухъ апӀура. Хъа учву дурартӀан хайлин артухъ дарнучвахъа?
27Хъа учвкан фуж фукьан хъюгъишра, шилхьан чан уьмур саб сяаьтназкьан ярхи апӀуз шул?
28Палатдин гьякьнаанра гьаз гъайгъу качвузхъа? Чюлиъ айи лизи кюкйир фици аьхю шулаш, лигай: дурари я зегьмет зигурадар, я парча убхурадар. 29КӀуразачвузки, Сулейман паччагьди чан лап ад айи вахтнара дурарихъ гьарсабдихъ хъайисдар палтар алахьури гъахьундар. 30Хъа гъи ади, закур цӀигъ убгурайи чюлин укӀ Аллагьди гьаци уччвуди балгурайиган, Дугъу учвʼин дицитӀан уччвуди палат алабхьидаринхъа, цӀибтӀан хътругърудар! 31Гьаддиз, «учу фу ипӀуйкӀан», «фу убхъуйкӀан» вая «фу алабхьуйкӀан» кӀури, гъайгъушнаъ махьанай. 32Гьаз гъапиш гьамрар вари аллагьсузари агрудар ву, хъа учвуз гьамрар вари лазим вуйиб Аьршарин ичв Адашдиз аьгъя. 33Сифтена-сифте учву Аллагьдин Паччагьлугъдихъ хъергай ва Дугъу кӀурайиб вари тамам апӀбахъ йихьай. Гьаци гъапӀиш, имбуб вари Дугъу тувдичвуз. 34Гьаци вуйиган, закурин йигъан гъайгъушнаъ махьанай, закурин йигъаз чан гъайгъушнар а. Гьарсаб йигъаз чан гъайгъушнар чӀяаьн ву.
Attualmente Selezionati:
Матта 6: ТабГК
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© Институт перевода Библии, 2010, 2013, 2016, 2018, 2023