Matiu 8

O Iesu i ulangolango pas a lepra

(Mk 1:40-45; Lk 5:12-16)

1Ra o Iesu i wan pirso tagisapat una tangai, a susut na taro det muri. 2Ara musano, i misait nama lepra, i wan toromi, i kis butkeke nisano, ma i watungi lena, “Labino, ra u nemi, i topas ui sur un ulangolango pas iau.” 3O Iesu i kodos a lamano, ma i pam a pinino, ra i watungi tano lena, “A nemi ut, un langolango.” Uniutra a lepra i rop gusuni. 4#Wkp 14:1-32; Mt 9:30; Lk 17:14Ra o Iesu i watungi tano lena, “Gong u inanos tar taio nami. Un nan ma un ese mugu tar ui torom a tene etabor torom o God, ma un pitar a etabor torom o God elar nami ra o Moses i sa watung tari. Ra un pami lenra, a taro det in tasmani lena u sa langolango.”

A nurnur anun a mugumugu anun a kum tene inaim

(Lk 7:1-10)

5Ra o Iesu i sa wanpat tong o Kapernaum, ara mugumugu anun a kum tene inaim tagitong o Rom i wan toromi, ra i inanosi sur in waruti. 6I watungi lena, “Labino, ara tultul anung kurong ut una rumu i inep, a pinino rop i mat, ma i taramo a dekdek na ngunungut doko.” 7O Iesu i watungi tano lena, “An nan ma an ulangolango pasi.” 8A mugumugu ra i balu i lena, “Labino, ka tokodos sur un ruk una nung a rumu. Un watung tu wasiso kut, ra anung a tultul in langolango. 9Uni iau a musano ra a ser mur a warkurai anundet ra det labo tang, ma di pitar tar a warkurai kai tang sur a taro na inaim. Ra an watungi tan taio lena, ‘Un nan,’ in nan kut. Ma torom taio kai lenri, ‘Un nan urin,’ in nan kut urin. Ma torom anung a tultul lena, ‘Un pam a utna ri,’ in pami kut.”

10O Iesu i longoro anun a wasiso, ra i kisin doko uni, ma i watungi torom a taro ra det muri lena, “A inanos mot nama lingmulus, ka tama tar tu te Israel ra anun a nurnur i labo elar nama musano ri. 11#Lk 13:29A watungi tamot lena kura numur a susut na taro det in nan tagitiro na matmatano tobar ma a matmatano lubur, ra det in kis tomo nam o Abaram, o Aisak ma o Jekop una lukaro una matanitu sapat una langit. 12#Mt 22:13; 25:30; Lk 13:28Ikut, a taro Israel ra numugu o God i pilok pas det sur det in kis una nun a matanitu, in lu pirso ru a susut tagun det utiro una dumirum. Ra det in tangtangis ma det in ungingit lokondet iai.” 13Ra o Iesu i watungi tan a mugumugu anun a kum tene inaim lena, “Un nan kut. Din pam a utna ut ra u nurnur suri.” Una du bung ut ra anun a tultul i langolango mut.

O Iesu i ulangolango pas a susut na misait

(Mk 1:29-34; Lk 4:38-41)

14O Iesu i ruk una rumu anun o Pita, ra i tama a inumun o Pita, a ino, i misait nama pinino mararong, kura i inep taru una kabulu. 15O Iesu i pam a lamano, ra a mararong i rop mut gusuni. A ino ra i katutur, ra numur i tabor o Iesu nama utna na inangon.

16Ra in matanas i sa sup taru, di ben pat a susut na taro torom o Iesu ra a kum laulau na nion kura un det. I lakro ru a kum laulau na nion gusun det nama wasiso kut, ma i ulangolango pas det rop, ra det misait. 17A utna ri i wanpat sur din pam sot pas a kum wasiso, ra a poropet Aisaia i sa wasiso taru uni lenri,

“I ut i los pas anundat a kum misait,

ma i rakon ru anundat a kum ngunungut.” Ais 53:4

Det ra det nem na mur o Iesu

(Lk 9:57-62)

18Ra o Iesu i tama a kunur na taro ra det tur talilis pasi, i watungi tan anun a kum nat na ususer lena, “Dat nan utong una ara papor tasi.” 19Ma ara tene ususer tagun a Warkurai i wan toromi, ra i watungi tano lena, “Tene Ususer, an mur ui una kum nubual rop ra un nan iai.” 20#2 Kor 8:9Ra o Iesu i watungi tano lena, “A kum lomlom na pap anundet a kum tung ut, ma a kum piko kai anundet a kum pios ut, ikut a Nutun a Musano katu rumu na ininep.” 21#1 Kin 19:20Ma ara musano kai, tagun anun a taro na ususer i watungi tano lena, “Labino, un mulaot ru iau munung sur an nan, an por ru tar o tita.” 22Ikut o Iesu i watungi tano, “Un mur iau, ma un madek ru a kum minat det in por anundet a kum minat.”

O Iesu i turbat a wuwu ma a top

(Mk 4:35-41; Lk 8:22-25)

23Ra o Iesu i kas una pot, anun a kum nat na ususer det kas numurunu. 24#Sng 4:8Numur a dekdek na wuwu doko i wanpat kisin ma i ragoti una du tasi. A top i tapak sapat netes una pot. Ikut o Iesu i inep dumun, 25ra det wan toromi, det wangun pasi, ma det inanosi lena, “Labino, un ulaun dat. Dat na iru.” 26#Mt 14:31; Sng 89:9Ma i watungi torom det lena, “Anumot a nurnur i natino doko. Sur asau ra mot ngara?” I katutur ra i turbat a wuwu ma a top, ra i mililo rop. 27Ra a kum nat na ususer det kisin uni, ma det watungi lena, “Osi na ngas na musano mulus ri? A wuwu ma a top der mur anun a wasiso!”

O Iesu i lakro ru a kum laulau na nion gusun aru musano

(Mk 5:1-20; Lk 8:26-39)

28O Iesu i sot una ara papor tasi, una papor anun a taro Gadara. Aru musano ra a kum laulau na nion kura un der, der wan tagitong una kum kulam na minat, ra der wan barato i. Der ngalngalia doko, ma kataio i ser wan sakit tiro una kisapi ra. 29#Mk 1:24; Lk 4:41Der woiwoi lena, “Nutun o God, asau ra u nem na pami un mir? Pepetlai, u wan urin sur un ukadik met? Ke sot utmakai a bung na warkurai.” 30A kabo liur na boro det wangon milau kut tiro iai. 31Ra a kum laulau na nion det saring o Iesu lena, “Ra un lakro ru met, un tulu ruk tar met utiro una kum boro.” 32O Iesu i watungi tandet lena, “Mot wan!” Ra a kum laulau na nion det pirso gusun aru musano ra, ma det ruk taru una kum boro. A kum boro det kalabor pirso una palis sur a du tasi, ra det kongo rop.

33A taro ra det ser tabor a kabo liur na boro ra, det kalabor eno pas utiro utamon. Ra det wanpat, det inanos una kum utna rop ra i wanpat, ma un der kai, ra a kum laulau na nion numugu kura un der. 34A taro rop tagun a tamon ra, det wan sur det in tama o Iesu. Ra det tama pasi, det saringi sur in nan gisen gusun anundet a papor.

Attualmente Selezionati:

Matiu 8: kqw

Evidenziazioni

Copia