Maki 2
2
Yesu tovefela gisiveyawana.
Madiu 9:1-8; Luke 5:17-26
1Aiyeta gavaiyehi himiyami tu Yesu Kafeneumi againe giyewana ada valeyana ginauna vaita yana manuweya gidamiyami. 2Kaliva moya'aidi Bana againe hivaga'auta be manuwa vetawana hibabalina, keke tamo abaga, kadu eda'awana keke tamo abaluku. Hidede amine hiyo'oyo'o tu Yesu badi agaidiya gilulumamala. 3Kaliva tufoidi hi'ela kaliva walogina gi'a'uwana-ma hi'aliyena ana towahi kaliva adivefowa. 4Yo'o lakahina fa'ina keke adifaiweya tovefela Yesu liline hinaseni. Hidema fa'ina hilaka manuwa getane ada hami Yesu gimiyami amine hifolena. Manuwa getana hi'etovahivahini-yo tovefela wa'ivina hisehobuyena. 5#Lu 7:48Ada Yesu yadi vetumagana gi'ita-yo tovefela againe gigahe gigayo, “Natuku, ya koyona ahe gayawelidi.”
6-7 #
1Yn 1:9; Ais 43:25 Tu Mosese yana vehimeya ana tovehawala tufoidi medede againe hihiyoto-ma Yesu yana gahe hinogalini-yo nuwahinagediya hitoliluvaluva higayo, “Gavadi-yo hida kaliva gigahe vaita Bana tauna koyona adi to'aiyawela? Hima Yaubada gihawatagona. Yaubada anakaibe koyona ana to'aiyawela.”
8Hidede amine nuwahinagediya hitoliluvaluva tu Yesu yadi nuwanuwa ase'asene gimadu'ayaunena ada gigahedi gigayo, “Gavadi-yo medede amine ase'asemiya watoliluvaluva? 9Gavaimi tovefela againe ganagahe-yo ginalakayemu? Ka'i ganagayo, Ya koyona ahe gayawelina, o ka'i ganagayo, Umidi a ivi u'avalani be unaudadana. Hadema vehimeya vita-mo'ena? Me kaliva ana siveyawa vaita vita-mo'ena fa'ina ka'i ganavehimeya tu keke ginayamumu, au taumiyao amifaiweya wana'itahalamanena kaliva adi siveyawa keke akufaiweya. 10-11Atu hida kaliva ganasiveyawana be wana'itani-yo Iya fa'ikuya wanagahe wanagayo, Velemodi. Bana Tohobu'ela kaliva yadi koyona adi aiyawela au ana tagalowalowa.” Ada au tovefela againe gigahe gigayo, “Ganagahe. Umidi a ivi uwahi be una ya manuweya.”
12 #
Md 9:33
Au tovefela gimidi ana ivi gimadu'avalani-yo moya'aidi matadiya gina gihobu. Kaliva moya'aidi hi'ita-yo hiyaulowoga Yaubada ana egana hikilakahina higayo, “Boi keke tamo hidede amine gavadi kada'itani.”
Yesu Livai ana egana velugana Madiu
gikovana be ginamuliyena.
Madiu 9:9-13; Luke 5:27-32
13Tu Yesu kadu gihobu tobu ana egana Galili ana taliyeya gina. Kaliva moya'aidi Bana againe hiyo'oyo'o ada givebutu givehawaledi. 14Ginauna tu takesi ana toyaudi sa'eyana gi'itana ana egana Livai, Alifiyo natuna. Bana Livai takesi ana abayaudi againe gihiyoto. Ada gi'ita-yo gigahena gigayo, “Unamuliyeku.” Au bana Livai gimidi be gimuliyena.
15Muliya Livai yana manuweya giluku be gina'a. Ada tolameya gi'au'a tu takesi ana toyaudi moya'aidi kadu tokoyona velugadiyao Bana Yesu kadu ana tomuliya buye hi'enolukekela tu hi'au'a. Fa'ina badi kalivai-dina tufoidi moya'aidi himuliyena. 16#Md 11:19; Lu 15:1-2Tu Mosese yana vehimeya ana tovehawala, higa Falisi adi loi, Yesu tokoyona kadu takesi ana toyaudi buye hi'au'a ma hi'itadi againe, ana tomuliya higahedi higayo, “Gavai'ona-yo wama kaliva koyodiyao takesi ana toyaudi kadu tokoyona velugadiyao Bana badi buye hi'a'au'a?”
17 #
Lu 19:10; 1Ti 1:15 Yesu yadi gahe ginogalini-yo gigahedi gigayo, “Badi yadi aulolo keke ma keke doketa againe hinana tu to'aulolo ma nuwanuwadi doketa yana leme. Ada toyamumu keke doketa yana leme hinaleleni amine, meda anafaiweya Iya gahobu'ela be keke toyamumu vehimeya hi'ita'itave'avina-ma ganayowanidi. Au gahobu'ela be tokoyona ganayowanidi be yaku leme againe hinanuwavilana.”
Labewaviyo fa'ina Yesu hitoliluveluvena.
Madiu 9:14-15; Luke 5:33-35
18Tova sa'eyana Yoni ana tomuliya kadu tonagona tafatafalolodiyao adi egana Falisi hilabelabewaviyo. Kaliva tufoidi hi'ela Yesu hitoliyena higayo, “Gavana fa'ina Yoni ana tomuliya kadu Falisi adi tomuliya hilabelabewaviyo be hinave'o'ola fa'ina, tu a tomuliya keke tamo tova hidalabelabewaviyo?”
19 #
Yo 3:29
Yesu gigahedi gigayo, “Nagi ana avemwamwala againe tonagi ana yo'o keke hinamiya-kawowo, au a'a hina'au'a, fa'ina bana tonagi aimo badi buye himimiyami. Aimo tonagi buye himimiyami keke adifaiweya hinalabelabewaviyo. 20Tu aimo tonagi hinanauwena lauveya ana toveya, au medema tovai-nadi ana yo'o hinamiya-kawowo, a'a keke hina'ani. Meda anafaiweya Iya yaku kaliva buye amimiyami fa'ina keke hidalabelabewaviyo.” Au hidedemi Yesu gigahedi.
Yesu yana vehawala ivaguna keke kaliva yadi nuwanuwa tuwaina buye kanave'atutamo'aini.
Madiu 9:16-17; Luke 5:36-39
21 #
1Ko 10:21; 2Ko 6:16 Kadu Yesu gigayo, “Keke tamo hakwadi aikeva tuwaina kaleko ivaguna keke gufeya gida'utuvini-ma againe ginabwadini. Ka'i hidede amine gidabwadina digo aikeva ana bwadi gida'akaninina, fa'ina kaleko ivaguna gidalautaina ada au kaliva ana aikeva gidakoyo-mo'a. 22Kadu keke tamo hakwadi oine ivaguna manugose kwafilidi tuwaina againe ginahiwani. Ka'i hidede amine gidahiwana digo, oine ivaguna gidatubuga be kwafilidi tuwaina a gikwakwana-ma gida'afolena, ada au oine kadu manugose kwafilidi gidakoyo. Ka'i oine ivaguna digo, kadu kwafilidi ivaguna.” Au hidede amine Yesu gigahetalahobuhobu.
Sabati ana vehimeya fa'ina.
Madiu 12:1-8; Luke 6:1-5
23 #
2Veh 23:25
Sabati sa'eyana againe Yesu witi ana faheya ginunudadana. Ana tomuliya buye hinauna tu tomuliya hivebutu witi nafona hikikikolukolu. 24Ada Falisi higahena higayo, “U'ita, gavadi-yo a tomuliya sabati ana vehimeya keke hida'itave'avini?”
25-26 #
1Sam 21:1-6
Yesu gigayo, “Tokaiwabu Devida tuwai-mo'ena gimiyami-ma kahihina ma'i wahawahawana o ka'i keke? Tova sa'eyana abaveyao ana tofaisewa adi tokaiwabu ana egana Abaiyata yana toveya, Devida tobohiyaneyao buye adiga keke be mafu gilaudi tu Yaubada yana manuweya giluku, a'a Yaubada matane hisena-ma givaina tu hawahawatana nonogana gi'ana kadu yana kalivamomo giveledi be buye hi'ana. Mena a'ai-nadi kaliva-kawowo fa'idiya hawahawatana tu abaveyao ana tofaisewagaga adifaiweya hina'ana.” Hidedemi Yesu bonadi gifatana.
27 #
2Veh 5:14
Kadu gigahedi gigayo, “Kaliva adi veluga fa'ina Yaubada veyawai ana tova gisena. Keke kaliva gidabubudi veyawai ana tova ana hawata fa'ina. 28Au Iya Tohobu'ela aku egana tovehimeya, fa'ina Iya kadu sabati ana to'itave'avina. Yaku kaliva sabati ana hawata hina'itave'avina o ka'i keke hina'itave'avini, medema Iya yaku abavehimeya.” Hidede amine Yesu gigahedi.
Attualmente Selezionati:
Maki 2: viv
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
© 2003, Wycliffe Bible Translators, Inc. All rights reserved.
