Matiyu 10

Yesu u suki mukumitoni n ni kupa ni n re

(Mar. 3:13-19; Luk. 6:12-16)

1Yesu u ɗekei mukumitoni† n ni kupa ni n re a̱ ubuta̱ u te, ɗa u nekei le utsura o loko wunla̱i u gbani-gbani, ka̱ta̱ o potsokpo iɓa̱lishi kakau.

2Na va ɗaɗa ula a azusuki† kupa n e re, vuza iyain a̱yi ɗa Sima, vuza na e ci ɗeke Biturusu n vuza ni Andarawu koɓolo n Yakubu n Yahaya, muku n re n Zabidi. 3Filibu, m Batalamawu, n Toma, koɓolo m Matiyu kishi ku utafu,† n Yakubu maku ma Alfa, n Tadawu, ele feu azusuki a̱ ni a ɗa. 4Aza a na a buwai ele ɗa Sima vuza na e ci ɗeke Ziloti, n Yahuza Iskaryoti, vuza na u ta̱wa̱i u dengei Yesu.

Yesu u danai azusuki ili i na a kuyaꞋan

(Mar. 6:7-13; Luk. 9:1-6)

5Ana Yesu u suki uma Kupanazere† a nam pa a, ɗa u danai le ili i nam pa, “Ka̱ta̱ i keɓece Aza̱ka̱yimbi kakuna ba, ka̱ta̱ feu i bana a̱ likuci i Samariya ba. 6Banai koci wa aza a Israila, adama a na i ta̱ an ushiga wu nlala n na m puwa̱nka̱i. 7Yi baci a kubana, salakai uma a na tsugono tsu gaɗi ci lo a̱ kuta̱wa̱ babu megeshe. 8I potsokpo aza a mbanaki, i ɗengusa̱ kpamu aza a na a̱ kuwa̱i. I potsokpo nkutu, ka̱ta̱ i loko wunla̱i u gbani-gbani. Yi isa ta̱ gbani babu i tsupa ikebe, gogo na, nekei gbani babu kisa katsupu. 9Ka̱ta̱ i ɗika ikebe† adama a nwalu n ɗa̱ ba, ko azanariya ko azurufa ko iyum i shili. 10Ka̱ta̱ i ɗika ujika ko ntogu n kusabaꞋa ko ataka ko kalangu ba. Uma a na i ɓa̱nka̱i va e neke ɗa̱ ili i na i cigai.

11“I uwa baci a̱ likuci, la̱nsa̱i vuma vu ma̱riki vi yoku ka̱ta̱ i cipa̱ a kpaꞋa ku ni ali ayin a na i kulaza. 12I uwa baci a kpaꞋa ku nan lo, kya̱sa̱i le ka̱ta̱ i dana, ‘Ma̱ta̱na̱ mo yongo n a̱ɗa̱.’ 13Uma a kpaꞋa a isa ɗa̱ baci, ka̱sa̱kpa̱i ma̱ta̱na̱ ma̱ ɗa̱ ma shamgba punu. Amma a isa ɗa̱ baci ba, kucikpai i sa̱nka̱ ma̱ta̱na̱ ma na i sheshei ke le. 14Likuci kpamu i iwan baci kisa ɗa̱ ko kupanaka ɗa̱, ka̱sa̱kpa̱i ubuta̱ wa, ka̱ta̱ i ka̱pa̱tsa̱ kubuta̱ ku ene a̱ ɗa̱ punu a̱ likuci ya.#10:14 A ayin a nan lo, vuza u ka̱pa̱tsa̱ baci kubuta̱ ku motogu ko ku ene a̱ ni, na lo u yotsongu ta̱ a na u pecei ka̱ci ka̱ ni n uma a nan lo ko n likuci i nan lo. 15N dana ɗa̱ mayun, kanna ka afada Ka̱shile ki ta̱ kulaꞋa n kupana asuvayali a uma o Sodom† n Gomora† an wa pana asuvayali a uma a̱ likuci i nan lo!”

Yesu u danai le atakaci i ta̱ lo a̱ kuta̱wa̱

(Mar. 13:9-13; Luk. 21:12-17)

16Yesu u lyaꞋi kelime ɗa u danai, “Mi ta̱ a̱ kusuku ɗa̱ ana nkyon e mere ma̱ nkunzukunzu. Yongoi n ugboji an oko, ka̱ta̱ kpamu i yongo babu iforotoi an moɗoi. 17Yongoi n cicoꞋo, adama a na uma i ta̱ lo a na a̱ kuka̱na̱ ɗa̱, ka̱ta̱ a banka ɗa̱ a̱ ubuta̱ wa afada, ka̱ta̱ a faba ɗa̱ a̱ unu a avasa. 18Yi ta̱ kpamu a kushamgba e kelime ka anan gomuna nu ngono adama a na yi aza o kutoni a̱ va̱. Na va ɗaɗa u kokpo ayin a na i kudana le kadanshi ka̱ va̱ n uma a aduniyan dem. 19Amma vuza u ka̱na̱ ɗa̱ baci, ka̱ta̱ i muɗa̱ ka̱ɗu adama a ili i na i kudansa, ko tsu na i kudansa i ɗa ba. A ayin a nan lo, Ka̱shile ki ta̱ e kuneke ɗa̱ kadanshi ka na i kudansa. 20Adama a na kadanshi ka na i kudansa ka̱ ɗa̱ kaꞋa ba. Ki ta̱ a̱ kuta̱ a̱ ubuta̱ wa Ayinviki e Esheku a̱ ɗa̱, vuza na wi a kuyaꞋan kadanshi asuvu a̱ ɗa̱.

21“Uma i ta̱ e kuneke itoku i le adama a na a una. Isheku yi ta̱ feu a kuyaꞋanka muku n le nannai. Muku mi ta̱ feu a kuyaꞋan tsurala n isheku i le ka̱ta̱ a zuwa a una le. 22Yaba dem wi ta̱ a kuꞋiwan ɗa̱ adama a̱ va̱. Amma aza a na a̱ ka̱na̱i uneki u ka̱ɗu u le ali sai uteku, i ta̱ a̱ kuciya̱ wishi. 23Uma a takacika ɗa̱ baci a̱ likuci i nam pa, yaꞋin gogoꞋo i bana a̱ likuci i yoku. N yaꞋanka ɗa̱ ta̱ uzuwakpani u nam pa: kafu i kotso kuka̱ra̱ likuci yi Israila ra̱ka̱, Maku ma Vuma mi ta̱ o kubono.

24“KapiꞋishi ka tsu laꞋa malum ma̱ ni ba. Kagbashi kpamu ka tsu laꞋa vuzagbayin vi ni ba. 25KapiꞋishi ko yotso ta̱ ko okpo tsu malum ma̱ ni. Kagbashi kpamu ko okpo tsu vuzagbayin vi ni. Mpa ɗa vuzagbayin vu kpaꞋa. E ɗeke mu baci BaꞋalzabu,† mogono ma̱ wunla̱i u gbani-gbani, ashe aza a kpaꞋa a na a buwai ta na i ta̱ e kuɗeke le ula a na a laꞋi nannai n kuna̱mgba̱!”

Panai wovon ba

(Luk. 12:2-7)

26Ɗa Yesu u danai kpamu, “Ka̱ta̱ i pana wovon u uma ba, adama a na ili dem i na yi usokongi gogo na, uma i ta̱ e kuyeve i ɗa. 27N dana ɗa̱ ta̱ ili i nam pa a̱ ka̱yimbi, amma n ciga ta̱ i dana le e keteshe. Ili i na yi a kupanaka le a kudansa n yemeni a atsuvu a̱ ɗa̱, shamgbai a̱ mbiri n kukpa̱Ꞌa̱ ka̱ta̱ i sala i ɗa.

28“Ka̱ta̱ i pana wovon wa aza a na a cigai kuna ɗa̱ ba. Ikyamba i ɗa̱ i ɗa a kuna koci, amma i a kusaꞋwa wuma u ɗa̱ ba. Panai wovon u Ka̱shile endeꞋen, vuza na u kufuɗa kula̱nga̱sa̱ wuma n ikyamba ra̱ka̱ a kpaꞋa ka akina. 29Ojironjiron e re viyum vi te#10:29 La̱na̱ a kaci ku udani “Ikebe”, punu ɗe ka̱ta̱ vu la̱na̱ “Asariyon” a̱ Ubuta̱ wi ili i Kuyeve. ɗa e ci denge le, amma ko vuza te vi le u tsu kuwa̱ babu Esheku a̱ ɗa̱ e yeve ba. 30Ka̱shile ke yeve ta̱ ka̱bunda̱i ka̱ ka̱nji ka na ki a aci a̱ ɗa̱. 31Adama a nannai ka̱ta̱ i pana wovon ba. Mayun a̱ɗa̱ i laꞋa ta̱ ojironjiron n a̱bunda̱i.

Kudana aza o yoku kadanshi ka̱ Kishi

(Luk. 12:8-9)

32“I dana baci uma a̱ɗa̱ aza o kutoni a̱ va̱ a ɗa yi, mi ta̱ a kudana Esheku a̱ va̱ a na i gaɗi a na a̱ɗa̱ aza o kutoni a̱ va̱ a ɗa yi. 33Amma i iwan mu baci, mi ta̱ a kudana Esheku a̱ va̱ a na i gaɗi a na aza o kutoni a̱ va̱ a ɗa yi ba.”

N ta̱wa̱ m ma̱ta̱na̱ ba amma n vishili

(Luk. 12:51-53; 14:26-27)

34Yesu u lyaꞋi kelime n kudana, “Ka̱ta̱ ye ene adanshi ma̱ta̱na̱ maꞋa n tuka̱i a aduniyan ba. N ta̱wa̱ adama a na n tuka̱ m ma̱ta̱na̱ ba, amma n vishili. 35N ta̱wa̱ ta̱

‘kuzuwa mavali ma̱ shilika̱ n esheku,

mavuka ma̱ shilika̱ n a̱na̱ku,

kejene kpamu ka̱ shilika̱ n a̱na̱ku a̱ ni.

36Irala i nu ta punu i a kpaꞋa ku nu!’#Mik. 7:6.

37“Aza a na a laꞋi n kuciga isheku i le ko ina̱ku i le nu mpa, ma̱riki me le ma yawa o okpo aza o kutoni a̱ va̱ ba. Aza a na a laꞋi kuciga muku n le nu mpa a yawa o okpo aza o kutoni a̱ va̱ ba. 38Vi iwan baci kuɗika maɗanga ma atakaci ma̱ nu ka̱ta̱ vu tono mu, ma̱riki ma̱ nu ma yawa vo okpo a̱ ka̱tsuma̱ ka̱ mukumitoni n va̱ ba. 39Vu gbagbala baci adama a na vi isa wuma u nu, vi ta̱ a kunamba u ɗa. Amma vu namba baci u ɗa adama a̱ va̱, mayun vi ta̱ a̱ kuciya̱ u ɗa mkpaꞋa n nalyaꞋa.”

Ka̱shile ke nekei katsupu

(Mar. 9:41)

40Yesu u danai, “Vuza na baci de dem u rabasai nu, u rabasa mu ta̱. Vuza na baci kpamu u rabasai mu u rabasa ta̱ feu vuza na u suki mu. 41Keneki ka ci isa ta̱ katsupu adama a na wi ta̱ a kudana uma kadanshi ka̱ Ka̱shile. Vuza na baci dem u rabasai keneki ka, wi ta̱ a kisa katsupu ke te feu n a̱yi derere. Vuma vu ma̱riki vi ci isa ta̱ katsupu adama a na vuza vu ma̱riki ɗa wi. Vuza na baci dem u rabasai vuma vu ma̱riki va, wi ta̱ a kisa katsupu ke te feu derere. 42Vuza na baci de dem u nekei vuza vu Kutoni vu va̱ vu na u kpa̱ɗa̱i kugbama mini ma kiya, adama a na vuma vu nan lo wi vuza vu Kutoni, mayun vuza nan lo wi ta̱ a kisa katsupu.”

Attualmente Selezionati:

Matiyu 10: asgNT

Evidenziazioni

Copia