Génesis 44

José icopa

1Joko wi Benjamín jare tɨkeɨ reta uyeyapɨkatu yuraa ye waerä. Jokua rambuewe José oyokui jëta pe uparawɨkɨ wae reta itenondewa opa umɨtɨnee waerä chupe reta jewɨta jeta tembiurä, opaete ipuereta wɨraa reta wae rupi. Erëi José oyokui wɨari wi oñono ye waerä chupe reta ikorepoti tembiurä umbɨepɨ tëi reta wae pëti pëti wae jewɨta japɨpe. 2Jare oyokui wi oñono waerä taɨkuewaete jewɨta japɨpe ikorepoti jare José icopa jepɨete wae. Jayawe jae uyapo José oyokui wae rupi.

3Pɨarewe ndimboweasɨ yawe, José opa omondoka ye Benjamín jare tɨkeɨ reta imburika reta rewe.

4Erëi ndei yuraa mbɨrɨ mbowe tëta wasu wi, José oyokui jëta pe uparawɨkɨ wae reta itenondewa jare jei chupe: “¡Ekua jokua kuimbae reta jaɨkue! Jare ndeo ndepitɨ reta yawe, ere chupe reta kuärái: “¿Maera pa pemɨñatima ye ikawi mbae wae ikawi uyapo pewe wae pe? 5¿Maera pa piñomi cheruwicha icopa jepɨete wae chuwi? Jae ko icopa vino jou pɨpe wae, jare jokua pɨpe wi uikuaa mbaembae uyeyapota wae. ¡Kua mbae piyapo wae ikawi mbaete ye ko!’ Jukuärái ere chupe reta,” jei José chupe.

6Jayawe José pe uyeyokui wae oo uepitɨ reta yawe, jei chupe reta José oyokui wae rupi. 7Jare kua uyandu reta yawe, José tɨkeɨ reta jei chupe: “Ore nduikuaa’ä mbae re ra ndiyemɨngeta neï wae,” jei reta. “¡Ndarau nduyapo kua nunga ikawi mbae wae! 8Mase, nde ndikuaa kawi neï ndueru ye ma ndewe ɨwɨ Canaán wi jokua korepoti tembiurä jepɨrä tëi pëti pëti ore nuwäe orerewɨta japɨpe wae. Jare ndarau etei noñomi mbae jepɨete wae, jare oro, jare mbae awe nderuwicha jëta wi,” jei reta chupe.

9Jare jei reta wi chupe wɨrowia katu rewe: “Ipotawe kía orepɨte pe ime onoi jokua copa wae, iyuka woi. Jare ore nduikota nepione retarä täta nduyeyokui waerä ndewe,” jei reta chupe.

10Jayawe José pe uyeyokui wae jei chupe reta: “Jaekawi. Erëi jaeño kía ime onoi copa wae upɨtata oï täta uyeyokui waerä chewe. Kía mbaetɨ copa onoi wae mbaetɨ teko onoi,” jei chupe reta.

11Jayawe jawoi pewa pëti pëti wae umbɨweyɨ imburika wi jewɨta ɨwɨ pe jare oyora reta. 12Jare José pe uyeyokui wae umbɨpɨ ueka copa José tɨkeɨ tenondewa jewɨta wiwe, tɨwɨ taɨkuewa jewɨta rewa. Jare uwäe chupe José icopa Benjamín jewɨta japɨpe.

13Tɨkeɨ reta kua uecha yawe, ipɨatɨtɨ pɨpei omondoro reta iyuwi jemimonde. Joko wi pëti pëti jae reta umbɨwɨta ye imburika, jare uñatima ye yuraa reta tëta wasu José oï wae pe.

14Jayawe Judá jare ïru reta yuweru uwäe yawe, José imeño oï jëta pe. Jayawe yuweru uñeñono reta ɨwɨ re José jowai tuicha ukɨye reta ramo.

15José upɨrandu chupe reta: “¿Maera pa kua piyapo chekotɨ? ¿Aramoi pikuaa’ä yerá piko che ko jae mburuwicha iyarakuaa katu wae? ¿Pikuaa’ä yerá piko chepuere aikuaa chechoropa rupi mbaembae ïru wae reta uyapo wɨari chekotɨ wae?” jei chupe reta.

16Jayawe Judá jei chupe: “¿Mbae ra ndoeta ndewe, oreruwicha? Echa’ä mbaetɨ mbae awe orepuere nduyapo nduikuaaka ndewe waerä nonoi’ä etei ko teko ndekotɨ. Tumpa ko uiporaraka oï orewe orereko kachi re. Añawe ore jare orerɨwɨ ndecopa wɨreko wae nduikota täta nduyeyokui waerä ndewe,” jei Judá José pe.

17Erëi José jei chupe reta: “Ndarau jokua ayapo. Jokua oñomi checopa chewi waeño täta uyeyokuita chewe. Pe reta pekua ye pepɨawiwe rewe peru jëta pe,” jei chupe reta.

Judá uyerure José pe tɨwɨ Benjamín re

18Jayawe Judá oya katu José re jare jei chupe: “Chemburuwicha, emaeño mii cheré ayemɨngeta waerä nde ndiwe kua rewa,” jei. “Awɨye mii ndepochɨ chewe. Echa’ä mburuwicha wasu rami ko nde jare ime nenoi opaete mbaepuere oreré,” jei chupe.

19“Tenonde ndoyu yawe, nde ndepɨrandu orewe imeño ra iko oreru wae re, jare ime ra nonoi ïru orerɨwɨ wae re,” jei chupe. 20“Jayawe ore numɨmbeu ndewe: ‘Imeño iko oreru indechiete wae, jare ime ïru orerɨwɨ taurusu oï wae. Jae oa ichɨ wi oreru indechi ma iko yawe. Orerɨwɨ jaeño ma iko pëti ichɨ wae imembɨ. Ïruwe tɨkeɨ umano ma ko. Jáeramo oreru uauete orerɨwɨ,’ numɨmbeu ndewe.

21“Jayawe nde ndere orewe: ‘Peru jokua perɨwɨ chewe kua pe aecha waerä,’ ndere orewe. 22Erëi ore ndoe ndewe: ‘Orerɨwɨ ndarau ipuere ueya tu. Echa’ä jae ueya yawe, umanota ko tu mbɨatɨtɨ pe,’ ndoe ndewe. 23Jayawe ndere ye orewe: ‘Peru’ä yawe pe reta ndiwe jokua perɨwɨ, jayawe ndarau pepuere peyu ye cherowai,’ ndere orewe.

24“Jare ore ndoo nuwäe yawe oreru oï wae pe, numɨmbeu chupe opaete nde ndere orewe wae,” jei chupe. 25“Joko wi opa ndou jokua tembiurä tenonde ndowa nduraa wae. Jáeramo oreru jei ye orewe ndoyu ye ndowa waerä orerembiurä wae,” jei. 26“Erëi ore ndoe chupe: ‘Ndarau orepuere ndoo orerɨwɨ taɨkuewa oo’ä yawe ore ndiwe. Echa’ä jae oo’ä yawe ore ndiwe, ndarau orepuere ndoo ye mburuwicha jowai,’ ndoe chupe.

27“Jayawe oreru jei orewe: ‘Pe reta pikuaa chembireko Raquel#44.27 Irundɨ ko Jacob jembireko reta. Jembireko Raquel ko jae imembɨ chupe mokui wae – jae reta ko José jare Benjamín jee wae. imembɨ chewe mokuiño. 28Erëi pëti wae ukañɨ ma chewi. Pëti mbaemɨmba pochɨ wae ñana rupiwa ndipo uyuka jou jokua cheraɨ. Jáeramo jae oë oo wiwe, aecha yewɨ'ä ma cheraɨ. 29Jare añawe peraa peï chewi kua ïru cheraɨ mii. Erëi mbae uasa chupe yawe, jokua mbɨatɨtɨ cheyukata ko, jare pe reta penoita teko tuicha wae.’ Jukuärái jei orewe oreru,” jei Judá José pe.

30-31Jare Judá jei wi chupe: “Añawe, chemburuwicha, ndarau chepuere añatima ye cheru kotɨ cherɨwɨ mbae. Echa’ä cheru uecha’ä yawe cherɨwɨ ore ndiwe, umanota ko mbɨatɨtɨ pe. Echa’ä cheru uauete jare uwɨaete jese. Jáeramo ore imeta nonoi teko tuicha wae, echa’ä orereko pewa ko oreru indechi wae umanota mbɨatɨtɨ pe,” jei chupe.

32“Jae wi cheru pe: ‘Che tayandareko kawi cherɨwɨ re. Jare aru yewɨ'ä ndewe yawe mbae uasa mbae rewe, jayawe che tanoi teko tuicha wae jesewa jaeño mái pewa.’ Jukuärái jae chupe.

33“Jáeramo ayerure mii ndewe, epoi cherɨwɨ wi. Che aikota nepionerä jae ipepɨka pe. Emaeño mii jese oo ye waerä tɨkeɨ reta ndiwe. 34¿Këraita pa añatima ye cheru kotɨ cherɨwɨ mbae? Ndarau chepuere, echa’ä aipota’ä etei aecha cheru uiporara oï jokua mbɨatɨtɨ pe.” Jukuärái jei Judá José pe.

Attualmente Selezionati:

Génesis 44: gnwPB

Evidenziazioni

Copia