I Versetti Biblici più popolari da Lucas 12

Condividi

Ča iwo tawie. Tado tarugadu, taerodo tagaiwo tabo tabiji. Mare iwogureu bagai karega. Tado tarugadu Imedu Onaregedu togi. Tarduwakare kaba meri kejeba aregodumode dukodire inagoino tai, tawo tado tarugadu jii toro rugadu.

Dukodire tameardae tawuje tawo tagimijera kurireudo tu Pao Kurireuče. Tamode tagimijerado ema dukeje umode tage jamedu boe maku tagai rugadu.

Dukodire Jesus makore boe eiamedu boei. Akore: – Taeku jado. Boe emeardaere tu pudui tuwo toe kurido tumedage ekori rugadu. Taragado tai tarokawo nono nou boe ero mogadure. Tagoe kurimode mare tagoe umodukare tamugu pemegado. Boe enoe koia karega umode boe emugu pemegado moto keje tiegarere pudui dutabo.

Boe etaidure tu tuwo toe kurido woe moto keje dukodire ewiagoromode tu nou toeji woe rugadu. Nou boe ewiapagamodukare Pao Kurireu bataruji. Mare boe emode toe jetudo baru tada dukeje boe ewiagoromodukare ia moto kejewu toeji pugeje, boe ewiapagamode tu Pao Kurireu bataruji rugadu.

Pao Kurireu jorduware tawimode kejewu meriji. Tagi rema tarduwakare. Tamororamagadumode mare tamodukare tawimode kejewu meri raido toro tagododai tamugu raiwo moto keje. Dukodire inagoino, tamororamagadukaiago iaboe rogu bagai pugeje. Tameartorudo tu Pao Kurireuji.

Jesus mako kimore ture jorduwadowugei. Akore: – Tamororamagadukaba tage bagai, tagudau areia bagai.

Mare tabagudu remawu ji karega inagoino. Taeku kidugo Pao Kurireuji tameartoruwo tu ji rugadu. Dujire inagoino. Tameartorumode tu Pao Kurireuji dukeje tamororamagadumodukare boe pega boeji pugeje. Dujire inagoino. Pao Kurireu jetu pemegamode tai rugadu. Dukodire tameartorudo tu ji rugadu. Dukodire inagoino tai. Ča kiebarege kugure emode ikera aboudure dukeje boe emode diero tori rogu udo pobe emoriče tuwo akirodo ei tugeče tuwo ekowuje. Nou kiebarege emori bokware. Mare du inodu tabo Pao Kurireu biagodumodukare nou kiebarege ekugure piji rugadu jii toro. Jorduware kiebarege eiamedu boei. Aidure kiebarege kugurei. Mare Pao Kurireu aidure tai du kodure nou kiebarege kugure eiamedu boe ekori. Dukodire jetu pemegamode tai rugadu. Jorduware tai rugadu. Jorduware tagao iku jamedu boeji. Jorduware nou inodu rogu boeji kodire jorduware nuba boe mode tai duji rugadu. Jetu pemegamode tai rugadu. Dukodire inagoino tai tabagudukawo boeče pugeje.

Jesus mako kimore: – Tabagudukaba. Pao Kurireu aidure tuwo tagimijerado pudumi tuwo boe pemegareu maku tagai baru tada.

Tagaiwodo awu kiebaregei. Ekare boe tugu. Ekare tugeragu boeji. Eke ja bokware. Eke muga bokware. Mare du inodu tabo Pao Kurireu koiare ure enogwagedo. Boe nure tagi. Pao Kurireu meardu kurire boei nou kiebarege ekori. Dukodire inagoino, jetu pemegamoduie tai.

Tamororamagadukaba nou tagwagemode jiboe bagai. Tamororamagadukaba nou tagudumode čeboe bagai.

Tagaiwodo awu okureboeji. Emodure mare emage eigoia karega ere tumodudo. Pao Kurireu koiare ure awu okureboe emodudo aino. Mariguduwu Israel doge eimijera kurireu Salomão oe kuričigore dukodire meture jiwu ukudau areia moture rugadu. Mare motukare nono awu okureboe emodu mogadure. Ča okureboe emodure mare joru umode ekowu kuri je. Mare boe nure tagi. Pao Kurireu meardu kurire boei nou okureboe ekori. Dukodire umode tugera maku tagai rugadu. Dukodire inagoino tai tamororamagadukaba tagudau areia bagai, tameartoruwo tu Pao Kurireuji rugadu. Tameartorumode ji dukeje tamode nono awu okureboe umogadure jamedu. Pao Kurireu jetu pemegamode tai rugadu. Kočare tameartoru kurikare ji?

Boe ero pegamode dukeje etaidumode tuwo nou turo pegareu biado boe epiji tagowo ro pemegareuge nuie pudumi. Mare Pao Kurireu jorduware ero pegareuji marigudu dukodire boe erduwamode nou ero pegareuji jamedu. Dukodire itaidure iwo tawie. Tarokaba nono fariseu doge ero mogadure. Tamago pegamode iaboeji boečoji dukeje Pao Kurireu meardumode rugadu. Toro ia meri keje boe eiamedu boe emeardumode nou tamagore jiboeji jamedu. Tamago podumode pui pu bijato ia tameardae pegareuji tawai tada mare Pao Kurireu meardumode nou tamagore jiboeji rugadu. Dukodire uwadodumode nou tamagore jiboe tabo boe eiamedu boe ewiagai. Dukodire inure tawie. Taro pegakaba, tamago pegakaba nono nou fariseu doge ero mogadure.