Yoni 1

Yoni Yesu givewagana Bona higa Yaubada ana ita'ita kadu

yana nuwanuwa gi'iveyemaunina.

1 # 1Yn 1:1-2; Ha 19:13 Boi tuwai-lokalokana babi ana abave'inuba aimo keke ana toveya kaliva ana egana Bona gimiyamiya-vagata, ada Bana Bona Yaubada buye himimiyami, ada Bana Bona Yaubada Tauna. 2Ada au babi ana abave'inuba againe Bana Bona Yaubada buye himimiyami. 3#Kl 1:16-17; Hi 1:2Ada Bana Yaubada yana nuwanuwa Bana Bona givelena be Bana Bona gaitoma moya'aidi gibubudi, ada Bana anakaibe babi ana gaitoma sa'eyana sa'eyana gibubudi, au keke tamo hakwadi velugana gida'aibubuna. 4#Yo 5:26Bana'e againe gaitoma moya'aidi wayawaidiyao yawaidi hinuhagana, ada Bana'e kaliva yawaida giveleda-ma kadu nuwada gikivemahalina. 5#Yo 8:12Ada Bana'e kaliva nuwada gikivemahalina-ma ana egana Tomahala, fa'ina ide uyuyu againe kamimiyami-ma gitutuvemahalida, tu badi to'uyuyu ma Tomahala yana mahalina keke adifaiweya hidaluvekwe'uni.

6Tu kaliva sa'eyana gilakayemu ana egana Yoni. Bana Yaubada gi'iveninisena be gi'ela. 7Bana kalivai-nadi gi'ela be kaliva agaidiya mahalina fa'ina ginahawavemogatala, ada yana gahe hinanogalini-yo moya'aidi Tomahala hinavetumaganena. 8Tu bana Yoni tauna keke Tomahalai-nadi. Bana gi'ela be higa Tomahala fa'ine ginahawavemogatala.

9Tu Bana Bona mahala velemo'ena ada babiya gihobu'ela be kaliva moya'aida nuwada gi'i'ivemahalina. 10#Yo 17:25Ada au Bana Bona babiya gihobu'ela be gimiyami. Yaubada yana nuwanuwa againe Bana Bona Tauna babi ana To'aibubuna nonogana tomiyababi hifaniyena. 11Tauna yana babi againe gihobu'ela tu yana yo'o hikilowena. 12#Ga 3:26; Kl 2:6Tu tufoidi keke hidakiloweni, au ase'asediya hivega'aulena be hivetumaganena, fa'ina badi tovetumagana gihawahegedi be Yaubada yana yo'ogaga agaidiya hitubuyemu. 13#Yo 3:3-6; 1Fi 1:23Badi tovetumagana Yaubada natuneyao hitubuvagu, ada yadi tubuvagu inubana keke kaliva dayagine, keke kaliva be kwamayoku yadi enoluga againe, kadu keke kaliva yana nuwanuwa againe. Au Yaubada Tauna yana vehimeya againe badi tovetumagana au Yaubada natuneyao hitubuvagu.

Yaubada Natuna anakaibe'u-mo'a fa'ina.

14 # Fl 2:7; Hi 2:14; Lu 9:32,35 Ada Bana Bona gihobu'ela be givekaliva ada gi'ela adahinageya a buye kamiyami. Kadu ime yana kikaiwabu a'itana, hida kikaiwabu-nadi Yaubada Tamada Natuna anakaibe'u-mo'a givelena-ma. Bana Bona nuwadoga kadu nuwanuwa velemo'ena againe gidodobodabodana.

15Kadu Yoni Bana fa'ine gilukahihi, gikovalumamala gigayo, “Hida kalivai-nadi fa'ine boi galukahihi gagayo, Iya wai ganagona tu Bana mulikuya gina'ela-ma gikaiwabuhegeku, fa'ina iya aimo keke gadatubuga tu Bana tuwaina gimiyamiya-vagata.” Hidemi Yoni gigahe. 16#Ef 3:19Ada Bana'e nuwadoga againe gidodobodabodana ada moya'aida agaideya yana nuwadoga gifolafolakena tova moya'aina, keke tamo gida'ilova. 17Boi tuwaina Mosese Yaubada yana vehimeya ime miYuda bwanenemeyao givehawaledi, tu tova adamoya Yesu Keliso Tamana Yaubada yana huluva amine gihuluva fa'ina, Yaubada yana nuwadoga kadu yana gahe velemona kahalamanena. 18#Yo 6:46; Md 11:27Keke tamo hakwadi Yaubada gida'itani, keke. Tu Bana'e Natuna anakaibe'u-mo'a Tamana tova moya'aina giveve'alunena, Yaubada yana huluva ide agaideya givehawala.

Kaliva Yoni Tobafitaiso inubana fa'ina hitoliluvaluva.

Madiu 3:1-12; Maki 1:1-8; Luke 3:1-18

19Tu tova sa'eyana miYuda yama tovehimeya Yelusalema againe abaveyao ana tofaisewa tufoidi kadu manuwa-tafalolo ana toveluga buye'i hi'iveninisedi be Yoni againe hi'ela, higa hinatoliluveluvena. Au higayo, “O hakwa'adi? Ka'i o'eni kalivai-nina Yaubada givegide be yada yo'o unanagoyeda?”

20Ada Yoni keke gidave'amata, au moya'aidi matadiya gihawavemogatala gigayo, “Iya keke Keliso Yaubada yana Tovegida.”

21 # 2Veh 18:15; Af 3:22 Badi higayo, “Au ugahe o hakwa'adi? Ka'i o'eni Elaiya Yaubada bonana ana to'awatalatalaina tuwaina gimiyami-ma?” Bana gigayo, “Keke. Iya keke Elaiya.”

Kadu hitoliluvaluva-havagi higayo, “Ka'i o'eni to'awatalatalaina boi Mosese gilukahihiyena, higa tova mulina gina'ela-ma?” Kadu bana Yoni givekeke.

22Bana givekeke-yo badi kadu higayo, “O udavenuwa'ata be adanogalina. Badi hi'iveninisema-ma aimo o fa'iniya gavaimi anagahedi? Gavadi o inuba?”

23 # Ais 40:3 Au Yoni gigahedi gigayo, “Tuwaina Aiseya Yaubada bonana ana to'awatalatalaina iya fa'ikuya gilukahihi amine, adamoya iya gahuluhuluva. Bana Aiseya gigayo,

Iya tokova, wala'aiya gakovakovadadana gagayo,

Kaiwabu yana eda ase'asemiya wanakidewedewena.”

Hidedemi Yoni Aiseya bonana giyakahina.

24Tu badi totoliluvaluva medema tonagona tafatafalolodiyao adi egana Falisi adi yo'o kalivai-dina. Badi Falisi hi'iveninisedi be hi'ela. 25Ada au Yoni againe hitoliluvaluva-havagi higayo, “O'eni keke Keliso, o'eni keke Elaiya kadu o keke tokivetuvetunu Mosese gilukahihiyena-ma, tu o hakwadi vehimeya givele-yo kaliva ukikivebafitaisoyedi?”

26 # Yo 1:33 Yoni gigayo, “Iya gufagaga againe gakivebafitaisoyedi, tu kaliva sa'eyana omi hinafamiya gilakayemu-ma wafaniyena. 27Bana mulikuya gina'ela tu gikaiwabuhegeku. Bana kikaiwabu-mo'ena tu iya kwamana kabisoku fa'ina, keke akufaiweya Bana againe ganave'agetoga-yo ana ageyafayafa adi aba'aiyauga ganayauni.” Hidemi Yoni gigahe.

28Ada hida lukahihi melala ana egana Bedani againe gilakayemu, melalai-nadi Yolidani yuwa fafaline. Medede againe Yoni kaliva gikikivebafitaisoyedi.

Yesu Yaubada yana Sifi Kabi'ona fa'ina.

29 # Ais 53:6-7; 1Fi 1:18-19 Tu aiyeta anavelu againe Yoni gida'ita ma Yesu bana againe gi'ela'ela ada Yoni gigahe gigayo, “Wa'ita. Wada kaliva gi'ela'ela-ma Yaubada givegidena, ana egana Yaubada yana Sifi Kabi'ona. Tomiyababi yada koyona ginawahina be ginanauwena, sifi abaveyao againe gina'alika amine. 30Wada kalivai-nadi fa'ine boi galukahihiyena gagayo, Iya wai ganagona tu Bana mulikuya gina'ela-ma kikaiwabu againe gitubuhegeku, fa'ina iya aimo keke gadatubuga tu Bana tuwaina gimiyamiya-vagata. Hidemi gagahe, ada wadema kaliva-mo'ena. 31Ada nagona iya gafaniyena gavaita hakwa'adi, tu omi miIsileli agaimiya Bana inubana ganakivemogatalina fa'ina, Yaubada gi'iveniniseku be ga'ela gufa againe gakikivebafitaisoyemi.”

32-33 # Md 3:16 Kadu Yoni gihawavemogatala gigayo, “Nagona gafaniyena, Bana Yaubada yana Tovegida ma keke gadahalamaneni, tu Yaubada Alu'aluwana lobameya gihobu be Bana againe gimiya-vagata, ana ita vaita bunebune amine ada iya ga'itana. Ga'ita-yo nuwaku gi'afolena. Bana gi'iveniniseku be kaliva gufeya ganakivebafitaisoyedi-ma bonana nuwaku gi'afolena gigayo, Alu'aluwa ginahobu be kaliva sa'eyana againe ginamiya-vagata amanadi una'itana, au unahalamanena Bana kalivai-nadi Alu'aluwa Mahalina againe kaliva ginavemagadi. Hidemi Yaubada gigaheku. 34Ada au iya ga'itana, ada moya'aimi matamiya gahawavemogatala hida kalivai-nadi Yaubada Natuna.” Hidedemi Yoni gigahe.

Kaliva Yesu againe himidivetomuliya-ma kahihidi.

35Tu kadu aiyeta anaveto againe Yoni gimidimidi ana tomuliya adi'iselu buye'i. 36#Yo 1:29Himidimidi tu Yesu gi'ela be ginauna. Yesu ginauna tu Yoni gi'ita-yo gigayo, “Mene wa'ita, Bana Yaubada yana Sifi Kabi'ona.”

37Ada tomuliya adi'iselu Yoni bonana hinogalini-yo, hilowoga Yesu muline hina. 38Hinauna tu Yesu gihagavilana gida'ita ma himuliyena, au gitoliluveluvedi gigayo, “Gavadi-yo wa'ela?” Ada tomuliya sa'eyana gigayo, “Labai, gava manuwa againe umiyami?” (Hifufu labai ana kaivila ide bonadeya “tovehawala lakahina”.)

39Au Yesu gigayo, “Wa'ela be kana ganavehawalemi.” Ada au hina be manuwa againe gimiyami-ma hi'itana. Ada kauwana giwahivekenana fa'ina, badi Bana againe buye himiyami tu mala a gibogi.

40Ada kaliva adi'iselu Yoni yana gahe Bana Yesu fa'ine hinogalina-ma sa'eyana Anidulu, bana Saimoni-Fita taina. 41Ada auhe'ama Anidulu gimadulowoga be gina tawagana Saimoni gilelena. Ginuhagani-yo gigahena gigayo, “Bana Mesaiya higa Yaubada yana Tovegida yada yo'o ginanagoyeda-ma ahe anuhagana.” (Tu bona Gilika againe Tovegida hivewagana Keliso.) 42#Md 16:18Ada au Anidulu tawagana givega'aulena Yesu againe. Ada Yesu gi'itadonedonena gigahena gigayo, “O'eni Saimoni Yoni natuna tu Iya ganaluwatuye Sifasi.” (MiYuda bonadiya bana ana egana Sifasi, bona Gilika ana egana Fita, ada egana ana kaivila kabala.)

Yesu Filifi kadu Nataniyela gigahedi be hinamuliyena.

43Tu aiyeta anavefowa againe Yesu ginuwanuwa vaita ginana Galili ana fafali againe, ada Filifi ginuhagana gigahena be higa ginamuliyena. 44Ma bana Filifi kwanamiBedasaida, medema kadu Anidulu be Fita yadi melala. 45#2Veh 18:18; Ais 7:14Au Filifi gina Nataniyela gilelena. Ginuhagani-yo gigahena gigayo, “Kaliva anuhagana, bana fa'ine boi Mosese yana buki-vehimeya againe gi'etoladina, kadu Yaubada bonana ana to'awatalatalaina hi'etoladina-ma Bana kalivai-nadi anuhagana. Ana egana Yesu, Yosefa natuna, kwanamiNasaledi.”

46 # Yo 7:41,52 Bana Nataniyela gigayo, “Nasaledi melala kabi'ona. Keke tamo tokaiwabu wada melalai-nadi againe ginalakayemu, keke.” Tu Filifi gigahena gigayo, “U'ela be kana, tauni una'itani.”

47Ada Yesu gida'ita ma Nataniyela gi'ela'ela, ada bana fa'ine gigahe gigayo, “Wa'ita, bana kwanamiIsileli velemo'ena. Yana dewa velemo'ena fa'ina keke tamo ve'alololo bana againe gidadauda.”

48Nataniyela gigahena gigayo, “Ha'againe u'itaku-yo uhalamaneku?” Yesu gigayo, “Bana Filifi aimo keke gida'ela gidavega'aule tu iya ga'ita be gahalamane, fiki aiwa'une umiyami ana toveya.”

49 # Md 14:33, 16:16; Yo 12:13 Au bana Nataniyela gigayo, “Tovehawala lakahi, Wona velemona o'eni Yaubada Natuna. O'eni miIsileli yada Tokaiwabu.”

50Yesu gigayo, “O againiya Iya gagahe fiki aiwa'une ga'ita. Hida yaku gahe fa'ina uvetumaganeku. Yaku gahe o fa'iniya medema gaitoma kabi'ona, tu aimo gaitoma lakahina una'itana.” 51#Aba 28:12Kadu gigayo, “Yaubada gihalamaneku tu gagahegahe. Lobama gina'ayauna be Yaubada yana tovenuwa'ata Iya Tohobu'ela agaikuya hinatauya be hinalakalaka hinahobuhobu ma o una'itadi.” Hidemi Yesu gigahe.

Attualmente Selezionati:

Yoni 1: viv

Evidenziazioni

Copia