Apocalipsis 19

Itsje̱ sen ngajní

1Ko kuatsinga jiꞌi, tjumeꞌe kui̱nꞌa̱n nichja kueya chujni ste ngajní ko séen nichja sen, ndachro sen:

¡Juasaya!

Juasie ndo Dio ixi jeꞌe ndo kuajon ndo juachaxin stechónna

ko jeꞌe ndo tsango tetuanꞌan ndo.

2Ixi jeꞌe ndo tsango jian ndo

ko jian nchéña ndo ijie̱;

méxin juinchejenga ndo nchri kuejuakao kueya xi ixi tsango ndakoꞌa juincheꞌe nchra,

ixi jeꞌe nchra juinchekateya nchra itsjé chujni nunte xasintajni,

méxin ndakoꞌa juincheꞌe na̱,

ko ndo Dio jai juengeꞌe ndo

ixi kondeexin nchra kuenꞌen sen kuancheꞌe xra̱ ngajin ndo.

3Ko íjngo ndachro sen:

―¡Juasaya! ¡Juasie ndo Dio! Ixi iꞌnchi jitachrexin ti jiche nchra naiꞌa tsjexin tsachrje ꞌnchi.

4Tjumeꞌe sen ikán no tachríi ko sen noó stechón bakeꞌexin ntatuchiꞌin sen ko kuisée sen, ko kuajon sen juasaya ngajin ndo ndo Dio ndo jitaꞌa trono ko ndachro sen:

―¡Jaña tsonꞌen! ¡Juasaya ko juasie ndo Dio!

5Tjumeꞌe kui̱nꞌa̱n tée naa sen nichja kui̱xi̱n ti jii trono ko ndachro:

Tájonnta juasaya ngajin Ndotáina Dio,

kain sen ncheꞌe xrée ndo,

kain sen joꞌon ko kain ichjan.

Kia ixi tsuteꞌe Xjantuchjon

6Kui̱nꞌa̱n xranchi xronichja kueya chujni, xranchi tinꞌenni xroin yeꞌe inda jitinga ko xranchi ti séen tjateé jindachro:

―¡Juasaya! Juasie Ncháina Dio,

ixi ó kuaxi tetuanꞌan ndo,

ndo chónda kain juachaxin.

7Juaxruxin tsojuna,

ko xrochéꞌe aséei̱na

ko chaxro tsajonna juasaya ngajin ndo

ixi ó kui̱i̱ nchakon tsuteꞌe Xjantuchjon.

Ko jan tsuteꞌe xjan ó tsikonchjian jan.

8Ko jeꞌe jan kuayéꞌe jan juachaxin tsitsáa jan manta lino chaxro tjúá ko chaxro tóngíxin.

Ko manta lino meꞌe xrondachro ti jian juincheꞌe sen tikinixinꞌen ndo Dio.

9 # Mt. 22:2, 3. *Tjumeꞌe ndo ángel ndachijina ndo:

―Ikjian jiꞌi: “Juaxruxin tsintee sen kuayéꞌe juachaxin tsakeꞌe sen ti kia tsuteꞌe Xjantuchjon.”

Ko jaꞌin ndachro ndo ángel:

―Jiꞌi ndachro ndo Dio, ko kain ti ndachro ndo meꞌe nduaxin.

10Tjumeꞌe janꞌan bakeꞌexin ntatuchiꞌin tutée ndo ángel ixi tjaꞌon tsajon juasaya ngajin ndo, ko jeꞌe ndo ndachro ndo:

―Ncheꞌa jaña ixi janꞌan kaxon ntaꞌa xra̱ ngajin ndo Dio xranchi jaꞌa, ko xranchi sen kichuua sen kuintueꞌa kuitikaon chijni jian chronga ndo Jesús. Jeꞌo tájuan juasaya ngajin ndo Dio.

Ixi jeꞌe ndo Jesús, meꞌe xrondachro ti kuachronga sen kuanichja ó saꞌó chijnie ndo Dio.

Ndo jitaꞌa naa kunxin tjúá

11Tjumeꞌe janꞌan bikon jixrangeꞌe ngajní ko ntiꞌa jii naa kunxin tjúá, ko ndo jitaꞌa ba ndatinꞌin ndo tsango Jian ko Nduaxin, ixi jeꞌe ndo jian nchéña ndo ijie̱ ngajin chujni ko te̱ꞌto̱ ndo ngajin ti ñaꞌi. 12Ikon ndo jitóngíxin xranchi xroꞌi, ko jaa ndo jitaꞌa kueya corona ko ntiꞌa jitaxin xranchi tinꞌin ndo ko jeꞌo jeꞌe ndo tienxin ndo meꞌe. 13Jitsáa ndo naa manta yaa ijni̱ ko ti xranchi tinꞌin ndo meꞌe xrondachro Chjenꞌen ndo Dio. 14Ko sen ángel te̱ꞌto̱ ste ngajní tikinixinꞌen ndo, sen meꞌe stetsáa sen manta lino tjúá ko tsango tjúá manta meꞌe ko steruéꞌe sen ndo ko ngujngu sen stetaꞌa sen kunxin tjúá. 15#Ap. 14:20.*Ko roꞌa ndo jitachrjexin naa chika espada tsango yao, ko chika meꞌe sincheníexin ndo kain nación ko sincheñexin ndo na̱ ijie̱ ixi naa ntakuto chika, xranchi ngisen tene tu uva ixi tutée sen, ko sinchekiꞌi ndo na̱ juañaue ndo Dio ndo chónda kain juachaxin. 16Ko manta jitsáa ndo jitaxin:

“Jeꞌe ndo Rey tetuenꞌen kain xi rey ko jeꞌe ndo Nchée kain chujni.”

17Tjumeꞌe bikon naa ndo ángel siin ndo ti jii chjiixro ko séen kuyakuꞌe ndo kain kuxe jitjanga ngusine ngajní:

―Xrokuiinta ko xraꞌonta ixi ndo Dio jai tsajon ndo sintenta. 18Sintenta ntauꞌe xi rey, ntauꞌe xi tituanꞌan chujni te̱ꞌto̱, ntauꞌe ni jieꞌe, ntauꞌe kunxin ko ntauꞌe ni jitaꞌa ba, ko ntauꞌe kain chujni, chujni tetuanꞌan ko chujni nchíín ncheꞌe na̱ xra̱ ko kaxon ntauꞌe ichjan ko ntauꞌe ni tsicha.

19Tjumeꞌe bikon iku tsango chjinga jii ko xi rey tintekituaꞌan nunte xasintajni ko chujnie xa tsixraꞌo ixi tsinteke̱ꞌto̱ na̱ ngajin ndo jitaꞌa kunxin ko ngajin chujnie ndo. 20#Ap. 13:1-18.*Ko itsé sen iku tsango chjinga jii ko kuintee sen ba ko kaxon xi ndakoꞌa bajako chijnie ndo Dio, ko bancheyeꞌe xa chujni ixi kaxin ixra̱ ijié juincheꞌe ngajinxin ikon iku tsango chjinga jii, jaña kuancheyeꞌe xa chujni tsikaa chjiꞌe ba, ni kuakajon juasaya ngajin tjatuꞌo tsikachrjeya ba. Ko iku tsango chjinga jii ko xi ndakoꞌa bajako chijnie ndo Dio ngayui jichón juankaꞌngi sen ngangi nda jichexin ixi azufre. 21Ko ikaxin chujni kuenxin na̱ ixi chika espada kuachrjexin roꞌa ndo jitaꞌa kunxin, ko kain kuxe, konkjeꞌe ba ixi juine ba ntauꞌe chujni meꞌe.

Attualmente Selezionati:

Apocalipsis 19: ppsNT

Evidenziazioni

Copia