Génesis 8

Ɨporu wasu opa yawe

1Erëi Tumpa iñakañɨ'ä Noé wi jare opaete mbaemɨmba reta jae ndiwe ñonoï chalana wasu japɨpe wae. Jayawe Tumpa ombou ɨwɨtu uipeyu waerä ɨ iáramo rupi jare umbɨpɨ tɨpa waerä ɨ. 2Tumpa oyopia ama jare ɨ ɨwɨ wi oë wae. 3-4Jare ndewe rupi ɨ umbɨpɨ tɨpa oo ɨwɨ wi. Jare 150 ara pe, oo uwapɨ chalana wasu pëti ɨwɨtu wasu Ararat jee wae re yasɨ chiu jare diecisiete ara pe. 5Ɨ imeño tɨpa oo oo yasɨ payandepo rewa. Jare jokua yasɨ re, ara yembɨpɨ wae pe, ɨwɨtu wasu reta uyekuaa ye ma.

6Joko wi cuarenta ara pe, Noé uipea chalana wasu iventana jae uyapo wae. 7Jare opoi pëti wɨra jü wae. Jare oë yawe, jokua wɨra uwewe oo opaete kerupi jare ou yewɨ. Jare oo ye jare ou yewɨ opa ma ɨ tɨpa rewa ɨwɨ wi.

8Joko wi opoi wi Noé pëti pɨkasu uikuaa waerä opa ma ra tɨpa ɨ ɨwɨ wi. 9Erëi pɨkasu uwäe’ä kiape uwapɨ uputuu waerä. Jáeramo ou ye chalana wasu pe, Noé oï wae pe, echa’ä ɨ imeño opa umbɨyasoi ɨwɨ ramo. Jayawe Noé omoë ipo jare umɨinge ye chalana wasu japɨpe pɨkasu.

10Jare Noé uäro ipɨakɨrëɨ rewe ïru chiu ara yewɨ jare opoi ye pɨkasu oka pe chalana wasu wi. 11Jare kaaru ma yawe, pɨkasu ou ye chupe jare ueru pëti ɨwɨra olivo jee wae jokɨ iyuru pe. Jukuärái Noé uikuaa ma tɨpa iko ɨ ɨwɨ wi. 12Jayawe Noé uäro ipɨakɨrëɨ rewe ïru chiu ara yewɨ jare opoi ye pɨkasu. Erëi kua wese pɨkasu ou yewɨ'ä ma chupe.

13Jukuärái, ime ma wɨreko yawe Noé 601 año, ɨporu wasu opa tɨpa ɨwɨ wi yasɨ pëti jare ara yembɨpɨ wae pe. Jayawe Noé opa uipea chalana wasu iyasoika. Jare umae yawe, uecha utini ma ɨwɨ. 14Mokui yasɨ pe veintisiete ara pe opa ma ɨwɨ utiniasɨ.

15-16Jayawe Tumpa jei Noé pe: “Eë chalana wasu wi, nde jare nembireko, jare nderaɨ reta jembireko rewe rewe toë nde ndiwe oka pe,” jei. 17“Enoe wi opaete nde ndiwe japɨpe ñonoï wae reta – jae ko wɨra reta, mbaemɨmba reta, jare opaete ɨwɨ rupi uyewichɨ wae reta. Toë too reta uñemoña ye waerä jetaete opaete ɨwɨ rupi,” jei Tumpa Noé pe.

18Jayawe Noé, jare jembireko, jare taɨ reta jembireko rewe rewe oë reta chalana wasu wi. 19Jare opaete mbaemɨmba ambɨe ye ye wae oë reta chalana wasu wi. Oë mbaemɨmba uwata ɨwɨ rupi wae reta, jare wɨra reta, jare opaete ɨwɨ rupi uyewichɨ wae reta wi. Pëti pëti jae jee wae rupi oë chalana wasu wi.

20Jayawe Noé uyapo pëti mbaerenda ita pewa oñono waerä iáramo mbaemɨmba uyukakue umee waerä Tumpa pe. Jare amokue mbaemɨmba reta jare wɨra reta Tumpa jei ikɨa mbae wae reta ipɨte wi, Noé uyuka jare uapɨ jokua mbaerenda iáramo umee waerä Tumpa pe.

21Jayawe Tumpa uyerowia umae Noé umee chupe wae re, jare utimbo kawiete chupe. Jare Tumpa jei iyupe: “Ndarau ye ma ayepɨpeyu ɨwɨ re kuimbae reta jeko pewa,” jei. “Yepe tëi michi wiwe ipɨayemɨngeta ikawi mbae wae reño, jesewe ndarau ye ma ambái opaete jekowe wae kërái ayapo wae rami,” jei. 22“Ime ɨwɨ oï rambuewe, ime ñotái oï maetɨ jare mbaewɨro, roɨ jare araku, aratini jare ama, jare ara jare pɨ̈tu,” jei Tumpa iyupe.

Attualmente Selezionati:

Génesis 8: gnwPB

Evidenziazioni

Copia