Madiu 21

Yesu doniki kwaune Yelusalema againe giyemu.

Maki 11:1-11; Luke 19:28-40; Yoni 12:12-19

1Yesu ana tomuliya buye Yelusalema againe hinauna tu Bedefegi oya Olive againe hiyemu. Mededei hiyemu tu ana tomuliya adi'iselu gigahedi be wai hinanagona. 2Gigahedi gigayo, “Omi wai wananagona yuwa melala againe wanaluku, ada doniki wanatudi ai againe hiluhifodi-ma wanamadu'itadi. Au wanayaudi be Iya agaikuya wana'aliyedi. 3Ada ka'i tamo hakwadi ginagahe vaita gavadi wanagani, au wanagahedi wanagayo, Yama Kauveya nuwanuwana me'ama. Ada au ginahawahegedi be wana'aliyedi.”

4Hidede amine hihuluva be gavaimi tuwai-mo'ena Yaubada bonana ana to'awatalatalaina gigaheye-vagahina, medema ginalakayemu velemo'ena. Gigayo,

5 # Sak 9:9 MiSaiyoni unagahedi unagayo,

Wa'ita, yami tokaiwabu omi agaimiya gi'ela'ela,

Bana'e kaliva umaumana doniki kwaune ginanauna.

E, yana wanuwahobu doniki natudi againe giyage be ginanauna.

Hidedemi to'awatalatalaina miYelusalema adi egana velugana miSaiyoni fa'idiya gigahe.

6Tu tomuliya adi'iselu hina ada Yesu givehimeyedi amine hidewa. 7Doniki wanatudi hi'aliyedi, adi aikeva kwaudiya hiyavelina be Yesu giyage. 8Kadu yo'o lakahi-mo'edi hi'ela, tufoidi adi aikeva edeya hiyaveyavelina kadu tufoidi ai laganina hikuyana be edeya hiyaveyavelina. 9#Sam 118:26Ada yo'o tufoidi wai hinagona tufoidi wai himulina, ada Yesu buye hinauna tu hikovakova higayo,

“Hosana, Devida bwanenena O adavadava.

Kaiwabu ana eganeya u'ela'ela-ma au Yaubada ginanuwakabubuye.

Kadu tomiyalobama O hinadavadava,

yadi vesiule hinayakahina.”

10Hinauna tu hidedemi hikovakova, ada Yesu Yelusalema againe giluku-yo melala kalivai-dina moya'aidi hiyo'oyo'o hilahalahaga higayo, “Bana hima hakwa'adi?”

11Badi yo'o Yesu hibwa'ulina-ma higayo, “Bana hidevama Yaubada bonana ana to'awatalatalaina ana egana Yesu, kwanaNasaledi Galili ana fafaliya gitauya.”

Yesu manuwa-tafalolo lakahina againe giluku.

Maki 11:15-19; Luke 19:45-48; Yoni 2:13-17

12Tu Yesu manuwa-tafalolo lakahina ana eda'awaneya giluku be badi mene manuwa-tafalolo againe hilukimokimone-ma giwavidi, mani tulina tulina ana tosenisi yadi tolama givetala'afufuna kadu kaliva bunebune abaveyao fa'ina hikimonevedamanedi-ma yadi abavetoga gituwabwatavilana. 13#Ais 56:7Gigahedi gigayo, “Yaubada bonana eto'etoladina gigahe gigayo,

Yaku manuwa hinavewagana abave'ove'o'ola ana manuwa.

Tu omi'iyao ma vaita tokai'afu yadi abaga amine wafaisewana.” Hidedemi Yesu gidakeyedi.

14Bana manuwa-tafalolo againe gimiyami tu tomatakoyo kadu tovefela Bana againe hi'ela be gisiveyawadi. 15Atu abaveyao ana tofaisewa kikaiwabudiyao kadu Mosese yana vehimeya ana tovehawala abaveyaulowoga Yesu gifaisewadi-ma hi'ita-yo hinuwakoyo. Kadu we'owe'o hi'itadi, manuwa-tafalolo ana eda'awaneya hiluku hikovakova higayo, “Hosana, Devida bwanenena kanadavadavana.” Ada hinogali-yo meda hinuwakoyo.

16 # Sam 8:2 Yesu hitoliyena higayo, “We'owe'o yadi gahe unogalina o ka'i keke?” Yesu gigayo, “E, Iya ganogalina tu Yaubada yana gahe sa'eyana ma'i wahawahawana o ka'i keke? Gigayo,

We'owe'o kadu fwefweya u'alaveleveledi be hinahawadavadava-mo'e.”

17Au Yesu ginuyabuyabudi be gina Yelusalema gihegena tu melala ana egana Bedani againe gina ginauda.

Yesu ai ana egana fiki gi'alatabutabuyena.

Maki 11:12-14,20-24

18Bogi gida tu mala gilauna Yesu gi'enohobu Yelusalema againe ginauna tu mafu gilauna. 19Ai ana egana fiki edeya gi'ita-yo gina guwana gilele tu lukuminaga gidauda. Au ai againe gigahe gigayo, “Aimo tova mulina kadu keke unayoyo, keke-mo'a.” Auhe'ama ai gimadu'awa'ulona.

20Ana tomuliya hi'ita-yo hiyaulowoga higayo, “Gavaiya'amine fiki gimadu'awa'uloni?”

21 # Lu 17:6 Yesu gigayo, “Gagahe velemo'ena ka'i wanavetumaganeku be keke ase'asemi gina'amalakibo, au fiki againe gafaisewana-ma amine aimo kadu omi amifaiweya wanafaisewana. Kadu keke mededemagaga. Au hida oya againe amifaiweya wanagahe wanagayo, Una lehageya utowa, ada au ginana ginatowa. 22#Md 7:7; Yo 14:13-14Ka'i yami wavetumagana Yaubada againe wanave'o'ola, au gavaimi wave'o'ola medema wananuhagana.” Hidedemi Yesu gigahedi.

Yesu yana abavehimeya inubana fa'ina hitoliluveluvena.

Maki 11:27-33; Luke 20:1-8

23 # Yo 2:18 Tu Yesu manuwa-tafalolo lakahina againe giyewana giluku givehavehawala tu abaveyao ana tofaisewa kikaiwabudiyao kadu miYuda yadi kaliva lakahidiyao Bana againe hi'ela hitoliluvaluva higayo, “O ugahema, ha'againe ya abavehimeya uvaini-yo mena gaitoma tulina tulina ufifaisewadi? Hakwa'adi mena abavehimeya givele?”

24Yesu gigayo, “Kadu yaku toliluvaluva sa'eyana omi agaimiya ganasena. Ka'i bonaku wanafatana amine o Iya kadu yaku abavehimeya inubana fa'ina ganavenuwa'atami. 25Yoni Tobafitaiso yana faisewa ma hakwadi abavehimeya Yoni givele-yo kaliva gikivebafitaisoyedi? Ka'i yana abavehimeya Yaubada againe give'inuba o ka'i kaliva agaidiya?”

Yesu gigahe-yo badi hivebutu buye hivekwageya higayo, “Ka'i kanagahe vaita Yoni yana abavehimeya Yaubada againe gidave'inuba au Bana ginagaheda ginagayo, Ka'i Yaubada againe digo, gavadi-yo Yoni yana gahe keke wadavetumaganeni? 26#Md 21:46Tu ka'i kanagahe vaita kaliva agaidiya gidave'inuba, au yo'o kamatausedi higa vaita gavaimi hinakivekoyoda, fa'ina moya'aidi hinuwanuwa vaita Yoni Yaubada bonana ana to'awatalatalaina.”

27Hidedemi tonagona hinuwanuwa fa'ina Yesu yana toliluvaluva hidemi hifatana higayo, “Ka'iwa. Ime keke adahalamaneni.” Bana gigayo, “Omi keke wadagaheku fa'ina, meda anafaiweya Iya keke ganavenuwa'atami hade'againe yaku abavehimeya give'inuba-yo hida gaitoma gafifaisewadi.

Kaliva natuneyao luhei adi gahetalahobuhobu.

28Ganagahe tu wanavanenega. Kaliva sa'eyana gimiyami natuneyao kaliva luhei. Gina tomo'ainagona gigahena gigayo, Natuku, adamoya unana yaku faha againe unafaisewa. 29Bana gidibutoyoga be gimiyami tu muliya nuwana gi'avilana be gina gifaisewa.

30Au kaliva gina kwamaneya meda anafaiweya gigahena vaita ginana faheya. Bana gigayo, Yamumuna, ganana. Tu keke gidana.

31Hadema kaliva tamana yana nuwanuwa gi'itave'avini?” Badi higayo, “Bana gimidigahena-ma.”

Yesu gigahedi gigayo, “Gagahe velemo'ena, badi koyodiyao higa takesi ana toyaudi kadu vevine yamayamadadadiyao omi tonagona tafatafalolomiyao hitubuhegemi be Yaubada yana yo'ogaga agaidiya himidiluku. 32#Lu 7:29-30Wa'ita, Yoni Tobafitaiso omi agaimiya gilakayemu be eda yegayegana ginavehawalemi, tu yana laumamala keke wadavetumaganeni. Atu badi koyodiyao higa takesi ana toyaudi kadu vevine yamayamadadadiyao hivetumaganena. Badi hivetumaganena be omi wa'itadi, tu au ai'adi keke-mo'a wadanuwavilani-yo wadavetumaganeni.” Hidedemi Yesu kaliva lakahidiyao gigahedi.

Faha ana to'itave'avina koyodiyao adi gahetalahobuhobu.

Maki 12:1-12; Luke 20:9-19

33Kadu Yesu gigayo, “Gahetalahobuhobu kadu sa'eyana wananogalina. Kaliva lakahina ai guwana ana egana kelefi yana babi againe gifahana. Faha gi'alana, kahu giyalana be aimo guwana ana abavagafuwafuwa fa'ina, kadu kweda tunugina faha ana itave'avina fa'ina giyogona. Kelefi ana faha gikidewedewena gihavaina, kaliva tufoidi faha ana to'itave'avina gisedi tu yana melala gihegena gina mali fafaliya ginunudadana. 34Himiyami tu kelefi ana aikolu ana tova giyemu againe, tonifaha ana agetoga faha ana to'itave'avina agaidiya gi'iveninisedi be ana guwa hinavaina.

35Badi to'itave'avina agetoga hikive'avidi, sa'eyana himunukoyokoyona, sa'eyana hiluve'alikana kadu sa'eyana hitutuve'alikana. 36Au kadu agetoga velugadiyao tufona moya'aidi gi'iveninisedi tu to'itave'avina meda anafaiweya hikivekoyodi. 37Muliya-mo'ane natuna badi agaidiya gi'iveninisena. Gigahe gigayo, Natuku be hinave'amohimohinena.

38Tu to'itave'avina tonifaha natuna hi'ita-yo taudiyao hive'agahegahe higayo, Hida hima bana ana hilafa. Wa'ela be kanaluve'alikana ada yana babi kanavaina. 39#Hi 13:12Au hikive'avina ala kwaune hituwa'atugena be hiluve'alikana. 40Wananuwanuwa. Tonifaha ginayewa'ela ana toveya, badi to'itave'avina gavaimi ginahuluvidi?”

41Hidedemi Yesu gitoliluvaluva tu badi kaliva lakahidiyao hifatana higayo, “Makewa wadema kaliva koyo-mo'edi ginamunukoyokoyodi tu hina'alika. Ada to'itave'avina velugadiyao ginavegidedi be yana faha hina'itave'avina, ada tova tova guwana ginaboyalina amine ana guwa hinavelevelena.”

42 # Sam 118:22-23; 1Fi 2:6-8 Yesu gigahedi gigayo, “Gahe sa'eyana Veyao Tuwaina ana buki againe ma'i wahawahawana o ka'i keke? Gigayo,

Ogola manuwa ana to'aiyogona hikilowena-ma

au holili'abi manuwa hinafane-mo'ane gimidimidi.

Kaiwabu yana vehimeya againe au hidemi gilakayemu,

ada medema gilubode-mo'ena ide matadeya.”

43Hidedemi Yesu Yaubada yana gahe Natuna ana kilowa fa'ina giyakahina tu yana gahe giluyabuna gigayo, “Gagahemi Yaubada omi miYuda ginahawatami be yana faha ginalemami. Au yo'o tulidi ginavegidedi be Yaubada yana faha hina'itave'avina, higa badi guwadi yamumuna yadi dewa againe hinaseyemaunena-ma kalivai-dina. [ 44Gava kaliva mena ogolai-nadi againe ginabe'u, medema luluna gina'adobona, atu gava kaliva ogola gina'alatagona, medema luluna gina'amuhumuhuna.]” Hidedemi Yesu gigahe.

45Tu badi abaveyao ana tofaisewa kikaiwabudiyao kadu Falisi Yesu yana gahetalahobuhobu hinogalina againe, badi fa'idiya gilulukahihi ma hi'ayaunena. 46Au eda hilelena be higa hinakive'avina, tu moya'aidi hinuwanuwa vaita Yesu Yaubada bonana ana to'awatalatalaina fa'ina yo'o himatausedi, au higa-wayoga keke adifaiweya.

Attualmente Selezionati:

Madiu 21: viv

Evidenzia

Copia